មន្រ្តីជាន់ខ្ពស់របស់រដ្ឋាភិបាលដែលទទួលបន្ទុកការដោះស្រាយទំនាស់ដីធ្លីបានជំរុញឲ្យស្ថាប័នពាក់ព័ន្ធពន្លឿនការដោះស្រាយបញ្ហាដីធ្លីឲ្យមាន”តម្លាភាព” ដែលលោកថាដើម្បីទប់ស្កាត់ការធ្លាក់ចុះប្រជាប្រិយភាពរបស់រដ្ឋាភិបាលនិងលទ្ធភាពនៃ”បដិវត្តន៍ដីធ្លី”នៅកម្ពុជា។
ក្នុងពិធីបើកសន្និបាតបូកសរុបការងារឆ្នាំ២០១៥និងទិសដៅការងារឆ្នាំ២០១៦ របស់ក្រសួងរៀបចំដែនដីនគររូបនីយកម្មនិងសំណង់ ដែលធ្វើឡើងនៅថ្ងៃចន្ទនេះ ប្រធានអាជ្ញាធរជាតិដោះស្រាយទំនាស់ដីធ្លី លោក ប៊ិន ឈិន បានទទួលស្គាល់ថាជម្លោះដីធ្លីគឺជាដើមចបមួយដែលធ្វើឲ្យគណបក្សប្រជាជនកម្ពុជាបានធ្លាក់ចុះប្រជាប្រិយភាពនៅពេលបោះឆ្នោតកាលពី២០១៣។ លោកជំរុញឲ្យមន្រ្តីពាក់ព័ន្ធរបស់ស្ថាប័ននេះត្រូវយកចិត្តទុកដាក់បន្ថែមទៀតក្នុងការពន្លឿនយន្តការដោះស្រាយជម្លោះដីធ្លីជូនប្រជាពលរដ្ឋ ប្រកបដោយតម្លាភាពដែលលោកថាដើម្បីទប់ស្កាត់ការធ្លាក់ចុះប្រជាប្រិយភាពនេះ។
លោកមានប្រសាសន៍ថា៖ “ក្រសួងស្ថាប័ននិងអ្នកពាក់ព័ន្ធទាំងអស់ត្រូវខិតខំសម្រេចការងាររបស់ខ្លួនក្នុងស្មារតីជំរុញការកែទម្រង់កាន់តែស៊ីជម្រៅតាមអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្រ្តីគឺ ធ្វើឲ្យបាន ធ្វើឲ្យលឿន ធ្វើឲ្យតម្លាភាព ជាពិសេសសេវាសាធារណៈក្នុងសមត្ថកិច្ចរបស់ក្រសួងស្ថាប័ននីមួយៗ”។
ទោះជាយ៉ាងណា លោក ប៊ិន ឈិន អះអាងថាកន្លងទៅស្ថាប័ននេះបានចុះវាស់វែងនិងប្រគល់ប័ណ្ណកម្មសិទ្ធិដីធ្លីជូនប្រជាពលរដ្ឋតាមយុទ្ធរបស់រដ្ឋាភិបាលបានច្រើនគួរឲ្យកត់សម្គាល់ផងដែរ។ លោកបញ្ជាក់ថាការដោះស្រាយនេះធ្វើឲ្យកម្ពុជាមិនអាចឈានទៅរក”បដិវត្តន៍ដីធ្លី”ដូចប្រទេសមួយចំនួននៅលើពិភពលោក។
លោកមានប្រសាសន៍ថា៖ “ការចុះបញ្ជីដីធ្លីក្នុងឆ្នាំ២០១៥សម្រេចបានជិត៣១ម៉ឺនប័ណ្ណ បើគិតចាប់ពីផ្តើមដំណើរការលទ្ធផលសរុបសម្រេចបានប្រមាណ៤លាន១៤ម៉ឺនក្បាលដីស្នើនឹង៥៩ភាគរយនៃចំនួនក្បាលដីប៉ាន់ស្មានសរុបទូទាំងប្រទេស៧លានក្បាស់ដី។ ដោយឡែកការដោះស្រាយទំនាស់ដីធ្លីក្នុងឆ្នាំ២០១៥តាមគណៈកម្មការសុរិយោដីទាំងបីថ្នាក់បានបញ្ចប់នីតិវិធីនៃការសម្រុះសម្រួលសរុបបាន៦៣៧ករណី ក្នុងនោះសម្រេចបានជោគជ័យ៣៧៦ករណីច្រានចោល១៩២ករណីនិងភាគីវិវាទសុំដកពាក្យបណ្តឹងវិញ៦៩ករណី”។
