មន្ទីរសាធារណៈការរាជធានីភ្នំពេញ បានឲ្យដឹងថា ដើម្បីកាត់បន្ថយការលិចក្នុងទីក្រុង នោះមន្ទីរសាធារណៈការត្រូវការសាងសងអណ្ដូងលូចំនួន ៣ពាន់បន្ថែមទៀត សម្រាប់រំដោះទឹកបានឆាប់រហ័ស។
ថ្លែងនៅក្នុងបទសំភាសន៍ជាមួយទូរទស្សន៍បាយ័នកាលពីថ្ងៃទី ២៧ ខែកញ្ញា ប្រធានមន្ទីរសាធារណៈការរាជធានីភ្នំពេញលោក សាំ ពិសិដ្ឋ បានឲ្យដឹងថាបញ្ហាលិចទឹកក្នុងទីក្រុងសព្វថ្ងៃដោយសារខ្វះខាត់នូវអណ្ដូងលូដើម្បីទទួលទឹក ដូច្នេះលោក បានស្នើសុំគោលការណ៍ធ្វើបន្ថែមឲ្យបានចំនួន៣ពាន់ទៀត។
បើតាមការលើកឡើងលោក សាំ ពិសិដ្ឋ បច្ចុប្បន្នភ្នំពេញមានអណ្ដូងលូចំនួន ៤ ៤០០០ រួចមកហើយ តែនៅមិនទាន់គ្រប់គ្រាន់ក្នុងការរំដោះទឹក ដោយអណ្ដូងលូខ្លះ មានគម្លាតឆ្ងាយពីគ្នា និង ខ្លះទៀតត្រូវបានពលរដ្ឋបិទជិតដើម្បី ប្រើជាប្រយោជន៍ផ្ទាល់ខ្លួន។ កណ្តូងលូគឺជា ចន្លោះសម្រាប់ឲ្យទឹកហូរពីលើផ្លូវ ឬ លើដី ចូលក្នុងប្រព័ន្ធលូ ហើយហូរទៅកន្លែងអាងរំដោះទឹក។
លោក សាំ ពិសិដ្ឋបន្តថា ករណីភ្លៀងខ្លាំងដែលបណ្ដាលឲ្យលិចតំបន់ខ្លះនៅភ្នំពេញប៉ុន្មានថ្ងៃនេះ គឺបណ្ដាលមកពីបម្រែបម្រួលអាកាសធាតុ ភ្លៀងក្នុងរយៈពេលខ្លី តែច្រើនលើសចំនុះ ៤០ មីលីម៉ែត្រក្នុងមួយម៉ោង។
លោក សាំ ពិសិដ្ឋ បន្ថែមថា ករណីលិចនេះ ក៏បណ្ដាលមកពីប្រទេសកម្ពុជាទទួយរងទឹកភ្លៀងច្រើន ក្នុងចំណោម ប្រទេស៥ លើពិភពលោក ដែលមាន ភីលីពិន វៀតណាម ថៃ និង ប្រទេសជប៉ុន ទើបបណ្ដាលឲ្យលើសសមត្ថភាពទ្រទ្រង់ទឹកភ្លៀង ។
លោក សាំ ពិសិដ្ឋ ឲ្យដឹងដែរថាក្នុងចំណោមប្រទេសទាំង៥ ដែលទទួលរងទឹកភ្លៀងខ្លាំងនោះ កម្ពុជារំដោះទឹកយឺតយ៉ាវជាងគេ ដោយសារការកសាងហេដ្ឋារចនាសម្ព័ន្ធ នៅកម្ពុជាមានភាពក្មេងខ្ចី ហើយបណ្ដាញលូមានភាពខ្វះខាត់ច្រើនផងដែរ៕