សមាជិកសភាអាស៊ានដើម្បីសិទ្ធិមនុស្ស ហៅកាត់ថា APHR នៅថ្ងៃនេះ បានអំពាវនាវឲ្យមានការបោះឆ្នោតដោយបើកចំហ និងដោយសន្តិវិធីនៅកម្ពុជា ខណៈដែលប្រទេសនេះគ្រោងរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅចុងសប្ដាហ៍នេះ។
ក្នុងសេចក្ដីប្រកាសព័ត៌មានមួយ នៅថ្ងៃនេះ ក្រុមសមាជិកសភាអាស៊ានដើម្បីសិទ្ធិមនុស្ស បានអំពាវនាវឲ្យបញ្ចប់ការគំរាមកំហែង អំពើហឹង្សា និងការយាយី និងជំរុញទៅអាជ្ញាធរកម្ពុជាឲ្យធានាថា សិទ្ធិបោះឆ្នោតរបស់ពលរដ្ឋកម្ពុជា ត្រូវបានការពារ។
ប្រធាន APHR លោក Charles Santiago សមាជិកសភាម៉ាឡេស៊ី ត្រូវបានដកស្រង់សម្ដីដោយនិយាយថា ពលរដ្ឋកម្ពុជាសមតែទទួលបានឱកាសក្នុងការជ្រើសរើសមេដឹកនាំមូលដ្ឋានរបស់ពួកគេដោយគ្មានការភ័យខ្លាច។
លោកបន្ថែមថា បរិយាកាសសិទ្ធិ និងនយោបាយដែលមានលក្ខណៈគាបសង្កត់ និងរឹតត្បិតនៅក្នុងប្រទេសកម្ពុជា និងគ្រោះថ្នាក់ និងការធាក់ថយនៃលទ្ធិប្រជាធិបតេយ្យនៅក្នុងប្រទេសនេះ បានធ្វើឲ្យកម្ពុជាក្លាយជាប្រទេសមានគំនាបនយោបាយខ្លាំងបំផុតនៅក្នុងតំបន់។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា គ្មានការគំរាមកំហែង គ្មានការគាបសង្កត់ទៅលើគណបក្សប្រឆាំងទេ ហើយថា មិនអាចទទួលយកបានទេចំពោះរបាយការណ៍ ឬអនុសាសន៍ ដោយថា លំអៀងទៅខាងបក្សប្រឆាំង៖ «ប៉ុន្មានថ្ងៃមុននេះ ម្សិលមិញម្សិលម៉្ងៃនេះ គឺពួកបក្សប្រឆាំងហ្នឹងហែក្បួនហើយវ៉ៃអ្នកជិះម៉ូតូម្នាក់ដែលប៉ះពាល់ទៅដល់ក្បួនហែរបស់គេហ្នឹង អាហ្នឹងសួរថាអ្នកណាបង្កើតអំពើហិង្សា?។ សុំសួរអស់លោកសភាគណបក្សប្រឆាំងនៅអាស៊ានមើល៍ អស់លោកយល់យ៉ាងម៉េចដែរដែលគេវ៉ៃគេជិតស្លាប់ហ្នឹង បួនដប់ម្ភៃនាក់វ៉ៃគេតែម្នាក់ហ្នឹង អាហ្នឹងតើជាអំពើហិង្សា? ពីណាគាបអ្នកណា? ពីណាមកគំរាមកំហែងអ្នកណា?»។ លោកនៅបញ្ជាក់បន្ថែមថា លោក ហ៊ុន សែន មិនមែនជាអ្នកបង្កើតសង្គ្រាមទេ តែបាននិយាយថា បើគណបក្សប្រឆាំងឈ្នះឆ្នោត គឺនយោបាយរបស់បក្សប្រឆាំងបង្កឲ្យមានសង្គ្រាម។
ប៉ុន្តែគណបក្សប្រឆាំង និងអ្នកវិភាគ តែងតែអះអាងថា បើគណបក្សប្រឆាំងឈ្នះឆ្នោតនឹងមិនមានសង្រ្គាមទេ ដោយបក្សប្រឆាំងគ្មានអាវុធនោះឡើយ។
ស្របពេលនៃការបោះឆ្នោតនេះ អង្គការលើកលែងទោសអន្តរជាតិ (Amnesty International) បានចេញរបាយការណ៍មួយថា បក្សកាន់អំណាច ហាក់បានប្រើវិធានការបំបាត់សិទ្ធិសេរីភាពបញ្ចញមតិ ការជួបជុំដោយសន្តិវិធី ខណៈការបោះឆ្នោតឆ្នាំ២០១៧ និង២០១៨ជិតមកដល់។
អង្គការលើកលែងទោសអន្តរជាតិមួយនេះ បានចាត់ទុក ការឃុំខ្លួនសកម្មជនដីធ្លីនៅតំបន់បឹងកក់ អ្នកស្រី ទេព វន្នី ការចាប់ខ្លួនមន្ត្រីអាដហុក មន្ត្រី គ.ជ.ប សកម្មជនបក្សប្រឆាំង និងការយាយីអតីតមេដឹកនាំបក្សប្រឆាំង លោក សម រង្ស៊ី ជាដើមថា រដ្ឋាភិបាលរបស់លោក ហ៊ុន សែន «ហាក់បីដូចជាបានចាប់ផ្តើមធ្វើយុទ្ធនាការជាប្រព័ន្ធមួយ ដើម្បីកម្ចាត់អ្នកដែលហ៊ានរិះគន់ តាមរយៈសំណុំរឿងព្រហ្មទណ្ឌគ្មានហេតុផល និងប្រឌិត»។
ប៉ុន្តែដូចរាល់ដងដែរ មន្រ្តីគណបក្សកាន់អំណាចបានច្រានចោលរបាយការណ៍នេះ៕