ជនជាតិដើមភាគតិចដែលរងផលប៉ះពាល់ពីគម្រោងអភិវឌ្ឍន៍ទំនប់វារីអគ្គិសនីខេត្តស្ទឹងត្រែង ទាមទារឲ្យ រដ្ឋាភិបាលផ្តល់សេវាសាធារណៈជូនពួកគេវិញ និងបញ្ឈប់ការបណ្តេញចេញទាំងបង្ខំ។
ជនជាតិដើមភាគតិចប្រមាណជិត២០នាក់មកឃុំក្បាលរមាស និងឃុំស្រែគរក្នុងស្រុកសេសាន ខេត្តស្ទឹងត្រែងនៅថ្ងៃទី២៩ សីហា ឆ្នាំ២០១៧នេះ បានប្រមូលផ្តុំគ្នាដាក់ញត្តិនៅក្រសួងមហាផ្ទៃ និងខុទ្ទកាល័យនាយករដ្ឋមន្រ្តីដើម្បីសុំឲ្យរដ្ឋាភិបាលដំណើរការឡើងវិញនូវសេវាសាធារណៈ និងបញ្ឈប់ការយកកំលាំងប្រដាប់អាវុធមកគំរាមកំហែងលើពួកគេទៀត។
ជនជាតិដើមភាគតិចពូន កញ្ញា ជើន ស្រីមុំ ប្រាប់អ្នកសារព័ត៌មានថា ក្រោមគម្រោងអភិវឌ្ឍន៍ទំនប់វារីអគ្គិសនីសេសានក្រោមពីរ អាជ្ញាធរបានផ្តាច់សេវាធារណៈផ្សេងៗនៅក្នុងឃុំក្បាលរមាស និងឃុំស្រែគរទាំង ស្រុងតាំងពីឆ្នាំ២០១៥ និងបានប្រើប្រាស់កំលាំងប្រដាប់អាវុធទៅគំរាមកំហែងពលរដ្ឋឲ្យចាក់ចេញពីភូមិចាស់ទៀតផង ដោយកញ្ញាយល់ថា សកម្មភាពនេះ គឺជាការរើសអើង និងរំលោភសិទ្ធិជនជាតិដើមភាគតិច។
កញ្ញាបន្ថែមថា «ក្មេងៗអាយុដែលត្រូវចូលរៀន គឺអត់បានចូលរៀនដែរ អញ្ចឹងពួកយើងទាមទារឲ្យរដ្ឋាភិបាលយកចិត្តទុកដាក់ក្នុងការដោះស្រាយទាក់ទងនឹងសេវាទាំងអស់ហ្នឹង ព្រោះអីឥលូវផ្តាច់ទាំងស្រុង ទាំងផ្លូវដើរ ថែមទាំងដាក់កំលាំងប្រដាប់អាវុធ ធ្វើអញ្ចឹងសមដែរ ព្រោះដីពួកគាត់អត់មានអីតតាំងជាមួយទេក្រៅពីការទាមទារនូវសិទ្ធិសេរីភាពរបស់ពួកគេ ហើយការរស់នៅរបស់ពួកគាត់ គឺទាមទាររស់នៅកន្លែងចាស់ ព្រោះកន្លែងចាស់គាត់មានដីស្រែស្រេច»។
ពលរដ្ឋម្នាក់ទៀតអ្នកស្រី សារ៉ុន សុខុម ឲ្យដឹងថាគម្រោងអភិវឌ្ឍន៍ទំនប់វារីអគ្គិសនីសេសានក្រោមពីរនេះកំពុងធ្វើឲ្យប៉ះពាល់ដល់ជីវភាពរស់នៅ ប្រពៃណីទំនៀមទំលាប់ និងអត្តសញ្ញាណរបស់ពួកគេផងដែរ។
