ព័ត៌មានថ្ងៃនេះ សហគមន៍​មាន​ជម្លោះ​ដីធ្លី​នៅ​ភ្នំពេញ​រៃ​អង្គាស​លុយ​គ្នា​ធ្វើ​ដំណើរ​ចូលរួម​បាតុកម្ម​ជាមួយ​ពលរដ្ឋ​ខេត្ត​កោះកុង​​អ្នក​មាន​ជម្លោះ​ដីធ្លី​បន្ត​បាតុកម្ម​នៅខាងមុខ​តុលាការ​ខេត្ត​កោះកុង​ទាមទារ​ឲ្យ​ដោះលែង​តំណាង​ខ្លួន​​ក្រុមប្រឹក្សា​ឃ្លាំ​មើល​កម្ពុជា​និង​យុវជន​នៅតែ​មាន​កង្វល់​ពី​ភាពមិនប្រក្រតី​នៃ​ការបោះបង្គោល​ព្រំដែន​កម្ពុជា​-វៀតណាម​ពលរដ្ឋ​រិះគន់​អាជ្ញាធរ​ស្រុក​ស្រី​សន្ធរ និង​ខេត្ត​កំពង់ចាម​ថា​ធ្វើ​ផ្លូវខុស​បចេ្ចកទេស​គ្មាន​ស្លាក​សញ្ញា​ចរាចរណ៍​ដំណោះស្រាយ​បញ្ហា​ឧស្ម័ន​រុស្ស៊ី និង​អ៊ុយ​ក្រែន​សង្គ្រោះ​ការផ្គត់ផ្គង់​ឧស្ម័ន​ទៅ​អឺរ៉ុប​នៅ​រដូវរងារ​ខាងមុខ​​កម្មករ​រោងចក្រ​ ជូ​ហួយ ហ៊្វូ​វែ ជិត១០០០​នាក់ ព្រមាន​ហែរ​ក្បួន​ទៅផ្ទះ​លោកនាយក​រដ្ឋមន្ត្រី​បក្សប្រឆាំង​បកអាក្រាត​ភាព​មិន​ប្រក្រតី​ក្នុង​រដ្ឋសភា​អង្គការសហប្រជាជាតិ​ព្រមាន​ពី​ចំនួន​សកម្មប្រយុទ្ធ​បរទេស​កើនឡើង​មិន​ធ្លាប់​មាន​មេដឹកនាំសហជីពពីររូបប្ដេជ្ញាបន្តចូលរួមការតវ៉ាទោះជាមានកំហិតពីតុលាការកម្ពុជាមានកំនើនតម្រូវការរថយន្តថ្មី (វីដេអូ)

ថ្ងៃសៅរ៍ ទី1 វិច្ឆិកា 2014
អំពីវីអូឌី | ទំនាក់ទំនង
ព័ត៌មានថ្មីបំផុត

ព័ត៌មានក្នុងប្រទេស

សហគមន៍​មាន​ជម្លោះ​ដីធ្លី​នៅ​ភ្នំពេញ​រៃ​អង្គាស​លុយ​គ្នា​ធ្វើ​ដំណើរ​ចូលរួម​បាតុកម្ម​ជាមួយ​ពលរដ្ឋ​ខេត្ត​កោះកុង​

ថ្ងៃសៅរ៍ ទី1 វិច្ឆិកា 2014 | 26 នាទី មុន

​ប្រជា​សហគមន៍​មាន​ជម្លោះ​ដីធ្លី​នៅ​រាជធានី​ភ្នំពេញ គ្រោង​លើកគ្នា​ចូលរួម​បាតុកម្ម​នៅខាងមុខ​តុលាការ​ខេត្ត​កោះកុង ជាមួយ​ប្រជា​សហគមន៍​ក្នុង​ខេត្ត​នេះ  ដើម្បី​ជំរុញ​ឲ្យ​តុលាការ ដោះលែង​តំណាង​របស់​ពួកគេ​ម្នាក់ ដែល​តុលាការ​ចាប់ឃុំខ្លួន​ពេល​កោះហៅ​សាកសួរ  ពីបទ​លួច​ទ្រព្យសម្បត្តិ​ក្រុម​ហ៊ុន SEZ​។​ ​អ្នកស្រី ច្រាយ នីម តំណាង​សហគមន៍​ថ្មគោល​រាជធានី​ភ្នំពេញ ឲ្យVOD ​ដឹង​នៅ ថ្ងៃ​សៅរ៍​នេះ​ថា ពួកគាត់​ជិត​១០០​នាក់​គ្រោង​ទៅ​ចូលរួម​ធ្វើបាតុកម្ម​ជាមួយ​ប្រជាពលរដ្ឋ​ខេត្ត​កោះកុង នៅ​ថ្ងៃ​ចន្ទ​ដើម​សប្តាហ៍​នេះ​។  អ្នកស្រី​ថា អ្វី​ជា​បញ្ហា នៅពេល​នេះ​ពួកគាត់​កំពុង​រៃ​អង្គាស​លុយ​គ្នា ដើម្បី​បាន​ធ្វើ​ដំណើរ និង​ជា​សោ​ហ៊ុយ​ហូបចុក ពេល​ទៅ​ជួយ​ធ្វើ​បាតុកម្ម​នៅ​ទីនោះ ដោយសារ​ពួក​គាត់​ស្ថិតក្នុង​សភាព​ខ្វះខាត​។​ ​អ្នកស្រី​ច្រាយ នីម បន្ថែមថា មូលហេតុ​ដែល​គាត់​ចង់​ទៅ​ជួយ​សហគមន៍​នៅ​ខេត្ត​កោះកុង ដោយសារ​តុលាការ​ខេត្ត​នេះ ចាប់​តំណាង​ពលរដ្ឋ​ដាក់​ពន្ធនាគារ​ដោយ​អ​យុតិធម៌​។ ​សង្គម​ស៊ីវិល ចាត់ទុកការឃុំ​នេះ ថា​មិន​មាន​តម្លាភាព ហើយ​មេធាវី​ធ្លាប់​ដាក់​លិខិត​សុំ​អន្តរាគមន៍ ឲ្យនៅ​ក្រៅ​ឃុំ កាលពី​ថ្ងៃ​ទី​២៨​ខែតុលា​។​ ​រយៈពេល​៦​ថ្ងៃ​ហើយ ប្រជា​សហគមន៍​មាន​ជម្លោះ​ដីធ្លី​ជាមួយ​ក្រុមហ៊ុន SEZ  បាន​បោះ​តង់​ស្នាក់​នៅ​ខាង​មុខ​តុលាកា​ខេត្ត​កោះកុង ហើយ​ពួកគេ​ទាំង​នោះ​ប្តេជ្ញា​ថា នឹង​បន្ត​ស្នាក់​នៅ​រហូត​មាន​ការដោះលែង​តំណាង​របស់​គាត់​ឲ្យមាន​សេរីភាព​ឡើងវិញ​។​ ​សូមជម្រាបថា តំណាង​ប្រជាពលរដ្ឋ​ឃុំ​ព្រែក​ខ្សាច់ ស្រុក​គិរីសាគរ ខេត្ត​កោះកុង លោក​ផន ណុល ត្រូវបាន​តុលាការ​ខេត្ត​នេះ​សម្រេច​ឃុំ​ខ្លួន​អស់​រយៈពេល​៦​ថ្ងៃ​មក​ហើយ ក្រោម​បទ​ចោទ​លួច​ទ្រព្យសម្បត្តិ​ក្រុមហ៊ុន SEZ ប៉ុន្តែ​មន្ត្រី​នគរបាល​មូលដ្ឋាន​អះអាងថា គេ​រក​មិនឃើញ​កំហុស​របស់​តំណាង​ពលរដ្ឋ​រូបនេះ​ទេ​៕ សូមសរសេរមកអ្នកនាង ថុល ស្រី​លក្ខណ៍ តាមរយៈ sreyleak@vodhotnews.com

