ក្នុងជំនួបដោយផ្ទាល់ក្នុងពិធីពិធីខួបអាពាហ៍ពិពាហ៍របស់អ្នកនាង ទេព បុទមបុផល ដែលជាតារាកំប្លែងកាលពីថ្ងៃទី២៨ ឧសភា អ្នកនាង កែវ កល្យាណ ដែលជាអតីតតារាសម្ដែងជើងចាស់ បានអះអាងថាអ្នកនាងមិនដើរតាមគន្លងរបស់អ្នកនាង អម្ពរ ទេវី ដែលសុខចិត្តជិះយន្តហោះមកសម្ដែងភាពយន្តមួយទុកជាស្នាដៃធ្វើអោយមានការភ្ញាក់ផ្អើលនោះទេ ដោយអ្នកនាងប្រកាសថាមិនចង់សម្ដែង និងមិនចង់ល្បីបន្តទៅទៀត។
អ្នកនាងបានឆ្លើយតបបែបនេះ នៅពេលមានការចោទសួរថា តើអ្នកនាងមានគម្រោងសម្ដែងមួយរឿងអោយផ្អើលសិល្បៈដូចគ្នានឹងអ្នកនាង អម្ពរ ទេវី ឬទេ។ អ្នកនាង កែវ កល្យាណ និយាយថាអ្នកនាងរស់នៅក្នុងស្រុកមិនដែលបានចេញទៅណាមកណានោះទេ ប៉ុន្តែមកពីអ្នកនាងអត់មានអារម្មណ៍ចង់វិលក្នុងសិល្បៈ ទើបអ្នកនាងប្រកាសថាមិនទទួលការសម្ដែងនោះទេ។
អ្នកនាងថាខ្លួនចាស់ហើយ ទើបរមែងប្រកែកមិនទទួលការសម្ដែង ដោយសារតែអ្នកនាងក៏មិនចង់បង្ហាញមុខណាមួយធ្វើអោយក្មេងៗយល់ថាអ្នកនាងនៅតែចង់ល្បីឈ្មោះ។ អ្នកនាងសារភាពដោយត្រង់ថា មានផលិតករច្រើននាក់បានស្នើអោយអ្នកនាងចេញសម្ដែង ដោយគម្រោងធ្វើរឿងអោយអ្នកនាងបានសម្ដែងអោយខ្លាំងដូចគ្នានឹងភាពយន្តដែលអ្នកនាង អម្ពរ ទេវី បានសម្ដែងយ៉ាងលេចធ្លោក្នុងរឿង «ទឹកចិត្តម្ដាយសម័យថ្មី» នោះផងប៉ុន្តែមកពីអ្នកនាងមិនចង់សម្ដែងទើបរមែងច្រានចោល។
អ្នកនាងនិយាយថា «អត់ទេ អត់ចង់សម្ដែងអីដូច អម្ពរ ទេវី ទេ ចាស់ហើយនៅតាមចាស់ទៅ»។
យ៉ាងណាមិញផ្ទុយពីការដាក់ខ្លួនរបស់អ្នកនាង កែវ កល្យាណ គេកត់សម្គាល់ថាអ្នកនាងនៅស្អាត និងមិនចាស់តាមវ័យ ដែលអាចនៅសម្ដែងជាតួម្ដាយឬជាតួជំទាវបាននៅឡើយ។ ក្នុងពេលអ្នកនាងបង្ហាញខ្លួន មានអ្នកសិល្បៈនិងភ្ញៀវកិត្តិយសច្រើននាក់សុំអ្នកនាងថតជាមួយ ដោយអ្នកនាងក្រៅពីមិនរើសអើង ក៏រួសរាយណាស់ដែរ។ អ្នកនាងមិនបានបង្ហើបអោយដឹងពីស្ថានភាពឯកជននោះទេ តែអ្នកនាងប្រាប់ថាខ្លួនមានកូនស្រីម្នាក់ស្រឡាញ់សិល្បៈដែរ ដោយគ្រាន់តែអ្នកនាងមិនអោយចូលប្រឡូកប្រឡាក់ដោយចង់អោយរៀនអោយបានជ្រៅជ្រះ។
អ្នកនាងផ្ដល់ចម្លើយដដែលជាដដែលថា មិនចង់បន្សល់ទុកស្នាដៃណាមួយមុនពេលចាស់ទៅនោះទេ ដោយសារតែអ្នកនាងយល់ថាក្មេងៗមានសមត្ថភាពច្រើន ដែលមិនចាំបាច់ទាល់តែអ្នកនាងទើបរឿងនោះមានតួអង្គល្អ។
