នៅទីបំផុតកីឡាករដែលបានឡើងអង្គុយកៅអី១៦នាក់ បន្ទាប់ពីបានឆ្លងផុតការប្រកួតជម្រុះពី៣២នាក់នោះ
ត្រូវបានជម្រុះអស់២នាក់ទៀតហើយ បន្ទាប់ពីតម្រូវអោយកីឡាករដែលបានឈ្នះក្នុងការប្រកួតជម្រុះជុំទី១បន្តប្រកួតគ្នា យកអ្នកខ្លាំងបន្តទៀត។
កីឡាករដែលបានឈានឡើងនៅក្នុងវគ្គជម្រុះយកតែ១៨នាក់នេះ ត្រូវគេកត់សម្គាល់ថាមានភាពចម្រូងចម្រាស់តាំងពីគូទី១តែម្ដង ដោយសារតែកីឡាកររូបណាក៏ចង់ឈានឡើង។ ការប្រកួតដែលបានធ្វើឡើងនៅសង្វៀនប៉ុស្ដិ៍លេខ៥ព្រែកកំពិសក្នុងព្រឹត្តិការណ៍ប្រកួត ជើងឯកក្នុងប្រភេទទម្ងន់៦៥គីឡូក្រាមនោះ បានឈានដល់វគ្គជម្រុះដែលកាន់តែមានសភាពស្វិតស្វាញជាងមុនទៀតហើយ ដោយសារតែការប្រកួតកាលពីថ្ងៃល្ងាចថ្ងៃទី២៨ តុលា មុននេះ គឺជាការប្រកួតសប្ដាហ៍ដំបូងសម្រាប់ជម្រុះយក៨នាក់ឡើងទៅកាន់វគ្គបន្ត។
កីឡាករជើងខ្លាំង២នាក់ គឺ អ៊ុំ វណ្ណេត មកពីក្លិបមរតកយុទ្ធគុនខ្មែរ និងកីឡាករ វ៉ែន ហុងជីវុង មកពីក្លិបកងកេងមានរិទ្ធិខេត្តបាត់ដំបង គឺជាអ្នកមានវាសនាបានឡើងអង្គុយកៅអីក្នុងវគ្គ៨កាន់មុនគេ ប៉ុន្តែក៏មានន័យថាកីឡាករ២រូបដែលខំតស៊ូរហូតបានឡើងក្នុងវគ្គជម្រុះពី៣២រូបដំបូងបានធ្លាក់ហាលអាវផងដែរ។ នៅក្នុងព្រឹត្តិការណ៍នេះ ចម្រុះដោយកីឡាករជើងចាស់និងជើងថ្មីដែលមានថ្វីដៃល្អៗ ហើយអ្វីដែលគេកត់សម្គាល់គឺកីឡាករម្នាក់ៗកាត់តែប្រឹងប្រកួតគ្នាអត់មានទម្លាក់ដៃតែម្ដង សម្រាប់វគ្គ១៦យក៨នាក់នេះ។
ថ្វីដ្បិតថាកីឡាករគូទី១ត្រូវបានបញ្ចប់ការប្រកួតក្នុងភាពចម្រូងចម្រាស់បន្តិចក្ដី ប៉ុន្តែអ្នកបោះបង់ការប្រកួតសឹងតែក្អួតដាច់ផ្ញារព្រោះតែរងកណ្ដាប់ដៃពីសំណាក់គូប្រកួតត្រូវចំលើថ្ងាសកៀកនឹងកន្លែងហាមឃាត់នោះផង។
ការប្រកួតក្នុងវគ្គ៨នាក់ដ៏ស្វិតស្វាញនោះ កីឡាករជើងខ្លាំងដែលបានឡើងរេញប្រឹងប្រែងប្រកួតខ្លាំងណាស់
ហើយអ្នកទស្សនាក៏មានការពេញចិត្តខ្លះដែរ បើទោះជាកីឡាករដែលបានបោះបង់ការប្រកួតក្នុងគូដណ្ដើមតំណែងជើងឯក១ត្រូវបានគេរិះគន់ថាមិនសូវប្រឹង និងចង់ស៊ីឡាក់ការប្រកួតតែមិនបានជ័យជម្នះក្ដី។