[អានបន្ត]
​អ្នក​មាន​ជម្លោះ​ដីធ្លី​បន្ត​បាតុកម្ម​នៅខាងមុខ​តុលាការ​ខេត្ត​កោះកុង​ទាមទារ​ឲ្យ​ដោះលែង​តំណាង​ខ្លួន​

ថ្ងៃសៅរ៍ ទី1 វិច្ឆិកា 2014 | 44 នាទី មុន

​ប្រជាពលរដ្ឋ​មាន​ជម្លោះ​ដីធ្លី​ជាមួយ​ក្រុមហ៊ុន​កោះកុង SEZ បន្ត​ប្រមូលផ្តុំ​គ្នា​បោះតង់​ស្នាក់​នៅ​ខាង​មុខ​តុលាការ​ខេត្ត​កោះកុង ដើម្បី​ជំរុញ​ឲ្យ​តុលាការ​ខេត្ត​នេះ ដោះលែង​តំណាង​របស់​ពួកគេ​ម្នាក់​ដែល​តុលាការ​ចាប់ឃុំខ្លួន​ពេល​កោះហៅ​សាកសួរ  ពីបទ​លួច​ទ្រព្យសម្បត្តិ​ក្រុមហ៊ុន​។​ ​ប្រជាពលរដ្ឋ​ម្នាក់​ក្នុង​ចំណោម​អ្នក​តវ៉ា លោក រៀម រ៉ុម បានឲ្យ​ដឹង​នៅ​ថ្ងៃ​សៅរ៍​នេះ​ថា ប្រជាពលរដ្ឋ បន្ត​បោះតង់​ស្នាក់នៅ ទាំង​យប់​ទាំង​ថ្ងៃ នៅ​ខាង​មុខ​តុលាការខេត្ត​នេះ​។ លោក​ថា ក្រុម​ប្រជាពលរដ្ឋ​មួយចំនួន​បាន​បន្ត​ធ្វើ​ដំណើរ​មក​ពី​ភូមិ​បន្ថែមទៀត ហើយ​ពួកគេ​ប្តេជ្ញា​បន្ត​ការតវ៉ា​លុះ​ត្រា​តែ​មាន​ការដោះលែង​តំណាង​របស់​គេ​មក​វិញ​។​ ​លោក រៀម រ៉ុម បន្ថែមថា ការឃុំ​ខ្លួន​តំណាង​ពួក​គាត់​នេះ គឺ​អ​យុតិធម៌ ដោយសារ​ក្រុមហ៊ុន​រំលោភ​យក​ដីធ្លី​របស់​គាត់ តែ​មិន​មាន​ទោស បែរ​ជា​ពួក​គាត់​​រឹបអូស​ទ្រព្យសម្បត្តិ​ក្រុមហ៊ុន​បន្តិចបន្តួច មានទោស​ជាប់​ពន្ធនាគារ​ទៅ​វិញ​។​ ​កាលពី​ល្ងាច​ថ្ងៃទី​៣១ ខែតុលា ឆ្នាំ​២០១៤ ម៉ោង​៥:៣០​នាទី លោក ប៉ែន ប៊ុនឈួ​យ អភិបាល​ស្តីទី​ក្រុង​ខេមរភូមិន្ទ បាន​ប្រជុំ​ជាមួយ​ប្រជាពលរដ្ឋ​ចំនួន​១០​នាក់​ក្នុងចំណោម​៦០​នាក់ ដើម្បី​សម្របសម្រួល​យក​យោបល់ និង​សំណូមពរ​ពី​ប្រជាពលរដ្ឋ​។​ ​សង្គម​ស៊ីវិល រិះគន់​តុលាការ​ខេត្ត​កោះកុង ដែល​បាន​សម្រេច​ឃុំ​ខ្លួន​តំណាង​ពលរដ្ឋ​មាន​ជម្លោះ​ដីធ្លី​ម្នាក់ លោក​ផន ណុល កាល​ពី​ម្សិលមិញ​នេះ​ថា មាន​ភាព​អ​យុតិធម៌ និង​ជា​ការគំរាមកំហែង​ដល់​សកម្មជន​ដីធ្លី​។​ ​តំណាង​ប្រជាពលរដ្ឋ​ឲ្យដឹងថា នៅ​ខែ​មករា ក្រុមហ៊ុន​កោះកុង SEZ.Co.LTD បាន​យក​គ្រឿងសំណង់​ទៅ​ធ្វើ​របង​ព័ទ្ធ​ដី​ប្រជាពលរដ្ឋ​១៣៥​គ្រួសារ នៅ​ឃុំ​ព្រែក​ខ្សាច់ ស្រុក​គិរីសាគរ ខេត្ត​កោះកុង​។ ពេលនោះ​ប្រជាពលរដ្ឋ​បាន​រាយការណ៍​ទៅ​នគរបាល​មូលដ្ឋាន ពី​គម្រោងការណ៍​ដកហូត​គ្រឿង​សំណង់​នោះ​។ ប៉ុន្តែ​ពីរ​ថ្ងៃក្រោយ​ការជូនដំណឹង​នោះ ពួកគាត់​បាន​ដកហូត​គ្រឿងសំណង់​របស់​ក្រុមហ៊ុន SEZ ដោយ​មាន​នគរបាល​មូលដ្ឋាន​ដឹង​ឮ​។ ករណី​នេះ​តុលាការ​បាន​ចោទប្រកាន់​ពួក​គាត់​ថា បាន​លួច​យក​ទ្រព្យសម្បត្តិ​របស់​ក្រុមហ៊ុន ហើយ​បាន​កោះហៅ​តំណាង​ពួក​គាត់​ចូល​តុលាការ​ជា​បន្តបន្ទាប់​។​ ប្រភព​ដដែល​បន្ថែមថា លុះដល់​ថ្ងៃ​២៣ ខែ​កញ្ញា ឆ្នាំ​២០១៤ តុលាការ​ខេត្ត​កោះកុង​បាន​កោះហៅ​តំណាង​ពលរដ្ឋ​៤​នាក់​ឲ្យចូល​បំភ្លឺ ប៉ុន្តែ​ដោយ​សារ​​មាន​ប្រជាពលរដ្ឋ​ច្រើន ឡើង​ទៅ​តវ៉ា ទើប​តុលាការ​ប្ដូរ​នីតិវិធី គឺ​កោះហៅ​តែ​តំណាង​ម្នាក់​ចូល​បំភ្លឺ​រួច​ឃុំខ្លួន​៕ សូមសរសេរមកអ្នកនាង ថុល ស្រី​លក្ខណ៍ តាមរយៈ sreyleak@vodhotnews.com

