អង្គការតម្លាភាពកម្ពុជាលើកឡើងថា ខ្លួននឹងប្រើរូបមន្តពិសេសមួយ តាមដានភាពមិនប្រក្រតីនៃការបោះឆ្នោត ឃុំ សង្កាត់ខាងមុខនេះ ដោយថាដើម្បីទប់ស្កាត់អំពើពុករលួយផ្នែកនយោបាយក្នុងប្រព័ន្ធបោះឆ្នោត។
ក្នុងសន្និសីទសាព័ត៌មាន នាថ្ងៃទី២៩ខែឧសភានេះ ស្តីពីការវិភាគទិន្ន័យនៃការបោះឆ្នោត និងវិធីសាស្ត្រសម្គាល់ភាពមិនប្រក្រតី ដែលអាចកើតមានជាយថាហេតុនៅថ្ងៃបោះឆ្នោត នាយកប្រិតបត្តិអង្គការតម្លាភាពកម្ពុជា លោក ព្រាប កុល លើកឡើងថា ជម្លោះនយោបាយ តែងតែកើតមានឡើង ក្រោយការបោះឆ្នោតម្តងៗ ដោយសារតែពួកគេ បន្ទោសទៅលើស្ថាប័នរៀបចំការបោះឆ្នោតថា គ្មានជំហរឯករាជ្យ។
លោក ព្រាប កុល លើកឡើងទៀតថា ដើម្បីចូលរួមកាត់បន្ថយជម្លោះនេះ អង្គការលោក នឹងដាក់ពង្រាយអ្នកសង្កេតការណ៍ជាង១ពាន់នាក់(១១០០)នៅតាមការិយាល័យចំនួន៤១០ ប្រើរូបមន្ត SBO សម្រាប់តាមដាន និងវាយតម្លៃនៃដំណើរការបោះឆ្នោត។
លោកថា៖ «ដោយសារយើងមើលឃើញថា ភាពមិនប្រក្រតីនៃការបោះឆ្នោត ការលួចបន្លំសន្លឹកឆ្នោត ជាអំពើពុករលួយនយោបាយ ដែលយើងត្រូវតែមានភារកិច្ចចូលរួមលុបបំបាត់ ហើយលើកកម្ពស់សុច្ចរិតភាព និងតម្លាភាពនៃការបោះឆ្នោត។ នេះគឺអាណត្តិរបស់អង្គការតម្លាភាព»។
លោក ព្រាប កុល ពន្យល់ថា រូបមន្ត SBO ប្រទេសមួយចំនួន ដូចជា ហ្ស៊ីមបាវេ អ៊ុយក្រែន ជាដើម ពួកគេធ្វើបានជោគជ័យ តាមរយៈបញ្ជូនអ្នកសង្កេតការណ៍ ទៅកាន់ការិយាល័យបោះឆ្នោត និងមានមន្ត្រីជំនាញ វិភាគលើសំណាកឯកសារដែល អ្នកសង្កេតការណ៍រកឃើញនៅថ្ងៃបោះឆ្នោត។
អ្នកនាំពាក្យ គ.ជ.ប លោក ហង្ស ពុទ្ធា បានស្វាគមន៍ទៅនឹងគម្រោងដាក់ពង្រាយអ្នកសង្កេតការណ៍ ដើម្បីឃ្លាំមើលការបោះឆ្នោតនេះ ដោយលោកលើកឡើងថា ការពង្រាយអ្នកសង្កេតការណ៍ប្រកបដោយវិជ្ជាជីវៈ លោកថា ពិតជាបានចូលរួមផ្តល់ជំនឿចិត្តដល់ភាគីពាក់ព័ន្ធដែលបានចូលរួមការបោះឆ្នោត។
លោកថា៖ «ការបង្ហាញខ្លួនរបស់អ្នកសង្កេតការជាតិ និងអន្តរជាតិ ហើយតាមគម្រោងកម្មវិធី របស់ TI គាត់ធ្វើក៏ដោយនោះបង្ហាញថាមានការចូលរួមគ្នាច្រើន។ ហើយពាក្យថាច្រើននេះបានន័យថា មិនមាននរណាម្នាក់ចង់ធ្វើអីស្រេកតែចិត្តបានទេ ។អញ្ចឹងនេះក៏ជាការកាត់បន្ថយនូវភាពមិនប្រក្រតីនៃការបោះឆ្នោតដែរ»។
បើតាមលោក ហង្ស ពុទ្ធា ការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៤នេះគិតត្រឹមថ្ងៃទី២៩នេះ គជប ទទួលបានអ្នកសង្កេតការណ៍សរុបជាង៦៤ម៉ឺននាក់(៦៤១៥០៤)។ក្នុងនោះអ្នកសង្កេតការណ៍ជាតិមានជិត៦ម៉ឺននាក់(៥៦៨១៧)អន្តរជាតិមាន៩៤ គណបក្សនយោបាយជាង៥ម៉ឺននាក់(៥៨៤០១០)អ្នកសាព័ត៌មានជាតិ៤៥៤នាក់ និងអន្តរជាតិ១២៩នាក់ ដែលលោក ហង្ស ពុទ្ធា ថាចំនួនអ្នកសង្កេតការណ៍នេះកើនឡើងយ៉ាងគំហុកបើប្រៀបធៀបនឹងការបោះឆ្នោតមុនៗ។
កាលពីបោះឆ្នោតឆ្នាំ២០១៣ គណបក្សសង្គ្រោះជាតិ បានដឹកនាំធ្វើមហាបាតុកម្ម ក្នុងរាជធានីភ្នំពេញ ជិតមួយឆ្នាំ ប្រឆាំងលទ្ធផលបោះឆ្នោត ។បក្សប្រឆាំងពេលនោះ ចោទ គ.ជ.ប ថា ជាអ្នកជួយបន្លំសន្លឹកឆ្នោត ឲ្យគណបក្សកាន់អំណាច បានឈ្នះការបោះឆ្នោត ។
ប៉ុន្តែមហាបាតុកម្មនោះបានបញ្ឈប់ទៅវិញ ក្រោយពីបក្សកាន់អំណាច ព្រមរំលាយក្បាលម៉ាស៊ីន គ.ជ.ប ចាស់ចោល ហើយបង្កើត គ.ជ.ប ថ្មី មានសមាជិក គ.ជ.ប ស្មើគ្នាតាមរូបមន្ត៤-៤-១ និងឈានទៅធ្វើបញ្ជីបោះឆ្នោតឡើងវិញជាដើម៕