រដ្ឋាភិបាលជប៉ុននិយាយនៅថ្ងៃនេះថា ប្រទេសនេះចាប់បានរលកសញ្ញា ដែលបញ្ជាក់ថា កូរ៉េខាងជើងអាចកំពុងរៀបចំបាញ់គ្រាប់មីស៊ីលជាថ្មីទៀត ប៉ុន្តែ រលកសញ្ញានោះមានលក្ខណៈខុសប្រក្រតី ហើយរូបភាពពីផ្កាយរណប មិនបានបង្ហាញសកម្មភាពថ្មីនោះឡើយ។
ទីភ្នាក់ងារព័ត៌មាន Reuters បានដកស្រង់សម្ដីប្រភពពីរដ្ឋាភិបាលជប៉ុន ដែលបាននិយាយថា រលកសញ្ញានេះ មានលក្ខណៈមិនទាន់គ្រប់ជ្រុងជ្រោយសម្រាប់សន្និដ្ឋានបែបនោះទេ។
ក្រោយពីបាញ់គ្រាប់មីស៊ីលជាបន្តបន្ទាប់ចាប់តាំងពីខែមេសាមក កូរ៉េខាងជើងបានផ្អាកបាញ់គ្រាប់មីស៊ីលរបស់ខ្លួនចាប់តាំងពីខែកញ្ញាមក ក្រោយពីក្រុងព្យុងយ៉ាងបានបាញ់គ្រាប់រ៉ុកកែតរំលងលើកោះហុកកៃដូនៅភាគខាងជើងជប៉ុន។
ទីភ្នាក់ងារព័ត៌មានជប៉ុនឃ្យូដូ បានរាយការណ៍កាលពីល្ងាចថ្ងៃម្សិលមិញថា រដ្ឋាភិបាលជប៉ុនបានប្រុងប្រៀបខ្លួន បន្ទាប់ពីចាប់បានរលកសញ្ញាវិទ្យុបែបនោះ ដែលបញ្ជាក់ថា ការបាញ់គ្រាប់មីស៊ីលអាចកើតឡើងនៅក្នុងរយៈពេលពីរបីថ្ងៃខាងមុខ។
ចំណែកឯទីភ្នាក់ងារព័ត៌មានកូរ៉េខាងត្បូងយ៉ុនហាប់ ដែលបានដកស្រង់សម្ដីប្រភពរដ្ឋាភិបាលនោះ ក៏បានរាយការណ៍ផងដែរថា ក្រុមមន្ត្រីចារកម្មអាមេរិក កូរ៉េខាងត្បូង និងជប៉ុន សុទ្ធតែចាប់បានសញ្ញាបែបនេះ ដែលបញ្ជាក់ថា អាចនឹងមានការបាញ់គ្រាប់មីស៊ីល៕