ការប្រកួតមួយនេះត្រូវគេកត់សម្គាល់ថាមានរូបមន្តខុសប្លែកពីការប្រកួតដែលធ្លាប់ធ្វើឡើងនៅ បណ្ដាប៉ុស្ដិ៍ផ្សេងដោយសារតែខាងប៉ុស្ដិ៍លេខ៥ប្រមូលកីឡាករល្អនៅតាមបណ្ដាក្លិបនៅទូទាំងប្រទេសរហូតដល់៣២រូប អោយមកឡើងប្រកួត ហើយប្រើរូបមន្តប្រកួតចាប់គូគ្នាចាញ់ធ្លាក់ៗដែលមានន័យថាលុះត្រាតែកីឡាករមិនធ្លាប់បរាជ័យទាល់តែសោះក្នុងចំណោមការប្រកួតដែលបានធ្វើឡើងតាំងពីក្នុងវគ្គជម្រុះដំបូងរហូតវគ្គផ្ដាច់ព្រ័ត្រ ទើបកំណត់ថាជាជើងឯក។
អ្នកទស្សនាភាគច្រើនមានការចាប់អារម្មណ៍សម្រាប់រូបមន្តបែបនេះយ៉ាងខ្លាំងជាពិសេសនៅពេលម្នាក់ៗបានដឹងពីសមាសភាពដែលមានឈ្មោះឡើងប្រកួត គឺមានចម្រុះដោយកីឡាករល្បីៗមានកេរ្តិ៍ឈ្មោះបោះសំឡេង
ហើយចង់ដឹងថាអ្នកដែលមានសំណាងបានឡើងទៅកាន់វគ្គបន្តសម្រាប់ការប្រកួតជម្រុះម្ដងៗ តើជាកីឡាករណាខ្លះ។ ការប្រកួតនេះដ្បិតថាកំណត់អោយប្រើតែ៣ទឹកមែន ប៉ុន្តែអាចល្អមើលជាងការប្រកួត៥ទឹកដែលបានធ្វើឡើងនោះទៅទៀតដោយសារតែកីឡាករដែលបានឡើងប្រកួតត្រូវការសន្សំពិន្ទុតាំងពីទឹកទី១ឆ្ពោះទៅរកជ័
យជម្នះនៅទឹកចុងក្រោយ។
យ៉ាងណាមិញ ការប្រកួតមួយនេះក៏រមែងទទួលបានការកាត់ស្មានពីសំណាក់អ្នកទស្សនាថាមិនសមនឹងអោយអ្នកនេះឈ្នះអ្នកនោះឈ្នះដោយសារតែពិន្ទុរបស់ពួកគេច្រើនតែប្រដំប្រសងគ្នានៅក្រោយបញ្ចប់ការប្រកួត៣
ទឹកនោះផងដែរ លើកលែងតែការប្រកួតដែលកីឡាករម្ខាងទៀតត្រូវសន្លប់ឬបោះបង់ការប្រកួតមុនចប់ទឹក
ទើបធ្វើអោយអ្នកទស្សនាមិនសូវបង្ហាញពីការកាន់ជើងលម្អៀងម្ខាងៗ។
ជាក់ស្ដែងការប្រកួតក្នុងសប្ដាហ៍បើកឆាកសម្រាប់ការជម្រុះដណ្ដើមកៅអី៨នាក់ដែល ទើបនឹងបញ្ចប់ថ្មីៗនេះ គឺមានការចម្រូងចម្រាស់តែម្ដង ដោយសារតែកីឡាករបង្គោលខៀវ ភុន សោភ័ណ្ឌ មកពីក្លិបនាគរាជមានជ័យ
ព្យាយាមចាប់កំហុសកីឡាករបង្គោលក្រហមម្ដងហើយម្ដងទៀត ហើយលទ្ធផលចុងក្រោយកីឡាករបង្គោលក្រហមក៏ត្រូវគេកាត់ក្ដីអោយឈ្នះ បន្ទាប់ពីលោកអាជ្ញាកណ្ដាល និងគណៈកម្មការរកមិនឃើញកំហុសរបស់គេដូចអ្វីនឹងការចោទប្រកាន់របស់កីឡាករបង្គោលខៀវម្ដងៗ។ ការប្រកួតមួយគូនេះ ចម្រូងចម្រាស់ចង់ផ្អើលរេញ
ដោយសារតែកីឡាករអ្នកគាំទ្រម្ខាងក៏សុទ្ធតែយល់ថាអ្វីដែលកីឡាកររបស់ខ្លួនបានចោទ និងបានវាយគឺសុទ្ធតែសមហេតុផលមិនខុសបច្ចេកទេស។
