ក្រុមអ្នកស្រាវជ្រាវទាំងមន្ត្រីរដ្ឋាភិបាលនិងមន្ត្រីអង្គការសង្គមស៊ីវិលអះអាងថា ព្រឹត្តិការណ៍បាញ់សម្លាប់ មន្ត្រីអភិរក្សព្រៃខ្មែរ ៣រូប កាលពីម្សិលមិញ បានកើតឡើងក្រោយពួកគេល្បាតព្រៃ រកឃើញវៀតណាមមួយក្រុមចូលកាប់ឈើសុខច្បាប់ ក្នុងស្រុកអូរាំង ខេត្តមណ្ឌលគិរី។
កាលពីថ្ងៃទី៣០ខែមករា មានព្រឹត្តិការណ៍បាញ់រះមួយ បានកើតឡើងនៅតំបន់ដែនជម្រកសត្វព្រៃកែវសីមា ក្នុងតំបន់អូហ៊ុចស្រុកអូរាំង បណ្តាលឲ្យស្លាប់៣នាក់ ក្នុងនោះមានមន្ត្រីអាវុធហត្ថ លោក សេក វឌ្ឍនា មន្រ្តីឧទ្យានុរក្សនៃមន្ទីរបរិស្ថានលោក តើន សុខណៃ នៃមន្ទីរបរិស្ថាន និង បុគ្គលិករបស់អង្គការ WCS លោក ថុល ខ្នា។
មន្ត្រីសម្របសម្រួលនៅសមាគមអាដហុកប្រចាំខេត្តមណ្ឌលគិរី លោក សុខ រដ្ឋា អះអាងថា បើយោងតាមរបាយការណ៍ របស់អាជ្ញាធរ មុនបាញ់ប្រហារកើតឡើង ក្រុមអភិរក្សបានជូបជនជាតិវៀតណាមមួយក្រុមកាប់ឈើ ហើយបានឃាត់ខ្លួនមនុស្សនិងវត្ថុតាង។
លោកថា៖ «បើតាមរបាយការណ៍បរិស្ថានគឺដោយសារតែមន្ត្រី៣នាក់ដែលបានស្លាប់ហ្នឹង ដោយសារគាត់ធ្វើការឃាត់វត្ថុតាងនៃបទល្មើសព្រៃឈើ ឃាត់ឈើឃាត់ត្រង់ទីណឺអីហ្នឹង ជាពិសេសគឺឃាត់បានជនជាតិវៀតណាម។ប៉ុន្តែមន្ត្រីទាំងហ្នឹងមិនបានយកវៀតណាមមកទេ គាត់ប្រគល់ទៅឲ្យមន្ត្រីប៉ុស្តិ៍ការពារព្រំដែនទៅវិញ ដើម្បីចាត់ចែង គាត់ជាអាជ្ញាធរជំនាញនៅតំបន់ហ្នឹង ប៉ុន្តែមួយសន្ទុះក្រោយមកក៏មានផ្ទុះអាវុធ»។
VODមិនអាចរកការបញ្ជាក់ពីអភិបាលខេត្តមណ្ឌលគិរីលោក ស្វាយ សំអ៊ាង បានទេដោយទូរសព្ទមិនអាចទាក់ទងបាន ខណៈស្នងការនគរបាលខេត្តលោក អ៊ុក សំណាង អះអាងថាកំពុងធ្វើរបាយការណ៍ហើយក្រោយមកបានបិទទូរស័ព្ទ ចំណែកអ្នកនាំពាក្យកងរាជអាវុធហត្ថលោក អេង ហ៊ី អះអាងមិនទាន់អាចបញ្ជាក់បានដោយរងចាំរបាយការណ៍លំអិតពីមន្ត្រីដែលចុះស៊ើបអង្កេតដល់កន្លែងកើតហេតុជាមុនសិន។
គេហទំព័រ Fresh News បានដកស្រង់សម្តី នាយកដែនជម្រកសត្វព្រៃកែវសីម៉ា លោក ឌិន ប៊ុនធឿន មកចុះផ្សាយថា មុនកើតហេតុជនរងគ្រោះ ៤នាក់ មានមន្ដ្រីអាវុធហត្ថម្នាក់ មន្ដ្រីឧទ្យានុរក្សម្នាក់ បុគ្គលិកអង្គការ WCS ម្នាក់ និងអ្នកភូមិម្នាក់បាន ជិះម៉ូតូ២គ្រឿង ចូលទៅល្បាតព្រៃឈើ ពេលនោះពួកគេបានជួបជនជាតិវៀតណាមមួយក្រុម ប្រដាប់ដោយរណាយន្ដ កាំប៉ិត និងពូថៅ កំពុងប្រព្រឹត្តបទល្មើសព្រៃឈើ។
ពេលឃើញបទល្មើសបែបនេះ ពួកគេទាំង៤នាក់ ក៏បានរាយការណ៍មក នាយកដែនជម្រកសត្វព្រៃកែវសីម៉ា តហើយលោក ឌិន ប៊ុនធឿន បានប្រាប់ទៅវិញថា ឲ្យត្រឡប់ថយក្រោយវិញ ដើម្បីយកកម្លាំងទៅថែមឈានទៅដល់ការបង្ក្រាប។
គេហទំព័រ ដដែលបានចុះផ្សាយទៀតថា នៅពេលជនរងគ្រោះទាំង៤នាក់ បើកម៉ូតូចេញមកវិញ មិនទាន់ដល់ភូមិផង ក៏រងការបាញ់ប្រហារជាច្រើនគ្រាប់ បណ្ដាលឲ្យស្លាប់៣នាក់ ហើយម្នាក់ទៀតបានរត់គេចខ្លួនចូលទៅក្នុងភូមិ។
Fresh News ក៏បានដកស្រង់សម្តីមន្ដ្រីសមត្ថកិច្ចជាន់ខ្ពស់ម្នាក់ នៅខេត្តមណ្ឌលគិរី ដែលសុំមិនបញ្ចេញឈ្មោះ បានបង្ហើបថា មុនពេលកើតហេតុ មន្ដ្រីអាវុធហត្ថ មន្ដ្រីបរិស្ថាន និងបុគ្គលិកអង្គការ WCS បានចូលទៅល្បាតព្រៃ ហើយក៏ឃើញបទល្មើសព្រៃឈើ បានចេញមកជួបក្រុមមន្ដ្រីនាយនគរបាលប៉ុស្ដិ៍អូររលែ ចំណុះឲ្យវរនគរបាលការពារព្រំដែនគោក នៃស្នងការដ្ឋាននគរបាលខេត្តមណ្ឌលគិរី លេខ ៦២១អាចសង្ស័យថា មកចរចា និងនិយាយគ្នាពាក់ព័ន្ធការប្រព្រឹត្តបទល្មើសនៅទីនោះ។
សមត្ថកិច្ចជាន់ខ្ពស់រូបនេះ បានបញ្ជាក់ទៀតថា ដោយសារតែការចរចារ និងនិយាយគ្នាមិនត្រូវ រហូតមានការឈ្លោះប្រកែកគ្នា ហើយក៏មានការផ្ទុះអាវុធបណ្ដាលឲ្យស្លាប់យ៉ាងដូច្នេះ៕
