ព័ត៌មានថ្ងៃនេះ នាយករដ្ឋមន្រ្តីការពារ​យន្តការ​យកប្រព័ន្ធសង្គម​​ហ្វេសប៊ុកដោះស្រាយបញ្ហារបស់ពលរដ្ឋអ្នកអះអាងថាគាំទ្ររដ្ឋាភិបាលប្រកាសធ្វើបាតុកម្មឲ្យរំលាយគណបក្សសង្រ្គោះជាតិលោក កឹម សុខា បដិសេធព័ត៌មានទៅក្រៅប្រទេស គេចពីបាតុកម្មប្រឆាំងរូបលោកបក្សប្រឆាំងស្នើរដ្ឋាភិបាល​បញ្ជូន​​​សន្ធិ​សញ្ញា​​​ពា​​​ណិ​ជ្ជ​កម្ម​​​អា​វុធឲ្យ​សភាផ្តល់សច្ចាប័ន ក្រោយកម្ពុជា​​ទទួលស្គាល់ជាង​២ឆ្នាំអសបនិងស្រីលង្កាព្រមព្រៀងគ្នាមួយដំណាក់ដំបូងដើម្បីបង្កើតសាលាក្ដីឧក្រដ្ឋកម្មសង្រ្គាមមន្ត្រី​រៀបចំដែនដីក្នុង​ខេត្តកំពង់ចាមបដិសេធការចោទប្រកាន់ពីអំពើពុករលួយប្រជាជនគុយបាសម្រុកចូលអាមេរិកដោយបារម្ភថាក្រុងវ៉ាស៊ិនតោនអាចបិទគោលនយោបាយអនុគ្រោះអន្តប្រវេសន៍កូរ៉េខាងត្បូងព្យួរការងាររោងចក្ររបស់ខ្លួនជាមួយកូរ៉េខាងជើងករណីដែលក្រុងព្យុងយ៉ាងបាញ់សាកល្បងនុយក្លេអ៊ែរវិភាគ៖ តើលោកនាយករដ្ឋមន្ត្រីពិបាកទេក្នុងការស្វែងរកព័ត៌មានពីទុក្ខលំបាករបស់ពលរដ្ឋ?​យូនីសេហ្វចាប់ផ្ដើមផែនការសកម្មភាពថ្មីនៅកម្ពុជារយៈពេល៣ឆ្នាំក្នុងទឹកប្រាក់៦៥លានដុល្លារ

ថ្ងៃព្រហស្បតិ៍ ទី11 កុម្ភៈ 2016
អំពីវីអូឌី | ទំនាក់ទំនង

ព័ត៌មានថ្មីបំផុត

ព័ត៌មានក្នុងប្រទេស

នាយករដ្ឋមន្រ្តីការពារ​យន្តការ​យកប្រព័ន្ធសង្គម​​ហ្វេសប៊ុកដោះស្រាយបញ្ហារបស់ពលរដ្ឋ

ថ្ងៃព្រហស្បតិ៍ ទី11 កុម្ភៈ 2016 | 7 នាទី មុន

លោកនាយករដ្ឋមន្រ្តី ហ៊ុន សែន បាន​លើក​ឡើង​ថា​ការណែនាំ​ឲ្យ​ស្ថាប័នក្រោមឱវាទឲ្យ​​ប្រើប្រាស់ប្រព័ន្ធសង្គម​ហ្វេសប៊ុកដើម្បី​ទទួល​ពាក្យ​បណ្តឹងពី​ប្រជា​ពលរដ្ឋ​ ជាយន្តការ​មួយ​”លឿននិងប្រសិទ្ធភាព​”និង​ថា​ដើម្បីចៀសវាង​ពលរដ្ឋទៅតវ៉ានៅ​តាម​ស្ថា​ប័នជាតិធំៗនិង​ផ្ទះនាយករដ្ឋមន្រ្តី។​ កាលពីដើមសប្តាហ៍នេះ លោក​ ហ៊ុន សែន បាន​ចេញសេចក្តីណែនាំ​ដល់​មន្ត្រី​របស់​ខ្លួន​ឲ្យចាត់​តាំង​ក្រុម​ការងារតាម​ដាន​របាយកា​រណ៍​ប្រ​ចាំថ្ងៃនិង​សំណូមពរ​របស់​ប្រ​ជាពល​រដ្ឋនៅ​លើ​ទំព័រ​ហ្វេសប៊ុក​ ដោយ​លោក​​ចាត់ទុក​ថា​នេះ​ដើម្បី​​ដោះ​ស្រាយ​បញ្ហាជូន​​ពល​រដ្ឋ​ទាន់ពេល​វេលា។ នៅក្នុងពិធីសម្ពោធសាកលវិទ្យាល័យសម្តេចហេងសំរិនត្បូងឃ្មុំ នៅព្រឹកថ្ងៃ​ព្រហស្បតិ៍នេះ លោក ហ៊ុន សែន បានប្រតិកម្ម​នឹង​អ្នកវិភាគមួយចំនួន​ដែល​រិះគន់យន្តការនេះ​។​ លោក​បានថ្លែ​ង​ថា​ការប្រើប្រាស់ហ្វេសប៊ុកនេះ​មិនមែនមានន័យថា​រដ្ឋាភិបាលបោះបង់ចោលប្រព័ន្ធ​ដឹកនាំបច្ចុប្បន្ននោះ ដោយ​ថា​គ្រាន់តែ​លោក​ចង់​ពន្លឿន​យន្តការដោះស្រាយ​។ លោក​បន្ត​ថា​បើទោះ​ជាមិនមានហ្វេសប៊ុក​ ប្រជា​ពលរដ្ឋ​នៅតែ​យក​​​ពាក្យ​បណ្តឹងនិងញត្តិ​ទៅ​ដាក់នៅរដ្ឋសភា ព្រឹទ្ធសភានិង​នៅផ្ទះរបស់នាយករដ្ឋមន្រ្តី។​ ​លោក​មានប្រសាសន៍​​ថា៖ “អញ្ចឹង​ទៅ សូមផ្តាំទៅវិញ ខ្ញុំអត់​ចោល​ប្រព័ន្ធការងារ​ខ្ញុំដែល​ធ្លាប់មានពីមុនទេ ក៏ប៉ុន្តែ​ខ្ញុំគ្រាន់តែ​បង្កើនល្បឿន​ឲ្យមន្រ្តីរបស់ខ្ញុំ គ្រប់ទីកន្លែង​ដោះស្រាយ​ការងារឲ្យ​បាន​លឿនបំផុត”។​ លោក ហ៊ុន សែន បានហៅអ្នក​វិភាគ​ដែល​លោកប្រតិកម្មនោះជា​អ្នកវិភាគចិញ្ចឹម​ចំណុចខ្សោយ​របស់​លោក​និ​ង​វិភាគ​ដើម្បីដូរយក​ប្រាក់ចំណូល។​ លោក​បញ្ជាក់ថា៖ “ហើយ​បើវិភាគមិនបានប្រឆាំងនាយករដ្ឋមន្រ្តី អាហ្នឹងវាចុះនរក។ ទាល់តែវិភាគប្រឆាំងជាមួយ​នាយករដ្ឋមន្រ្តី អាហ្នឹងទើបគេហៅប្រឆាំង បើ​អញ្ចឹង​សូម​បន្តទៀតទៅចុះ…”។ ​​នៅក្នុង​សេចក្តីណែនាំ​ លោក ហ៊ុន សែន បាន​សរសេរ​ថា​នៅ​ក្នុង​ទំព័រហ្វេសប៊ុក​របស់​លោក​សព្វ​ថ្ងៃ​នេះទទួល​បាននូវពាក្យ​បណ្តឹងនិង​សំណូម​​ពរ​របស់​ប្រ​ជា​ពល​រដ្ឋ​នៅ​ទូទាំង​ប្រ​ទេស។ លោកឲ្យ​ដឹងទៀតថាជំនួយ​ការ​របស់​លោកនឹង​ផ្ញើ​សំណូម​ពរនិង​បណ្តឹងរបស់​ប្រ​ជា​ពល​រដ្ឋ​នេះ​ទៅ​តាមហ្វេសប៊ុករបស់ក្រ​សួង​-ស្ថាប័ននិងរាជធានី-ខេត្តនីមួយៗដែល​លោក​ទទួល​បាន​ពីប្រ​ជា​ពល​រដ្ឋ​ ​។ គួ​របញ្ជាក់​ថាមួយរយៈចុងក្រោយនេះ លោក​ ​ហ៊ុន សែន ​បានចាប់ផ្តើមសកម្មលេង​ហ្វេសប៊ុក ក្រោយ​ពីខុទ្ទកាល័យ​បានប្រកាសកាលពីខែកញ្ញា ឆ្នាំ​២០១៥ ថា​លោក​មានហ្វេសប៊ុក​ផ្លូវការដែលមានចំនួន​អ្នកចុចចូលចិត្ត(Likes)ដល់ទៅជាង​២លាននាក់ លើ​សមេបក្សប្រឆាំងលោក សម រង្ស៊ី។ ទោះជាយ៉ាងណា​ លោក ហ៊ុន សែន​ ធ្លាប់​បានប្រកាសថាលោកមិនមែនជា”នាយករដ្ឋមន្រ្តីហ្វេសប៊ុក”នោះទេ ដោយបញ្ជាក់ការលេងប្រព័ន្ធសង្គមររបស់លោកនាពេលបច្ចុប្បន្ននេះ គឺដើម្បីទទួលព័ត៌មានពិតនិងគ្រប់ជ្រុងជ្រោយ៕ ​សរសេរ​មក​កាន់ លោក ស៊ុន ណារិន តាមរយៈ sun_narin@vodhotnews.com  