[អានបន្ត]
​ក្រុមប្រឹក្សា​ឃ្លាំ​មើល​កម្ពុជា​និង​យុវជន​នៅតែ​មាន​កង្វល់​ពី​ភាពមិនប្រក្រតី​នៃ​ការបោះបង្គោល​ព្រំដែន​កម្ពុជា​-វៀតណាម​

ថ្ងៃសៅរ៍ ទី1 វិច្ឆិកា 2014 | 1 ម៉ោង មុន

​ក្រុមប្រឹក្សា​ឃ្លាំ​មើល​កម្ពុជា និង​យុវជន​ប្រមាណ​៨០​នាក់ គ្រោង​ចុះ​ត្រួតពិនិត្យ​បង្គោល​ព្រំដែន កម្ពុជា​-​វៀតណាម នៅ​ពាក់កណ្តាល​ខែ​វិច្ឆិកាខាង​មុខ​នេះ នៅ​ចំណុច​ចំនួន​២ ក្នុង​ស្រុក​ចន្ទ្រា ខេត្ត​ស្វាយរៀង ដោយ​ពួកគេ​សង្ស័យថា បោះ​ចូល​ក្នុង​ទឹកដី​ខ្មែរ​។ ​លិខិត​អំពាវនាវ​ស្វែងរក​ជំនួយ​ពី​មហាជន​របស់​ក្រុមប្រឹក្សា​ឃ្លាំ​មើល​កម្ពុជា ដែល​បង្ហោះ​លើ​ហ្វេ​សប៊ុក​លោក​រ៉ុង ឈុន សរសេរថា លោក រ៉ុង ឈុន នឹង​​ដឹក​នាំ​​យុវជន ប្រមាណ​៨០​នាក់ ចុះ​ត្រួតពិនិត្យ​តំបន់​ព្រំដែន​ខ្មែរ​-​យួន នៅ​ចន្លោះ​បង្គោល​ឡាក់ លេខ ១៤៧ និង​១៤៨ ដែល​ពួកគេ​សង្ស័យថា វៀតណាម​បាន​បោះបង្គោល​ក្នុង​ដី​ខ្មែរ នៅ​ស្រុក​ចន្ទ្រា​ខេត្ត​ស្វាយរៀង នៅ​ថ្ងៃ​ទី​១៦​ខែវិច្ឆិកា​ឆ្នាំ​២០១៤​ខាងមុខនេះ​។ ​សមាជិក​ក្រុមប្រឹក្សា​ឃ្លាំ​មើល​កម្ពុជា លោក រ៉ុង ឈុន បានឲ្យVOD​ដឹង​នៅ​ព្រឹក​ថ្ងៃ​សៅរ៍​នេះ​ថា មូលហេតុ​ដែល​គាត់​សម្រេចចិត្ត​ដឹកនាំ​ក្រុមយុវជន​ទៅ​មើល​បង្គោល​ព្រំដែន​នេះ ដើម្បី​ជំរុញ​ឲ្យ​យុវជន​ខ្មែរ បាន​យល់ដឹង​ពី​បញ្ហា​ព្រំដែន​របស់​កម្ពុជា និង​ប្រទេស​ជិតខាងជាពិសេសវៀតណាម និង​ថៃ​។ លោក​ថា ក្រុម​ការងារ​លោក​មាន​ផែនការ​ចុះ​នៅ​តាម​តំបន់​ផ្សេងៗ​ទៀត តែ​ជំហាន​ដំបូង​នៅ​ថ្ងៃទី​១៦​ខែ​វិច្ឆិកា​ខាង​មុខ​នេះ នឹង​ចុះ​ទៅ​ព្រំដែន​កម្ពុជា​-​វៀតណាម​។​ ​លោក រ៉ុង ឈុន បន្ថែមថា ប្រសិនបើ​រក​ឃើញ​ពី​ភាពមិនប្រក្រតី បន្ទាប់​ពី​បញ្ចប់​ទស្សនៈកិច្ច​នេះ លោក​នឹង​ធ្វើ​របាយការណ៍​ស្តី​ពី​ភាពមិនប្រក្រតី​ទាំង​នោះ ដាក់​ទៅ​រដ្ឋាភិបាល​កម្ពុជា​និង​ស្ថាប័ន​ពាក់ព័ន្ធ​។​ ​ការសម្រេចចិត្ត​ចុះ​ត្រួតពិនិត្យ​បង្គោល​ព្រំដែន​របស់​ក្រុមប្រឹក្សា​ឃ្លាំ​មើល​កម្ពុជា​នេះ ធ្វើឡើង​បន្ទាប់​ពី​មាន​ការរិះគន់​ថា ភាពមិនប្រក្រតី​នៃ​ការ​បោះ​បង្គោល​​ព្រំដែន​កម្ពុជា​-​វៀតណាម និង​វៀតណាម​ធ្វើ​ផ្លូវ​ចូល​ទឹកដី​កម្ពុជា​ប្រមាណ​៤០Km ​នៅក្នុង​ខេត្ត​មណ្ឌលគិរី​៕ សូមសរសេរមកអ្នកនាង ថុល ស្រី​លក្ខណ៍ តាមរយៈ sreyleak@vodhotnews.com

[អានបន្ត]
ពលរដ្ឋ​រិះគន់​អាជ្ញាធរ​ស្រុក​ស្រី​សន្ធរ និង​ខេត្ត​កំពង់ចាម​ថា​ធ្វើ​ផ្លូវខុស​បចេ្ចកទេស​គ្មាន​ស្លាក​សញ្ញា​ចរាចរណ៍​