មន្រ្តីសម្របសម្រួសគម្រោងកំណែទម្រង់ដីធ្លីនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សូផាត មានប្រសាសន៍ថាការដោះស្រាយដីធ្លីកន្លងទៅគឺ”គ្មានតម្លាភាព”នោះទេ ដែលលោកថាករណីភាគច្រើន គឺពលរដ្ឋខាតដី។ លោកមានប្រសាសន៍ថា៖ “បើនិយាយពីយន្តការនៃការដោះស្រាយហ្នឹងគឺអត់ល្អតែម្តងគ្រាន់តែបានថាដោះស្រាយបញ្ចប់ តែបញ្ចប់ទាំងមិនល្អ បញ្ចប់ទាំងធ្វើឲ្យប្រជាពលរដ្ឋខាតបង់។ ហើយការដោះស្រាយវិវាទដីធ្លីនេះមិនមែនទៅលើតែមន្រ្តីរបស់ក្រសួងរៀបចំដែនដីនគររូបនីយកម្មនិងសំណង់ទេគឺវាអាស្រ័យទៅលើថ្នាក់ដឹកនាំរដ្ឋាភិបាលនិងមន្រ្តីដែលពាក់ព័ន្ធនៅតាមមន្ទីក្រសួងនានា”។
គួរបញ្ជាក់ថាកាលពីថ្ងៃព្រហស្បតិ៍សប្តាហ៍មុន លោកនាយករដ្ឋមន្ត្រី ហ៊ុន សែន បានឲ្យដឹងថារដ្ឋាភិបាលបានដកហូតដីសម្បទានសេដ្ឋកិច្ចជិតមួយលានហិកតាទៅគ្រប់គ្រងវិញក្នុងចំណោមដីជាង២លានហិកតាដែលរដ្ឋាភិបាលបានផ្ដល់ទៅឲ្យក្រុមហ៊ុន។ លោកបញ្ជាក់ថាតាមរយៈការធ្វើកំណែទម្រង់ឡើងវិញពាក់ព័ន្ធនឹងបញ្ហាដីសម្បទានសេដ្ឋកិច្ច រហូតមកដល់ពេលនេះ រដ្ឋាភិបាលបានពិនិត្យមើលទៅលើដីសម្បទានសេដ្ឋកិច្ចរួចរាល់អស់ហើយ ទាំងផ្នែកកសិកម្ម និងផ្នែកបរិស្ថាន ដែលលោកថាមានផ្ទៃដីសរុបជាង២លានហិកតា។
លោកមានប្រសាសន៍ថា៖ “ក្នុងចំនួន២លានហិកតាជាងនេះ ឥឡូវបន្សល់ទុកឲ្យបន្តវិនិយោគតែ១លាន៩ម៉ឺនហិកតាទេ ជិត១លានហិកតាទៀតបានដកហូតយកមកវិញហើយ។ ហើយក្នុង១លានហិកតានេះ (ដែលបន្តឲ្យវិនិយោគ) ភាគច្រើនគឺជាដីបានដាំដុះដំណាំកៅស៊ូ ឬក៏ដំណាំអីផ្សេងៗរួចស្រេចទៅហើយ”។
លោក ហ៊ុន សែន បន្តថាសម្រាប់ដីជាង១លានហិកតាដែលរដ្ឋាភិបាលបន្តឲ្យវិនិយោគនោះ ក្រុមហ៊ុនត្រូវធ្វើការដោះស្រាយផលប៉ះពាល់ជាមួយប្រជាពលរដ្ឋ ដោយលោកថារដ្ឋាភិបាលអាចនឹងបន្តដកហូតយកដីទាំងនោះទៅគ្រប់គ្រងវិញ៕