ប្រទេសចិននៅថ្ងៃនេះ បាប្រាប់ទៅភូមាថា ពួកគេគួរតែធ្វើការរួមគ្នាដើម្បីរក្សាស្ថេរភាពនៅតាមព្រំដែនរួមរបស់ពួកគេ នៅចំពោះមុខការផ្ទុះឡើងការវាយប្រហារជាបន្តបន្ទាប់ពីសំណាក់ក្រុមប្រដាប់អាវុធនជនជាតិភាគតិច ទៅលើកម្លាំងសន្តិសុខភូមា ហើយបង្ខំឲ្យមនុស្សរាប់ពាន់នាក់ភៀសខ្លួនឆ្លងព្រំដែនចូលទៅប្រទេសចិន ដើម្បីគេចពីអំពើហិង្សា។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
បើតាម Reuters ដដែល ការវាយប្រហារនានានៅខែនេះ បានប៉ះពាល់យ៉ាងខ្លាំងទៅលើគោលដៅកសាងសន្តិភាពរបស់អ្នកស្រី អ៊ុងសាន ស៊ូជី ជាមួយក្រុមជនជាតិភាគតិច ខណៈចិនកំពុងព្រួយបារម្ភអំពីហានិភ័យនៃអំពើហិង្សានៅភាគខាងជើងភូមា បានរីករាលដាលទៅដល់ព្រំដែនរបស់ខ្លួនដូចឆ្នាំមុន រហូតដល់ពលរដ្ឋចិន ៥នាក់ស្លាប់។
រដ្ឋមន្ត្រីការបរទេសចិន លោក វ៉ាង យី បានប្រាប់គណៈប្រតិភូភូមា ដែលដឹកនាំដោយប្រធានគណៈកម្មការសន្តិភាព លោក ទិន ម្ញូ វិន ថា ក្រុងប៉េកាំងព្រួយបារម្ភដោយសារតែស្ថានភាពកាន់តែអាក្រក់ ហើយបានអំពាវនាវជាថ្មីម្ដងទៀត ឲ្យបញ្ចប់សកម្មភាពយោធា និងជជែកគ្នាស្វែងរកដំណោះស្រាយ។
លោក វ៉ាង យី បានថ្លែងក្នុងសេចក្ដីប្រកាសព័ត៌មានមួយថា៖ “ភាគីទាំងពីរគួរតែប្រើប្រាស់យន្តហការកាទូត និងយោធាកម្រិតខ្ពស់ចិន-ភូមា ដើម្បីរួមគ្នារក្សាសន្តិភាព និងស្ថេរភាពនៃតំបន់ព្រំដែនចិន-ភូមា”។
កំណើនអំពើហិង្សានៅរដ្ឋរ៉ាក់ឃីន បានកើតឡើងបន្ទាប់ពីរដ្ឋាភិបាលភូមាបានសម្រុកចូលតំបន់មានជម្លោះនោះ ដែលបានបង្ខំឲ្យជនជាតិរ៉ូហ៊ីងយ៉ាងរាប់រយនាក់រត់ភៀសខ្លួនទៅប្រទេសបង់ក្លាដែស ដោយបង្កជាឧបសគ្គថ្មីមួយសម្រាប់ជយលាភីពានរង្វាន់ណូប៊ែលសន្តិភាព អ្នកស្រី ស៊ូជី ដែលបានឡើងកាន់អំណាចកាលពីឆ្នាំមុន ជាមួយការសន្យាផ្សះផ្សារជាតិ៕
