ប្រធានគណបក្សអំណាចខ្មែរ បានប្រកាសឲ្យសកម្មជនខ្លួនត្រៀមខ្លួនទប់ស្កាត់និងដាក់ពាក្យបណ្តឹងទៅលើមន្ត្រីណាដែលចុះឈ្មោះឲ្យជនបរទេសខុសច្បាប់ បោះឆ្នោតរើសមេដឹកនាំកម្ពុជា។
ក្នុងសន្និសិទសារព័ត៌មាននៅព្រឹកថ្ងៃពុធនេះ លោក សួន សេរីរដ្ឋា ថ្លែងថាគណបក្សលោកបានប្រកាសឲ្យសកម្មជនខ្លួន ត្រៀមខ្លួនទប់ស្កាត់ជនបរទេសខុសច្បាប់ដែលទៅចុះឈ្មោះបោះឆ្នោត។ លោកថាគណបក្សនេះក៏ត្រៀមដាក់ពាក្យបណ្តឹងប្តឹងមន្ត្រីណាដែលចុះឈ្មោះឲ្យជនបរទេសទាំងនោះ។ លោកបន្តថា៖ “យើងសម្រេចផ្ទេរសិទ្ធិឲ្យតំណាងរាជធានី–ខេត្តទាំងអស់នៅទូទាំងប្រទេសគឺថាមានសិទ្ធិ ដើម្បីនឹងចាត់ចែងតែងតាំងសកម្មជននៅតាមឃុំ–សង្កាត់ទាំងអស់ ដើម្បីឃ្លាំងមើលការចុះឈ្មោះបោះឆ្នោតនៅតាមមណ្ឌលបោះឆ្នោតនៅទូទាំងប្រទេស។… ទប់ស្កាត់(ជនបរទេស)ផង ហើយអាចដាក់ពាក្យបណ្តឹងប្តឹងផង មិនមែនប្តឹងត្រឹមតែជនជាតិយួនទេ គឺប្តឹងចំពោះមន្ត្រីណាដែលឃុបឃិត ឲ្យពូកហ្នឹងបន្តចុះឈ្មោះបោះឆ្នោត”។
លោក សួន សេរីរដ្ឋា អះអាងថា លោកមើលឃើញមានភាពមិនប្រក្រតីនៃការធ្វើអត្តសញ្ញាណប័ណ្ណសញ្ជាតិខ្មែរឲ្យជនជាតិវៀតណាមដោយមិនបានចូលសញ្ញាតិត្រឹមត្រូវ។ លោកថាជនបរទេសមិនអាចសម្រេចវាសនាប្រទេសកម្ពុជាជំនួសប្រជាជនកម្ពុជាបានទេ។
មន្រ្តីអន្តោប្រវេសន៍កម្ពុជាឲ្យដឹងថា មានជនជាតិវៀតណាមជាង៧ម៉ឺននាក់ប្រើប្រាស់ឯកសាររដ្ឋបាលរបស់កម្ពុជាដោយខុសច្បាប់។
អ្នកនាំពាក្យគណៈកម្មាធិការជាតិរៀបចំការបោះឆ្នោតលោក ហង្ស ពុទ្ធា មានប្រសាសន៍ថា គ.ជ.ប ស្វាគមន៍ចំពោះការចូលរួមសង្កេតការណ៍លើការចុះឈ្មោះបោះឆ្នោតនេះ។ ចំពោះការប្តឹងទៅលើមន្ត្រី គ.ជ.ប លោកថាគណៈកម្មាធិការនេះនឹងទទួលយកមកពិនិត្យ តែលោកថាប្រសិនជាការប្តឹងនោះគឺគ្រាន់តែមានបំណងរំខាន លោកថាអាចប្រឈមទៅនឹងផ្លូវច្បាប់ផងដែរ។
លោកបន្ថែមថា៖ “ជាការពិត មន្ត្រីចុះឈ្មោះគាត់មានតួនាទីក្នុងការទទួលប្រជាពលរដ្ឋក្នុងការចុះឈ្មោះបោះឆ្នោត។ អញ្ចឹងការបង្កឲ្យមានភាពរញ៉េរញ៉ៃ ប៉ះពាល់ដល់ដំណើរការនៃការចុះឈ្មោះបោះឆ្នោតនោះ អាចនឹងក្លាយទៅជាបទល្មើសផ្សេងៗទៀត។ អជ្ញាធរឃុំ–សង្កាត់ដែលមានតួនាទី វិមជ្ឈការចុះឈ្មោះបោះឆ្នោតនេះ លោកនឹងចាត់វិធានការទៅតាមផ្លូវច្បាប់ហើយ”។
នាយកប្រតិបត្តិអង្គការឃ្លាំមើលការបោះឆ្នោតហៅកាត់ថាខុមហ្រ្វែលលោក គល់ បញ្ញា យល់ថាអ្នកសង្កេតការណ៍គួរមានការពិភាក្សាជាមួយ គ.ជ.ប ដើម្បីមាននីតិវិធីណាមួយច្បាស់លាស់សម្រាប់ករណីនេះ។ លោកឲ្យដឹងថាជាក្រមសីលធម៌បក្សនយោបាយ គឺមិនអនុញ្ញាតឲ្យទៅរារាំងជនណាម្នាក់មិនឲ្យចុះឈ្មោះបោះឆ្នោតទេ ហើយការប្តឹងជនណាម្នាក់មិនឲ្យចុះឈ្មោះបោះឆ្នោតគឺត្រូវមានភស្ភុតាងច្បាស់លាស់។ សម្រាប់ការប្តឹងតវ៉ាទៅលើមន្ត្រីចុះឈ្មោះបោះឆ្នោតណាមួយ លោកថាគឺអាចធ្វើបាន តែមិនត្រូវបង្កឲ្យមានការរំខានដល់ដំណើរការនៃការចុះឈ្មោះបោះឆ្នោតទេ។
លោកបន្តថា៖ “ជាក្រមសីលធម៌របស់ភ្នាក់ងារគណបក្ស គេមិនឲ្យយើងមករារាំងអ្នកមកចុះឈ្មោះបោះឆ្នោតទេ គឺត្រូវអនុវត្តន៍តាមនីតិវិធីដំណើរការនៃការចុះឈ្មោះបោះឆ្នោតហ្នឹង បើយើងចង់ប្តឹង យើងត្រូវរកភស្ភុតាងរកអីដើម្បីដាក់បណ្តឹងហ្នឹង។ ការរារាំងវាអាចនាំទៅជាបញ្ហា“។
បើតាម គ.ជ.ប អ្នកមានសិទ្ធិបោះឆ្នោតមានដល់ជាង១០លាននាក់ ដោយដំណើរការចុះឈ្មោះបោះឆ្នោតក្រុមប្រឹក្សាឃុំ-សង្កាត់ចាប់ផ្តើមពីថ្ងៃទី១ខែកញ្ញាដល់ថ្ងៃទី២៩ ខែវិច្ឆិកា ឆ្នាំ២០១៦៕
