ប្រធានាធិបតីអាមេរិក លោក ដូណាល់ ត្រា ធ្វើដំណើរតាមដងផ្លូវនៅថ្ងៃនេះ ដើម្បីអបសាទរការកាន់តំណែងគ្រប់ ១០០ថ្ងៃនៅឯសេតវិមាន ដោយមានការស្រែកអបអរពីអ្នកគាំទ្រនៅឯពិធីជួបជុំមួយមានលក្ខណៈដូចគ្នាទៅនឹងយុទ្ធនាការឃោសនាបោះឆ្នោត ដោយបានលោកបានកោតសរសើរពីជោគជ័យដំបូង ផ្ទុយទៅនឹងអ្នករិះគន់លោក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
លោក ត្រាំ បានប្រាប់មហាជននៅរដ្ឋផេនស៊ីវ៉ានៀថា លោកទើបតែចាប់ផ្ដើមសម្រេចបានការសន្យារបស់លោកនាអំឡុងយុទ្ធនាការឃោសនាបោះឆ្នោត។ លោកបានវាយប្រហារម្ដងហើយម្ដងទៀតទៅលើប្រព័ន្ធផ្សព្វផ្សាយគ្មានសមត្ថភាព គ្មានភាពស្មោះត្រង់ ដោយថា ពួកគេមិនបានប្រាប់ការពិតអំពីជោគជ័យរបស់រដ្ឋបាលលោកនោះទេ។
ការប្រមូលផ្ដុំនេះ បានកើតឡើងនៅក្នុងថ្ងៃតែមួយនឹងការដង្ហែក្បួនអាកាសធាតុ ដែលបាតុកររាប់ពាន់នាក់បានឡោមព័ទ្ធសេតវិមាន ហើយវាក៏បានកើតឡើងជួនគ្នានឹងកម្មវិធីបរិភោគអាហារប្រចាំឆ្នាំជាមួយអ្នកសារព័ត៌មាន នៅទីក្រុងវ៉ាស៊ីតោន។
លោក ត្រាំ និងបុគ្គលិករបស់លោក បានសម្រេចរំលងចោលកម្មវិធីជួបជុំបរិភោគអាហារជាមួយអ្នកសារព័ត៌មាន ដោយសារតែលោកយល់ថា លោកពុំទទួលបានភាពយុត្តិធម៌ពីសារព័ត៌មាន៕
លោក ត្រាំ ថ្លែងប្រាប់មហាជនថា ក្រុមតារាសម្ដែងហូលីវូដ និងប្រព័ន្ធផ្សព្វផ្សាយនៅទីក្រុងវ៉ាស៊ីងតោន កំពុងតែលួងលោមគ្នាទៅវិញទៅមកនៅក្នុងសាលសណ្ឋាគារមួយ នៅរដ្ឋធានីវ៉ាស៊ីតោន។ លោកបន្តថា ប្រសិនបើការងារសារព័ត៌មានមានភាពស្មោះត្រង់ និងប្រាប់ពីការពិត ប្រព័ន្ធផ្សព្វផ្សាយសមតែទទួលបានទំនុកចិត្តដ៏ធំ៕