អ្នកនាងនិយាយថា «ទៅសម្ដែងអីទៀត ក្មេងៗឥឡូវពូកែចង់ងាប់ គេសម្ដែងបានហើយ ខ្ញុំមិនបាច់ទេ(សម្ដែង)»។
យោងតាមការអះអាងរបស់អ្នកនាង កែវ កល្យាណ គឺមហាជននឹងមិនអាចបានឃើញស្នាដៃមួយថ្មីរបស់អ្នកនាងទៀតទេ បើទោះជាអ្នកនាងរស់នៅស្រុក ហើយបានឃើញពីភាពរីកចំរើនក្នុងវិស័យភាពយន្តនាពេលចុងក្រោយច្រើនជាងតារាសម្ដែងជើងចាស់ដែលរស់នៅក្រៅស្រុកដូចជាអ្នកនាង អម្ពរ ទេវី ជាដើម ដែលគួរតែចាប់អារម្មណ៍ចង់បង្ហាញមុខមួយរឿង ច្រើនរឿង មិនខុសគ្នានឹងអ្នកនាង ចាន់ តារាទី និង ប៉ែន សុផានី ជាដើម។
អ្នកនាងថាខ្លួនគឺអស់និស្ស័យនឹងការសម្ដែងតែម្ដង ទើបអ្នកនាងលែងចង់សម្ដែង និងថាការសម្ដែងមួយរឿងទុកជាអនុស្សាវរីយ៍មុនចាស់ឬទុកជាស្នាដៃអ្វីដូចគ្នានឹងអ្នកនាង អម្ពរ ទេវី គឺមិនអាច។
យ៉ាងណាមិញ អ្នកនាងថាសម្រាបការបង្ហាញមុខក្នុងកម្មវិធីសិល្បៈ អ្នកនាងនៅតែបន្តធ្វើឡើងដោយមិនខ្លាចចំពោះការសម្ភាសន៍របស់អ្នកកាសែតនោះទេ ដោយសារតែអ្នកនាងយល់ថាខ្លួនមិនមានរឿងត្រូវខ្លាចនិងចង់ភ្ជាប់ទំនាក់ទំនងជាមួយតារាសិល្បៈជំនាន់ក្រោយដូចគ្នា។
អ្នកនាងនិយាយថា «សម្រាប់ខ្ញុំ ប្អូន(អ្នកសិល្បៈ)អោយតែអញ្ជើញគឺអត់ចោលទេ ព្រោះខ្ញុំចូលចិត្តជួបជុំចឹងដែរតើ!»។
អ្នកនាងសរសើរថាតារាសិល្បៈស្រករក្រោយស្រស់ស្អាតជាងជំនាន់អ្នកនាង និងសម្ដែងបានល្អមិនចាញ់តារាៗនៅក្នុងជំនាន់អ្នកនាងក្នុងពេលដែលតារាស្រករក្រោយបែរជាមើលឃើញថាអ្នកនាងជាតារាជើងចាស់ដែលសម្ដែងបានឥតខ្ចោះមិនអាចប្រដូចបាន និងនៅស្រស់ស្អាតបើទោះជាមានវ័យច្រើន។
អ្នកនាងមិនបានបង្ហើបថាតើអ្នកនាងប្រកបអាជីវកម្មអ្វី និងមានស្វាមី ឬយ៉ាងណានោះទេ ខណៈដែលតារាសិល្បៈបានអះអាងថាអ្នកនាងទំនងជាមេម៉ាយច្រើនជាងមានស្វាមី ដោយសារតែអ្នកនាងមិនធ្លាប់រំលឹករឿងស្វាមី និងចូលចិត្តទៅណាមកណាតែជាមួយកូនស្រីឬជាមួយតារាចម្រៀង ចាន់ ចរិយា ដែលអ្នកនាងបានអះអាងថាជាប្អូនស្រីធម៌ឬជាមិត្តសម្លាញ់នោះ។
អ្នកនាងត្រូវគេអះអាងថារស់នៅក្នុងវីឡាមួយនៅបុរីប៉េងហួតទួលគោល ដោយជីវភាពរបស់អ្នកនាងក្រៅពីមានវីឡាក៏មានលុយចាយមិនអស់ដែរ ក្រោយពេលបាត់បង់ពីសិល្បៈទាំងស្រុង៕
