មន្រ្តីជាន់គណបក្សប្រឆាំង បានឲ្យដឹងថា ជំនួបរវាងតំណាងគណបក្សសង្រ្គោះជាតិ ជាមួយតំណាងក្រសួងមហាផ្ទៃនៅរសៀលនេះ មិនបានលទ្ធផលអ្វីជាក់លាក់នោះទេ ខណៈដែលក្រសួងមហាផ្ទៃនៅតែបង្ហាញជំហមិនទទួលស្គាល់ក្បាលម៉ាស៊ីនដឹកនាំថ្មីរបស់គណបក្សនេះ។
នេះបើតាម លោក អេង ឆៃអ៊ាង អនុប្រធានគណបក្សសង្រ្គោះជាតិបានថ្លែងប្រាប់អ្នកសារព័ត៌មានក្រោយពីជំនួបនោះ។
លោក អេង ឆៃអ៊ាង ថ្លែងថាលោកបានស្នើឲ្យក្រសួងមហាផ្ទៃចេញលិខិតទទួលស្គាល់ថា ការធ្វើសមាជវិសមញ្ញ និងការវិសោធនកម្មលក្ខន្តិកៈរបស់គណបក្សសង្រ្គោះជាតិ ពិតជាត្រឹមត្រូវតែមន្រ្តីក្រសួងមហាផ្ទៃមិនព្រមចេញលិខិតជាផ្លូវការដោយគ្រាន់តែទទួលស្គាល់តាមរយៈពាក្យសំដី។
លោកថា៖ «ចុងក្រោយនេះ គឺរឿងទាក់ទងទៅនឹងអ្វីដែលក្រសួងមហាផ្ទៃលើកឡើងហ្នឹង តែ២ចំណុចទេ គឺតែរឿងជ្រើសរើស ជ្រើសតាំងក្បាលម៉ាស៊ីនដឹកនាំ ជាន់ខ្ពស់គណបក្សហ្នឹង មិនស្របលក្ខន្តិកៈ ហើយនិងពាក្យស្លោកតែប៉ុណ្ណឹងទេបាទ។ បើនិយាយឲ្យស្រួលស្ដាប់ទៅ សម្រាប់កិច្ចការផ្ទៃក្នុងគណបក្សដូចសមាគម អាហ្នឹងរឿងឯកជនរបស់គណបក្សទេ ប៉ុន្ដែឥឡូវហ្នឹងក្រសួងមហាផ្ទៃ គេបានចូលជ្រៅមកដែរ អាហ្នឹងចាំយើងពិនិត្យទៅតាមហ្នឹង»។
ក្រសួងមហាផ្ទៃ នៅតែប្រកាន់ជំហរថា ការជ្រើសរើសក្បាលម៉ាស៊ីនថ្មីដឹកនាំគណបក្សសង្រ្គោះជាតិគឺខុសលក្ខន្តិកៈ និងទាមទារឲ្យដកពាក្យស្លោកដែលថា «ដកមេឃុំបម្រើបក្ស ដាក់មេឃុំបម្រើរាស្ត្រ»។
លោក ប្រាក់ សំអឿន អគ្គនាយករដ្ឋបាលក្រសួងមហាផ្ទៃ បានឲ្យអ្នកសារព័ត៌មានដឹងក្រោយកិច្ចប្រជុំនេះថា ក្រសួងនៅតែមិនទទួលស្គាល់សមាជរបស់គណបក្សសង្រ្គោះជាតិ ដែលជ្រើសរើសប្រធាននិងអនុប្រធានថ្មីនោះដដែល ដោយលោកថា ខុសនឹងប្រការ៤៧ នៃលក្ខន្តិកៈគណបក្សនយោបាយ។
ប៉ុន្ដែលោក ប្រាក់ សំអឿន ពុំបានបញ្ជាក់ថាតើចំណុចណាមួយនៃប្រការ៤៧នេះ ដែលគណបក្សសង្គ្រោះជាតិ ធ្វើខុសនោះទេ ដោយលោកគ្រាន់តែទទូចឲ្យគណបក្សសង្គ្រោះជាតិពិនិត្យឡើងវិញលើចំណុចអស់ទាំងនេះឡើងវិញទៅ ក្រសួងមហាផ្ទៃនឹងទទួលស្គាល់ហើយ។
ឆ្លើយតបនឹងការចោទប្រកាន់ថា ក្រសួងមហាផ្ទៃហាក់កំពុងលូកដៃក្នុងរឿងផ្ទៃក្នុងគណបក្សសង្គ្រោះជាតិ លោក ប្រាក់ សំអឿន អគ្គនាយករដ្ឋបាលក្រសួងមហាផ្ទៃ អះអាងថា ក្រសួងជាស្ថាប័នអនុវត្តច្បាប់ និងបំពេញតួនាទី ក្នុងនាមដូចជាអាណាព្យាបាលរបស់គណបក្សទាំងអស់ប៉ុណ្ណោះ និងថា មិនមែនធ្វើឡើងតាមខ្សែញាក់របស់រដ្ឋាភិបាលនោះទេ។
លោកថា៖ «សំខាន់គឺថាគាត់ទៅកែទៅ រឿងហ្នឹង វាចប់រឿងហើយ វាមានទៅបញ្ហាអី ឲ្យតែធ្វើតាមអ្វី ដែលក្រសួងមហាផ្ទៃ ឲ្យគាត់កែថា អាសមាជជ្រើសប្រធាន អនុប្រធានវាខុសច្បាប់ វាខុសនឹងប្រកាស៤៧ ខទី២ បើគាត់កែអាហ្នឹងឲ្យត្រូវទៅ ហើយដូរអាពាក្យស្លោកឲ្យចប់ទៅ វាចប់ហើយ […] ក្រសួងមហាផ្ទៃ គ្រាន់តែខ្ញុំសុំជំរាបចេះថា ក្រសួងមហាផ្ទៃ ជាក្រសួងស្ថាប័នអនុវត្តច្បាប់ អញ្ចឹងធ្វើម៉េចទៅតាមច្បាប់ទេ ហើយលោកត្រូវយល់សម្ដេចនាយករដ្ឋមន្ដ្រី គាត់ជាប្រធានបក្សមួយដោយឡែក គាត់ជានាយករដ្ឋមន្ដ្រី អត់មានជាប់គ្នា អត់មានពាក់ព័ន្ធគ្នាទេណា»។
កាលពីថ្ងៃទី០២ខែមីនាឆ្នាំ២០១៧ គណបក្សសង្រ្គោះជាតិបានរៀបចំសមាជដើម្បីជ្រើសរើសក្បាលម៉ាស៊ីនដដឹកនាំថ្មីរបស់ គណបក្សបន្ទាប់ពីលោក សម រង្ស៊ី បានលាលែង ពីតំណែងប្រធានបក្ស។ បន្ទាប់ពីធ្វើសមាជនេះ បក្សប្រឆាំងបានបោះឆ្នោតគាំទ្រឱ្យលោក កឹម សុខា ធ្វើជាប្រធានគណបក្សសង្រ្គោះជាតិ ហើយមានអនុប្រធាន៣នាក់ រួមមានលោក ប៉ុល ហំម លោកស្រី មូរ សុខហួរ និងលោក អេង ឆៃអ៊ាង៕
រាយការណ៍បន្ថែមដោយពេជ្រ ចំរ៉ុង