រដ្ឋមន្ត្រីក្រសួងមហាផ្ទៃណែនាំឲ្យសមត្ថកិច្ច ត្រូវរឹតបន្តឹងចំពោះអ្នកជិះម៉ូតូគ្មានមួកសុវត្ថិភាពបន្ថែមទៀត ខណៈអ្នកជិះម៉ូតូស្លាប់ដោយសារគ្រោះថ្នាក់ចរាចរណ៍មានការកើនឡើង។ នេះបើតាមគេហទំព័រអគ្គស្នងការដ្ឋានគរបាលជាតិ។
ក្នុងពិធីបិទមហាសន្និបាតសមាគមមិត្តនគរបាលជាតិកម្ពុជាអាណត្តិទី៤ កាលពីថ្ងៃទី២៨ ខែធ្នូ ឆ្នាំ២០១៧ រដ្ឋមន្ត្រីក្រសួងមហាផ្ទៃលោក ស ខេង ថ្លែងថា បច្ចុប្បន្ននេះអត្រាអ្នកស្លាប់ដោយសារគ្រោះថ្នាក់ចរាចរណ៍បានកើនឡើងជាបន្តបន្ទាប់ ហើយអ្នកដែលគ្រោះថ្នាក់ដល់ជីវិតភាគច្រើន ជិះម៉ូតូដោយគ្មានពាក់មួកសុវត្ថិភាព គឺមានរហូតដល់៧៨ភាគរយ។
របាយការណ៍របស់នគរបាលជាតិឲ្យដឹងថា គ្រោះថ្នាក់ចរាចរណ៍រយៈពេល១០ខែកន្លងមកនេះ មានជិត៣ពាន់ករណី (២ ៩៥៨) សម្លាប់មនុស្សជាង១ពាន់៤រយនាក់ (១៤៦៩) និងរបួសចំនួន ៤.៥៣០នាក់ ហើយជាមធ្យមក្នុងមួយថ្ងៃ មានអ្នកស្លាប់ប្រមាណ៥នាក់ និងរបួស ១៥នាក់ ហើយភាគច្រើននៃអ្នកស្លាប់គឺ មិនបានពាក់មួកសុវត្ថិភាព។
បើតាមតួលេខនេះ ក្រសួងថា ចំនួនអ្នកស្លាប់នេះ លើសឆ្នាំមុន ៤៤នាក់ បើប្រៀបធៀននឹងឆ្នាំ២០១៦ ក្នុងរយៈពេលដូចគ្នា៕