សមាគមមន្ត្រីរាជការរិះគន់ថ្នាក់ដឹកនំាសាលារដ្ឋមួយចំនួន ដែលឈប់សំរាកនៅថ្ងៃបុណ្យចូលឆ្នាំចិន ថាធ្វើឲ្យប៉ះពាល់ដល់ទំនៀមទម្លាប់ខ្មែរនិងគោលនយោបាយសិក្សារបស់រដ្ឋ។
ប្រធានសមាគមមន្ត្រីរាជការឯករាជ្យកម្ពុជាលោក ហៀក ព្រីង មានប្រសាសន៍នៅថ្ងៃចន្ទនេះថា នៅអំឡុងថ្ងៃបុណ្យចូលឆ្នាំចិន កាលពីថ្ងៃទី២៧ ២៨ និង២៩ ខែមករា លោកសង្កេតឃើញថា សាលារដ្ឋមួយចំនួនដូចជា វិទ្យាល័យបាក់ទូក ស៊ីសុវត្ថិ ចាក់តុមុខ និងនរោត្តមជាដើម លោកថាគ្រូមួយចំនួនមិនបានបង្រៀនសិស្សដូចថ្ងៃធម្មតាទេ ដោយលោកសួរគ្រូ គ្រូថាមិនមានសិស្សមករៀន ចំណែកសិស្សវិញថាគ្រូមិនបង្រៀន ព្រោះមានសិស្សមករៀនតិចពេក។
លោក ហៀក ព្រីង រិះគន់ថា បើគ្រូនិងសិស្សឆ្លើយដាក់គ្នាទៅវិញទៅមក ហើយនាំគ្នាឈប់សំរាកថ្ងៃបុណ្យចូលឆ្នាំចិន ដែលមិនមែនបុណ្យប្រពៃណីជាតិខ្មែរនោះ ធ្វើឲ្យប៉ះពាល់ដល់កម្មវិធីសិក្សានិងគោលនយោបាយរបស់រដ្ឋាភិបាល។ លោកមានប្រសាសន៍ថា៖ «ក្នុងនាមយើងជាម្ចាស់ប្រទេស ឬមួយក៏ជាគោលការណ៍របស់រដ្ឋាភិបាល មានន័យថា យើងមិនមានគោលការណ៍ណាទៅតាមប្រតិទិន ការឈប់សំរាករបស់ក្រសួងទេ ហើយសុំបញ្ជាក់ថា មិនមែនគេឈប់ទេ មានន័យថា យើងប្រើភាសាឈប់ វាអត់ឈប់ទេ មានន័យថា គ្រាន់ថាយើងទៅ[សាលា]វាអត់ឃើញមានសិស្សមករៀន គ្រូថាសិស្សមិនមករៀន សិស្សថាគ្រូមិនមករៀន វាធ្វើឲ្យសាលាមិនមានសិស្សរៀន»។
យ៉ាងណាក៏ដោយ VOD មិនអាចសុំការបំភ្លឺជុំវិញករណីនេះ ពីនាយកវិទ្យាល័យបាក់ទូក ស៊ីសុវត្ថិ ចាក់តុមុខ សាលានរោត្តម និងនាំពាក្យក្រសួងអប់រំបានទេនៅថ្ងៃចន្ទនេះ។
ប្រធានសមាគមគ្រូបង្រៀនឯករាជ្យកម្ពុជា លោកស្រី អ៊ុក ឆាយ៉ាវី មានប្រសាសន៍ថា ដើម្បីកុំឲ្យសិស្ស និងគ្រូ ឆ្លើយដាក់គ្នាទៅវិញទៅមក លោកស្រីថា រដ្ឋាភិបាលត្រូវធ្វើការដាក់លក្ខខណ្ឌដល់លោកគ្រូ-អ្នកគ្រូ ឲ្យដាក់កម្មវិធីប្រឡងឬស្រាវជ្រាវនៅថ្ងៃបុណ្យនោះ។ លោកស្រីបញ្ជាក់ថា៖ «ដើម្បីឲ្យសិស្សានុសិស្ស កុំឲ្យរុញថាមកពីគ្រូ មកពីសិស្ស លុះត្រាតែក្រសួងរកវិធីសាស្ត្របែបណាដាក់ពេលថ្ងៃចូលឆ្នាំចិន យួន ឲ្យចំថ្ងៃប្រឡងឆមាស ហើយការប្រឡងឆមានលុះត្រាតែមានការចុះឃ្លាំមើល ក៏មានការចុះអធិការ កិច្ច នៅថ្ងៃហ្នឹងដែរ[ថ្ងៃចូលឆ្នំាចិន] កុំឲ្យក្រសួងដាក់តែនៅថ្នាក់ក្រោមតាមសាលាបង្រៀន ប៉ុន្តែខ្លួនឆ្លៀតពេលទៅសែនចិន យួន ដូចគ្នា បើមានវិធីសាស្ត្របែបហ្នឹង សិស្សអត់មានឈប់ទេ យ៉ាងហោចណាស់ក៏ រៀនបាន៩០%ដែរ»។
គួរឲ្យកត់សំគាល់ ជារៀងរាល់ឆ្នាំ នៅពេលបុណ្យចូលឆ្នំាចិនចំនួន៣ថ្ងៃ សិស្សានុសិស្សនៅសាលាឯកជន និងសាលារដ្ឋមួយចំនួនតែងតែឈប់ ដោយពួកគេបន្ទោសគ្នាទៅវិញទៅមក ដោយគ្រូថា មិនមានសិស្សមករៀន តែសិស្សថាមិនមានគ្រូបង្រៀន។ ករណីនេះ ធ្វើឲ្យមន្ត្រីរាជការឯករាជ្យ និងសមាគមគ្រូបង្រៀនឯករាជ្យកម្ពុជា រិះគន់ថា ធ្វើឲ្យប៉ះពាល់ដល់ការសិក្សារបស់សិស្ស៕