ថ្ងៃសៅរ៍ ទី1 វិច្ឆិកា 2014 | 1 ម៉ោង មុន

​ប្រជាពលរដ្ឋ​នៅ​ស្រុក​មួយ​នៃ​ខេត្ត​កំពង់ចាម រិះគន់ថា ការធ្វើ​ផ្លូវ​ខុស​បច្ចេកទេស គ្មាន​ស្លាក​សញ្ញា​ចរាចរណ៍ ឬ​ចំណាំងផ្លាត ជា​ហេតុ​បណ្ដាល​ឲ្យ​ប្រជាពលរដ្ឋ​ជួប​គ្រោះថ្នាក់​ជា​ច្រើនលើក​ច្រើនសារ​។ ​ពលរដ្ឋ​នៅ​ភូមិ​ជ័យ ឃុំ​មាន​ជ័យ ស្រុក​ស្រី​សន្ធរ ខេត្ត​កំពង់ចាម លោក​ឆេង លី ប្រាប់​VOD នៅ​ថ្ងៃ​សៅរ៍​នេះ​ថា ផ្លូវ​កៅស៊ូ​តាម​ដង​ទន្លេមេគង្គ​នៅក្នុង​ភូមិ​របស់​គាត់ ត្រង់​ចំណុច​ផ្លូវ​កែង​តែងតែមាន​គ្រោះថ្នាក់​ចរាចរណ៍​កើតឡើង​ជា​ញឹកញាប់ បណ្ដាលឲ្យ​មនុស្ស​របួស​ ពិការ ខូចខាត​ទ្រព្យសម្បត្តិ និង​ស្លាប់​បាត់បង់​ជីវិត​ជា​បន្តបន្ទាប់​។​ ​លោក​ឆេង លី បន្តថា មូលហេតុ​បណ្ដាលឲ្យ​មាន​គ្រោះថ្នាក់​កើតឡើង​ជា​បន្ត​បន្ទាប់​នេះ ដោយសារ​ចំណុច​ផ្លូវកែង​នោះ​មិន​មាន​ដាក់​ស្លាក​សញ្ញា​ចរាចរណ៍ គ្មាន​ឧបករណ៍​ចំណាំងផ្លាត​សម្គាល់​នៅពេល​យប់ ដើម្បី បញ្ជាក់ថា​នៅ​ខាង​មុខ​មាន​ផ្លូវកែង ឬ​មិន​មាន​របាំង​ផ្លូវ​ជា​ដើម​។​ ​ទាក់ទង​នឹង​បញ្ហា​នេះ មេឃុំ​មានជ័យ ស្រុក​ស្រី​សន្ធរ លោកឌឹ​ម ប៊ុន​ហុង ប្រាប់ VOD នៅ​ថ្ងៃ​សៅរ៍​នេះ​ថា លោក​នឹង​ដាក់​លិខិ​តស្នើ​ទៅ​ថ្នាក់លើ ដើម្បី​ចាត់​វិធាន​ចំពោះ​បញ្ហា​ទាំងអស់​នេះ​ ប៉ុន្តែ​នៅពេល​នេះ​លោក​កំពុង​ជាប់រវល់​។​ VOD ​មិនអាច​ទាក់ទង​មន្ត្រី​មន្ទីរ​សាធារណៈការ​ខេត្ត​កំពង់ចាម ដើម្បី​បំភ្លឺ​ករណី​នេះ​បាន​ទេ​។​ ​ប្រជាពលរដ្ឋ​ឲ្យដឹងថា ពួកគាត់​មាន​ការភ័យខ្លាច​នឹង​ចំណុច​កែង​គ្រោះថ្នាក់​នោះ ហើយ​សំណូមពរ​ឲ្យ​មន្ត្រី​ពាក់ព័ន្ធ​ប្រញាប់​ដោះស្រាយ​បញ្ហា​នេះ ដើម្បី​បញ្ចៀស​គ្រោះថ្នាក់ ដែល​នាំឲ្យ​ពួកគាត់​របួស​ ពិការ បាត់បង់​ជីវិត ខូចខាត​ទ្រព្យសម្បត្តិ និង​ពេលវេលា​៕ សូម​សរសេរ​មក​កញ្ញា ខាន់ លក្ខិណា តាមរយៈ khanleakhena@yahoo.com

[អានបន្ត]
​កម្មករ​រោងចក្រ​ ជូ​ហួយ ហ៊្វូ​វែ ជិត១០០០​នាក់ ព្រមាន​ហែរ​ក្បួន​ទៅផ្ទះ​លោកនាយក​រដ្ឋមន្ត្រី​