អ្នកស្រីមន្ថែមថា «ពួកខ្ញុំមិនជំទាស់ទេនឹងគម្រោងអភិវឌ្ឍន៍វារីអគ្គិសនីនេះទេ គាត់ចង់ធ្វើអីក៏ធ្វើទៅ ប៉ុន្តែបញ្ហារឿងលំនៅឋាន ដីធ្លីស្រែចំការពួកខ្ញុំ ព្រមទាំងអបិយជំនឿ ព្រៃអ្នកតាអារក្សរបស់ពួកខ្ញុំ ដែលបាត់បង់នោះ សួរថាពួកខ្ញុំចេះឈឺចាប់អត់? ចុះបើគេធ្វើចំពោះរូបគាត់វិញ បើគេបណ្តេញចេញអញ្ចឹង មានការឈឺចាប់ដូចខ្ញុំអត់? ជាពិសេសថ្នូរដូនតារបស់ពួកខ្ញុំ ហ្នឹងហើយដែលពួកខ្ញុំមិនអាចចាកចោលពួកគាត់បាន បើទោះជាទឹកលិចយ៉ាងណាក៏ដោយ ពួកខ្ញុំមិនអាចចាកចេញចោលពួកគាត់បានទេ ដើម្បីឲ្យវិញ្ញាណរបស់ពួកគាត់ស្ងប់ជាមួយពួកខ្ញុំ»។
មន្រ្តីក្រសួងមហាផ្ទៃបានអនុញ្ញាតឲ្យតំណាងពលរដ្ឋចូលដាក់ញត្តិផ្ទាល់ ហើយតំណាងពលរដ្ឋឲ្យដឹងថា មន្រ្តីក្រសួងសន្យាជួយរកដំណោះស្រាយ។ ចំណែកមន្រ្តីខុទ្ទកាល័យនាយករដ្ឋមន្រ្តីគឺលោក គង់ ចំរើន បានទទួលញត្តិពីពលរដ្ឋដែរ ហើយឆ្លើយនឹងសំនួរអ្នកសារព័ត៌មានថា លោកនឹងបញ្ជូនឯកសារនេះឲ្យមន្រ្តីជំនាញពិនិត្យបន្តទៀត។
លោកបន្ថែមថា «ខ្ញុំអត់មានសិទ្ធិអីធ្វើទេ អាហ្នឹងគេមានបច្ចេកទេសរបស់គេ អ្នកបច្ចេកទេសគេធ្វើបន្ត ខ្ញុំគ្រាន់តែទទួលញត្តិរបស់ពួកគាត់ទេ មើលបោះគាត់ឲ្យស្រួលក្នុងបែបបទក្នុងទំរងបោះវារួចហើយ បញ្ជូលទៅឲ្យអ្នកជំនាញ»។
ក្រុមពលរដ្ឋឲ្យដឹងថា គម្រោងទំនប់វារីអគ្គិសនីសេសានក្រោមពីរនេះ បានធ្វើឲ្យមានផលប៉ះពាល់ដល់ភូមិចំនួន៦ភូមិ នៃឃុំចំនួនពីរក្នុងស្រុកសេសាន ខេត្តស្ទឹងត្រែង ដែលមានពលរដ្ឋរស់នៅចំនួន៨៤៦គ្រួសារកំពុងរស់នៅ តែរហូតមកដល់ពេលនេះ អ្នកដែលរងផលប៉ះពាល់បានសម្រេចទទួលយកសំណងប្រមាណ៨៧ភាគរយ ខណៈ១២៦គ្រួសារកំពុងរង់ចាំដំដោះស្រាយ។
ក្រសួងរ៉ែ និងថាមពល ធ្លាប់ឲ្យដឹងថា វារីអគ្គិសនីសេសានក្រោមពីរនេះ ជាគម្រោងរបស់រដ្ឋាភិបាល ដែលបានផ្តល់សិទ្ធិទៅឲ្យក្រុមហ៊ុនឯកជនមួយ ដែលមានភាគហ៊ុនពីចិន៥១ភាគរយ កម្ពុជា៣៩ភាគរយ និងវៀតណាម១០ភាគរយ។ វារីអគ្គិសនីសេសានក្រោមពីរនេះ ចំណាយទឹកប្រាក់ជិត៨០០លានដុល្លារអាមេរិក ដោយរំពឹងថា បានថាមពលអគ្គិសនី៤០០មេហ្គាវ៉ាត់៕