អាជ្ញាធរខេត្តសៀមរាប បានអះអាងថា យ៉ាងហោចណាស់ផ្ទះប្រជាពលរដ្ឋចំនួន៦ខ្នង ក្នុងសង្កាត់ចុងឃ្នៀស ត្រូវភ្លើងឆេះអស់ទាំងស្រុងនៅថ្ងៃនេះ ដោយថា មូលហេតុមកពីទុស្សេខ្សែភ្លើង។
អធិការដ្ឋាននគរបាលក្រុងសៀមរាប បានរៀបរាប់នៅលើទំព័រហ្វេសប៊ុករបស់ខ្លួនថា អគ្គីភ័យនោះបានកើតឡើងនៅវេលាម៉ោងជាង ៩ព្រឹក សិ្ថតក្នុងភូមិទី៦ សង្កាត់ចុងឃ្នៀស ដោយឆេះផ្ទះពលរដ្ឋអស់ចំនួន ០៦ខ្នង ប៉ុន្តែ មិនបណ្តាលឲ្យពលរដ្ឋណាម្នាក់គ្រោះថ្នាក់ក្នុងហេតុការណ៍នោះឡើយ។
នគរបាលក្រុងសៀមរាប បានឲ្យដឹងថា សមត្ថកិច្ចបានប្រើប្រាស់រថយន្តពន្លត់អគ្គីភ័យចំនួន ៨គ្រឿង ដើម្បីពន្លត់ និងបានរលត់ទាំងស្រុងនៅម៉ោងប្រមាណជាង ១០ព្រឹក ប៉ុន្តែ សមត្ថកិច្ចមិនបានប្រាប់ពីទំហំនៃការខូចខាតទ្រព្យនោះទេ។
របាយកាណ៍របស់សមត្ថកិច្ចឲ្យដឹងថា គិតត្រឹមថ្ងៃទី១៤ ខែវិច្ឆិកា អគ្គិភ័យ ៧៦ករណី បានកើតឡើងទូទាំងប្រទេស ក្នុងនោះករណីអគ្គិភ័យធំៗមាន ១០លើក ដោយបណ្តាលឲ្យមនុស្សស្លាប់ ៧នាក់ ក្នុងនោះមានស្ត្រីម្នាក់ និងរបួស ១២នាក់ ក្នុងនោះមានស្ត្រី ៤នាក់៕