ក្នុងកិច្ចសម្ភាសន៍កាលពីថ្ងៃទី២៩ សីហា តារាសម្ដែងល្បីឈ្មោះ កញ្ញា ពេជ្រ អាវីហ្សា បានអះអាងថា នាងពិតជាមានមោទនភាពណាស់ ដែលឪពុកបង្កើតរបស់នាង គ្រាន់តែជាអ្នករត់ម៉ូតូឌុប ដោយលោកបានបន្តអាជីពមួយនេះតាំងពីនាងនៅក្មេងរហូតដល់ពេលដែលនាងមានលទ្ធភាពចេះរកលុយដោយខ្លួនឯង។
ពាក្យសម្ដីរបស់នាងត្រូវគេចាប់អារម្មណ៍ថា ប្រសិនបើឪពុករបស់នាងបានឮមិនដឹងជារំភើបចិត្តដល់ស្រក់ទឹកភ្នែកប៉ុណ្ណានោះទេ ក្នុងពេលដែលមនុស្សភាគច្រើនតែងបង្ហាញការតូចចិត្តដែលមានសំណាងមិនល្អកើតមកជាកូនអ្នកក្រ ជាពិសេសកើតជាកូនអ្នកមានអាជីពជាអ្នករត់ម៉ូតូឌុប តែនាងបែរជាអះអាងថាខ្លួនមានមោទនភាពទៅវិញ ដែលមានឪពុកជាអ្នករត់ម៉ូតូឌុប។
កញ្ញា ពេជ្រ អាវីហ្សា ដែលមានឈ្មោះដើមថា សុខ ម៉ី បានអះអាងថា ក្នុងគ្រាអតីតកាល នាងគ្រាន់តែជាកូនស្រីម្នាក់នៅក្នុងគ្រួសារមួយដែលមានជីវភាពមហាកម្សត់ប៉ុណ្ណោះ ដោយសារតែទាំងឪពុកទាំងម្ដាយ សុទ្ធតែខ្វះលទ្ធភាពធ្វើការនិងរកស៊ីធំដុំដូចឪពុកម្ដាយភាគច្រើនដែលរស់នៅភ្នំពេញ ហើយធ្វើអោយនាងនិងបងប្អូន២នាក់មានការលំបាកជាខ្លាំង។
ក្នុងពេលនាងមិនទាន់បានរួមចំណែកនៅក្នុងគ្រួសារ នាងអះអាងថាស្ថានភាពរស់នៅមិនខុសពីអ្នកក្រលំបាកនោះទេ ដោយសារតែឪពុកមានមុខរបរត្រឹមជាតែអ្នករត់ម៉ូតូ ហើយម្ដាយក៏មិនមានលទ្ធភាពរកការងារបាននឹងគេ ដែលធ្វើអោយគ្រួសាររបស់នាងយ៉ាប់យ៉ឺន។ នាងសម្រេចចិត្តឈប់រៀនតាំងពីថ្នាក់ទី៩ ទៅបម្រើការជាអ្នកលក់ដូរភីហ្សាតាមហាងនិងក្រោយមកក៏បានទៅបម្រើការនៅកាស៊ីណូណាហ្គាជាអ្នកដូរកាក់។
នាងថាលោកឪពុកនិងរូបនាងផ្ទាល់ បានក្លាយជាបង្អែករបស់គ្រួសារយ៉ាងខ្លាំងនៅក្នុងពេលនោះ ដោយឪពុកប្រឹងរត់ម៉ូតូទាំងយប់ទាំងថ្ងៃ ហើយនាងក៏ប្រឹងធ្វើការដើម្បីយកប្រាក់មកផ្គត់ផ្គង់ដល់គ្រួសារដែលមានការចំណាយខ្ពស់។
នាងបានកោតសរសើរចំពោះ លោក សុខ តុង ជាឪពុករបស់នាងយ៉ាងខ្លាំង ដែលប្រឹងតស៊ូរត់ម៉ូតូមិនខ្លាចនឿយហត់ ដោយនាងបានចាត់ទុកថា បើគ្មានឪពុករបស់នាងប្រឹងប្រែងមិនស្គាល់ឈឺជា ប្រហែលជាគ្រួសាររបស់នាងដួលស្លាប់បាត់ទៅហើយ ជាពិសេសគឺរូបនាងផ្ទាល់ ក៏ប្រហែលជាមិនអាចនឹងទប់ទប់តម្រូវការរបស់គ្រួសារបស់បានដែរ ដោយសារតែការងាររបស់នាងនៅក្នុងពេលនោះទទួលបានប្រាក់ចំណូលមកជួយគ្រួសារមិ
