សាលាដំបូងរាជធានីភ្នំពេញ បានសម្រេចបិទបញ្ចប់ការស៊ើបសួរករណីបាញ់សម្លាប់លោកបណ្ឌិត កែម ឡី ប៉ុន្តែមិនបានបង្ហាញលំអិតពីលទ្ធផលស៊ើបអង្កេតនោះទេ។
យោងតាមលិខិតកាលពីថ្ងៃទី២៣ខែធ្នូ ប្រាប់ទៅអ្នកស្រី ប៊ូ រចនា ភរិយា លោក កែម ឡី សាលាដំបូងរាជធានីភ្នំពេញ បានអះអាងថា បន្ទាប់ពីបានស៊ើបសួរ ប្រមូលភស្តុតាងទាក់ទិននឹងសំណុំរឿងនេះ សាលាដំបូងបានសម្រេចបិទបញ្ចប់ការស៊ើបសួរ។
នៅពេលសួថា តើក្នុងការស៊ើបសួរកន្លងមក ចៅក្រមស៊ើបសួរ បានរកឃើញអីខ្លះ? តើរកឃើញថា មានអ្នកណាពាក់ព័ន្ធផ្សេងទៀតទេ ក្រៅពី ជួប សម្លាប់? អ្នកនាំពាក្យសាលាដំបូងរាជធានីភ្នំពេញ លោក លី សុផាណា សុំមិនអត្ថាធិប្បាយបន្ថែម ដោយថា នេះជាការកិច្ចការសម្ងាត់របស់តុលាការ។
ប្អូនប្រុសលោក កែម ឡី គឺលោក កែម រិទ្ធសិទ្ធិ បានប្រាប់វីអូឌីថា លោកមិនទាន់បានឃើញលិខិតជូនព័ត៌មានពីបិទបញ្ចប់ការស៊ើបសួរករណីបងប្រុសរបស់លោកនៅឡើយទេ។
លោកបញ្ជាក់ថា លោកមិនអាចទទួលយកការបិទបញ្ចប់ការស៊ើបសួររបស់តុលាការបាននោះទេ ដោយថា កន្លងមកលោកមិនបានឃើញលទ្ធផល និងភស្តុតាងអ្វីក្រៅពីជនសង្ស័យម្នាក់ដែលថា ឈ្មោះ ជួប សម្លាប់ ដែលសមត្ថកិច្ចបានចាប់ខ្លួននោះទេ។
លោក កែម រិទ្ធិសិទ្ធិ បានអំពាវនាវដល់តុលាការឲ្យជួយរកយុត្តិធម៌ក្នុងករណីឃាតកម្មនេះ។
អស់រយៈពេល៥ខែមកហើយ ដែលលោក កែម ឡី អ្នកវិភាគបញ្ហាសង្គមដ៏ល្បីត្រូវបានខ្មាន់កាំភ្លើងបាញ់សម្លាប់នៅស្ដារម៉ាតក្បែរស្ដុបបូកគោកណ្ដាលទីក្រុងភ្នំពេញ កាលពីថ្ងៃទី១០ ខែកក្កដា ឆ្នាំ២០១៦។ មានជនជាប់ចោទតែម្នាក់គត់ដែលមានឈ្មោះ អឿត អាង ឬហៅ ជួប សម្លាប់ ត្រូវបានឃុំខ្លួនដោយតុលាការក្រុងភ្នំពេញ។