[អានបន្ត]
អ្នកអះអាងថាគាំទ្ររដ្ឋាភិបាលប្រកាសធ្វើបាតុកម្មឲ្យរំលាយគណបក្សសង្រ្គោះជាតិ

ថ្ងៃព្រហស្បតិ៍ ទី11 កុម្ភៈ 2016 | 51 នាទី មុន

បុរសពីរនាក់ដែលចេញមុខតាមហ្វ៊េសប៊ុកអះអាងថាជាអ្នកគាំទ្ររដ្ឋាភិបាលរបស់គណបក្សប្រជាជនកម្ពុជាប្រកាសថាពួកគេនឹងធ្វើបាតុកម្មឲ្យរំលាយគណបក្សគណបក្សសង្រ្គោះជាតិចោល ប្រសិនបើអ្នកគាំទ្រ​គណបក្សប្រឆាំងនេះហ៊ានធ្វើបាតុកម្មប្រឆាំងលោកនាយករដ្ឋមន្រ្តី ហ៊ុន សែន ដែលនឹងទៅ​អាមេរិក​នៅពាក់កណ្តាលខែនេះ។ នៅក្នុងហ្វ៊េសប៊ុកដែលឃើញផ្សព្វផ្សាយនៅថ្ងៃព្រហស្បតិ៍នេះ បុរសម្នាក់ក្នុងចំណោមបុរសពីរនាក់បានចោទប្រកាន់គណបក្សសង្រ្គោះជាតិថាបានដឹកនាំបាតុកម្មកន្លងមកនាំឲ្យខូចខាតទ្រព្យសម្បត្តិនិង​សន្តិសុខសង្គម។ បុរសរូបនោះក៏បានចោទប្រកាន់តំណាងរាស្ត្រគណបក្សសង្រ្គោះជាតិ លោក រៀល ខេមរិន្ទ្រ និង​លោក អ៊ុំ សំអាន ថាជាអ្នកធ្វើឲ្យផ្អើលដល់អង្គការសហប្រជាជាតិរឿងព្រំដែន ប៉ុន្តែគណបក្សសង្រ្គោះជាតិមិនទទួលស្គាល់ថាជាទង្វើរបស់គណបក្សនោះឡើយ ហើយថាដូចនេះការធ្វើបាតុកម្មរបស់អ្នកគាំទ្ររដ្ឋាភិបាលនេះ មិនមែនជាការទទួលខុសត្រូវរបស់មេដឹកនាំគណបក្សប្រជាជនកម្ពុជានោះទេ។ បុរសដដែលនិយាយថា៖ “ជាការឆ្លើយតបរបស់ក្រុមសម្ព័ន្ធក៏ដូចជាក្រុមយុវជនគាំទ្ររាជរដ្ឋាភិបាលដែរ ថាយើងខ្ញុំត្រៀម​ខ្លួន​ជានិច្ច ហើយអាចឈានទៅដល់ធ្វើបាតុកម្មនៅមុខគណបក្សសបង្រ្គោះជាតិ បើសិនជាក្នុង​ដំណើរទស្សនៈកិច្ចរបស់​សម្តេចតេជោ ទៅប្រជុំអាស៊ាននៅរដ្ឋកាលីហ្វញ៉ា ថ្ងៃទី១៥ ១៦នេះ អស់លោក[CNRP]ធ្វើបាតុកម្មប្រឆាំងនឹងលោក[ហ៊ុន សែន] គឺថាយើងខ្ញុំនឹងទៅដល់ទីស្នាក់គណបក្ស​សង្រ្គោះជាតិ ហើយ​ស្នើឲ្យ​រដ្ឋសភាជាតិ គឺដកបក្សចង្រៃជាតិ បំផ្លាញជាតិហ្នឹងចោលតែម្តង ចេញពីបញ្ជីបក្សនយោបាយ។មិនខ្វះទេ អត់ពីគណបក្សសង្រ្គោះជាតិមួយ វាមានគណបក្សច្រើនទៀត”។ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថាលោកមិនដឹងពីការប្រកាសធ្វើបាតុកម្មរបស់អ្នកគាំទ្រគណបក្សកាន់អំណាចនេះទេ។ តែលោកថាបើធ្វើបាតុកម្មមែនជាសិទ្ធិរបស់ពួកគេ។ ចំណែកកម្មវត្ថុនៃការធ្វើបាតុកម្មរបស់អ្នកគាំទ្ររដ្ឋាភិបាលដើម្បីឲ្យរំលាយគណបក្សប្រឆាំងនោះ លោក សុខ ឥសាន អះអាងថាមិនអាចរំលាយបានទេគឺទាល់តែប្តឹងទៅតុលាការ។ លោកមានប្រសាសន៍ថា៖ ”មិនមែនប្រកាសឲ្យគេរំលាយឬប្រកាសឲ្យអ្នកនេះអ្នកនោះ ធ្វើតាមខ្លួនបានទេ។ ចង់រំលាយអី អាហ្នឹងប្តឹងទៅតុលាការ ហើយរកកំហុសគេទៅ។ បើថាគេខុសមែន តុលាការគេពិនិត្យតាមហ្នឹង យើងមិនអាចសន្និដ្ឋានបានទេ។ លើកលែងតែវាមាននៅក្នុង​បញ្ញត្តិច្បាប់ស្តីពីការបោះឆ្នោត…”។ អ្នកនាំពាក្យគណបក្សសង្រ្គោះជាតិ លោក យ៉ែម បុញ្ញឬទ្ធិ មានប្រសាសន៍ថាលោកស្វាគមន៍ចំពោះបាតុកម្មទាំងអស់ ប៉ុន្តែត្រូវធ្វើតាមច្បាប់និងដោយអហិង្សា។ លោកមានប្រសាសន៍ថា៖ “លោកចង់ធ្វើបាតុកម្មមុខគណបក្សសង្រ្គោះជាតិ ដើម្បីឲ្យរំលាយគណបក្សសង្រ្គោះជាតិ អញ្ជើញ ហើយដាក់ពាក្យសុំត្រឹមត្រូវទៅ។ បាតុកម្មអហិង្សា គាត់អាចធ្វើ យើងគាំទ្រឲ្យមានបាតុកម្មអហិង្សាដើម្បីបញ្ចេញមតិ។ ឯកឧត្តមយល់ម៉េចចំពោះការធ្វើបាតុកម្មឲ្យរំលាយគណបក្ស?ខ្ញុំយល់ថា ប្រព័ន្ធនៅប្រទេសយើងកាន់តែយ៉ាប់ទៅៗ។ប្រព័ន្ធនៃការគ្រប់​គ្រង​រដ្ឋមួយទាំងមូល​ក្លាយទៅជាអាណាធិបតយ្យកាន់តែខ្លាំងឡើងៗ”។ លោក យ៉ែម បុញ្ញឬទ្ធិ ក៏បានបញ្ជាក់ម្តងទៀតថាបើមានបាតុកម្មនៅអាមេរិកប្រឆាំងលោក ហ៊ុន សែន គឺមិនជាជំហររបស់គណបក្សសង្រ្គោះជាតិឡើយ។ លោក ទូច វិបុល ប្រធានអង្គការ​សម្ព័ន្ធ​មិត្តខ្មែរអាមេរិកកាំងនិង​ជា​អ្នក​រៀបចំ​បាតុកម្ម មានប្រសានស៍ថា​ថ្មីៗនេះ មេដឹកនាំគណបក្ស​នយោបាយ​នានា​បាន​វាយប្រហារ​និង​ចោទប្រកាន់គ្នាទៅវិញទៅមក​ក្នុងន័យ​បង្ក​ឧបសគ្គ​ឬរារាំង​និង​បំបែក​ទំនុកចិត្ត​ពលរដ្ឋខ្មែរ​អាមេរិកាំង​កុំឲ្យ​ចូលរួមធ្វើបាតុកម្ម​ប្រឆាំង​លោក ហ៊ុន សែន។​ បើតាមសេចក្តីថ្លែងការណ៍របស់ក្រុមនេះ  ការធ្វើបាតុកម្មនោះគឺទាមទារឲ្យបញ្ឈប់ការរំលោភសិទ្ធិមនុស្ស​នៅកម្ពុជា និងបញ្ឈប់​ការចាប់ក្រុមសកម្មជនប្រជាធិបតេយ្យដាក់ពន្ធនាគារ។ ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាព ​លោក យង់ គិមអេង យល់ថាកម្មវត្ថុ​នៃការធ្វើបាតុកម្មរបស់អ្នកគាំទ្រគណបក្សប្រជាជនកម្ពុជាឲ្យរំលាយគណបក្សប្រឆាំងគឺមិនសមហេតុផលទេ​។ ចំណែកការធ្វើបាតុកម្មរបស់អ្នកគាំទ្រគណបក្សសង្រ្គោះជាតិនៅអាមេរិក លោកថាជាសិទ្ធិស្របច្បាប់។ កាលពីខែតុលាឆ្នាំ២០១៥ អ្នកគាំទ្រគណបក្សប្រជាជនកម្ពុជា បានធ្វើបាតុកម្មឲ្យដក លោក កឹម សុខា ពីអនុប្រធានទី១នៃរដ្ឋសភា ហើយក្រុមសិទ្ធិមនុស្សបញ្ជាក់ថាពេលនោះ ក្រុមកុបករខ្លះបានវាយដំមន្រ្តីជាន់ខ្ពស់គណបក្សសង្រ្គោះជាតិ គឺលោក ញ៉យ ចំរើន និង​លោក គង់ សភា បណ្តាលឲ្យរបួសធ្ងន់ ខណៈតំណាងរាស្ត្រទាំងពីររូបនេះចេញពីរដ្ឋសភា។ប៉ុន្តែ លោក សុខ ឥសាន បានច្រានចោល ចំពោះការលើកឡើងថា បាតុកម្មដែលមានហិង្សាកាលណោះ មានជាប់ពាក់ព័ន្ធនឹងគណបក្សប្រជាជនកម្ពុជា៕ សរសេរមកកាន់លោក អ៊ឹង ប៊ុនថន  តាមរយៈchanthorn@vodhotnews.com

