ម្ចាស់សំណួរដែលជាប្រធានគណៈកម្មការជំនាញនៃរដ្ឋសភាមកពីគណបក្សសង្រ្គោះជាតិបានចាត់ទុកការឆ្លើយបំភ្លឺរបស់រដ្ឋមន្រ្តីសុខាភិបាលនៅព្រឹកនេះថា នៅមិនទាន់អាចទទួលយកបានទេ។
តំណាងរាស្ត្រគណបក្សប្រឆាំងបានចោទសួរសំណួរដូចជា ការបាត់លុយមូលនិធិសកល៤១ម៉ឺនដុល្លារ និងការលក់មន្ទីរពេទ្យរដ្ឋមួយចំនួនទៀត។
លោក ម៉ម ប៊ុនហេង រដ្ឋមន្រ្តីក្រសួងសុខាភិបាលឆ្លើយថា លោកបានធ្វើកិច្ចការដោយគោរពតាមនីតិវិធីរបស់រដ្ឋទាំងអស់។ លោកថា៖ «យើងមានប្រព័ន្ធអូឌីតឯករាជ្យមួយរបស់មូលនិធិសកល លុយនេះមិនបាត់ទេ ប៉ុន្តែមានបញ្ហាដែលទាក់ទងនឹងអំពើរត់ការ ដូច្នេះហើយបានជាភារកិច្ចរបស់អង្គភាពប្រឆាំងអំពើពុករលួយលោកស៊ើបលើបញ្ហានេះ» ។
លោកឆ្លើយពីរឿងអាគារពេទ្យចំការមនថា៖ «ចំពោះពេទ្យចំការមន គឺអាជ្ញាធររាជធានីភ្នំពេញ លោកមានគំរោងអភិវឌ្ឍហេដ្ឋារចនាសម្ព័ន្ធរបស់ខ្លួនក្នុងវិស័យសុខាភិបាល ហើយយើងខ្ញុំក៏ឯកភាពដើម្បីឲ្យអនុវត្តទៅតាមនីតិវិធីរដ្ឋដែលមាន»។
ទោះជាយ៉ាងណា លោក អេង ឆៃអ៊ាង តំណាងរាស្ត្រគណបក្សសង្គ្រោះជាតិ ផ្តល់សម្ភាសន៍ដល់អ្នកសារព័ត៌មានថា ការឆ្លើយរបស់លោក ម៉ម ប៊ុនហេង គឺមិនចំសំណួរ ហើយថាការបំភ្លឺនេះគឺជាគេចវេសពីការទទួលខុសត្រូវ។ លោកថា៖ «ដូចរឿងការបាត់បង់មូលនិធិសកលក្នុងការទិញមុង គឺធម្មតាមូលនិធិសកលគេអ្នកផ្តល់ជំនួយឲ្យក្រសួងសុខាភិបាលចាត់ចែង ហើយអ្នកដែលធ្វើឲ្យបាត់មូលនិធិហ្នឹង គឺមន្ត្រីក្រសួងសុខាភិបាល ចឹងក្រសួងសុខាភិបាលក៏ដូចជាក្រសូងនានារបស់រដ្ឋដែរតែងតែមានសវនកម្មផ្ទៃក្នុង ដើម្បីស៊ើបអង្កេតមើលរឿងហ្នឹង ថាតើបាត់យ៉ាងម៉េច ដាក់ទណ្ឌកម្មយ៉ាងម៉េច។ បើខ្លួនថាវាហួសសមត្ថកិច្ចក្នុងការដាក់ទណ្ឌកម្ម នោះបានគេរុញឬប្តឹងទៅឲ្យអង្គភាពប្រឆាំងអំពើពុករលួយ បានគេចាត់វិធានការថែមទៀត។ ប៉ុន្តែមកដល់នេះ យើងអត់ឃើញមានមន្ត្រីណាជាប់គុកផងហ្នឹង គឺវាស្ងាត់ទៅវិញទៅ»។
លោកបន្តពីរឿងដោះដូរអាគារថា៖ «មានអាគាររដ្ឋច្រើនណាស់ អាគារក្រសួងសុខាភិបាលហ្នឹង គឺការដោះដូរអត់មានតម្លាភាព។ នៅមន្ទីរពេទ្យចំការមនជាប់វិមានឯករាជ្យនេះ យើងអត់ដឹងថាការដោះដូរអាគារហ្នឹងដោះដូរយកទៅណា លក់របៀបម៉េច បានតម្លៃប៉ុន្មាន គឺអត់។ ហើយដូចការដោះដូរមន្ទីសម្ពពក្រុងមុខបុរីកីឡាក៏អត់ដឹង គាត់ឆ្លើយអត់ច្បាស់លាស់។ អ្វីដែលគួរហួសចិត្ត គឺការដោះដូរមជ្ឈមណ្ឌលជាតិកំចាត់ជំងឺគ្រុនចាញ់ គេវ៉ៃតម្លៃឆ្នាំ២០១២ អាគាររដ្ឋមួយការ៉េតែ១៥០០ដុល្លារ ដែលតម្លៃទីផ្សារ៣៥០០ដុល្លារ» ។
បើតាមលោក អេង ឆៃអ៊ាង រឿងនេះមិនអាចបញ្ចប់ត្រឹមនេះទេ ដោយថាតំណាងរាស្ត្រគណបក្សសង្គ្រោះជាតិនឹងប្រជុំផ្ទៃក្នុងសិនថានឹងធ្វើអីទៀត។
អ្នកសារព័ត៌មានមិនអាចតាមរក លោក ម៉ម ប៊ុនហេង ដើម្បីសម្ភាសន៍បន្ថែមបានទេបន្ទាប់ពីចប់ការឆ្លើយបំភ្លឺក្នុងរដ្ឋសភា។
សូមរំលឹកថាកាលឆ្នាំ ២០១៣ អតីតនាយកមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ លោក ដួង សុជាតិ និងមន្ត្រីជាន់ខ្ពស់មួយចំនួនទៀតនៅក្នុងមជ្ឈមណ្ឌលនេះ ត្រូវបានរកឃើញថា ពួកគេបានយកប្រាក់ប្រមាណ ៤១ម៉ឺនដុល្លារ (ប្រាក់កម្រៃជើងសា) ជាថ្នូរនឹងការផ្តល់កិច្ចសន្យាដេញថ្លៃក្រោមជំនួយរបស់អង្គការមូលនិធិសកល (Global Fund) ដើម្បីប្រយុទ្ធប្រឆាំងនឹងជំងឺរបេងនិងជំងឺគ្រុនចាញ់ ទៅក្រុមហ៊ុនដេញថ្លៃមួយចំនួន។
រដ្ឋមន្រ្តីសុខាភិបាល ក៏ធ្លាប់ត្រូវបានរដ្ឋសភាហៅទៅបំភ្លឺម្តងរួចហើយ ទាក់ទងនឹងការរីករាលដាលជំងឺអេដស៍នៅខេត្តបាត់ដំបង ដោយសារតែមានការចម្លងតាមរយៈគ្រូពេទ្យតាមភូមិឈ្មោះ ញែម ជ្រិន៕
