តុលាការរាជធានីភ្នំពេញបានសម្រេចឲ្យលោក សម រង្ស៊ី ចាញ់ក្តីលោក ហ៊ុន សែន មួយករណីទៀត ដោយឲ្យអតីតប្រធានបក្សប្រឆាំងរូបនេះ ជាប់ពន្ធនាគារ ១ឆ្នាំ ៨ខែ ពាក់ព័ន្ធនឹងបណ្តឹងដែលថាលោក សម រង្ស៊ី បានចោទរដ្ឋាភិបាលថានៅពីក្រោយនៃអំពើឃាតកម្មលើលោកបណ្ឌិត កែម ឡី។
ចៅក្រមសាលាដំបូងរាជធានីភ្នំពេញ លោក អ៊ី ថាវរៈ នៅព្រឹកថ្ងៃទី៣០ មីនានេះ បានសម្រេចឲ្យលោក សម រង្ស៊ី ជាប់ពន្ធនាគារ ១ឆ្នាំ ៨ខែ និងពិន័យជាប្រាក់ចូលរដ្ឋ ១០លានរៀល និងឲ្យសងសំណងចិត្តទៅលោក ហ៊ុន សែន ១០០រៀលលុយខ្មែរ ពីបទបរិហារកេរ្តិ៍និងញុះញង់ឲ្យបង្ករអសន្តិសុខដល់សង្គម។
មេធាវីការពារក្តីលោក សម រង្ស៊ី គឺលោក សំ សុគង់ យល់ថាការសម្រេចនេះមិនមានយុត្តិធម៌សម្រាប់កូនក្តីលោក។ អយុត្តិធម៌ព្រោះលោកថា ការសម្រេចនេះគឺធ្វើឡើងដោយគ្មានភស្ភុតាងគ្រប់គ្រាន់ និងមិនមានអ្វីដែលអាចបញ្ជាក់បានថាកូនក្តីរបស់ខ្លួនប្រព្រឹត្តនូវបទញុះញង់ដូចការចោទប្រកាន់នោះទេ។
លោកថា៖ «កូនក្តីខ្ញុំនិយាយតែពាក្យមួយទេគឺពាក្យថារដ្ឋអំណាច ពាក្យហ្នឹងបើយើងនិយាយជាទូទៅគឺអត់សំដៅលើរាជរដ្ឋាភិបាល អត់សំដៅលើក្រុមរដ្ឋអំណាចអីជាក់លាក់ទេព្រោះអីដោយសារជួនការមានមនុស្សមួយក្រុមហ្នឹងគាត់អាចប្រកាសថា រដ្ឋអំណាច ឬជាអីដែលពាក់ព័ន្ធ ឬជារដ្ឋអំណាចមួយដែលមិនពិតប្រាកដនោះណា។ ព្រោះអីពាក់ព័ន្ធនឹងញុះញង់ឬក៏បរិហារកេរ្តិ៍ហ្នឹងលុះត្រាតែយើងសំដៅលើបុគ្គលណាមួយជាក់លាក់»។
ទោះជាយ៉ាងណាលោក សំ សុគង់ ថានឹងពិភាក្សាជាមួយកូនក្តីលោកដើម្បីប្តឹងទៅសាលាឧទ្ធរណ៍បន្តទៀត។
សាស្ត្រាចារ្យវិទ្យាសាស្ត្រនយោបាយលោក ឯម សុវណ្ណារ៉ា យល់ថាបណ្តឹងរវាងលោក ហ៊ុន សែន ទៅលើលោក សម រង្ស៊ីនេះ ជាបណ្តឹងដែលគេអាចមើលឃើញគ្រប់គ្នារួចហើយពីលទ្ធផលនៃបណ្តឹងនោះ។ ចំពោះការសម្រេចសេចក្តីនេះវិញលោកថា បើទោះជាតុលាការអះអាងខ្លួនសម្រេចដោយផ្អែកលើភស្ភុតាង និងវិនិច្ឆ័យដោយត្រឹមត្រូវក៏ដោយ ក៏ការសម្រេចនេះត្រូវបានមជ្ឈដា្ឋនទូទៅវាយតម្លៃបានហើយថាគឺស្ថិតក្រោមសម្ពោធនយោបាយរបស់បក្សកាន់អំណាច។
លោកថា៖ «ពាក់ព័ន្ធឥទ្ធិពលរបស់តុលាការនៅក្រោមឥទ្ធិពលរបស់នីតិប្រតិបត្តិ អញ្ចឹងក៏ពិបាករកយុត្តិធម៌សម្រាប់បុគ្គលទូទៅដែរ អាហ្នឹងដែលធ្វើឲ្យមហាជនទូទៅអាចមើលឃើញថាបណ្តឹងនេះគឺនាយករដ្ឋមន្ត្រីគាត់ឈ្នះ ក៏ប៉ុន្តែនៅក្នុងសម័យកាលនេះ នាយករដ្ឋមន្ត្រីគាត់មិនយកលុយដោយសារតែ គាត់គិតអំពីភាពត្រឹមត្រូវរបស់គាត់ ហើយជាទូទៅបុគ្គលសាធារណៈគួរតែប្រកាន់យកគោលការណ៍បែបនេះឯងមិនបាច់យកប្តឹងយកឈ្នះយកចាញ់យកសំណង ផ្លូវចិត្តអីទេព្រោះបុគ្គលសាធារណៈធ្វើការដើម្បីសាធារណៈជនទូទៅ។ គាត់យកសំណងចូលរដ្ឋគឺវាអត់បញ្ហាទេ តែប្រសិនជាគាត់យកសំណងចូលខ្លួនគាត់ដូចករណីលោក គឹម សុខ អីអាហ្នឹងករណីហ្នឹងគឺវាអត់ល្អមើល»។
គួរបញ្ជាក់ផងដែរថា មានមនុស្ស៣នាក់ហើយដែលត្រូវរដ្ឋាភិបាលប្តឹងពាក់ព័ន្ធនឹងការលើកឡើងរបស់ពួកគេដែលចោទរដ្ឋាភិបាលថានៅពីក្រោយការសម្លាប់លោក កែម ឡី។ មនុស្សចំនួន៣នាក់នោះមានលោក សម រង្ស៊ី លោកស្រីថាក់ ឡានី និងលោក គឹម សុខ។ បណ្តឹងដែលរដ្ឋាភិបាលប្តឹងលោក សម រង្ស៊ី និងលោកស្រី ថាក់ ឡានី បានទាមទារសំណងពីពួកគេតែ១រយរៀល ខណៈដែល លោក គឹម សុខ ត្រូវបានលោក ហ៊ុន សែន ប្តឹងទាមទាររហូតដល់ ៥០ម៉ឺនដុល្លារក្នុងករណីដូចគ្នានេះ៕