[អានបន្ត]
លោក កឹម សុខា បដិសេធព័ត៌មានទៅក្រៅប្រទេស គេចពីបាតុកម្មប្រឆាំងរូបលោក

ថ្ងៃព្រហស្បតិ៍ ទី11 កុម្ភៈ 2016 | 1 ម៉ោង មុន

ប្រធានស្ដីទីគណបក្សសង្គ្រោះជាតិ លោក កឹម សុខា នៅថ្ងៃព្រហស្បតិ៍នេះបានបដិសេធថាលោកមិនមានគម្រោងទៅក្រៅប្រទេសដើម្បីគេចខ្លួននៅពេលមានបាតុកម្មប្រឆាំងរូបលោក។ ក្នុងពេលចុះសួរសុខទុក្ខសកម្មជនបក្សប្រឆាំងនៅពន្ធនាគារព្រៃស លោក កឹម សុខា បានលើកឡើងថាលោក​មិនចេញទៅប្រទេសណានោះទេ បើទោះ​មានបាតុកម្មប្រឆាំងរូបលោក។ ឆ្លើយតបនឹងសំណួរអ្នកសារ​ព័ត៌មានសួរថាបើមានបាតុកម្មតើលោកនឹងមា​នគម្រោងចាកចេញពីប្រទេសកម្ពុជា លោកមានប្រសាសន៍ថា៖ “ហេ! ខ្ញុំមិនទៅណាទេ។ ខ្ញុំធ្វើការនៅទីនេះ”។ ការលើកឡើងរបស់លោក កឹម សុខា ធ្វើឡើងក្រោយពេលបុគ្គលលេចធ្លោតាមប្រព័ន្ធសង្គមហ្វេសប៊ុកនិងគាំទ្រគណបក្សប្រជាជនកម្ពុជានិងជាទាហានក្នុងជួរកងយោធពលខេមរភូមិន្ទ លោក ខាន់ ចាន់សុផល បានបង្ហោះសារតាមហ្វេសប៊ុកថាលោក កឹម សុខា នឹងចេញពីប្រទេសដើម្បីគេចពីអំពើហិង្សាតាមរយៈបាតុកម្មប្រឆាំងរូបលោក។ លោកបានសរសេរថា៖ “លោក កឹម សុខា ខ្លាចអ្នកគាំទ្រគណបក្សប្រជាជនកម្ពុជាធ្វើបាតុកម្ម ដុតផ្ទះរបស់គាត់ ឬទាញគាត់ចេញពីក្នុងឡាន ហើយវាយដំដូចតំណាងរាស្ត្រទាំងពីររូបនោះ”។ លោកនាយករដ្ឋមន្រ្តី ហ៊ុន សែន ធ្លាប់បានថ្លែងបាតុកម្មប្រឆំាងនឹងបាតុកម្មនឹងកើតមានជាថ្មីទៀត ប្រសិនបើអ្នកគំាទ្រគណបក្សប្រឆំាងនៅសហរដ្ឋអាមេរិកធ្វើបាតុកម្មប្រឆំាងរូបលោកដែលទៅចូលរួមប្រជុំអាស៊ានសហរដ្ឋអាមេរិកនៅពាក់កណ្តាលខែកុម្ភៈខាងមុខនេះ។ ចំណែកប្រជាពលរដ្ឋខ្មែរអាមេរិកកាំងប្រកាសជាថ្មីថាខ្លួននឹងធ្វើបាតុកម្មនៅពេលលោកនាយករដ្ឋមន្រ្តី ហ៊ុន សែន ទៅបំពេញទស្សនកិច្ចនៅសហរដ្ឋអាមេរិក បើទោះជាលោក សម រង្ស៊ី មេដឹកនាំបក្សប្រឆាំងព្រមានកុំឲ្យធ្វើបាតុកម្មក៏ដោយ។ លោកបានថ្លែងថា៖ “រឿងបាតុកម្ម គណបក្សសង្រ្គោះជាតិគឺសូមឲ្យបងប្អូនផ្អាកទាំងអស់ គម្រោងធ្វើបាតុកម្មនៅទីណាក៏ដោយ ពីព្រោះការធ្វើបាតុកម្មនេះ វាអត់មានចំណេញអ្វី ខាត។ អ្វីដែលយើងចង់បានជាអាទិភាព ការបោះឆ្នោត ហើយយើងចូលក្នុងអន្ទ្រាក់គេហើយ បើយើងចូលធ្វើបាតុកម្ម គេមានលេស គេប្រើអំពើហិង្សា សភាពការណ៍តានតឹង វាកាន់តែកើនឡើង អាហ្នឹងវាមិនដឹងជាទៅណា…”។ គួរបញ្ជាក់ថាកាលពីលោក ហ៊ុន សែន ទៅសហរដ្ឋអាមេរិកកាលពីខែកញ្ញា ឆ្នាំ២០១៥ មានបាតុកម្មអហិង្សាមួយប្រឆំាងនឹងវត្តមានរូបលោក។ មួយខែក្រោយមកខណៈពេល លោក ហ៊ុន សែន ទៅធ្វើទស្សនកិច្ចនៅប្រទេសបារំាងក៏មានបាតុកម្មដោយអហិង្សាទាមទារឲ្យលោកចុះចេញពីតំណែង។ ភ្លាមៗនោះលោក ហ៊ុន សែន បានប្រកាសពីទីក្រុងប៉ារីសមកថាលោកគំាទ្រឲ្យមានបាតុកម្មនៅកម្ពុជាតបតវិញដើម្បីទម្លាក់លោក កឹម សុខា ពីអនុប្រធានទី១នៃរដ្ឋសភា។ បាតុកម្មប្រឆាំងលោក កឹម សុខា ក៏បានកើតមាន ហើយក្នុងថ្ងៃនោះ តំណាងរាស្ត្រគណបក្សប្រឆំាងពីររូបត្រូវគេវាយឲ្យរងរបួសធ្ងន់គឺលោក គង់ សភានិងលោក ញ៉យ ចំរើន៕ សរសេរមកកាន់លោក លី បេឡា តាមរយៈbela@vodhotnews.com  

[អានបន្ត]
បក្សប្រឆាំងស្នើរដ្ឋាភិបាល​បញ្ជូន​​​សន្ធិ​សញ្ញា​​​ពា​​​ណិ​ជ្ជ​កម្ម​​​អា​វុធឲ្យ​សភាផ្តល់សច្ចាប័ន ក្រោយកម្ពុជា​​ទទួលស្គាល់ជាង​២ឆ្នាំ

