យោងតាមការប្រកាស ភាពយន្តរឿង «អនុស្សាវរីយ៍ថ្ងៃចូលឆ្នាំ» គឺជារឿងដែលបានបោះទុនផលិតដោយផលិតករមកពី៤ប្រទេសរួមគ្នាគឺកម្ពុជា ថៃ ឡាវ និងសិង្ហបុរី ដោយផលិតករទាំងនោះ បានទាំងយកតារាសម្ដែងតំណាងអោយប្រទេសរៀងខ្លួនមករំលេចនៅក្នុងភាពយន្តនេះ អោយសម្ដែងជាមួយតារាខ្មែរនោះផង។
យ៉ាងណាមិញ ភាគីកម្ពុជាគឺផលិតកម្មមហាហង្ស ត្រូវបានភាគីប្រទេសទាំង៣ផ្ដល់សិទ្ធិអោយធំជាង លើសិទ្ធិកំណត់លើសាច់រឿងមួយផ្នែកធំ មានសិទ្ធិដាក់តារាសម្ដែងខ្មែរច្រើនជាងគេ ដែលមិនខុសពីម្ចាស់ផ្ទះសម្រាប់ការផលិតភាពយន្តមួយនេះជាកម្មសិទ្ធិរួមផង ទើបធ្វើអោយផលិតករប្រទេស៣ផ្សេងទៀត រួមទាំងតួសម្ដែងផង ជុំគ្នាក្រុងពាលីនៅក្នុងប្រទេសកម្ពុជាក្នុងផលិតកម្មមហាហង្សកាលពីថ្ងៃទី២៩ កក្កដា។
លោក អ៊ិន សុភិន ចាងហ្វាងផលិតកម្មមហាហង្សនិយាយថា ក្រោយការជជែកដេញដោលអស់រយៈពេលយ៉ាងយូរ ផលិតកម្មរបស់លោកក៏សម្រេចផលិតរឿង «អនុស្សាវរីយ៍ថ្ងៃចូលឆ្នាំ» ជាមួយផលិតករ៣ប្រទេសរួមគ្នា គឺ ផលិតករថៃ ឡាវ និងសិង្ហបុរី ដោយកិច្ចសហការនោះ គឺភាគីទាំង៤សម្រេចបោះទុនក្នុងម្នាក់យ៉ាងតិច៥ម៉ឺនដុល្លារ ព្រមជាមួយនឹងការទទួលខុសត្រូវលើការចំណាយលើតារាសម្ដែងនិងក្រុមការងារក្នុងពេលផលិត។ អ៊ីចឹងហើយទើបក្នុងរឿងនេះ គឺមានតួសម្ដែងរហូតដល់ទាំង៤ប្រទេសតែម្ដង គឺតារាថៃ២រូប តារាឡាវ១រូប តារាសិង្ហបុរីមួយរូប និងភាគច្រើនគឺតារាកម្ពុជា ដោយសាច់រឿងទាំងមូលត្រូវកំណត់ចេញថតនៅក្នុងប្រទេសថៃចំនួន៧ថ្ងៃ ឡាវ៥ថ្ងៃ និងសល់ប៉ុន្មានទៀតត្រូវថតនៅក្នុងប្រទេសកម្ពុជា។
នៅក្នុងរឿងនេះ លោកថាផលិតកម្មមហាហង្សនឹងមានសិទ្ធិធំជាងផលិតករទាំង៣ ដោយសារតែលោកអាចកំណត់សាច់រឿងពាក់ព័ន្ធនឹងប្លង់របស់តារាខ្មែរបានមួយផ្នែកធំ ហើយលោកក៏អាចដាក់បញ្ចូលតារាខ្មែរអោយចូលសម្ដែងបានច្រើនបើធៀបនឹងតារាមកពីប្រទេស៣ទៀត ដោយការកំណត់លើករណីផ្សេងទៀត ក៏ភាគីខាងកម្ពុជាទទួលបានសិទ្ធិធំជាង ជាពិសេសគឺការតម្រូវអោយតារាខ្មែរបានសម្ដែងជាគូស្នេហ៍របស់តារាថៃ និងតារាឡាវ ដើម្បីរំលេចភាពលេចធ្លោររបស់តារាខ្មែរ។
