អ្នកធ្វើការទាក់ទងនឹងជលផលបានសាទរចំពោះវិធានការរបស់រដ្ឋមន្ត្រីក្រសួងមហាផ្ទៃដែលបានដាក់ចេញថ្មីនេះទាក់ទងនឹងការបង្ក្រាបបទល្មើសជលផល តែពួកគេបារម្ភថាមានប្រសិទ្ធិភាពតែមួយរយៈពេលខ្លី ។
កាលពីថ្ងៃទី២៨ ខែធ្នូកន្លងទៅ រដ្ឋមន្ត្រីក្រសួងមហាផ្ទៃលោក ស ខេង បានថ្លែងថារាជរដ្ឋាភិបាលបានសម្រេចបង្កើតក្រុមការងារមួយដើម្បីបង្ក្រាបបទល្មើសនេសាទនៅក្នុងបឹងទន្លេសាប ក្នុងនោះលោកថាលោកនឹងជិះយន្តហោះដើម្បីពិនិត្យមើលពីលើបឹងទន្លេសាប២សប្តាហ៍ម្តងឬ១ខែម្តងផងដែរ។ លើសពីនេះលោកក៏បានព្រមានដកអភិបាលខេត្តចំនួន៥ដែលនៅជុំវិញបឹងទន្លេសាបដែលមិនអាចទប់ស្កាត់បទល្មើសនេសាទបាន។
អ្នកធ្វើការទាក់ទងនឹងជលផលបានសារទចំពោះវិធានការណ៍នេះតែបារម្ភថាមានប្រសិទ្ធិភាពរយៈពេលខ្លី និងបានរិះគន់ទៅលើការអនុវត្តន៍ច្បាប់ពីមុនដែលថាមិនសូវមានប្រសិទ្ធិភាព។
ប្រធានសម្ព័ន្ធប្រជានេសាទកម្ពុជាលោក ឡុង សូចែត យល់ថាវិធានដែលរដ្ឋដាក់ចេញនេះគួរតែមានការអនុវត្តន៍ជាជាងការដាក់មានតែវិធានការណ៍ហើយការអនុវត្តន៍គ្មាន។ លោកបន្ថែមថាលោកមិនសូវជាមានជំនឿលើការអនុវត្តន៍របស់រដ្ឋនៅពេលនេះនោះទេដោយថា វិធានការច្បាប់ដែលបានចែងជាក់លាក់ហើយ តែការអនុវត្តន៍វិញបែរជាមិនសូរតឹងរឹងដូចដែលមានក្នុងច្បាប់នោះទេ។
លោកមានប្រសាសន៍ថា « គ្រាន់តែមានប្រសាសន៍តែបើគាត់មិនអនុវត្តន៍ទេវាអត់អស់ទេព្រោះបទល្មើសពិបាកណាស់ យើងមើលស្ថានភាពឆ្នាំ២០១៦នេះ ការទប់ស្កាត់របស់ជំនាញរបស់អីគឺគាត់ទប់ស្កាត់គគ្រឹកគ្រេងពេញបឹងទន្លេសាបបទល្មើសនៅតែកើតមានដដែល។ វាពិបាកណាស់! បើយើងសង្ឃឹមតែលើយន្តការណ៍នៃការទប់ស្កាត់មិនងាយទេបទល្មើសនេសាទនោះ ព្រោះធម្មតាការទប់ស្កាត់ទៅត្រលប់មកពីទប់ស្កាត់វិញចេះតែធ្វើទៅដោយសារតែការអនុវត្តន៍ច្បាប់ដូចជាការផ្តន្ទាទោស អញ្ចឹងណាស់ » ។
លោកថាប្រសិនជាការអនុវត្តន៍នោះមិនមានវិធានការផ្លូវច្បាប់ទៅលើអ្នកប្រព្រឹត្តិល្មើសនោះទេមិនអាចធ្វើឲ្យការទប់ស្កាត់នោះមានប្រសិទ្ធិភាពនោះទេ លើសពីនេះទៀតស្ទើតែមិនចាំបាច់បង្កើតក្រុមការងារ ឬក៏មានការធ្វើដំណើរតាមយន្តហោះរបស់លោក ស ខេង នោះទេប្រសិនបើការអនុវត្តន៍ច្បាប់ដែលមានបច្ចុប្បន្ននោះតឹងរឹង។
ខុសគ្នាបន្តិចពីលោក សូចែត អ្នកសម្របសម្រួល អង្គការអភិវឌ្ឍន៍ធនធានជលផល លោក មិញ ប៊ុនលី មានប្រសាសន៍ថាលោកគាំទ្រឲ្យមានវិធានការនេះ តែលោកបារម្ភថាវិធានការទាំងនោះមានប្រសិទ្ធិភាពតែមួយរយៈ និងថវិការសម្រាប់គាំទ្រក្រុមការងារដើម្បីធ្វើការតាមវិធានការនេះ។
លោកថា « អ្វីដែលយើងព្រួយបារម្ភយើងខ្លាចតែយុទ្ធនាការនេះ ឬផែនការនេះគឺបានតែរយៈពេលខ្លីនោះប្រសិនជាយើងបន្តទៅចេះតែមានបន្តទៅអ្នកនេសាទក៏យើងអាចរកបាន សម្រាប់ទទួលទាន សម្រាប់រស់នៅបានល្អ ហើយធនធាននោះក៏អាចនៅបានយូរអង្វែងដែរ។ យើងខ្លាចតែមានយន្តការតែខ្វះថវិការ ក្នុងការធ្វើប្រតិបត្តិការទាំងជំនាញ ទាំងក្រុមការងារហ្នឹង បើមិនមានថវិការទេ ក៏អាចជួបឧបសគ្គដែរ »។