ថ្ងៃព្រហស្បតិ៍ ទី11 កុម្ភៈ 2016 | 1 ម៉ោង មុន

តំណាងរាស្រ្តគណបក្សសង្រ្គោះជាតិបានដាក់លិខិត​មួយច្បាប់​ទៅ​រដ្ឋមន្រ្តីក្រសួងការពារជាតិ ដោយ​ស្នើ​ឲ្យពន្លឿនបញ្ជូន​សន្ធិ​សញ្ញា​​​ពា​​​ណិ​ជ្ជ​កម្ម​​​អា​វុធ​​​(Arms Trade Treaty)ដែល​កម្ពុជា​គាំទ្រ​នៅអង្គការ​សហប្រជា​​ជា​តិកាលពីឆ្នាំ២០១៣​​ ឲ្យ​រដ្ឋសភាផ្តល់សច្ចាប័នដើម្បីអាចប្រើប្រាស់បាន។​ នៅក្នុងលិខិតមួយចុះថ្ងៃទី២៩ ខែមករាហើយ​​ដាក់ទៅ​រដ្ឋមន្រ្តីក្រសួងការពារជាតិ លោក ទៀ បាញ់ តំណាង​រាស្រ្ត លោក សុន ឆ័យ បានលើក​ឡើង​ថាសន្ធិសញ្ញានេះ​ត្រូវបានរដ្ឋាភិបាលចុះហត្ថលេខាគាំទ្រ​កាល​ពី​ថ្ងៃទី​​១៨ ខែតុលា ឆ្នាំ​២០១៣។ លោក​បន្តថាលោក​បា​នដាក់សំណើ​នេះទៅក្រសួងការបរទេសកម្ពុជា តែ​​ត្រូវបានណែនាំ​ឲ្យ​ដាក់ទៅក្រ​សួងការពារជាតិវិញដែលទទួលខុសត្រូវលើ​សន្ធិសញ្ញានេះ។​ លោក សុន ឆ័យ បានបញ្ជាក់​ថា៖ “សូមឯក​ឧត្តម​មេត្តាពិនិត្យ​លទ្ធភាព​ក្នុងការធ្វើសំណើមករដ្ឋសភាឲ្យ​ធ្វើការ​ពិនិត្យ​និង​ផ្តល់សច្ចាប័ន​លើកិច្ចព្រមព្រៀងArms Trade Treaty(ATT)នៅពេលឆាប់ដែលអាចធ្វើទៅបាន”។ វីអូឌីមិនទាន់​អាច​សុំការការបកស្រាយបន្ថែម​ពី​លោក សុន ឆ័យ បាននៅឡើយទេនៅថ្ងៃ​ព្រហស្បតិ៍នេះ។​ ប្រទេសកម្ពុជា​បាន​ចុះហត្ថលេខា​លើ​សន្ធិសញ្ញា​នេះ​ដែល​ធ្វើឲ្យ​កម្ពុជា​ក្លាយ​ជា​ប្រទេស​ទី​១១៤ដែល​គាំទ្រ​នូវ​​​កិច្ចព្រមព្រៀងនេះ។​ សន្ធិសញ្ញានេះ​ធ្វើឡើងដើម្បី​បង្កើត​នូវបទដ្ឋាននិង​​ស្តង់ដារ​អន្តរជាតិខ្ពស់បំផុត​សម្រាប់​​​​​កា​​រធ្វើនិ​​​​យត​​កម្ម​​លើ​​​ពា​​​ណិ​ជ្ជ​កម្ម​​​អន្តរ​​ជាតិ​​​​​​​​​លើអា​​​វុធ​​​​​ព្រ​ម​​​ព្រៀ​ង​ឲ្យ​​ប្រើ​​​ប្រាស់​​​ ​​​​​ទ​ប់​ស្កាត់និង​​​កាត់ប​ន្ថយ​​​​​កា​រ​​​ធ្វើ​​​​ពា​​​ណិជ្ជ​កម្ម​​​អា​វុធ​​​​​​ព្រម​ព្រៀង​ឲ្យ​​ប្រើ​​ប្រាស់​​​ដោ​យ​​ខុស​​ច្បាប់។ អា​​​វុធ​​ដែលត្រូវបានកំណត់​ឲ្យ​ប្រើប្រាស់​ធម្មតា​មាន​ដូចជា​​​​ជា​រថ​ក្រោះ ​រថ​​​ពាស​​ដែក ​ប្រ​ព័​ន្ធ​​កាំ​​​ភ្លើង​​​ធំ​ យន្ត​ហោះ​ប្រ​យុទ្ធ​ ឧទ្ធម្ភាគ​ចក្រ​​​វា​យ​​ប្រ​ហារ ​នា​​វា​​ចម្បាំ​ង កាំ​ជ្រួច​មី​ស៊ីល​និ​ង​​​អា​​​វុធ​ធុ​ន​តូ​ច។ សន្ធិ​សញ្ញា​​នេះក៏បាន​​​ហា​ម​​ប្រាម​កា​រ​នាំចេញ ការ​នាំ​​ចូ​ល​និ​ង​ការ​​ដឹក​​​ជញ្ជូន​​​អា​វុ​ធ​​​​ព្រម​​ព្រៀង​​​ឲ្យ​ប្រើ​​​ប្រាស់​​​​​ឆ្លង​ដែន​​ក្នុង​​ករណី​​​កា​រ​​​ហា​​ម​​ប្រាម​អា​វុធ​ និង​​​នៅ​​ពេល​​ដែលមានការ​ប្រើ​ប្រាស់​​​អា​វុធ​​​ទាំងនេះ​​​ដើ​ម្បី​​ប្រព្រឹត្តអំ​ពើ​​​ប្រ​ល័យ​​​ពូ​ជ​​សាស​ន៍ ​ឧក្រិដ្ឋ​​កម្ម​​ប្រឆាំង​មនុស្ស​​​ជាតិ​និ​ង​ឧក្រិដ្ឋ​​កម្ម​សង្គ្រាម។ អ្នកនាំពាក្យក្រសួងការពារជាតិ លោក ឈុំ សុជាតិ មានប្រសាសន៍ថា​លោក​មិនទាន់ឃើញលិខិត​របស់​តំណាងរាស្រ្តនៅឡើយទេ។ លោក​បន្ត​ថា​កន្លងទៅមានការពិចារណានិងប្រជុំផ្ទៃក្នុងលើកិច្ចព្រមព្រៀងនេះដែរ​។ លោក​មិនទាន់អាច​បកស្រាយលម្អិត​ពីកិច្ចព្រមព្រៀងនេះបាននៅឡើយទេ៕ សរសេរមកកាន់លោក ស៊ុន ណារិន តាមរយៈsun_narin@vodhotnews.com