ថ្ងៃសៅរ៍ ទី1 វិច្ឆិកា 2014, 10:28 AM

​កម្មករ​រោងចក្រ ជូ​ហួយ ហ៊្វូត​វែ (Juhui Footwear) ក្នុង​ខេត្ត​កំពង់ចាម​ជិត​១០០០​នាក់ ព្រមាន​ដង្ហែ​ក្បួន​មក​ផ្ទះ​លោក​នាយករដ្ឋមន្ត្រី នៅ​ថ្ងៃ​ចន្ទ​ដើម​សប្តាហ៍​នេះ ប្រសិន​​បើ​តុលាកា​មិន​ដោះលែង​តំណាង​របស់​ពួកគេ​៥​នាក់​ឲ្យមាន​សេរីភាព​ឡើងវិញ​។​ ​ការព្រមាន​នេះ​ធ្វើឡើង ខណៈ​ពួកគេ​កំពុង​ប្រមូលផ្តុំ​គ្នា​ធ្វើ​បាតុកម្ម​នៅ​ខាង​មុខ​រោងចក្រ នា​ព្រឹក​ថ្ងៃ​សៅរ៍​នេះ ទាមទារ​ឲ្យ​ដោះលែង​តំណាង​របស់​ពួកគេ ៥​នាក់ ដែល​តុលាការ​បញ្ជូនទៅ​មន្ទី​ឃុំខ្លួន​បណ្ដោះអាសន្ន នៅ​ពន្ធនាគារ​វត្ដ​ឃ្មង់ កាលពី​ថ្ងៃ​សៅរ៍ ទី​២៥ ខែតុលា ឆ្នាំ​២០១៤។​ ​មន្ត្រី​សហជីព ស៊ី​ខៅ​ឌូ លោក វឌ្ឍនៈ បានឲ្យ​VOD ដឹងថា នៅ​ថ្ងៃ​សៅរ៍​នេះ​កម្មករ​បាន​បន្ត​បាតុកម្ម​នៅ​ខាង​មុខ​រោងចក្រ ទាមទារ​ឲ្យមាន​ការ​ដោះ​លែង​​តំណាង​​រប​ស់​​ពួកគេ​៥​នាក់ ឲ្យមាន​សេរីភាព​ឡើងវិញ តែ​មិន​ទាន់​មាន​ដំណោះស្រាយ នៅឡើយ​ទេ​។ លោក​ថា ប្រសិនបើ​នៅ​តែ​មិន​មាន​ដំណោះស្រាយ នៅ​ថ្ងៃ​ចន្ទ​ដើម​សប្តាហ៍​នេះ ក្រុម​កម្មករ​ទាំងអស់​នឹង​ហែ​ក្បួន​រក​អន្តរាគមន៍​ដល់​ផ្ទះ​លោកនាយក​រដ្ឋមន្ត្រី​ហ៊ុន​សែន​។​ កម្មករ​រោងចក្រ ជូហួយ ហ៊្វូត​វែ បាន​ធ្វើ​ការតវ៉ា​ជា​ច្រើនលើក​ច្រើនសារ​ចាប់តាំងពី​ដើម​ខែ​តុលា​ម​ក ដើម្បី​ទាមទារ​លក្ខខណ្ឌ​ការងារ​មួយចំនួន តែ​ពុំ​ទទួលបាន​ដំណោះស្រាយ​ច្បាស់លាស់​ណាមួយ។ លក្ខខណ្ឌ​ការងារ​ទាំងនោះ​រួមមាន បន្ថែម​លុយ​បាយ​ថ្ងៃត្រង់ ស្នើ​ឲ្យ​ភាគី​ក្រុមហ៊ុន​គោរព​កិច្ច​ព្រម​ព្រៀង​ជាមួយ​កម្មករ​កាលពី​ឆ្នាំ ២០១២ ទាមទារ​លុយ​បន្ថែម​ម៉ោង​ពេល​ល្ងាច បន្ថែម​លុយ​ធ្វើដំណើរ និង​លុយ​ព្រីម​(​ប្រាក់​រង្វាន់​ទៀត​ទាត់​)​។​ កម្មករ​ឲ្យដឹងថា​រោងចក្រ ជូហួយ ហ៊្វូត​វែ ស្ថិតក្នុង​ភូមិ​រវៀង ឃុំ​ខ្នរ​ដំបង ស្រុក​ជើងព្រៃ ខេត្ត​កំពង់ចាម មាន​កម្មករ​សរុប​ជាង​៦​ពាន់​នាក់​៕ សូមសរសេរមកអ្នកនាង ថុល ស្រី​លក្ខណ៍ តាមរយៈ sreyleak@vodhotnews.com

[អានបន្ត]
បក្សប្រឆាំង​បកអាក្រាត​ភាព​មិន​ប្រក្រតី​ក្នុង​រដ្ឋសភា​

ថ្ងៃសៅរ៍ ទី1 វិច្ឆិកា 2014, 10:09 AM

​តំណាងរាស្ត្រ​មកពី​គណបក្ស​សង្គ្រោះ​ជាតិ និង​ជា​អនុប្រធានគណៈកម្មការ​ទី​២ នៃ​រដ្ឋសភា ស្នើឲ្យ​ប្រធានរដ្ឋសភាជាតិក​ម្ពុ​ជា ព្យួរ​ការងារ និង​ដក​តួនាទី​មនុស្ស​មួយ​ចំនួន​នៅក្នុង​អគ្គលេខាធិការដ្ឋាន​នៃ​រដ្ឋសភា ដើម្បី​បើកផ្លូវ​ឲ្យមាន​ការស៊ើបអង្កេត​ភាពមិនប្រក្រតី​នៃ​ការចាយវាយ​ថវិកា​រដ្ឋ​សភា​។ ​ក្នុង​លិខិត​ចុះហត្ថលេខា​ដោយ​លោក សុន ឆ័យ ចេញ​ថ្ងៃ​ទី​៣១ ខែតុលា ឆ្នាំ​២០១៤ ម្សិលមិញ ស្នើ​ឲ្យ​លោក ហេង សំរិន ព្យួរ​ការងារ​អគ្គលេខាធិការ​រដ្ឋសភា លោក ឡេង ប៉េងឡុង និង​ដក​តួនាទី​អគ្គលេខាធិការរង លោក មិត្ត កា​រ៉េ​ន រួម​ទាំង​ក្រុម​គ្រួសារ ដែល​កំពុង​កាន់កាប់​តំណែង​សំខាន់ៗ​ក្នុង​រដ្ឋសភា​។​ VOD មិនអាច​សុំ​ការអធិប្បាយ​ពី​លោក ឡេង ប៉េងឡុង និង​លោក មិត្ត កា​រ៉េ​ន ពាក់ព័ន្ធ​នឹង​បញ្ហា​នេះ​បានទេ។​ ​គួររំឭកថា ព្រះមហាក្សត្រ​នៃ​ព្រះរាជាណាចក្រ​កម្ពុជា​បាន​ត្រាស់​បង្គាប់ ក្នុង​ព្រះរាជក្រឹត្យ​ចុះ​ថ្ងៃ​ទី​៣០ ខែតុលា ឆ្នាំ​២០១៣ ដាក់ឲ្យ​អគ្គលេខាធិការ​រដ្ឋ​សភា​លោក​ឡេង ប៉េងឡុង ចូលនិវត្តន៍​ចាប់ពី​ថ្ងៃ​ទី​០១ ខែតុលា ឆ្នាំ​២០១៣ មកម្ល៉េះ​។ នេះ​បើ​តាម​ប្រភព​ព័ត៌មាន​ពី​គេហទំព័រ​ភាសា​ខ្មែរ​មួយ ដែល​បាន​ចុះ​ផ្សាយ​កាលពី​ថ្ងៃ​ទី​១៥ ខែ​ធ្នូ ឆ្នាំ​២០១៣៕ សូមសរសេរមកលោក ណុល ដារ៉ា តាមរយៈ dara@vodhotnews.com

