ក្រសួងសុខាភិបាលសិង្ហបុរី បានបញ្ជាក់ថាការឆ្លងវីរុស Zika ចំនួន ៤១ករណី ត្រូវបានរកឃើញនៅប្រទេសមួយនេះ។ នេះដោយយោងតាមការផ្សាយរបស់សារព័ត៌មាន Channel News Asia។
សារព័ត៌មានមួយនេះដែលបានដកស្រង់សម្ដីក្រសួងសុខាភិបាលសិង្ហបុរីនោះបានរាយការណ៍ថា មនុស្ស៣៤នាក់បានជាសះស្បើយទាំងស្រុងហើយ ខណៈមនុស្ស៧នាក់ទៀតកំពុងស្ថិតក្រោមការព្យាបាលនៅក្នុងមន្ទីរពេទ្យ។
នៅក្នុងសន្និសីទកាសែតកាលពីថ្ងៃម្សិលមិញ ក្រសួងសុខាភិបាលនិងទីភ្នាក់ងារបរិស្ថានជាតិរបស់សិង្ហបុរីបាននិយាយថាករណីទាំងអស់គឺជាពលរដ្ឋរស់នៅតំបន់ Sims Drive ឬជាកម្មករនៅទីនោះ។ ពួកគេពុំបានដឹងថាបានធ្វើដំណើរទៅតំបន់រងវីរុសនេះទេនៅពេលថ្មីៗនេះ ហើយពួកគេសុទ្ធតែឆ្លងវីរុសនេះនៅក្នុងប្រទេសប៉ុណ្ណោះ។
ក្នុងចំណោមនោះ អ្នកជំងឺ៣៦នាក់គឺជាកម្មករបរទេសដែលធ្វើការនៅការដ្ឋានសំណង់នៅតំបន់ Sims Drive។ ចំណែកមនុស្ស៤នាក់ដទៃទៀតគឺជាពលរដ្ឋសិង្ហបុរីអាយុចន្លោះពី២១ឆ្នាំដល់៦៥ឆ្នាំ។
ក្រសួងសុខភិបាលបានប្រកាសដូច្នេះ បន្ទាប់ពីរកឃើញថាស្ត្រីជនជាតិម៉ាឡេស៊ីវ័យ៤៧ឆ្នាំម្នាក់បានឆ្លងវីរុសនេះ៕