[អានបន្ត]
មន្ត្រី​រៀបចំដែនដីក្នុង​ខេត្តកំពង់ចាមបដិសេធការចោទប្រកាន់ពីអំពើពុករលួយ

ថ្ងៃព្រហស្បតិ៍ ទី11 កុម្ភៈ 2016, 11:06 AM

ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាល ក្នុងស្រុកកងមាស ខេត្តកំពង់ចាមលោក ម៉ៅ ប៊ុនថុន បដិសេធការចោទប្រកាន់ទាក់ទងនឹងការទារប្រាក់ពីប្រជាពលរដ្ឋជាថ្នូរទៅនឹងការចេញលិខិតសាងសង់ផ្ទះ ការទិញលក់ដី និងការអនុញ្ញាតឲ្យសាងសង់ស្ថានីយប្រេងឥន្ធនៈ។ យោងតាមលិខិតមួយច្បាប់របស់អង្គភាពប្រឆាំងអំពើពុករលួយដែលបានចេញជាសាធារណៈកាលពីថ្ងៃពុធ លោក ម៉ៅ ប៊ុនថុន បានរងការចោទប្រកាន់ថាប្រព្រឹត្តភាពមិនប្រក្រតីមួយចំនួនក្នុងការអនុវត្តតួនាទីរបស់លោក ដូចជាទារប្រាក់៥០០ដុល្លារពីប្រជាពលរដ្ឋជាថ្នូរនឹងការអនុញ្ញាតឲ្យសាងសង់ផ្ទះ ទារប្រាក់១០០ដុល្លារពីប្រជាពលរដ្ឋនៅពេលចុះវាស់ព្រំប្រទល់ក្នុង១ក្បាលដី និងទារប្រាក់ពី៣០០០ទៅ៥០០០ដុល្លារពីអាជីវករ ដើម្បីជាថ្នូរនឹងការអនុញ្ញាតឲ្យសាងសងស្ថានីយប្រេងឥន្ធនៈ១កន្លែង។ នៅក្នុងលិខិតដដែលនោះ លោក ម៉ៅ ប៊ុនថុន បានបំភ្លឺទៅកាន់អង្គភាពថាលោកមិនបានប្រព្រឹត្តដូចការចោទប្រកាន់នោះទេ។ លោក ម៉ៅ ប៊ុនថុន បានបំភ្លឺនៅក្នុងលិខិតនោះថា ករណីដែលចោទថាលោកបានទារប្រាក់ពីប្រជាពលរដ្ឋ៥០០ដុល្លារជាថ្នូរនឹងការអនុញ្ញាតឲ្យសាងសង់ផ្ទះនោះ លោកថាលោកមិនមានសិទ្ធិចេញលិខិតសម្រេចឲ្យសាងសង់នោះទេ ដោយលោកថា លោកគ្រាន់តែមានសិទ្ធិចុះទៅពិនិត្យប្លង់ និងបោះព្រំដី ដើម្បីកំណត់ទំហំផ្លូវនិងចំណីផ្លូវ និងមានសិទ្ធិចុះហត្ថលេខាលើពាក្យសុំលិខិតអនុញ្ញាតច្បាប់សាងសង់ ហើយបញ្ជូនទៅអភិបាលស្រុកចុះហត្ថលេខា មុនបញ្ជូនឡើងទៅខេត្តបន្តទៀត។ ចំពោះការចោទប្រកាន់ពីការទារប្រាក់ពីប្រជាពលរដ្ឋទិញលក់ដីធ្លីពេលចុះវាស់ព្រំប្រទល់នោះ  លោក ម៉ៅ ប៊ុនថុន បានបកស្រាយនៅក្នុងលិខិតនោះថា រាល់ការទិញលក់ដីដែលមានប័ណ្ណ និងដីពុំទាន់មានប័ណ្ណ ជាទូទៅមិនបានឆ្លងកាត់ការិយាល័យរបស់លោកនោះទេ។ ចំណែកករណីដែលថាលោកបានទារប្រាក់ពីអាជីវករពី៣០០០ដល់៥០០០ដុល្លារជាថ្នូរនឹងការអនុញ្ញាតឲ្យសាងសង់ស្ថានីយប្រេងឥន្ធនៈនោះ លោកថារាល់ការសាងសង់ស្ថានីយប្រេងឥន្ធនៈក្នុងស្រុកភាគច្រើនគឺម្ចាស់ស្ថានីយជាអ្នករត់តាមលំដាប់លំដោយដល់ថ្នាក់ខេត្តដោយខ្លួនឯង ដោយលោកថា លោកមានសិទ្ធិត្រឹមតែចុះវាស់វែងកំណត់ចំណីផ្លូវ និងចុះហត្ថលេខាបញ្ជូនតាមរយៈការិយាល័យប៉ុណ្ណោះ។ ប្រធានអង្គភាពប្រឆាំងអំពើពុករលួយលោក ឱម យ៉ិនទៀង ប្រាប់វីអូឌី(VOD)នៅព្រឹកនេះថា អង្គភាពមានតួនាទីបង្ហាញពាក្យបណ្ដឹង និងការស្រាយបំភ្លឺរបស់អ្នកដែលត្រូវចោទ។ លោកថា ករណីនេះគឺអាស្រ័យលើអ្នកដែលបានដាក់ពាក្យបណ្ដឹងទទួលយកការបកស្រាយនោះក្នុងកម្រិតណា ហើយអង្គភាពនឹងរង់ចាំទទួលប្រតិកម្មបន្តទៀតរបស់អ្នកដាក់ពាក្យប្ដឹងនោះ។ នៅក្នុងករណីចោទប្រកាន់ពុករលួយកន្លងមក លោក ឱម យ៉ិនទៀង បានឲ្យដឹងថា អង្គភាពនឹងបិទបញ្ចប់ករណីចោទប្រកាន់ ប្រសិនជាខាងភាគីដើមចោទមិនមានប្រតិកម្មតបនឹងការបំភ្លឺ។ លោកបានបន្តថា ប្រសិនបើភាគីដើមចោទមានប្រតិកម្មនឹងការឆ្លើយបំភ្លឺ នោះអង្គភាពនឹងបន្តឲ្យមានការឆ្លើយបំភ្លឺបន្ថែមទៀត៕ សរសេរមកកាន់លោក ហ៊ុន សិរីវឌ្ឍន៍ តាមរយៈ hunsirivadh@gmail.com   

[អានបន្ត]
វិភាគ៖ តើលោកនាយករដ្ឋមន្ត្រីពិបាកទេក្នុងការស្វែងរកព័ត៌មានពីទុក្ខលំបាករបស់ពលរដ្ឋ?​

