រដ្ឋមន្ត្រីក្រសួងបរិស្ថាននិងរុក្ខជាតិឥណ្ឌូនេស៊ី អ្នកស្រី Siti Nurbaya បាននិយាយកាលពីថ្ងៃម្សិលមិញថា ឥណ្ឌូនេស៊ីកំពុងតែធ្វើការឥតឈប់ឈរ ដើម្បីពន្លត់ភ្លើងឆេះព្រៃ ហើយបានអំពាវនាវឲ្យប្រទេសដទៃ ជួយដល់កិច្ចខិតខំប្រឹងប្រែងរបស់ឥណ្ឌូនេស៊ី ជាជាងរិះគន់។ នេះដោយយោងតាមការផ្សាយរបស់សារព័ត៌មាន Channel News Asia។
Channel News Asia បានដកស្រង់សម្ដីរដ្ឋមន្ត្រីរូបនេះដែលបានថ្លែងក្នុងសេចក្ដីប្រកាសព័ត៌មានមួយថា ឥណ្ឌូនេស៊ីបន្តគោរពការរិះគន់ពីប្រទេសជិតខាង ប៉ុន្តែអ្នកស្រីថាឥណ្ឌូនេស៊ីមិនមែនប្រឹងប្រែងពន្លត់ភ្លើងឆេះព្រៃដោយសារតែសម្ពាធពីប្រទេសដទៃនោះឡើយ។
អ្នកស្រី Siti ក៏បាននិយាយថា រដ្ឋាភិបាលឥណ្ឌូនេស៊ីខិតខំបំពេញកាតព្វកិច្ចរបស់ខ្លួន សម្រាប់ប្រជាជនឥណ្ឌូនេស៊ី។
អ្នកស្រីបានថ្លែងបន្តថាប្រទេសដទៃគួរតែផ្អាកនិយាយពាក្យមិនចាំបាច់ ប៉ុន្តែពិនិត្យមើលកិច្ចខិតខំប្រឹងប្រែងដែលរដ្ឋាភិបាលឥណ្ឌូនេស៊ីបានអនុវត្ត៕