កូនស្រីលោក កឹម សុខា អះអាងលើបណ្តាញសង្គម Twitter ថា ឪពុករបស់នាង នឹងត្រូវបានគេនាំខ្លួនមកចូលមកតតាំងក្ដីនៅសាលាឧទ្ធរណ៍ ជុំវិញបណ្ដឹងសុំនៅក្រៅឃុំ។
បើតាមការគ្រោងទុក សាលាឧទ្ធរណ៍គ្រោងនឹងបើកសវនាការលើបណ្ដឹងសុំនៅក្រៅឃុំរបស់លោក កឹម សុខា នាព្រឹកថ្ងៃទី១ ខែកុម្ភៈស្អែកនេះ បន្ទាប់ពីសាលាដំបូងសម្រេចបដិសេធសំណើរបស់ក្រុមមេធាវីមេដឹកនាំអតីតបក្សប្រឆាំងរូបនេះ កាលពីពាក់កណ្ដាលខែមករាមក។
កូនស្រី លោក កឹម សុខា គឺ កញ្ញា កឹម មនោវិទ្យា សរសេរលើបណ្តាញTwitter ថា នៅថ្ងៃស្អែកឪពុករបស់នាងនឹងមានវត្តមាននៅបន្ទប់សវនាការ ៖«តាមដំណឹងជាផ្លូវការណ៍បានឲ្យដឹងថា លោក កឹម សុខា នឹងមកដល់សាលាឧទ្ធរណ៍ក្រុងភ្នំពេញ នាម៉ោង៨ព្រឹក ថ្ងៃទី១ ខែកុម្ភៈ ឆ្នាំ២០១៨ ដើម្បីចូលរួមសវនាការបណ្តឹងនៅក្រៅឃុំ»។
មេធាវីការពារក្ដីឲ្យលោក កឹម សុខា គឺ លោក ផែង ហេង ប្រាប់ VOD ថា លោក កឹម សុខា ពិតជាត្រូវបានតុលាការអនុញ្ញាតឲ្យចូលតតាំងក្ដី នៅសាលាឧទ្ធរណ៍នាថ្ងៃស្អែកពិតប្រាកដមែន។
លោកថា៖ «បញ្ជូនគាត់មកចូលរួមសវនាការ គឺខាងអគ្គព្រះរាជអាជ្ញា ជាអ្នកចេញលិខិត ហើយលិខិតនេះ គេអាចបញ្ជាទៅពន្ធនាគារតែម្ដង មេធាវីយើងបានទទួលព័ត៌មានតាមរយៈគ្រួសារដែរទេ»។
អគ្គនាយកនៃអគ្គនាយកដ្ឋានក្រសួងមហាផ្ទៃ លោក នុត សាវនា មានប្រសាសន៍ថា ខាងនាយកដ្ឋានពន្ធនាគារ នឹងបញ្ជូនលោក កឹម សុខា ទៅសាលាឧទ្ធរណ៍នៅថ្ងៃស្អែក តាមសំណើរបស់សាលាឧទ្ធរណ៍។
លោកថា៖ «អាហ្នឹងស្រេចលើដីកាបញ្ជារបស់តុលាការ បើខាងតុលាការឲ្យខាងយើងខ្ញុំបញ្ជូនគាត់ទៅ យើងបញ្ជូនគាត់ទៅ»។
ចំណែក អ្នកនាំពាក្យក្រសួងមហាផ្ទៃ លោក ខៀវ សុភ័គ គូសបញ្ជាក់ខ្លីៗថា ខាងតុលាការ និងអាជ្ញាធរ បានត្រៀមរៀបចំកម្លាំងរួចរាល់ហើយ ក្នុងការនាំខ្លួនលោក កឹម សុខា មកកាន់សាលាឧទ្ធរណ៍នៅថ្ងៃស្អែកនេះ។
លោកថា៖ «គេមានក្បួនរបស់គេ ទៅសួរខាងតុលាការថែមទៅ ខាងតុលាការ គេមានកម្លាំងគ្រប់គ្រាន់ ក្នុងការពារ»។
នេះជាលើកដំបូងហើយ ដែលតុលាការបានសម្រេចនាំខ្លួនលោក កឹម សុខា មកបង្ហាញនៅចំពោះមុខតុលាការ ចាប់តាំងពីការឃុំខ្លួនកាលពីខែកញ្ញាឆ្នាំមុន។
ជាញឹកញាប់ តុលាការ បានបដិសេធ មិនអនុញ្ញាតឲ្យលោក កឹម សុខា មានវត្តមាននៅក្នុងសវនាការឡើយ ទាំងក្នុងបណ្ដឹងជំទាស់នីតិវិធីនៃការឃុំខ្លួនរបស់សាលាដំបូងរាជធានីភ្នំពេញ និងបណ្ដឹងសុំនៅក្រៅឃុំ បន្ទាប់ពីសមត្ថកិច្ចចាប់ខ្លួនលោក កាលពីថ្ងៃទី៣កញ្ញាឆ្នាំមុន និងបញ្ជូនទៅឃុំក្នុងពន្ធនាគារត្រពាំងផ្លុង ស្ថិតក្នុងខេត្តត្បូងឃ្មុំ៕