ខណៈដែលដំណឹងស្នេហារវាងអ្នកនាង ភិន សុដាលីស និងលោក សួន រ៉ានីរ៉ាស៊ីនី កូនកាត់រុស្សីកាន់តែបានកំរើកឡើង តារាស្រីរូបនេះមិនត្រឹមតែមិនប្រកែកនោះទេ គឺថែមទាំងជ្រើសយកលោក ស៊ីនី អោយសម្ដែងតួឯកក្នុងរឿង «ណូលីណូឡា» របស់មហាហង្ស ដែលនាងធ្វើជាអ្នកចាត់ការផលិតកម្មនោះផង។
អ្នកនាងបានសារភាពថាពិតជាចូលចិត្តតួឯកប្រុសរូបនេះ ក្រោយពេលស្គាល់គ្នាប្រាកដមែន ប៉ុន្តែមិនមានន័យថាអ្នកមានទំនាក់ទំនងលើសពីមិត្តភ័ក្រ្តរួចហើយ ទើបយកលោកមកលើកក្នុងរឿងថ្មីរបស់ផលិតកម្មមហាហង្សនោះឡើយ។
ភិន សុដាលីស និយាយថា រវាងអ្នកនាងនិងតួឯកប្រុសរឿង «ណូលីណូឡា» ពិតជាបានទាក់ទងគ្នាលើសពីមិត្តធម្មតានិងឧស្សាហ៍ចេញទៅណាមកជាមួយគ្នាប្រាកដមែន ដោយសារតែ លោកមានចរឹតយកចិត្តទុកដាក់និងធ្វើអោយអ្នកនាងសប្បាយចិត្តក្នុងពេលដើរជាមួយ។
យ៉ាងណាមិញ អ្នកនាងថាលោកនៅមិនទាន់ចាត់ថាប្រុសស្នេហ៍ថ្មីរបស់ខ្លួននោះទេ បើទោះជាអ្នកនាងបានទទួលស្គាល់ថារវាងអ្នកនាងនិងលោកមានភាពស្និទ្ធិគ្នា និងចូលចិត្តគ្នាលើសពីមិត្តធម្មតា។ នាងនៅតែចាត់ទុកថាតួឯកប្រុសរឿង «ណូលីណូឡា» ជាមិត្តភ័ក្រ្ត តែបានចាត់ទុកថាបើទំនាក់ទំនងនៅតែល្អដូចបច្ចុប្បន្ន គឺដំណឹងស្នេហាច្បាស់ការពិតជាកើតមានឡើង។ អ្នកនាងថាបានស្គាល់លោកស៊ីនីតាមរយៈការបង្ហាញខ្លួនក្នុងសិល្បៈហើយក្រោយពីសេពគប់គ្នាអ្នកនាងក៏ពេញចិត្តលោកនិងបានសម្រេចចិត្តជ្រើសលោកអោយមកសម្ដែងជាតួឯកក្នុងរឿង «ណូលីណូឡា» ដែលជារឿងរបស់មហាហង្សដែលនាងជាអ្នកចាត់ចែងតួ។
អ្នកនាងបដិសេធថាមិនមែនដោយសារតែចង់យកចិត្តតួប្រុសដែលអ្នកនាងពេញចិត្ត ហើយប្រគល់តំណែងតួឯកអោយសម្ដែងនោះទេ ពោលគឺបណ្ដាលមកពីឪពុករបស់អ្នកនាងក៏ពេញចិត្តចំពោះការសម្ដែងរបស់លោកក្នុងរឿងពីមុនៗមកដែរ ទើបអ្នកនាងយល់ថាការជ្រើសអោយលោក ស៊ីនី សម្ដែងតួឯកជាមួយអ្នកនាងគឺជារឿងចៃដន្យ។
អ្នកនាងសារភាពថាស្ថានភាពរវាងអ្នកនាងនិងតួឯករឿង «ណូលីណូឡា» មានទម្រង់តែមួយនឹងពេលអ្នកនាងពាក់ព័ន្ធស្នេហ៍ជាមួយលោក ប៉ែន ចំរ៉ុង តែអ្នកនាងប្រកាសថាស្នេហារបស់អ្នកនាង បើពិតជាមានជាមួយលោក ស៊ីនី មែន ក៏មិនលឿននិងធ្វើឡើងដោយចិត្តឯងដូចមុននោះដែរ។
