ក្រុមហ៊ុនអាមេរិក កំពុងតែស្វែងរកច្រកដើម្បីបញ្ចុះបញ្ចូលប្រធានាធិបតីជាប់ឆ្នោត លោក ដូណាល់ ត្រាំ ឲ្យបន្ទន់ជំហររបស់លោក ដែលបានគំរាមលុបចោលផែនការភ្ជាប់ទំនាក់ទំនងនឹងប្រទេសគុយបារបស់រដ្ឋបាលប្រធានាធិបតី បារ៉ាក់ អូបាម៉ា។ ការគំរាមរបស់លោក ត្រាំ ធ្វើឲ្យមានក្ដីបារម្ភថា ក្រុមហ៊ុនអាមេរិកអាចនឹងខាតបង់ប្រាក់រាប់រយលានដុល្លារ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
អំឡុងយុទ្ធនាការឃោសនាបោះឆ្នោត លោក ត្រាំ បាននិយាយថា លោកគិតថា ការភ្ជាប់ទំនាក់ទំនងកាទូតជាមួយគុយបា គឺជារឿងល្អ ប៉ុន្តែ លោកថា លោក អូបាម៉ា គួរជំរុញកាន់តែខ្លាំងថែមទៀត ឲ្យមានសម្បទានពីក្រុងហាវ៉ាណា មុននឹងលុបចោលការរឹតបន្តឹងលើការធ្វើដំណើរ និងពាណិជ្ជកម្ម។
នៅថ្ងៃនេះ ពោលគឺ ៤ថ្ងៃក្រោយមរណភាពមេដឹកនាំបដិវត្តន៍គុយបា លោក ហ្វីដែល កាស្ត្រូ លោក ត្រាំ បានសរសេរលើ Twitter ថា លោកនឹងបញ្ចប់នូវអ្វីដែលលោកចាត់ទុកជា “កិច្ចព្រមព្រៀង”របស់លោក អូបាម៉ា ប្រសិនបើគុយបាមិនបម្រើប្រជាជនរបស់ខ្លួន។
ប៉ុន្តែ លោកមិនបានសន្យាផ្លាស់ប្ដូរទេ ហើយក្រុមអ្នកតស៊ូមតិដែលជំរុញឲ្យមានទំនាក់ទំនងជិតស្និទ្ធនោះ បាននិយាយថា ពួកគេសង្ឃឹមថា មហាសេដ្ឋីរូប ជំរុញទំនាក់ទំនងសេដ្ឋកិច្ច៕