លោកបន្ថែមថា កន្លងទៅមានច្បាប់សម្រាប់ឲ្យអនុវត្តន៍តែលោកសង្កេតឃើញថាមានកត្តាមួយចំនួនដែលធ្វើឲ្យការអនុវត្តន៍ច្បាប់នោះមិនមានប្រសិទ្ធភាព គឺបណ្តាលមកពីអ្នកអនុវត្តន៍ច្បាប់ ហើយមួយចំនូនទៀតកើតឡើងពីប្រជាពលរដ្ឋ។
លោកថា « វាមានកត្តាជាច្រើនយ៉ាងគឺទីមួយគឺទាក់ទងនឹងការអនុវត្តន៍ច្បាប់របស់មន្ត្រីដែលកាន់ច្បាប់ហ្នឹងទីពីរគឺពាក់ព័ន្ធនឹងរឿងនយោបាយដែលគាត់គិតមុខគិតក្រោយខ្លាចបាត់បង់ប្រជាបិយអីអញ្ចឹង ហើយទី៣ទាក់ទងនឹងតម្រូវការមួយចំនួនដែលគាត់មិនបានគិតគូរពី ផលប្រយោជន៍វែងឆ្ឆាយដែលគាត់មិនបានគិតដល់កូនចៅជំនាន់ក្រោយរបស់គាត់នោះ គាត់គិតថាមិចឲ្យតែបានមានហូបចុកជំនាន់នេះ គាត់ធ្វើឧបករណ៍ខុសច្បាប់ឲ្យតែបាន ដោយមិនបានគិតគូរដល់អនាគតកូនចៅរបស់គាត់ » ។
ឧបករណ៍នេសាទដែលត្រូវបានក្រសួងកសិកម្មហាមឃាត់ពីការប្រើប្រាស់ និងលក់ដូរតាំងពីឆ្នាំ២០១២ មានដូចជាឧបករណ៍លបឬវ៉ាវ(ប) ឧបករណ៍អួនឬមង រួមផ្សំភ្លើងឲ្យត្រីកុំ(ឈ្មក់) អួនអូសទឹកសាបនិងការនេសាទដោយប្រើឈិបយន្តជាដើមត្រូវបានហាមឃាត់នឹងត្រូវចាត់វិធានការតឹងរឹងចំពោះអ្នកប្រើប្រាស់ឧបករណ៍ទាំងនេះ។
ទាំងលោកឡុង សូចែត និងលោក មិញ ប៊ុនលី ថាប្រសិនមិនអាចបង្ក្រាបការនេសាទខុសច្បាប់នោះបានទេ នឹងអាចធ្វើឲ្យបាត់បង់ពូជត្រី ប្រជានេសាទដែលរស់នៅប្រកបរបររកស៊ីដោយសារត្រីនោះក៏បាត់បង់ការងារនិងប្រាក់ចំនូលតាមនោះផងដែរ។
អ្នកឃ្លាំមើលពីការអភិវឌ្ឍន៍សង្គមលោកបណ្ឌិត មាស នី សង្កេតឃើញថាកន្លងមកលោកឃើញរដ្ឋាភិបាលតែងតែដាក់ចេញវិធានការជាច្រើនតែចុងក្រោយវិធានការទាំងនោះហាក់ដូចជាសាបរលាបទៅវិញ ហើយចំពោះវិធានការលើកនេះក៏លោកមិនសង្ឃឹមថារដ្ឋាភិបាលអាចអនុវត្តន៍បានពេញទំហឹងនោះទេ ដែលគ្រាន់តែជាការល្អមើល។
លោកថា «លោកថាពីបទពិសោធពីមុនមកខ្ញុំអត់មានជំនឿទេ ហើយមិនមែនត្រឹមខ្ញុំទេ ពលរដ្ឋដទៃទៀតក៏គេគិតដូចខ្ញុំអញ្ចឹងដែរ ព្រោះអីពីមុនៗមកយើងថាវាអត់បានជោគជ័យ ព្រៃឈើរហូតមកដល់ពេលនេះគឹនៅតែកាប់ដដែល វិស័យជលផលក៏ដូចគ្នាដែរ ខ្ញុំចង់ឃើញឲ្យរដ្ឋាភិបាលហ្នឹង មិនមែនខ្ញុំប្រឆាំងទេ តែឃើញថាធ្វើហ្នឹងល្អហើយប៉ុន្តែ កុំតែថា ហើយថាហើយមិនធ្វើ ហើយធ្វើហើយតែបន្តិចហើយឈប់ មានតែធ្វើដែរតែធនធានធម្មជាតិនៅតែហិនហោចដែរ» ។
លោកមាស នី ឲ្យជាយោបល់ថា បើមានតែការអនុវត្តន៍ហើយមិនបានជម្រុញឲ្យមានចូលរួមជាមួយប្រជាពលរដ្ឋដែលនៅតាមសហគមន៍នោះគឺវិធានការដែលដាក់នោះមិនមានប្រសិទ្ធិភាពនោះទេ។លើសពីនេះទៀតលោកថាត្រូវមានវិធានការច្បាប់តឹងរឹងទៅលើមន្ត្រីណាដែលហ៊ានប្រព្រិត្តឹអំពើពុករលួយ នោះលោកជឿថាប្រសិទ្ធិភាពនៃការអនុវត្តន៍វិធានការនោះប្រាកដជាបានជោគជ័យ៕