ថ្ងៃព្រហស្បតិ៍ ទី11 កុម្ភៈ 2016, 09:17 AM

កាលពីថ្ងៃទី៨ខែកុម្ភៈឆ្នាំ២០១៦កន្លងទៅនេះលោកនាយករដ្ឋមន្ត្រី ហ៊ុន សែន បានណែនាំមន្ត្រីរបស់លោកនៅតាមក្រសួងស្ថាប័ននានាឲ្យតាមដានហ្វេសប៊ុករបស់លោក​ជាប្រចាំដើម្បីបានដឹងពីទុក្ខកង្វល់ដែលពលរដ្ឋបានលើកឡើងនៅតាមបណ្តាញសង្គមនេះ។​ លោកនាយករដ្ឋមន្ត្រីបញ្ជាក់ថាហ្វេសប៊ុករបស់លោក​ទទួលបានការលើកឡើងពីទុក្ខកង្វល់របស់ប្រជាពលរដ្ឋ​នៅទូទាំងប្រទេស។​ មួយរយៈកាលចុងក្រោយនេះលោកនាយករដ្ឋមន្ត្រី ហ៊ុន សែន ក៏បានធ្វើសកម្មភាពសាមញ្ញ​ៗដូចជាជួបអ្នកធាក់ស៊ីក្លូនៅជិតផ្ទះរបស់លោកនៅក្បែរវិមានឯករាជ្យ ការដើរហាត់ប្រាណជាមួយសាធារណជនទូទៅ ការសាកសួរសុខទុក្ខប្រជាពលរដ្ឋ និងការបរិភោគអាហារតាមដងផ្លូវជាដើម។​​ សកម្មភាពតាមហ្វេសប៊ុកនិងសកម្មភាពសាមញ្ញៗរបស់នាយករដ្ឋមន្ត្រីមួយរយៈកាលចុងក្រោយនេះទោះជាមានអ្នកវិភាគខ្លះថាលោកធ្វើឡើងដើម្បីយកចិត្តយកថ្លើមពលរដ្ឋ​ក្រោយពេលបាត់បង់សំឡេងឆ្នោតគាំទ្រ​ក៏ដោយក៏មានអ្នកវិភាគគាំទ្រខ្លះចាត់​ទុកថានេះជាសកម្មល្អរបស់មេដឹកនាំដែលស្វែងយល់ដោយផ្ទាល់ពីទុក្ខលំបាក​របស់ពលរដ្ឋ​ដើម្បីយកទៅដោះស្រាយ។ លោក​នាយករដ្ឋមន្ត្រីក៏ធ្លាប់លើកឡើងដែរទុក្ខកង្វល់របស់ប្រជាពលរដ្ឋគឺជាទុក្ខកង្វល់របស់លោក​ផ្ទាល់​។​ កាលពីឆ្នាំ២០១៤លោកនាយករដ្ឋមន្ត្រី ហ៊ុន សែន ក៏ធ្លាប់បានស្តីបន្ទោសឲ្យមន្ត្រីក្រោមបង្គាប់របស់លោកថាបានរារាំងពលរដ្ឋ​មិនឲ្យយកញត្តិឬលិខិតសំដែងពីទុក្ខកង្វល់​ប្រគល់ឲ្យលោកនាំឲ្យលោកមិនបានដឹងថាពលរដ្ឋកុំពុងជួបទុក្ខលំបាកអ្វីខ្លះ។​​ ក្រោយការណែនាំតែមួយថ្ងៃក្រសួងស្ថាប័នរបស់រដ្ឋប្រមាណ១០ប្រកាសពីសមាសភាពក្រុមការងាររបស់ខ្លួន​ដែលត្រូវរៀបចំឲ្យ​តាមដានប្រចាំនៅលើហ្វេសបុករបស់លោកនាយករដ្ឋមន្ត្រីដើម្បីបានដឹងពីទុក្ខកង្វល់របស់ពលរដ្ឋហើយចាត់វិធានការដោះ ស្រាយឲ្យបានទាន់ពេលវេលានិងតម្លាភាព។​ សាស្ត្រាចារ្យវិទ្យាសាស្ត្រនយោបាយលោក សាមិន្ទ ចម្រើនជ័យ យល់ឃើញថាអាចជាការល្អដែលលោកនាយករដ្ឋមន្ត្រី ហ៊ុន សែន ប្រើប្រាស់ហ្វេសប៊ុករបស់លោកក្នុងការតាមដានពីទុក្ខកង្វល់ពលរដ្ឋព្រោះលោកថាកន្លងមកមន្ត្រីថ្នាក់ក្រោមព្យាយាមលាក់បាំងព័ត៌មានពិតនៅតាមមូលដ្ឋាន​។ ទោះយ៉ាងណាលោក ចម្រើនជ័យ ថ្លែងថាការប្រមូលព័ត៌មាន​តាមហ្វេសប៊ុក​លោកនាយករដ្ឋមន្ត្រីគឺបានតែមួយចំណែកតែប៉ុណ្ណោះលោកថាដើម្បីទទួលបានព័ត៌មានពិតហើយដោះស្រាយបញ្ហាទុក្ខកង្វល់របស់ពលរដ្ឋ​ឲ្យមានប្រសិទ្ធិភាពនោះគឺត្រូវពង្រឹងមន្ត្រីជំនាញនៅតាមស្ថាប័នឲ្យមានការទទួលខុសត្រូវចំពោះកិច្ចការនេះ។ លោកបន្តថា៖ “ពេលខាងមុខទៀតតើគាត់នៅតែកាន់តំណែងហ្នឹងទៀតដែរឬអត់?