លោក សេង កដិកា និយាយថា ក្នុងចំណោមគូប្រកួតទាំង៣២នាក់ដែលបានប្រកួតគ្នា លោកចាត់ទុកថារវាងបង្គោលក្រហម អ៊ុំ វណ្ណេត និងបង្គោលខៀវ ភុន សោភ័ណ្ឌ ផ្ទុះរឿងចម្រូងចម្រាស់តាំងពីដើមទី ដោយសារតែការប្រកួតរបស់ពួកគេគឺត្រូវចាក់មើលវីដេអូឃ្លីបសារចុះសារឡើងដដែលទម្រាំអាចអោយបន្តទៅទៀតបាន
នៅពេលកីឡាករម្ខាងគឺបង្គោលខៀវប្រកាច់លើរេញហើយចោទថាកីឡាករបង្គោលក្រ
ហមវ៉ៃខុសបច្ចេកទេស។
លោកថាអ្នកទាំងពីរធ្វើអោយគណៈកម្មការឈឺក្បាល តែក៏ចាត់ទុកភាគីម្ខាងៗប្រឹងប្រែងក្នុងពេលវាយចេញប្រតាយប្រតប់នោះដែរមុនពេលកីឡាករបង្គោលខៀវសម្រេចចិត្តបោះបង់ការប្រកួត ដោយអះអាងថាក្អួត
និងចុកខ្លាំង មិនអាចប្រកួតប្រកួតបន្ត។
លោកថា ភុន សោភ័ណ្ឌ បានចោទថាកីឡាករ អ៊ុំ វណ្ណេត អុកត្រូវប្រដាប់ការពារដោយធ្វើប្រកាច់លើរេញ ប៉ុន្តែក្រោយពេលគណកម្មការចាក់វីដេអូប្រកួតសារចុះសារឡើងគឺគេត្រូវចំលើប្រដាប់ការពារប៉ុណ្ណោះ ទើបកីឡាករភុន សោភ័ណ្ឌ សម្រេចចិត្តបោះបង់ការប្រកួតក្នុងទឹកទី២ បន្ទាប់ពីបណ្ដោយអោយរាប់២ដង ដោយសារតែចង់ចាប់កំហុសថាកីឡាករម្ខាងទៀតវាយខុសបច្ចេកទេស។
លោកថានៅតែមានអារម្មណ៍សោកស្ដាយដែលកីឡាករ ភុន សោភ័ណ្ឌ ខ្វះការតស៊ូ តែលោកក៏កាត់ស្មានថាការប្រកួតដែលបានធ្វើឡើងនោះបានធ្វើអោយចុកខ្លាំងទើបដល់ថ្នាក់ប្រកាច់លើរេញ ហើយប្រកាសដើរចេញពីរេញព្រោះដឹងថាបើបន្តការប្រកួតក៏នៅតែមិនឈ្នះនោះដែរ។ លោកថាការប្រកួតបើកឆាកក្នុងវគ្គជម្រុះពី១៦យក៨នាក់ គឺជាការប្រកួតដែលមានកម្រិតតឹងតែង ដោយសារតែក្នុងវគ្គនេះ គឺកីឡាករដែលឡើងប្រកួតជម្រុះគ្នាសុទ្ធកីឡាករមិនដែលស្គាល់ចាញ់ក្នុងវគ្គ៣២នាក់។
លោកថាការប្រកួតតាមរូបមន្តបែបនេះ ទទួលបានលទ្ធផលវិជ្ជមានល្អណាស់ ហើយក៏មិនភ័យរឿងកីឡាករណាម្នាក់លក់ដូរលទ្ធផលនោះដែរ ដោយសារតែការបរាជ័យក្រៅពីរងការរិះគន់ ក៏ត្រូវបាត់ឱកាសសម្រាប់ការប្រកួតនៅក្នុងវគ្គបន្ទាប់ ដែលផ្ទុយពីការប្រកួតជើងឯកតាមរូបមន្តសន្សំពិន្ទុ ដែលមានកីឡាករខ្លះវាយប្ដូរលទ្ធផលក្រោយពេលទទួលបានពិន្ទុដាច់គេដឹង តែបានឡើងបើទោះជាសល់មួយប្រកួតចុងក្រោយ ឬកីឡាករដែលដឹងថាខ្លួនធ្លាក់ស្វ័យប្រវត្តិដែលមិនចាំបាច់ប្រឹងប្រកួតអោយអស់ពីសមត្ថភាព៕