នៅក្នុងរឿងនេះ លោកថាផលិតករថៃ និង២ប្រទេសផ្សេងទៀតបានយល់ព្រមកំណត់យកតួឯក៤គូ ដោយតារាប្រុសខ្មែរត្រូវសម្ដែងជាមួយតួស្រីថៃ តារាខ្មែរសម្ដែងជាមួយតួស្រីឡាវ តារាថៃត្រូវសម្ដែងជាមួយតួឯករបស់សិង្ហបុរី និងតារាខ្មែរត្រូវសម្ដែងជាមួយតារាខ្មែរ ដើម្បីរំលេចពីស្នេហាបែបរ៉ូម៉ាទិកនៅថ្ងៃចូលឆ្នាំក្នុងប្រទេសទាំង៣។
លោកថារំលេចពីថ្ងៃចូលឆ្នាំព្រមគ្នានេះ គឺដោយសារតែថៃ ឡាវ និងកម្ពុជា ជាប្រទេសដែលមានថ្ងៃចូលឆ្នាំចំពេលតែមួយ ហើយមានលក្ខណៈស្រដៀងគ្នា ហើយដោយសារតែខាងផលិតករមានបំនងចង់បង្ហាញវប្បធម៌ និងចងភ្ជាប់មិត្តភាពរវាងប្រទេសទាំង៤ផង ទើបសម្រេចចាប់ដៃផលិតរឿងតែម្ដង។
សាច់រឿង «អនុស្សាវរីយ៍ថ្ងៃចូលឆ្នាំ» លោកថាត្រូវបាននិពន្ធឡើងដោយផលិតករចំនួន៤ប្រទេស ដោយខាងកម្ពុជាគឺលោកជាអ្នកនិពន្ធ ហើយទើបយកមកផ្ដុំសាច់រឿងបញ្ចូលគ្នា ដើម្បីអោយក្លាយជារឿងមួយពេញទម្រង់ និងមានសាច់រឿងជក់ចិត្ត។ ភាពយន្តមួយនេះ នឹងដំណើរការចេញថតនៅដើមខែសីហា ដោយសាច់រឿងទាំងមូលគឺនិយាយពីតារាសិង្ហបុរី និងតារាកម្ពុជាបានទៅកម្សាន្តចំថ្ងៃចូលឆ្នាំនៅក្នុងប្រទេសឡាវ និងប្រទេសថៃ ហើយក៏មានតារាថៃ មកកម្សាន្តនៅកម្ពុជាចំថ្ងៃចូលឆ្នាំដូចគ្នា ហើយក៏បង្កើតស្នេហាបែបរ៉ូម៉ាទិកមួយរបស់តួឯកទាំង៤គូ។
លោកបង្ហាញអារម្មណ៍សប្បាយចិត្តដែលមានឱកាសចាប់ដៃផលិតរឿងជាមួយផលិតករទាំង៣ប្រទេស ដែលមិនខុសពីលោកផលិតរឿងជាលក្ខណៈអន្តរជាតិ ប៉ុន្តែមិនប្រើការចំណាយទាំងស្រុងដែលមានន័យថាលោកបានផលិតរឿងមួយដោយមានក្រុមការងារជាជនបរទេសចូលរួមចាត់ចែង និងមានទាំងតួសម្ដែងដល់ទៅ៤ប្រទេសអោយសម្ដែងរួមគ្នា តែការចំណាយមិនខ្ពស់។