អ្នកនាងការផ្ដល់ឱកាសអោយលោក ស៊ីនី សម្ដែងតួឯកជាមួយអ្នកនាង គឺមិនមែនដើម្បីលួងចិត្តតួប្រុសអោយជ្រើសរើសអ្នកនាងដែលជាស្រ្តីមេម៉ាយនោះទេ តែអ្នកនាងបញ្ជាក់ថាបើអ្នកនាងមិនពេញចិត្តចំពោះតួថ្មីម្នាក់នេះមុនពេលឪពុកច្រើសរើសទេ ក៏លោក ស៊ីនី អាចមិនបានតំណែងនេះដូចគ្នា។
អ្នកនាងសារភាពថាខ្លួនពេញចិត្តអោយឪពុកជ្រើសយក ដោយសារតែយល់ឃើញថាលោក ស៊ីនី មានចំណុចល្អច្រើន ចាប់តាំងពីអ្នកនាងបានស្គាល់ ជាពិសេសគឺលោកចូលចិត្តកូនស្រីរបស់អ្នកនាងតែម្ដង។
លោក អ៊ិន សុភិន ធ្លាប់បានបញ្ជាក់ថាមុនពេលពាក់ព័ន្ធនឹងលោក ប៉ែន ចំរ៉ុង អ្នកនាង ភិន សុដាលីស បានរំអុកសុំអោយលោកសម្ដែងតួឯកស្ទើរតែគ្រប់រឿងរបស់ផលិតកម្មមហាហង្ស ដោយលោកក៏បានយល់ព្រមដោយមិនបានដឹងពីទំនាក់ទំនងនៅខាងក្រោយខ្នងរបស់កូនស្រី។
លោកថាទំនាក់ទំនងស្នេហារបស់កូនស្រី និងលោក ប៉ែន ចំរ៉ុង គឺបានលេចកាន់តែច្បាស់ ក្រោយពេលលោកសម្រេចចិត្តអោយសម្ដែងជាតួឯកជាមួយគ្នាក្នុងរឿង «អាព្រឿងងាប់ហើយ» ដោយក្រោយបញ្ចប់រឿងនេះ កូនស្រីលោក និងតួឯកប្រុសក៏បំបែកលែងដាច់តែម្ដង។
យ៉ាងណាមិញ លោកបញ្ជាក់ជាថ្មីថា ប្រសិនបើ ភិន សុដាលីស ពិតជាស្រឡាញ់តួឯកប្រុសលោក ស៊ីនី តាមរយៈការអោយសម្ដែងក្នុងរឿង «ណូលីណូឡា» ដែលលោកទើបតែក្រុងពាលីមុននេះពិតមែន ក៏លោកមិនប្រកាន់នោះដែរ ដោយសារតែលោកក៏សម្គាល់ថាលោក ស៊ីនី ក៏ជាបុរសល្អ។
លោកនិយាយថា «ខ្ញុំដឹងថាពីរនាក់ហ្នឹងរាប់អានគ្នា ហើយដោយសារតែតួប្រុសហ្នឹងគាត់សម្ដែងល្អផងទើបខ្ញុំយកមកអោយសម្ដែងតួឯកជាមួយ ដាលីស ក្នុងរឿង «ណូលីណូឡា» តែបើថតម៉ារឿងហ្នឹងពីរនាក់ហ្នឹងចឹងដូចកាលជាមួយ ប៉ែន ចំរ៉ុង ក៏អត់មានអីដែរ បើតួប្រុសហ្នឹងគាត់ល្អដែរហ្នឹង!»។
