សហព័ន្ធស្រូវអង្ករកម្ពុជាបានឲ្យដឹងថា តម្លៃស្រូវស្ទើរគ្រប់ប្រភេទនៅឆ្នាំនេះ មានការកើនឡើង ចន្លោះពី១០០ទៅ២០០រៀលក្នុង១គីឡូក្រាម បើប្រៀបធៀបជាមួយឆ្នាំ២០១៦។
អគ្គលេខាធិការសហព័ន្ធស្រូវអង្ករកម្ពុជាលោក មូល សារិទ្ធ ប្រាប់វីអូឌីនៅថ្ងៃនេះថា មូលហេតុដែលនាំឲ្យតម្លៃស្រូវ កើនឡើងនេះមានមូលហេតុពីរសំខាន់គឺ គុណភាពស្រូវល្អជាងមុន និងតម្រូវការស្រូវលើទីផ្សារអន្តរជាតិ ដែលទទួលទិញពីកម្ពុជាកើនឡើង។
បើតាមលោក មូល សារិទ្ធ ឲ្យដឹងថាតម្លៃស្រូវនៅឆ្នាំ សម្រាប់ស្រូវសែនក្រអូប មានតម្លៃ៩០០ទៅ១០០រៀល ស្រូវផ្ការំដួលនិងផ្កាម្លិះតម្លៃ១១០០ទៅ១២០០រៀល ចំណែកស្រូវ អ៊ីអ៊ែរ វិញមានតម្លៃជាង៨០០រៀល។ លោកពន្យល់មូលហេតុនៃការឡើងថ្លៃ។
លោកថា៖ «ទី១ កត្តាទីផ្សារ ទី២ គុណភាពស្រូវ គាត់ប្រើពូជបានល្អ ហើយទឹកភ្លៀងក៏វាល្អដែរ មួយទៀតទាក់ទងជាមួយនឹងតម្រូវការ នៅពេលដែលតម្រូវការវាមានការកើនធម្មតាតម្លៃវានឹងឡើងហើយ ពីព្រោះម្នាក់ទិញច្រើនទិញស្តុកទុក»។
អគ្គលេខាធិការសម្ព័ន្ធនៃសហគមន៍កសិករកម្ពុជាលោក ថេង សាវឿន អះអាងខុសពីសហព័ន្ធស្រូវអង្ករដោយថា ស្រូវឡើងថ្លៃដោយសារ នៅតាមខេត្តមួយចំនួនស្រូវមិនសូវល្អ បានទិន្នផលទាប និង មិនសូវមានស្រូវលក់។
ទោះយ៉ាងណាលោកថា ប្រសិនបើតម្លៃស្រូវឡើងថ្លៃជាងពេលបច្ចុប្បន្ន លោកថា វាអាចជួយឲ្យជីវភាពកសិករកាន់តែប្រសើរ និងកាត់បន្ថយការធ្វើចំណាកស្រុករបស់កសិករដោយសារ ការជំពាក់លុយធនាគារផងដែរ។
លោកថា៖ «ស្រូវរបស់ពួកគាត់មិនបានផលល្អដូចឆ្នាំមុនទេ ជាហេតុធ្វើឲ្យការលក់ស្រូវរបស់ពួកគាត់ហ្នឹង មានតម្លៃគួរសម ហើយអ្នកខ្លះគាត់អត់បានលក់ស្រូវផងដែរ ពីព្រោះគាត់ទុកបម្រុងចិញ្ចឹមគ្រួសារគាត់ក្នុងការប្រើប្រាស់និងបរិភោគ។ នេះជាអ្វីដែលយើងប្រមូលបាននៅចុងឆ្នាំនេះ បន្ទាប់ពីប្រមូលផលយើងបានជួបជជែកពិភាក្សាកសិករដែលជាអ្នកផលិតនៅក្នុងប្រទេសកម្ពុជា។ នៅតាមបណ្ដាលខេត្តមួយចំនួន ដូចជា ទៅជួបនៅស្វាយរៀង កំពត ព្រះសីហនុ និងតំបន់ស្រូវផងដែរ»។
របាយការណ៍នាំចេញអង្ករកម្ពុជា ចេញដោយលេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ ឲ្យដឹងថា ក្នុងរយៈពេល ១១ខែក្នុងឆ្នាំនេះ កម្ពុជានាំចេញអង្ករជិត ៦០ម៉ឺនតោនទៅកាន់ទីផ្សារអន្តរជាតិ ដោយបានកើនឡើងជិត ២០ភាគរយ បើប្រៀបធៀបនឹងឆ្នាំ២០១៦៕