[អានបន្ត]
មេដឹកនាំសហជីពពីររូបប្ដេជ្ញាបន្តចូលរួមការតវ៉ាទោះជាមានកំហិតពីតុលាការ

ថ្ងៃសុក្រ ទី31 តុលា 2014, 06:18 PM

ប្រធាន​សមាគម​គ្រូ​បង្រៀន​កម្ពុជា​ឯករាជ្យ លោក រ៉ុង ឈុន និង​ប្រធាន​សហព័ន្ធសហជីព​កម្ពុជា​ លោកស្រី យ៉ាង សុភ័ណ្ឌ ​បញ្ជាក់​ជំហរ​​ថា អ្នក​ទាំង​ពីរ​នៅ​តែ​បន្ត​ចូល​រួម​ក្នុង​សកម្មភាព​តវ៉ា​នានា​​ដើម្បី​ការពារ ​សិទ្ធិសមាជិក​ខ្លួន ទោះ​ជា​តុលាការ​បាន​ហាម​ឃាត់​ក៏​ដោយ។ ក្រោយ​ ពី​ការ​​ចូល​ខ្លួន​បំភ្លឺ​ក្នុង​​សាលា​ដំបូង​រាជធានី​ភ្នំពេញ​កាល​ពី​ព្រឹក​ ថ្ងៃ​សុក្រនេះ លោក​ រ៉ុង ឈុន ថ្លែង​ទៅ​កាន់​អ្នក​សារ​ព័ត៌មាននៅ​មុខ​តុលាការ​ថា នៅ​រសៀល​ថ្ងៃ​​នេះ ចៅ​ក្រម​ដាក់​ក​ម្រិត​សេរី​ភាពរូប​លោក​​មិន​ឲ្យ​ចូល​រួម​ក្នុង​ សកម្មភាព​តវ៉ា​ផ្សេងៗ ។ ទោះ​ជាយ៉ាង​ណា​ក៏ដោយ លោក​ថា លោក​នឹង​នៅ​តែ​បន្ត​ចូល​រួម​ការតវ៉ា​ ប្រសិន​បើ​សមាជិក​របស់​លោក​មាន​បញ្ហា ។ លោក រ៉ុង ឈុន មាន​ប្រសាសន៍​ថា «​វាជា ​រឿង​ដែល​ដក​សិទ្ធិ​សេរី​ភាព​ របស់​ខ្ញុំ​អស់​ហើយ អញ្ចឹង​ក្នុង​នាម​ខ្ញុំ​ជា​មេ​សមាគម មេ​សហជីព បើ​ដក​សិទ្ធិ​យើង​បែប​ហ្នឹង​សួរថាតើ​ឲ្យ​យើង​ទៅ​ការពារ​សមាជិក​យើង​បាន​ឬ​ មិន​បាន? ...​យើង​មិន​រាថយទៅ​នឹង​ដី​កា​ ឬ​សាល​ក្រម​ដែល​ដាក់​កំហិត​ខ្ញុំ​ យើង​នៅ​តែ​បន្ត​បេសកកម្ម​យើង​បន្ត​ទៅ​ទៀត»។ ដូច​គ្នា​នេះ​ ដែរ បន្ទាប់​ពី​ចេញ​ពី​សាលា​ដំបូង​រាជធានី​ភ្នំពេញ​​នៅ​រសៀល​ថ្ងៃ​សុក្រ​នេះ លោក​ស្រី យ៉ាង សុ​ភ័ណ្ឌ មាន​ប្រសាសន៍ថា លោក​ស្រី​ត្រូវ​បាន​តុលាការ​ដាក់​កំហិត​មិន​ឲ្យ​ចូល​រួម​សកម្មភាព​តវ៉ានានា​ ដូច​លោក រ៉ុង ឈុន ដែរ ។ លោក​ស្រីថា តុលាការ​ក៏​​បង្គាប់​​ឲ្យ​លោក​ស្រី ចូល​ខ្លួន​ជា​ទៀង​ទាត់ទៅ​បង្ហាញ​ខ្លួន​នៅ​ប៉ុស្តិ៍រដ្ឋបាល​​ក្នុង​មូល​ដ្ឋាន​ដែល​លោក​ស្រី​រស់​នៅ​រាល់​សប្តាហ៍​ទី៤ ក្នុង​ខែ​នីមួយៗ។ ទោះ ​យ៉ាងណា លោកស្រី​ថា នៅ​តែ​ប្រកាន់​ជំហរ​​​ចូល​រូម​ក្នុង​ការ​តវ៉ា​ផ្សេង​ដើម្បី​ការ​ពារ​ ប្រយោជន៍​សមាជិក​ខ្លួន។ លោកស្រី​មាន​ប្រសាសន៍​ថា «នេះ​ជា​សិទ្ធិ​របស់​ ខ្ញុំ វាមិន​មែនជា​សិទ្ធិ​នៅ​លើ​ការ​សម្រេច​ចិត្តរបស់​គាត់​ទេ​ ព្រោះ​ខ្ញុំ​ខ្លួន​ឯង​មិន​បាន​ប្រព្រឹត្ត​ដូច​នូវ​អ្វី​ដែល​​មាន​ក្នុង​ការ​ ចោទ​ប្រកាន់ទេ អញ្ចឹង​ខ្ញុំ​មាន​សិទ្ធិ​គ្រប់​គ្រាន់​ បើ​សិន​ជា​កម្មករ​​សមាជិក​របស់​ខ្ញុំ​មាន​​​​មាន​បញ្ហា​ហើយ​ត្រូវ​ការជំនួយ​ ពី​ខ្ញុំ​ៗ​នឹង​ទៅ​ជួយ​គាត់»។ លោក​ស្រី យ៉ាង សុ​ភ័ណ្ឌ ឲ្យ​ដឹង​ទៀត​ថា មុន​ពេល​បញ្ចប់​ការ​សាក​សួរ លោក​ស្រី​បាន​សំណូម​ពរ​ ឲ្យ​តុលាការ​លើក​បទ​ចោទ​មក​លើ​លោក​ស្រី ព្រោះ​លោក​ស្រី​មិន​បាន​ស្ថិត​ក្នុង​​ព្រឹត្តិការណ៍​បាតុកម្ម​នៅ​ផ្លូវ​វេង​ ស្រេង​នោះ​ទេ។ លោក រ៉ុង ឈុន និង​លោកស្រី យ៉ាង សុភ័ណ្ឌ ត្រូវ​បាន​តុលាការ​កោះ​ហៅ ឲ្យ​ចូល​ខ្លួន​បំភ្លឺ​នៅ​ថ្ងៃ​ សុក្រនេះតាមពាក្យបណ្ដឹងរបស់សមាគមរោងចក្រកាត់ដេរកម្ពុជា (GMAC) ដោយ​ចោទ​ពី​បទ​ហិង្សា​ដោយ​ចេតនា​មាន​ស្ថាន​ទម្ងន់ទោស ធ្វើឲ្យ​ខូចខាត​ដោយ​ចេតនា​មាន​ស្ថាន​ទម្ងន់​ទោស គំរាមកំហែង​ថា​នឹង​ធ្វើឲ្យ​ខូចខា​តដែល​ភ្ជាប់​នូវ​បញ្ហា​អ្វីមួយ និង​ប្រើ​មធ្យោបាយ​ដើម្បី​ជា​ឧបសគ្គ​ដល់​ចរាចរណ៍​សាធារណៈ ដែល​ប្រព្រឹត្ត​នៅ​ចំណុច​មុខ​សួន​ឧស្សាហកម្ម​កាណាឌីយ៉ា ផ្លូវ​វ៉េងស្រេង ភូមិ​ត្រពាំង​ថ្លឹង សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ កាលពី​ថ្ងៃ​ទី​២៥  ខែ​ធ្នូ ឆ្នាំ​២០១៣ រហូត​ថ្ងៃទី​៣ ខែ​មករា ឆ្នាំ​២០១៤៕ សូមសរសេរមកកាន់លោក ទូច​ សុខា តាមរយៈ sokha@vodhotnews.com

