មេដឹកនាំយោធាថៃ លោក ប្រាយុទ្ធ ចាន់អូចា នឹងជូបជាមួយមេដឹកនាំ សហរដ្ឋអាមេរិក លោក ដូណល ត្រាំ នៅថ្ងៃចន្ទសប្តាហ៍ក្រោយ ដែលជំនួបនេះធ្វើឡើងដោយបិទទ្វារជជែកពីការវិវត្តន៍នៃទំនាក់ទំនងរបស់ប្រទេសទាំងពីរ ។
រដ្ឋអំណាចទីក្រុងវ៉ាស៊ីនតោនធ្លាប់បានរិះគន់ខ្លាំងៗលើសកម្មភាពពួកយោធាដែលដឹកនាំដោយលោកប្រា យុទ្ធ ចន្ទអូចា ធ្វើរដ្ឋប្រហារទម្លាក់រដ្ឋាភិបាលស៊ីវិល ដឹកនាំដោយលោកស្រី យីង ឡាក់កាលពីឆ្នាំ២០១៤ ហើយក្រុមនេះ បន្តគ្រប់គ្រងអំណាចដល់បច្ចុប្បន្ន។ ដោយសារការរិះគន់លើរដ្ឋប្រហារនោះធ្វើឲ្យទំនាក់ទំនងរវាងសហរដ្ឋអាមេរិក និងថៃបានធ្លាក់ចុះ។
ដោយសារតែការប្រឈមដាក់គ្នានោះ អាមេរិក និងថៃបានទម្លាក់ចោលការធ្វើសមយុទ្ធប្រចាំឆ្នាំជាមួយគ្នាឈ្មោះ Cobra Gold ជាសមយុទ្ធទ្រង់ទ្រាយធំនៅអាស៊ី។
នៅក្នុងជំនួបនៃការស្តារទំនាក់ទំនងនៃប្រទេសទាំងពីរនេះ អ្នកតាមដានមួយចំនួន អះអាងថា បញ្ហាដែលថៃកំពុងតែធ្វើពាណិជ្ជកម្មយ៉ាងច្រើនលើសលប់ជាមួយកូរ៉េខាងជើង នឹងអាចលើកយកទៅជជែកនៅក្នុងពេលនោះ។ ក្នុងដំណើរទស្សនកិច្ចរបស់រដ្ឋមន្ត្រីការបរទេសសហរដ្ឋអាមេរិកលោក Rex Tillson នៅទីក្រុងបាងកកកាលពីខែមុនក៏បានជំរុញឲ្យរដ្ឋាភិបាលថៃបញ្ឈប់ការធ្វើជំនួនជាមួយកូរ៉េខាងជើង។
ក្រោយជំនួបនោះថៃបានថ្លែងថា ខ្លួនបានបញ្ឈប់ការធ្វើពាណិជ្ជកម្មជាមួយកូរ៉េខាងជើង រហូតដល់៩៥% នៃការកិច្ចព្រមធ្វើពាណិជ្ជកម្មកន្លងមក។
ទោះយ៉ាងណា រដ្ឋាភិបាលលោកត្រាំ បានបញ្ជាក់ថា មិនផ្តោតខ្លាំងលើការពង្រឹងសិទ្ធិមនុស្ស និង លទ្ធិប្រជាធិបតេយ្យដូចរដ្ឋាភិបាលអាមេរិកមុនៗនោះទេ គឺលោកត្រាំផ្តោតតែលើការអភិវឌ្ឍន៍ប្រទេស និង ប្រជាជនរបស់ខ្លួនតែប៉ុណ្ណោះ។ដូច្នេះគេរំពឹងថា ជំនួបរវាងមេដឹកនាំយោធាថៃ និង មេដឹកនាំអាមេរិកនេះ នឹងទទួលបានផលល្អ ។