លោកថាភាពយន្តនេះនឹងបញ្ចប់ការថតនៅអំឡុងខែ៨ ដើម្បីអាចកាត់និងដាក់បញ្ចាំងព្រមគ្នាចុងឆ្នាំ ដោយការដាក់បញ្ចាំងមិនមែនតែនៅប្រទេសកម្ពុជាតែមួយនោះទេ គឺដាក់បញ្ចាំង៣ប្រទេសផ្សេងទៀតព្រមគ្នាតែម្ដង គឺនៅប្រទេសថៃ ឡាវ និងវៀតណាម។
ភាពយន្តមួយនេះនិយាយពីស្នេហា៤គូនៅថ្ងៃចូលឆ្នាំ ដោយតួអង្គខ្លះត្រូវឆ្លុះបញ្ចាំងពី ស្នហារ៉ូម៉ាទិកចំថ្ងៃចូលឆ្នាំនៅក្នុងប្រទេសថៃ ខ្លះនៅប្រទេសឡាវ និងភាគច្រើនបង្ហាញស្នេហារវាងតារាប្រុសខ្មែរនិងតារាស្រីថៃនៅក្នុងប្រទេសកម្ពុជា តែខ្លឹមសារសំខាន់គឺនិយាយពីស្នេហាមួយដែលមិនប្រកាន់ពូជសាសន៍ និងការរំលេចវប្បធម៌សាសនារបស់ប្រទេសទាំង៣រួមគ្នា បង្ហាញអន្តរជាតិ។
នៅក្នុងរឿងនេះនឹងត្រូវចំណាយទុនច្រើនក្នុងការរៀបចំជាប្លង់អោយដូចនឹងថ្ងៃចូលឆ្នាំនៅក្នុងប្រទេសនីមួយៗពិតៗ ទើបការចំណាយលោកថាមិនទាន់ច្បាស់រឿងថាត្រឹមមួយភាគហ៊ុន៥ម៉ឺនដុល្លារអាចគ្រប់នោះទេ។ លោកថាក្នុងពេលចេញថត ប្រសិនបើតារាថៃ ឬតារាឡាវ និងក្រុមការងារចុះមកថតនៅកម្ពុជា នោះបន្ទុកក្នុងការចំណាយគឺជារបស់លោក ប៉ុន្តែនៅពេលតារាខ្មែរ និងក្រុមការងាររបស់លោកចេញទៅថតនៅក្នុងប្រទេសថៃ ឬឡាវ ក៏ជាបន្ទុករបស់ផលិតករទាំង២ដូចគ្នាផងដែរ ទើបលោកយល់ថាទោះមានការចំណាយខ្ពស់យ៉ាងណាក៏មិនមែនជារឿងចម្លែក។
លោករំពឹងថាភាពយន្តមួយនេះ នឹងជោគជ័យនៅក្រៅប្រទេសច្រើនជាងក្នុងស្រុក ដោយសារតែភាគីថៃមានការចូលរួមសម្ដែងដោយតារាស្រីថៃដែលកំពុងឡើងកូដ ហើយភាគីឡាវ និងសិង្ហបុរី ក៏សម្ដែងអោយតួអង្គល្បីឈ្មោះដែលមានយុវវ័យប្រចាំប្រទេសពួកគេចូលចិត្ត ក្នុងពេលដែលភាគីខាងតារាខ្មែរដែលលោកជ្រើសរើស ក៏សុទ្ធតែជាតួសម្ដែងដែលមានកេរ្តិ៍ឈ្មោះបោះសំឡេង និងឡើងកូដ។
ម្យ៉ាងមកពីមុនចាប់ដៃផលិតរឿងនេះ ភាគីខាងថៃ ឡាវ និងវៀតណាម សុទ្ធតែបានអះអាងថានឹងទទួលយករឿងនេះទៅដាក់បញ្ចាំងតាមរោងទំនើបដោយមិនភ័យរឿងទីផ្សារដាក់បញ្ចាំងផង ទើបលោកកក់ក្ដៅ ក្នុងការចាប់ដៃ។ លោកថាផលិតករថៃ និងសិង្ហបុរីដែលលោកចាប់ដៃ ធ្លាប់បានយករឿងដែលពួកគេផលិតទៅបញ្ចាំងនៅក្នុងទីផ្សារទាំង៣ ហើយទទួលបានជោគជ័យយ៉ាងច្រើនមកហើយ ទើបលោកយល់ថាការផលិតមួយរឿងនេះ គឺទោះជាត្រូវ ចំណាយអស់ជាង៣០ម៉ឺនដុល្លារ ក៏មិនពិបាកក្នុងប្រមូលដើមវិញ។