លោកបានបង្ហាញពីការជឿជាក់ចំពោះកូនស្រី ដោយអះអាងថាអ្នកនាងមិនជ្រើសមនុស្សខុសទៀតទេ បន្ទាប់ពីអ្នកនាងរងការឈឺចាប់ម្ដងហើយ ជាមួយលោក ប៉ែន ចំរ៉ុង ព្រោះតែបានបង្កាត់ភ្លើងស្នេហ៍ជាមួយតួប្រុសថ្មីនេះ។ លោកថា ភិន សុដាលីស បានក្លាយជានារីមេម៉ាយម្ដងហើយ អ៊ីចឹងវាមិនមានអ្វីចម្លែកទេ បើអ្នកនាងសំឡឹងឃើញបុរសណាម្នាក់ដែលខ្លួនស្រឡាញ់ ដើម្បីអោយនាងសប្បាយចិត្ត។
លោកថាខ្លួនជាឪពុកគ្មានសិទ្ធិដាក់បម្រាមនោះទេ តែលោកក៏នឹងជួយមើលខុសត្រូវកូនស្រីផងដែរ ដើម្បីអោយកូនចេះគិតវែងឆ្ងាយជាងមុន ហើយមិនជួបរឿងជូរចត់ម្ដងទៀត។
លោកថាបានឮពីរឿងគេថាកូនស្រីរបស់លោក និងតួឯកប្រុសរឿង «ណូលីណូឡា» ស្រលាញ់គ្នា ដោយលោកបញ្ជាក់ថាបើមែនក៏រីករាយទទួលយក តែអ្វីដែលលោកមើលឃើញគឺអ្វីៗមិនទាន់ស៊ីជម្រៅ។
អ្នកនាង ភិន សុដាលីស និយាយថានាងមានសិទ្ធិជ្រើសស្នេហាថ្មី តែនាងមិនទាន់គិតថាលោក ស៊ីនី គឺជាបុរសថ្មីជំនួសអោយវត្តមានរបស់លោក ប៉ែន ចំរ៉ុង នោះទេ បើទោះជានាងមានអារម្មណ៍ចូលចិត្តជាងមិត្តភ័ក្រ្តប្រុសដទៃទៀត និងគិតថាល្អមានចំណុចល្អច្រើនដែលគួរសេពគប់។
អ្នកនាងថាដំណាក់កាលពេលនេះ ទំនាក់ទំនងទ្វេរភាគីរវាងខ្លួន និងតួឯកប្រុសរឿងថ្មីដែលនាងចាត់ចែង គឺស្ថិតនៅមិត្តភាពច្រើនស្នេហា ប៉ុន្តែក៏បានបង្ហើបផងដែរថាលោកមានលក្ខណៈច្រើនយ៉ាងខុសពីបុរសដែលអ្នកនាងបានស្គាល់។
លោក សួន រ៉ានីរ៉ាស៊ីនី បានអះអាងថាលោកជាកូនកាត់រុស្ស៊ី ដែលមានម្ដាយជាជនជាតិរុស្ស៊ី និងមានឪពុកជាជនជាតិខ្មែរ។ លោកបានរស់នៅចំរើនវ័យក្នុងប្រទេសរបស់ម្ដាយអស់រយៈពេលច្រើនឆ្នាំ ដោយទើបតែផ្លាស់មករស់នៅប្រទេសកម្ពុជាក្រោយពេលលោកបានធំក្ដីហើយប៉ុណ្ណោះ។
លោកថាខ្លួនអត់មានសង្សារចាស់ឬសង្សារថ្មីនោះទេ មុនពេលទាក់ទងរាប់អានជាមួយអ្នកនាង ភិន សុដាលីស ទើបលោកថាទំនាក់ទំនងជាមួយមេម៉ាយរូបនេះ គឺមិនមានការជំទាស់ណាមួយ។ លោកសរសើរថាអ្នកនាង ភិន សុដាលីស ជានារីឆ្លាត និងមានគំនិតវែងឆ្ងាយ ទើបលោកពេញចិត្តហើយចូលចិត្តទៅណាមកណាមួយ។
យ៉ាងណាមិញ លោកថាមិនហ៊ានចាត់ទុកថាអ្នកនាងជាសង្សារនោះទេ ដោយសារតែលោករង់ចាំអោយទំនាក់ទំនងច្បាស់លាស់ជាងនេះ ដើម្បីកុំអោយខ្មាស់មហាជនក្រោយពេលមិនចុះសម្រុង៕