នច្រើនណាស់ណាទេ។
ខុសពីមនុស្សភាគច្រើនដែលតូចចិត្តព្រោះឪពុកដែលជាមេគ្រួសារមិនមានលទ្ធភាពអោយនាងអាចរៀនបានច្រើន កញ្ញា ពេជ្រ អាវីហ្សា បានអះអាងថាខ្លួននាងសប្បាយចិត្តដែលលោកឪពុកដែលមានមុខរបរត្រឹមតែជាអ្នករត់ម៉ូតូឌុប អាចប្រឹងតស៊ូអោយនាងរៀននៅវិទ្យាល័យបាក់ទូកបានដល់ថ្នាក់ទី៩ មុនពេលដែលនាងសម្រេចចិត្តឈប់រៀនស្វែងរកការងារ។
យ៉ាងណាក៏ដោយ នាងនៅតែមានឱកាសស្វែងយល់នូវការសិក្សាបន្ថែមក្នុងពេលធ្វើការ ទើបនាងអាចប្រើបានព្រមទាំងភាសាខ្មែរ អង់គ្លេស និងចិន មិនខុសពីមនុស្សបានរៀនចប់កម្រិតថ្នាក់ទី១២។ កញ្ញានិយាយថាកម្សត់ណាស់ក្នុងពេលដែលឪពុកនាងត្រូវរត់ម៉ូតូឌុបចិញ្ចឹមកូនតាំងពីតូចដល់ធំ ហើយអ្វីដែលសំខាន់គឺមិនបានបណ្ដោយអោយកូនខ្ចាត់ព្រាត់ក្លាយជាក្មេងអាវ៉ាសែ ក្នុងពេលដែលគ្រួសារអន់ជន្ទល់នាពេលអតីតកាល។
អ៊ីចឹងហើយទើបនាងសម្រេចចិត្តធ្វើសេះធ្វើក្របី មិនអោយឪពពុករបស់នាងបន្តអាជីពជាអ្នករត់ម៉ូតូឌុបដូចមុនទៀតទេ ដោយបានទាំងដើរតួជាមួយបងប្អូន២នាក់ទៀតរបស់នាងប្រឹងប្រែងរកលុយ ដើម្បីបញ្ចប់ភារៈរបស់លោកឪពុកនិងម្ដាយក្នុងពេលដែលអ្នកទាំងពីរក៏មានវ័យកាន់តែជ្រេនោះផង។
នាងនិយាយថាមកទល់ពេលនេះ ឪពុកនាងមានវ័យ៦១ឆ្នាំ ប៉ុន្តែលោកក៏មានសុខភាពមិនសូវអំណោយផលណាស់ដែរ ដោយសារតែកាលពីក្មេង លោកនឿយហត់ខ្លាំងមិនសូវបានសម្រាក ជាពិសេសក្នុងពេលត្រូវសំកុកអង្គុយដឹកម៉ូយគ្មានស្គាល់ម៉ោងសម្រាក ដើម្បីរកប្រាក់ចិញ្ចឹមកូន។
ខុសពីមនុស្សមួយចំនួនដែលមិនហ៊ានបញ្ជាក់ពីមុខរបរបស់ឪពុកដែលគ្រាន់តែជាអ្នករត់ម៉ូតូឌុបម្នាក់ តារារូបនេះបន្តថានាងអត់ខ្មាស់ទេ នៅពេលមនុស្សភាគច្រើនដឹងថាឪពុករបស់នាងគ្រាន់តែជាអតីតអ្នករត់ម៉ូតូឌុបយ៉ាងកម្សត់ម្នាក់ ដោយសារតែលោកមិនមានលទ្ធភាពរកការងារល្អបានធ្វើដើម្បីចិញ្ចឹមកូន។
កញ្ញានិយាយថា «ប៉ាខ្ញុំ គាត់រត់ម៉ូតូឌុបតែរហូតហ្នឹងពីមុន ហើយខ្ញុំអត់លាក់ទេ ផ្ទុយទៅវិញខ្ញុំកោតសរសើរដែលគាត់រត់តែម៉ូតូឌុបសោះ តែអាចចិញ្ចឹមពួកខ្ញុំអោយបានល្អបាន!»។