[អានបន្ត]
​អ្នកវិភាគ​៖​ ការ​មិន​ជជែក​សាលដីកា ​ICJ​ ជាមួយ​ថៃ​ជា​ចំណុច​គ្រោះថ្នាក់​នៅ​ថ្ងៃ​អនាគត​

ថ្ងៃសុក្រ ទី31 តុលា 2014, 05:06 PM

​អ្នកវិភាគ​បញ្ហា​សង្គម​លើកឡើងថា កម្ពុជា​មិន​លើកយក​ករណី​អនុវត្តន៍​សាលដីកា​តុលាការ​យុត្តិធម៌​អន្តរជាតិ​ ជជែក​ជាមួយ​នាយក​រដ្ឋមន្ត្រី​ថៃ​គឺជា​ការខាតបង់ ហើយ​អាច​បង្ក​គ្រោះថ្នាក់​នៅ​ថ្ងៃ​អនាគត​។ ការលើកឡើង​របស់​អ្នកវិភាគ​បែបនេះ បន្ទាប់​ពីនាយករដ្ឋមន្ត្រី​ថៃ​ដែល​កើតចេញ​ពី​រដ្ឋប្រហារ​យោធា​លោក ​ប្រា​យុទ្ធ ច័ន្ទ​អូ​ចា (Prayut Chan-O-Cha) ដឹកនាំ​គណៈប្រតិភូ​បំពេញ​ទស្សនកិច្ច​នៅ​កម្ពុជា​២​ថ្ងៃ​ គឺ​ថ្ងៃទី​៣០​ និង​៣១ ​​ខែតុលា​។ ក្នុង​ដំណើរ​ទស្សនកិច្ច​នេះ​លោក ច័ន្ទ​អូ​ចា ជួប​ជាមួយ​លោកនាយក​រដ្ឋមន្ត្រី​ហ៊ុន​សែន និង​ចូល​គាល់​ព្រះមហាក្សត្រ​នរោត្តម សីហមុនី​ផង តែ​ភាគី​ទាំង​ពីរ​មិន​បាន​ជជែក​ពី​ការអនុវត្តន៍​សាលដីកា​របស់​តុលាការ​យុត្តិធម៌​អន្តរជាតិ​ដែល​ប្រកាស​ជិត​១​ឆ្នាំ​មកនេះ​ទេ​។​

[អានបន្ត]
ជនជាតិ​ដើម​ភាគ​តិច​ស្នើ​អាជ្ញាធរ​បញ្ឈប់​គម្រោង​សាងសង់​រូប​ចម្លាក់​ព្រះពុទ្ធ​នៅ​បឹង​យក្សឡោម​

ថ្ងៃសុក្រ ទី31 តុលា 2014, 04:29 PM

ជនជាតិ​ដើម​ភាគតិច​ក្នុង​ខេត្តរតនគីរី​ ស្នើ​ឲ្យ​តំណាងរាស្ត្រ​របស់​ខ្លួន​ និងអាជ្ញាធរ​​ខេត្ត​ អន្តរាគមន៍​បញ្ឈប់​គម្រោង​​សាងសង់​រូប​ចម្លាក់​​ព្រះពុទ្ធ​ចូលនិព្វាន​ក្នុងបរិវេណ​បឹង​យក្សឡោម​ ដោយ​អះអាង​ថា ផ្ទុយ​នឹង​ប្រពៃ​ណី​​វប្បធម៌​របស់​ខ្លួន ​។ ប្រធាន​គណៈកម្មការ​បឹង​យក្ស​ឡោម​ លោក វេង​ ចឹ ​បា្រប់VODកាលពី​ថ្ងៃ​ព្រសហ្បតិ៍​ម្សិលមិញ​ថា តំណាង​រាស្ត្រ​ខេត្ត​លោក​ ប៊ូ ឡាំ​ បានបញ្ជាឲ្យ​ចៅសង្កាត់​យក្សឡោម​ប្រមូល​​​ស្នាម​​មេដៃយល់​ព្រម​ពី​ជនជាតិ​ដើម​ភាគតិច​លើ​លិខិត​គម្រោងសាង​សង់​​រូប​ចម្លាក់​​ព្រះពុទ្ធ​ចូលនិព្វាន​ លើ​ផ្ទៃ​ដី​ទំហំ​១៨​គុណ​នឹង​២៣​ម៉ែត្រ​ តែ​ពួក​គាត់​មិនព្រម​ផ្តិត ។

[អានបន្ត]
​កម្មករ​រោងចក្រ​នៅ​កំពង់ចាម​ហែ​ក្បួន​តវ៉ា​ឲ្យ​ដោះលែង​តំណាង​របស់​ខ្លួន​៥​នាក់​

