នាយករដ្ឋ​មន្ត្រី​ថៃ​បដិសេធ​លុប​ចោល​បម្រាម​លើ​សកម្មភាព​នយោបាយ

នាយក​រដ្ឋ​មន្ត្រី​ថៃ លោក ប្រាយុទ្ធ ចាន់អូចា (រូបភាពពី Bangkok Post)

នាយករដ្ឋមន្ត្រីថៃ លោក ប្រាយុទ្ធ ចាន់អូចា កាលពីថ្ងៃចន្ទម្សិលមិញបានច្រានចោលការអំពាវនាវនានា ឲ្យរបបយោធាមួយនេះលុបចោលបម្រាមទៅលើសកម្មភាពនយោបាយ ដោយលោកអះអាងថាអ្នកនយោបាយថៃពុំបានកែប្រែឥរិយាបថរបស់ពួកគេឡើយ។

កាសែតបាងកកប៉ុស្តិ៍របស់ថៃបានរាយការណ៍ថាការអំពាវនាវនានាឲ្យលុបចោលបម្រាមត្រូវបានរីកធំឡើងបន្ទាប់ពីក្រុមប្រឹក្សាជាតិរក្សាសណ្ដាប់ធ្នាប់និងសន្តិភាពកាលពីសប្ដាហ៍មុនបានលុបចោលបម្រាមលើការធ្វើដំណើរដែលបានដាក់ទៅលើបុគ្គលជាង១៥០រូប ក្រោយពីពួកយោធាដណ្ដើមអំណាចកាលពីឆ្នាំ២០១៤។

កាសែតនេះបានដកស្រង់សម្ដីលោក ប្រាយុទ្ធ ដែលបាននិយាយថាលោកនឹងមិនពិចារណាលុបចោលការរឹតបណ្តឹងដទៃទៀតឡើយ ដោយសារវាអាចនាំឲ្យបាត់បង់សណ្ដាប់ធ្នាប់សាធារណៈនិងគំរាមកំហែងដល់ការត្រួសត្រាយនយោបាយរបស់របបនេះ។

លោក ប្រាយុទ្ធ បញ្ជាក់ថាការលុបចោលបម្រាមលើការធ្វើដំណើរគ្មានអ្វីប៉ះពាល់ដល់ការធ្វើប្រជាមតិនៅថ្ងៃទី០៧ ខែសីហាខាងមុខនោះឡើយ។

នៅពេលសួរថា តើក្រុមប្រឹក្សារកឃើញសញ្ញាណាមួយនៃចលាចលនយោបាយឬទេ លោកឧត្ដមសេនីយ៍ ប្រាយុទ្ធ ប្រាប់ថា ខ្លឹមសារនៅលើបណ្ដាញសង្គមនិងកិច្ចសម្ភាសតាមប្រព័ន្ធផ្សព្វផ្សាយនានាបញ្ជាក់ច្បាស់ថា អ្នកនយោបាយថៃមិនទាន់បញ្ឈប់ឥរិយាបថអាក្រក់របស់ពួកគេនៅឡើយទេ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