កញ្ញាបញ្ជាក់ថាមកទល់ពេលនេះ ទាំងឪពុកនិងម្ដាយរបស់នាង មិនមានអ្នកណាបន្តការរកចំណូលនោះទេ ដោយសារតែនាងនិងបងប្អូន២នាក់ទៀតសុទ្ធតែមានការងារនិងមានលទ្ធភាពផ្គត់ផ្គត់ការចំណាយនៅក្នុងគ្រួសារបានគ្រាន់អស់ហើយ។
យ៉ាងណាមិញ នាងថាឪពុកម្ដាយរបស់នាងនៅតែមានបង្ហាញពីការអាណិតនាងនិងកូនៗ២ទៀត ដែលប្រឹងរកលុយ ដោយលោកទាំងពីរចេះតែចង់រកនេះចង់រកនោះជួយនោះផង តែបណ្ដាលមកពីកូនៗមិនអោយរកទើបលោកអ្នកទាំងពីរសម្រាកនៅតែផ្ទះ ហើយឈប់ទាំងស្រុងនូវអាជីពជាអ្នករត់ម៉ូតូឌុប។ នាងថាតាំងពីតូចដល់ធំ
នាងមានផ្ទះតែមួយគត់គឺនៅម្ដុំផ្សាឌុយមិច ដោយអ្នករស់នៅម្ដុំនោះសុទ្ធតែបានដឹងថាឪពុកនាងជាអ្នករត់ម៉ូតូឌុប
ប៉ុន្តែមនុស្សភាគច្រើនមិនមានអ្នកណាមាក់ងាយចំពោះគ្រួសារនាងដូចមុនទៀតទេ បន្ទាប់ពីគ្រួសារអ្នករត់ម៉ូតូឌុបមួយនេះ បានប្រែក្លាយខ្លួនជាអ្នកគ្រាន់បើក្រោយពេលដែលនាងក៏បានក្លាយជាតារាសិល្បៈ
ហើយបងប្អូនរបស់នាងក៏មានការងារល្អៗបានធ្វើ។
ពេជ្រ អាវីហ្សា បញ្ជាក់ថាសម្រាប់អ្នកខ្លះពេលនិយាយពីមុខរបររបស់ឪពុកគឺអៀនមាត់ ប៉ុន្តែសម្រាប់នាងអត់ខ្មាស់នោះទេ ដោយចាត់ទុកថាបើមនុស្សដែលរាប់អាននាងដឹងថាគឺជាកូនស្រីរបស់អតីតអ្នករត់ម៉ូតូឌុប
ឈប់រាប់រកនាងក៏នាងមិនខ្វល់។
នាងនៅតែបង្ហាញនូវមោទនភាពដែលបានមានឪពុកត្រឹមតែជាអ្នករត់ម៉ូតូឌុប និងមានម្ដាយត្រឹមតែជាស្រ្តីមេផ្ទះ តែនាងនិងប្អូនៗសុទ្ធតែមានអនាគតល្អនាពេលចុងក្រោយ ដែលផ្ទុយពីគ្រួសារខ្លះដែលមានឪពុកម្ដាយជាអ្នកមានបាន ប៉ុន្តែកូនខ្លះក៏មានក្លាយជាទំពាំងស្អុយសម្រាប់គ្រួសារ។
នាងបញ្ជាក់ថាអោយតែរំលឹកពីអតីតកាលរបស់ខ្លួន គឺនាងនឹកអាណិតចំពោះឪពុកដែលត្រូវរកស៊ីហាលភ្លៀងហាលខ្យល់មុនគេ អ៊ីចឹងហើយទើបនាងបានតាំងចិត្តថាអោយតែបុរសណាម្នាក់ដែលចង់បាននាងមានចិ
ត្ត ឬផ្នត់គំនិតចង់មើលស្រាលដល់គ្រួសារនាង ជាពិសេសគឺលោកឪពុកនាង គឺនាងសុខចិត្តដោយចោល បើទោះជាបុរសម្នាក់នោះមានប្រាក់កាសនិងការងារល្អមកជះក្នុងទំនាក់ទំនងរបស់នាងក៏ដោយ។
នាងសារភាពថាមិនទាន់មានស្នេហាថ្មីនោះទេ បន្ទាប់ពីនាងផ្ទុះឡើងនូវរឿងរងការវាយដំពីសំណាក់អតីតសង្សារដែលជាប្អូនថ្លៃ លោកឧកញ៉ា ទ្រី ភាព កាលមុន៕