ថ្ងៃសុក្រ ទី31 តុលា 2014, 03:55 PM

​កម្មករ​រោងចក្រ ជូ ហួយ ហ្វ៊ូត​វែ (Juhui Footwear) ក្នុង​ខេត្ត​កំពង់ចាម​មាន​គ្នា​ប្រមាណ​៣០០​នាក់ នៅ​ព្រឹក​ថ្ងៃ​សុក្រ​នេះ ធ្វើ​ការហែក្បួន​តវ៉ា​ទាមទារ​ឲ្យ​តុលាការខេត្ដ​នេះ ដោះ​តំណាង​ខ្លួន​៥​នាក់ និង​ទាមទារ​ឲ្យ​រោងចក្រ​ទទួល​កម្មករ​ដែរ​ត្រូវបាន​បញ្ឈប់​ចូលធ្វើការ​វិញ​។​ ​មន្ដ្រី​ផ្នែក​ច្បាប់​នៅ​សហជីព​ស៊ី​ខៅ​ឌូ​លោក ប៊ុត ប៊ុន​ឈាន ឲ្យ​VOD​ដឹង​នៅ​ថ្ងៃ​សុក្រ​នេះ​ថា កម្មករ​បាន​ហែ​ក្បួន​ទៅមុខ​សាលាដំបូង​ខេត្ដ​កំពង់ចាម ដើម្បី​ទាមទារ​តវ៉ា​ឲ្យ​ដោះលែង​តំណាង​របស់​ខ្លួន​៥​នាក់​ទៀត​ដែល​សមត្ថកិច្ច​បាន​ចាប់ខ្លួន​ទៅ​ដាក់​ពន្ធនាគារ​ខេត្ដ​កំពុងចាម​កាលពី​ថ្ងៃ​សៅរ៍ ទី​២៥ ខែតុលា ឆ្នាំ​២០១៤ ដែល​ក្រោយមក​អ្នក​ទាំង​៥​ត្រូវ​តុលាការ​បញ្ជូនទៅ​មន្ទី​ឃុំឃាំង​នៅ​ពន្ធនាគារ​វត្ដ​ធ្នង់​ជា​បណ្ដោះអាសន្ន​។​ ​កាលពី​ថ្ងៃ​សៅរ៍​សប្តាហ៍​មុន សមត្ថកិច្ច​ខេត្ត​កំពង់ចាម​បាន​ឃាត់ខ្លួន​កម្មករ  និង​សមាជិក​សហជីព​ស៊ី​ខៅ​ឌូ​ចំនួន​១០​នាក់ បន្ទាប់ពី​មាន​ករណី​ផ្ទុះ​ហិង្សា​រវាង​សមត្ថកិច្ច និង​កម្មករ ខណៈ​កម្មករ​តវ៉ា​ទាមទារ​លក្ខខណ្ឌ​ការងារ​ពី​ភាគី​រោងចក្រ ជូ ហួយ ហ្វ៊ូត​វែ ។ បន្ទាប់​ពី​តំណាង​អយ្យការ​បាន​សាកសួរ​ជន​ដែល​ត្រូវបាន​ចាប់ខ្លួន​ទាំង​នោះ នៅ​ថ្ងៃ​ចន្ទ​ដើម​សប្ដាហ៍​នេះ តុលាការ​បាន​សម្រេច​ដោះលែង​មនុស្ស​៥​នាក់ តែ​បន្ត​ឃុំខ្លួន​៥​នាក់​ទៀត ។​ ​លោក ប៊ុត ប៊ុន​ឈាន បញ្ជាក់ថា ការហែក្បួន​របស់​កម្ម​ករ​នៅថ្ងៃនេះ គឺ​ដើម្បី​ទាមទារ​នូវ​ចំណុច​សំខាន់ៗ​៣ គឺ​ទី​១​ទាមទារ​ឲ្យ​តុលាការ​ដោះលែង​តំណាង​របស់​ខ្លួន​៥​នាក់​ដែល​ជាប់​ឃុំឃាំង ទី​២​ស្នើឲ្យ​ក្រុមហ៊ុន​ទទួលយកក​ម្មករ​ដែ​ល​ក្រុមហ៊ុន​បាន​បញ្ឈប់​ឲ្យ​ពួកគាត់​បាន​ចូលធ្វើការ​វិញ និង​ទី​៣​ឲ្យ​ក្រុមហ៊ុន​គិត​ប្រាក់​រំ​ឮ​ក​ជូន​ពួកគាត់​ស្របតាម​ច្បាប់​។​ ​កម្មការិនី​ដែល​បាន​ចូលរួម​ធ្វើការ​តវ៉ា​អ្នកស្រី ស​ត គន្ធា ប្រាប់ VOD នៅ​ព្រឹក​ថ្ងៃ​សុក្រ​ទី​៣១​ខែ​តុលា​នេះ​ថា ខាង​តុលាការ​មិន​បាន​អើពើ និង​មិន​ចេញ​មក​ដោះស្រាយ​ឲ្យ​ពួកគាត់​នោះ​ទេ ។ អ្នកស្រី​អំពាវនាវ​ឲ្យ​រាជរដ្ឋាភិបាលជួយដោះ​ស្រាយ​បញ្ហា​របស់​កម្មករ និង​សំណូមពរ​ឲ្យ​តុលា​ដោះលែង​កម្មករ​ទាំង​៥​នាក់​ពីព្រោះ​ពួកគាត់​ជា​ជន​គ្មាន​កំហុស​។​ VOD​មិនទាន់​អាច​ស្វែងរក​ការទំនាក់ទំនង​ចៅក្រម​ដែល​កាន់​សំណុំរឿង​នេះ និង​ប្រធាន​តុលាការខេត្ត​កំពង់ចាម ដើម្បី​សុំ​ការអត្ថាធិប្បាយ​នៅឡើយ​ទេ ។​ ​កម្មករ​រោងចក្រ ជូ ហួយ ហ្វ៊ូត​វែ បាន​ធ្វើ​ការតវ៉ា​ជា​ច្រើនលើក​ច្រើនសារ​ចាប់តាំងពី​ដើម​ខែ​តុលា​ម​ក ដើម្បី​ទាមទារ​លក្ខខណ្ឌ​ការងារ​មួយចំនួន តែ​ពុំ​ទទួលបាន​ដំណោះស្រាយ​ច្បាស់លាស់​ណាមួយ ។ លក្ខខណ្ឌ​ការងារ​ទាំងនោះ​រួមមាន បន្ថែម​លុយ​បាយ​ថ្ងៃត្រង់ ស្នើ​ឲ្យ​ភាគី​ក្រុមហ៊ុន​គោរព​កិច្ចព្រមព្រៀង​ជាមួយ​កម្មករ​កាលពី​ឆ្នាំ ២០១២ ទាមទារ​លុយ​បន្ថែម​ម៉ោង​ពេល​ល្ងាច បន្ថែម​លុយ​ធ្វើដំណើរ និង​លុយ​ព្រីម​(​ប្រាក់​រង្វាន់​ទៀត​ទាត់​)​។​ ​កម្មករ​ឲ្យដឹងថា​រោងចក្រ ជូ ហួយ ហ្វ៊ូត​វែ ស្ថិតក្នុង​ភូមិ​រវៀង ឃុំ​ខ្នរ​ដំបង ស្រុក​ជើងព្រៃ ខេត្ត​កំពង់ចាម មាន​កម្មករ​សរុប​ជាង​៦​ពាន់​នាក់​៕ សូមសរសេរមកលោក ឡេង ចាន់​រតនា​ តាមរយៈ cjlengchanratana@gmail.com​​

[អានបន្ត]
Page: 1/671 12345678910>>>

បទយកការណ៍

បទយកការណ៍ផ្សេងទៀត

ព័ត៌មានបែបស៊ើបអង្កេត

ព័ត៌មានបែបស៊ើបអង្កេតផ្សេងទៀត

វិភាគព្រឹត្តិការណ៍

វិភាគព្រឹត្តិការណ៍ផ្សេងទៀត

បទសម្ភាសន៍

បទសម្ភាសន៍ ផ្សេងទៀត
To