​ ចឹងបើវាក្លាយជាយន្តការថ្នាក់ជាតិមួយវានឹងក្លាយទៅជាប្រព័ន្ធមួយទោះបីថាដូរមនុស្សក៏ដោយទោះបីថាគាត់មានបញ្ហាសុខភាពស្អីក៏ដោយគឺយន្តការហ្នឹងនៅតែដើរព្រោះមានយន្តការសម្រាប់ឲ្យមនុស្សធ្វើការរួចទៅហើយ”។ អាចជាផ្នែកដែលបញ្ជាក់ថាការពឹងតែលើហ្វេសប៊ុកលោកនាយករដ្ឋមន្ត្រីមិនអាចទទួលបានព័ត៌មានគ្រប់ដែរព្រោះបច្ចុប្បន្នពលរដ្ឋខ្មែរមានជាង១៥លាននាក់តែការសិក្សាររួមគ្នារបស់ USAID  វិទ្យាស្ថានបើកទូលាយ និងមូលនិធិអាស៊ីចេញផ្សាយកាលពីខែវិច្ឆិកាឆ្នាំ២០១៥បង្ហាញថាចំនួនអ្នកប្រើប្រាស់អ៊ិនធើណែតនិងហ្វេសប៊ុក​មានតែជាង៣លានឈ្មោះខណៈអ្នកខ្លះម្នាក់ឯងប្រើឈ្មោះហ្វេសប៊ុកពីរឬបីផ្សេងគ្នា។​ បើយើងពិនិត្យមើលស្ថានភាពបច្ចុប្បន្ន​សម័យទំនើបផ្លូវធ្វើដំណើរហាក់ងាយស្រួលអាចធ្វើដំណើរបានរាប់រយគីឡូក្នុងមួយថ្ងៃ បច្ចេកវិទ្យាព័ត៌មានទំនើបគេអាចដឹងហេតុការណ៍នៅក្នុងប្រទេសនិងនៅលើពិភពលោកតែប៉ុន្មាននាទីប៉ុណ្ណោះក្រោយហេតុការណ៍កើតឡើង។ ចុះលោកនាយករដ្ឋមន្ត្រី ហ៊ុន សែន ពិតជាពិបាកក្នុងការស្វែងរកព័ត៌មាន​ពិតពីទុក្ខកង្វល់របស់ប្រជាពលរដ្ឋ​ឬយ៉ាងណា?​ កន្លងមកលោកនាយករដ្ឋមន្ត្រីនាយករដ្ឋមន្ត្រី ហ៊ុន សែន ក៏ធ្លាប់បាន​គេសរសើរថាជាអ្នក​ពូកែប្រមូលព័ត៌មានដែរគឺពេលគណបក្សប្រជែងលោកប្រជុំបែបសម្ងាត់ក៏លោកនៅតែទទួលបានព័ត៌មានដែរ។ បើនិយាយពីកម្មករនិងអ្នកមានជម្លោះដីធ្លីដែលស្វែងរកកិច្ចអន្តរាគមន៍ពីលោកនាយករដ្ឋមន្ត្រីវិញគឺលោកនាយករដ្ឋមន្ត្រីមិនបាច់បើកហ្វេសប៊ុកទេគ្រាន់តែអង្គុយនៅមុខផ្ទះហើយបើកទ្វាររបងក៏ឮសំឡេងស្រែកយំរបស់ពលរដ្ឋ​អ្នកមានជម្លោះដីធ្លីនិងកម្មករស្រែកសុំកិច្ចអន្តរាគមន៍ដែរព្រោះអ្នកជួបបញ្ហាទាំងនោះតែងព្យាយាមប្រមូលផ្តុំនៅមុខផ្ទះលោកនាយករដ្ឋមន្ត្រីនៅក្បែរវិមានឯករាជ្យតែពេលខ្លះត្រូវសមត្ថកិច្ចបង្រ្កាបនិងចាប់ខ្លួន។​ ប្រធានមជ្ឈមណ្ឌលប្រជាពលរដ្ឋ​ដើម្បីអភិវឌ្ឍន៍និងសន្តិភាពលោក យង់ គិមអេង លើកឡើងថាជាប្រភពព័ត៌មានសំខាន់ដែលលោកនាយករដ្ឋមន្ត្រីអាចស្តាប់ការតវ៉ារបស់ពលរដ្ឋនិងស្តាប់ពលរដ្ឋ​លើកឡើងពីទុក្ខកង្វល់តាមប្រព័ន្ធផ្សព្វផ្សាយនានា។ លោកបន្ថែមថា៖ “បាទអាហ្នឹងពលរដ្ឋគេឲ្យច្រើនណាស់តាមរយៈគេតវ៉ា គេចរចាមិនបាន គេបាតុកម្ម គេនិយាយតាមវិទ្យុទូរទស្សន៍អីច្រើនបាទគួរតែស្រង់មតិយកតាមហ្នឹងដែរបាទ”។​ ទោះយ៉ាងណាលោកនាយករដ្ឋមន្ត្រី ហ៊ុន សែន និង​មន្ត្រីរបស់លោកតែងច្រានចោលរបាយការណ៍របស់អង្គការសង្គមស៊ីវិលជាតិនិង​អន្តរជាតិសរសេរពីភាពខ្វះចន្លោះរបស់រដ្ឋាភិបាល​ជាញឹកញាប់ហើយចោទថាអង្គការទាំងនោះធ្វើរបាយការណ៍កុ​ហក​សរសេរអាក្រក់ពីរដ្ឋាភិបាលដើម្បីទទួលបានជំនួយ។​ អ្នកវិភាគបញ្ហាសង្គមខ្លះលើកឡើងថារបាយការណ៍លើកឡើងពីភាពខ្លះចន្លោះមួយចំនួន​មន្ត្រីរដ្ឋាភិបាលមិនទាន់បានមើលផងក៏ប្រកាសច្រានចោលទៅហើយ។​ កំណែទម្រង់ស៊ីជម្រៅ​ក្នុងការដោះស្រាយទុក្ខលំបាករបស់ពលរដ្ឋឲ្យបានទាន់ពេលជាកំណែទម្រង់មួយដែលរដ្ឋាភិបាល​ដឹក​នាំដោយគណបក្សប្រជាជនកម្ពុជាដាក់ចេញក្រោយពេលគណបក្សដឹកនាំប្រទេសជិត៤០ឆ្នាំមកនេះបានបាត់បង់សំឡេងគាំទ្រអស់២២អាសនៈក្នុងពេលបោះឆ្នោតអាណត្តិទី៥ឆ្នាំ២០១៣។​ កំណែទម្រង់ស៊ីជម្រៅបានជ្រៅកម្រិតណានោះប្រហែលជាត្រូវរង់ចាំមើលលទ្ធផលនៃការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១៧និងបោះឆ្នោតជ្រើសតាំងតំណាងរាស្ត្រនៅឆ្នាំ២០១៨៕ សូមសរសេរមកកាន់លោក ពៅ មេត្តា តាមរយៈ minpov@vodhotnews.com

