ក្រសួងបរិស្ថាន ប្រកាសឲ្យសាធារណជនទូទាំងប្រទេស ពិសេសយុវជនចូលរួមប្រកួតប្រជែង ក្នុងការថតរូប ដើម្បីយកមកដាក់តាំងពិពណ៌ ដែលការថតនេះ ផ្តោតលើប្រធានបទ សម្រស់ធម្មជាតិ និងរិស្ថាន។
ក្នុងសេចក្តីប្រកាសព័ត៌មានរបស់ក្រសួងបរិស្ថានដែលផ្សព្វផ្សាយលើទំព័រហ្វេសបុករបស់ក្រសួងនៅថ្ងៃនេះ បានឲ្យដឹងថា ក្រសួងនឹងរៀបចំការតាំងពិពណ៌រូបថត នៅសួនច្បារមុខ វត្តបទុមវតី ក្នុងរាជធានីភ្នំពេញពីថ្ងៃទី៩ដល់ថ្ងៃទី១១ ខែធ្នូ ខាងមុខនេះ។
សេចក្តីប្រកាសព័ត៌មានរបស់ក្រសួងបញ្ជាក់ថា ការរៀបចំការប្រកួតប្រជែងការថតរូបនេះ គឺធ្វើឡើងក្នុងគោលបំណង លើកទឹកចិត្តឲ្យមានការចែករំលែករូបភាពនានា ដើម្បីបញ្ជ្រាបឲ្យមានការស្រលាញ់បរិស្ថាន និង លើកកម្ពស់ការឲ្យតម្លៃ និង ការពារធនធានធម្មជាតិ។
តាមគម្រោងក្រសួងបរិស្ថាន ជ្រើសរើសយករូបថតចំនួន៣០សន្លឹកទៅតាំងពិពណ៌ ហើយចំពោះម្ចាស់រូបថតដែលទទួលបានចំណាត់ថ្នាក់ពីលេខ១ដល់៣ នឹងទទួលប័ណ្ណជ័យលាភីនិងរង្វាន់លើកទឹកចិត្ត៕