លោកនឹងយកបទពិសោធន៍ក្នុងការផលិតរឿងរួមគ្នាលើកនេះ ហើយបន្តចាប់ដៃជាមួយផលិតករក្រៅប្រទេសក្នុងរឿងបន្តបន្ទាប់ ដើម្បីបញ្ច្រៀតភាពយន្តរបស់ខ្មែរទៅកាន់ទីផ្សារក្រៅប្រទេសអោយកាន់តែទូលាយ។
លោកនិយាយថា «សម្រាប់ភាពយន្តខ្មែរគឺទោះជាយើងផលិតបានល្អម៉េច ក៏មិនងាយចូលទីផ្សារបរទេសបានដែរ ពិសេសត្រឹមតែនៅរោងក្នុងបាងកកក៏មិនងាយចូលដែរ តែបើយើងចាប់ដៃជាមួយបរទេសហើយផលិតជាមួយគ្នាចឹង គឺអត់ពិបាកទេ ព្រោះគាត់ធានាទីផ្សារខាងគាត់ ហើយយើងធានាទីផ្សារខាងយើង ចឹងដឹងតែជោគជ័យម្មង»។
លោកថាផលិតករដែលបានចាប់ដៃផលិតរឿងជាមួយលោកគឺសុទ្ធតែជាផលិតករដែលបានផលិតភាពយន្តខ្នាតធំ ហើយទទួលជោគជ័យនៅលើទីផ្សារក្នុងរោងកុនក្នុងតំបន់អាស៊ានរួចអស់មកហើយ ទើបលោកសប្បាយចិត្តក្នុងការចាប់ដៃ។ ការផលិតរឿងនេះ លោកថាមានការចំណាយខ្ពស់ ប៉ុន្តែបើនិយាយពីលទ្ធផលគឺបានច្រើនជាងឆ្ងាយណាស់ ជាពិសេសនៅពេលដែលលោកមានឱកាសបានបញ្ចូលសម្ដែងតារាខ្មែរច្រើននាក់អោយបានសម្ដែងរឿងនេះ ដែលលោកចាត់ទុកថាគឺជាមោទភាពធំមួយសម្រាប់តារាខ្មែរ និងវិស័យភាពយន្តរបស់ខ្មែរតែម្ដង។
ភាពយន្តមួយនេះ លោកថាមានការចូលរួមសម្ដែងដោយតារាខ្មែរច្រើននាក់ ជាពិសេសត្រង់ឈុតថ្ងៃចូលឆ្នាំដែលតម្រូវអោយផលិតកររៀបចំប្លង់អោយដូចនឹងថ្ងៃចូលឆ្នាំពិតៗ បង្ហាញនៅក្នុងសាច់រឿងស្ដែងពីវប្បធម៌របស់ប្រទេសកម្ពុជានោះ។ មួយវិញទៀត ដោយសារតែរឿង«អនុស្សាវរីយ៍ថ្ងៃចូលឆ្នាំ»គឺជាភាពយន្តនិយាយពីស្នេហា និងវប្បធម៌ក្នុងថ្ងៃចូលឆ្នាំរបស់កម្ពុជា ឡាវ និងថៃ ទើបលោកយល់ថាចំណាប់អារម្មណ៍សម្រាប់សាច់រឿងមួយនេះ នឹងកាន់តែទាក់ទាញល្អ ដើម្បីដឹងថាតើពេលចូលឆ្នាំរបស់ប្រទេសទាំង៣ គឺមានលក្ខណៈស្រដៀងគ្នា និងខុសគ្នាបែបណាខ្លះ? ផលិតករថៃ ឡាវ និងសិង្ហបុរី ក្រៅពីទទួលខុសត្រូវលើភាគហ៊ុនស្មើនឹងផលិតកម្មមហាហង្ស លោកថាក៏ត្រូវរាប់រងរឿងតម្លៃតួឯកប្រុសស្រីដែលយកមកថត លើក្រុមការងារ និងផ្ដល់ឧបករណ៍ថតអោយទំនើបផងដែរ ដើម្បីអោយរឿងទាំងមូលមានគុណភាពទាំងរូបភាព ទាំងសំឡេង និងប្លង់ក្នុងរឿង។
លោក ខាត់ វ៉ៃហាំង ដែលជាតារាខ្មែរមួយរូបមានសំណាងបានសម្ដែងជាតួគូស្នេហ៍ជាមួយតារាថៃ កញ្ញា ណាតាទីដា ដាំរ៉ុងវិសិដ្ឋផេត បានអះអាងថាលោកមានអារម្មណ៍រំភើបចិត្តយ៉ាងខ្លាំង ដែលត្រូវបានផលិតករមហាហង្សជ្រើសរើសអោយធ្វើតេស្ដិ ហើយក៏ត្រូវផលិតករមកពី៣ប្រទេសផ្សេងទៀតពេញចិត្តអោយធ្វើតួឯកមួយរូប។ លោកថាតួអង្គសំខាន់ៗនៅក្នុងរឿងនេះគឺលុះត្រាតែមានការឯកភាពពីខាងបរទេសជាដៃគូ ទើបលោកយល់ថាតារាដែលបានសម្ដែងនៅក្នុងរឿងនេះគឺជាមោទនភាពធំមួយ។
យ៉ាងណាមិញ លោកបានបង្ហាញពីអារម្មណ៍រំភើប ក្នុងពេលដែលរឿងមួយនេះ ជាភាពយន្តដែលផលិតដោយផលិតករ៤ប្រទេសផ្សេងគ្នា គឺថៃ ឡាវ សិង្ហបុរី និងកម្ពុជា ប៉ុន្តែកម្ពុជាបានធ្វើជាអ្នកចាត់ចែងធំជាងគេ ដោយអាចសម្រេចលើការស្នើតួអោយថតបានច្រើន ដែលធ្វើអោយភាពយន្តមួយនេះគឺមិនខុសពីភាពយន្តរបស់ខ្មែរនោះទេ ប៉ុន្តែមានការចូលរួមពី ក្រុមការងារបរទេស និងពីតារាបរទេស៣ប្រទេសផ្សេងគ្នា។
លោកថាចំពោះភាសាគឺមិនមានបញ្ហាចោទនោះទេ ដោយសារតែក្នុងពេលថតគឺក្រុមការងារបានអះអាងថានឹងមានអ្នកបកប្រែប្រចាំការ ហើយប៉ារ៉ូលដែលត្រូវនិយាយក៏ត្រូវនិយាយភាសារៀងខ្លួន ដោយក្នុងពេលបញ្ចាំងគឺបកប្រែតែភាសារបស់តួអង្គដែលផ្ទុយពីប្រទេសដែលត្រូវបញ្ចាំងរឿង។ អ្វីដែលលោកសប្បាយថែមទៀត គឺរឿងទាំងមូលនឹងត្រូវដាក់បញ្ចាំងព្រមគ្នានៅប្រទេសកម្ពុជា ថៃ ឡាវ និងវៀតណាម ហើយឮថាក្នុងថ្ងៃបើកសម្ពោធដាក់បញ្ចាំង គឺតារាបរទេស និងក្រុមការងារថៃ ឡាវ និងសិង្ហបុរី នឹងមកសម្ពោធនៅកម្ពុជាបំពេញមុខកម្ពុជា៕