កម្មការិនី ១៥នាក់ បានរងរបួសធ្ងន់ស្រាល និងត្រូវបានបញ្ជូនទៅសង្គ្រោះនៅមន្ទីរពេទ្យ បន្ទាប់ពីរថយន្តដឹកពួកគេ បានក្រឡាប់នៅព្រឹកថ្ងៃនៅ នៅស្រុកសំរោងទង ខេត្តកំពង់ស្ពឺ។ នេះដោយយោងតាមអធិការនគរបាលស្រុកសំរោងទង លោក ឃុត សុផល ដែលត្រូវបានវេបសាយនគរបាលជាតិដកស្រង់សម្ដី។
មន្ត្រីនគរបាលរូបនេះ បានបន្ថែមថា រថយន្តដែលផ្ទុកកម្មការិនីដល់ទៅ ៤៥នាក់នោះ បានក្រឡាប់នៅម៉ោងជាង ៦ព្រឹកថ្ងៃនេះ នៅត្រង់ភូមិអង្គតាឡឹក ក្នុងឃុំសំបូរ ក្រោយពីបើកបរក្នុងល្បឿនលឿន។ អ្នកបើកបរបានរត់គេចខ្លួនបាត់ក្រោយរថយន្តក្រឡាប់។
ប្រធានមន្ទីរការងារ និងបណ្ដុះបណ្ដាលវិជ្ជាជីវៈ លោក ចឹក បូរិន បានឲ្យដឹងថា កម្មការិនីរបួសចំនួន ១៥នាក់ ក្នុងនោះរបួសធ្ងន់បាក់ដៃម្នាក់ ត្រូវបានបញ្ជូនទៅសង្គ្រោះនៅតាមគ្លីនិកនានា ក្រោយពីកើតហេតុការណ៍នោះ៕
