មជ្ឈមណ្ឌលជាតិគាំពារមាតានិងទារក ហៅមន្ទីរពេទ្យជប៉ុន រងការចោទប្រកាន់ថា បុគ្គលិកនៃមន្ទីរពេទ្យនេះបានធ្វេសប្រហែស បណ្តាលឲ្យស្ត្រីដែលមានផ្ទៃពោះម្នាក់ស្លាប់ទាំងម្តាយនិងទារកក្នុងផ្ទៃ។
ហេតុការណ៍នេះ បានកើតឡើងនៅវេលាម៉ោងប្រមាណ១១យប់ថ្ងៃទី២៨ ឧសភា ឆ្នាំ២០១៧ នៅមជ្ឈមណ្ឌលជាតិគាំពារមាតា និងទារកហៅមន្ទីរពេទ្យជប៉ុន ដែលស្ថិតនៅទល់មុខ មន្ទីរពេទ្យព្រះកេតុមាលា តាមផ្លូវលេខ៤៧ក្នុងសង្កាត់ស្រះចក ខណ្ឌដូនពេញ។
យោងតាមវីដេអូដែលបានផ្សព្វផ្សាយតាមហ្វេសប៊ុក បានបង្ហាញពីសកម្មភាពរបស់ក្រុមគ្រួសារសពស្រ្តីឈ្មោះ ឈា ណារិន បានយំស្រែកស្តោកស្តាយចំពោះការបាត់បង់សមាជិកគ្រួសារខ្លួនដោយថា មកពីការធ្វេសប្រហែសរបស់បុគ្គលិកនៃមន្ទីរពេទ្យនេះ។
បុរសដែលអះអាងថាជាប្តីរបស់ស្រ្តីរងគ្រោះបានថ្លែងរាប់រាប់ក្នុងវីដេអូ ដែលបានផ្សព្វផ្សាយនោះថា មូលហេតុដែលបណ្តាលឲ្យប្រពន្ធរបស់លោកស្លាប់នោះគឺមកពីការធ្វេសប្រហែសរបស់បុគ្គលិកនៃមន្ទីរពេទ្យនេះ ដោយមិនបានយកចិត្តទុកដាក់ពិនិត្យព្យាបាលប្រពន្ធខ្លួន ខណៈស្រ្តីរងគ្រោះធ្លាក់ឈាមខ្លាំងនៅពេលរៀបចំសម្រាល។ លោកបន្ថែមថា បុគ្គលិកក្មេងៗនៃមន្ទីរពេទ្យនេះ ហាក់មិនមានជំនាញច្បាស់លាស់ ហើយឧបករណ៍សង្គ្រោះបន្ទាន់មិនមានគុណភាពទើបណ្តាលឲ្យប្រពន្ធលោកស្លាប់បែបនេះ។
លោកថា៖ «ពេទ្យក៏លូកដៃចូលទៅធ្លាក់ឈាមមក ប្រពន្ធខ្ញុំគាត់ថាបងអើយខ្ញុំជិតដាច់ខ្យល់ហើយ ជីពចរឡើងមកលើ ពេទ្យគេថាយកខ្យល់អុកស៊ីសែនមកខ្យល់ហ្នឹងយកមកដាច់ទុយោទៀត ហើយសុទ្ធតែក្មេងៗ យកអានេះខុសយកអានោះខុសទាល់តែប្រពន្ធដាច់ខ្យល់។ … ពេទ្យក៏លូកដៃចូលទៅធ្លាក់ឈាមមក ប្រពន្ធខ្ញុំគាត់ថាបងអើយអូនងងឹតមុខណាស់ ខ្ញុំថាអូនកើតអី ប្រពន្ធថាខ្ញុំស្លាប់ឥឡូវហើយ ដល់ពេទ្យជប៉ុនក្រែលគេមានជំនាញខ្ញុំថាអត់អី ដល់អញ្ចឹងខ្ញុំចេះតែមើលប្រពន្ធខ្ញុំស្លេកទៅស្លេកទៅ ដល់ពេលចឹងបានពេទ្យធំមកដល់ ក៏រុញចូលមន្ទីរពេទ្យនោះប្រពន្ធខ្ញុំស្លាប់តាំងពីនេះបាត់ទៅហើយ»។
វីអូឌីមិនអាចទាក់ទងប្រធានមជ្ឈមណ្ឌលគាំពារមាតា និងទារក ហៅពេទ្យជប៉ុន ដើម្បីសុំការឆ្លើយបំភ្លឺពីករណីនេះបាននៅឡើយទេ។
អ្នកនាំពាក្យក្រសួងសុខាភិបាលលោក ឡូ វាសនាគីរី ថាលោកមិនទាន់ទទួលព័ត៌មានពីករណីនេះនោះទេ តែលោកថានៅពេលដែលកើតមានរឿងដូច្នេះក្រសួងនឹងមិនទុកឲ្យរឿងនេះចោលនោះទេ។
លោកថា៖ «ឥឡូវនេះខ្ញុំអត់ទាន់បានទទួលព័ត៌មានហ្នឹងទេ។ តែនៅពេលណាដែលកើតមានករណីអញ្ចឹងក្រសួងនឹងធ្វើការពិនិត្យមើលហើយ អញ្ចឹងទេរហូតមកដល់ពេលនេះខ្ញុំអត់អាចជូនជាព័ត៌មានអីបានទេ។ … ក្រសួងប្រហែលជាអាចដឹងរឿងហ្នឹងហើយចាំមើលក្រសួងនឹងទាក់ទងទៅមជ្ឍមណ្ឌលជាតិ»។
វិស័យសុខាភិបាលកម្ពុជារងការរិះគន់ជាបន្តបន្ទាប់ទាំងសេវា បច្ចេកទេស និងពាក្យសំដីគ្រូពេទ្យដែលធ្វើឲ្យប្រជាជនកម្ពុជាមួយចំនួនបង្ហាញការអស់ចំនឿលើមន្ទីរនៅពេទ្យនៅកម្ពុជា។
កាលពីថ្ងៃទី២៩ កុម្ភះ ឆ្នាំ២០១៧នេះ លោក ហ៊ុន សែន ក៏បានថ្លែង ទទួលស្គាល់ថាមានពេទ្យមួយចំនួនតូច ដែលលោកថា មិនមានក្រមសីលធម៌ សម្តីមិនល្អនិងគិតតែពីលុយ។ ទោះជាយ៉ាងណា លោកថាចំនួនគ្រូពេទ្យនោះមិនច្រើនដល់ថ្នាក់៩០ឬ៩៩ភាគរយនោះទេ។ លោកចាត់ទុកការរិះគន់ថាពេទ្យខ្មែរភាគច្រើនអាក្រក់ជា «ការមិនអាចទទួលយកបាន និង ថាជាការប្រមាថលើវិស័យសុខាភិបាលកម្ពុជា»៕
