ក្រសួងកសិកម្មបង្ហាញថាការនាំចេញជ័រកៅស៊ូក្នុងរយៈពេល១១ខែ នៃឆ្នាំ២០១៧ មានចំនួនប្រមាណ១៥ម៉ឺនតោន ដែលមានការកើនឡើងនេះស្មើប្រមាណជា៣១ភាគរយបើធៀបទៅនឹងឆ្នាំ២០១៦។
របាយការណ៍ការងារកសិកម្មរបស់ក្រសួងកសិកម្មផ្សព្វផ្សាយកាលពីថ្ងៃទី១៩ ធ្នូ ដែលវីអូឌីទើបទទួលបានឲ្យដឹងថា ការនាំចេញជ័រកៅស៊ូពីកម្ពុជាទៅលក់នៅទីផ្សារបរទេសក្នុងរយៈពេល១១ ខែឆ្នាំ២០១៧ បានចំនួន ១៥២ ៩៦២ តោនដែល កើនឡើង៣៦ ៦១៣តោន ឬ៣១ភាគរយលើសឆ្នាំមុន ខណៈតម្លៃជាមធ្យមនៃកៅស៊ូ១តោនសម្រាប់ឆ្នាំ២០១៧ មានតម្លៃ១ ៦២៥ដុល្លារ កើនលើសឆ្នាំមុន៤៥២ដុល្លារក្នុង១តោន។
បើតាមក្រសួងកសិកម្មឲ្យដឹងថា ការដាំដុះកៅស៊ូបានកើនឡើងជាបន្តបន្ទាប់ ជាពិសេសក្នុងពេលតម្លៃ កៅចាប់ងើបឡើងវិញ ប៉ុន្តែលទ្ធភាពផ្ទៃដីពង្រីកការដាំដុះកៅស៊ូនៅកម្ពុជា មានប្រមាណជាង ៥០០.០០០ ហិកតាប៉ុណ្ណោះ។ រហូតមកដល់ពេលនេះ កម្ពុជា បាននាំចេញជ័រស៊ូភាគច្រើនទៅកាន់ប្រទេសវៀតណាម ម៉ាឡេស៊ី សិង្ហបុរី ចិន និងបណ្តាប្រទេសមួយចំនួននៅអឺរ៉ុប៕
