ក្រសួងរៀបចំដែនដីឲ្យដឹងថា គិតត្រឹមដំណាច់ខែឧសភា ប្រជាពលរដ្ឋរស់នៅអាគារប៊ុលឌីញ «ស» ជាច្រើនគ្រួសារបានទទួលយកប្រាក់សំណងជាថ្នូរនឹងការចាកចេញពីអគារ។
ក្នុងសេចក្ដីប្រកាសព័ត៌មាន ចេញផ្សាយនៅថ្ងៃអង្គារនេះ ក្រសួងរៀបចំដែនដី នគរូបនីយកម្ម និងសំណង់ ឲ្យដឹងថា គិតត្រឹមថ្ងៃទី៣០ ខែឧសភា ឆ្នាំ២០១៧ ប្រជាពលរដ្ឋរស់នៅអាគារប៊ុលឌីញ «ស» ចំនួន៤៦៤គ្រួសារហើយ បានយល់ព្រមលក់បន្ទប់ស្នាក់នៅរបស់ពួកគេ ពោលគឺស្មើនឹង៩៤,៣ភាគរយ នៃចំនួនពលរដ្ឋចំនួន៤៩២គ្រួសារ។
ការទទួលយកប្រាក់សំណងជាថ្នូរនឹងការចាកចេញពីអគារប៊ុលឌីញ គឺបន្ទាប់ពីមានការសម្រួបសម្រួលរវាងប្រជាពលរដ្ឋរស់នៅក្នុងអគារ ក្រុមហ៊ុនវិនិយោគ និងក្រសួងរៀបចំដែនដី កាលពីថ្ងៃទី១២ខែឧសភាកន្លងទៅ។
ក្នុងកិច្ចប្រជុំសម្រួបសម្រួលនោះ រដ្ឋមន្ដ្រីក្រសួងរៀបចំដែនដីលោក ជា សុផារ៉ា អះអាងប្រាប់ប្រជាពលរដ្ឋថា រដ្ឋាភិបាលអាចផ្ដល់សំណងឲ្យអ្នករស់នៅអាគារប៊ូឌីញ «ស» ក្នុង១ម៉ែត្រការ៉េ ត្រឹម១ ៤០០ដុល្លារអាមេរិក និងសន្យាបន្ថែមទឹកប្រាក់ចំនួន១០០ដុល្លារទៀត ក្នុងមួយគ្រួសារ សម្រាប់ការរើផ្ទះចេញពីអគារ៕