[អានបន្ត]
យូនីសេហ្វចាប់ផ្ដើមផែនការសកម្មភាពថ្មីនៅកម្ពុជារយៈពេល៣ឆ្នាំក្នុងទឹកប្រាក់៦៥លានដុល្លារ

ថ្ងៃពុធ ទី10 កុម្ភៈ 2016, 05:46 PM

អង្គការយូនីសេហ្វ(UNICEF)ប្រកាសដំណើរការផែនការសកម្មភាពថ្មីនៃកម្មវិធីរបស់ខ្លួននៅក្នុងប្រទេសកម្ពុជាសម្រាប់ឆ្នាំ២០១៦ដល់ឆ្នាំ២០១៨ ក្រោមកិច្ចសហប្រតិបត្តិការជាមួយរដ្ឋាភិបាល ដោយគម្រោងរយៈពេល៣ឆ្នាំនេះគ្រោងចំណាយថវិកាអស់៦៥លានដុល្លារ។ នៅក្នុងសេចក្ដីប្រកាសព័ត៌មានរួមមួយ អង្គការយូនីសេហ្វ និងក្រសួងផែនការបានឲ្យដឹងថា នៅថ្ងៃពុធនេះ ភាគីទាំងពីរបានចុះហត្ថលេខាជាផ្លូវការលើផែនការសកម្មភាពថ្មីនេះ ដោយមានរដ្ឋមន្រ្តីក្រសួងផែនការលោក ឆាយ ថន តំណាងឲ្យរាជរដ្ឋាភិបាលកម្ពុជា និងលោកស្រី  Debora Comini ប្រធានយូនីសេហ្វប្រចាំប្រទេសកម្ពុជា។ សេចក្ដីប្រកាសព័ត៌មានបន្តថា ផែនការសកម្មភាពនេះនឹងកំណត់ និងធ្វើការឆ្លើយតបទៅនឹងឧបសគ្គចម្បងៗដែលបានរារាំងការទទួលបានសិទ្ធិរបស់កុមារនៅកម្ពុជា និងបង្ហាញនូវវិស័យសំខាន់ៗសម្រាប់កិច្ចសហប្រតិបត្តិការក្នុងរយៈពេលបីឆ្នាំខាងមុខ។ រដ្នមន្រ្តីក្រសួងផែនការលោក ឆាយ ថន ត្រូវបានដកស្រង់សម្ដីនៅក្នុងសេចក្ដីប្រកាសព័ត៌មាននោះថា៖ “យើងសប្បាយរីករាយណាស់ដោយសារកម្មវិធីប្រចាំប្រទេសថ្មីនេះនឹងផ្តោតការយកចិត្តទុកដាក់លើកុមារដែលងាយរងគ្រោះបំផុត ដែលធ្វើឲ្យមានកុមារកាន់តែច្រើននៅកម្ពុជាមានឱកាសរស់រានមានជីវិត និងលូតលាស់ពេញវ័យប្រកបដោយសុខភាពល្អនិងផលិតភាពខ្ពស់”។ សេចក្ដីប្រកាសព័ត៌មានដដែលបានលើកឡើងថា ប្រទេសកម្ពុជាជាប្រទេសដែលមានចំនួនកុមារ និងក្មេងជំទង់ច្រើន ដោយប្រមាណ៤៥ភាគរយនៃប្រជាជនសរុបមានអាយុតិចជាងឬស្មើ១៩ឆ្នាំ។ ជាមួយគ្នានេះ ប្រជាជនប្រមាណ១១ភាគរយមានអាយុតិចជាង៥ឆ្នាំ។ សេចក្ដីប្រកាសព័ត៌មានក៏បានដកស្រង់សម្ដីរបស់លោកស្រី Debora Comini ប្រធានយូនីសេហ្វប្រចាំនៅកម្ពុជាផងដែរថា៖ “វិសមភាពអាចបន្តពីមួយជំនាន់ទៅជំនាន់មួយទៀតនៅក្នុងវដ្តជីវិតដែលគ្មានទីបញ្ចប់ ហើយដែលនឹងប៉ះពាល់ដល់សង្គមទាំងមូល។ ហេតុដូចនេះ ការវិនិយោគលើកុមារគឺជាការវិនិយោគដ៏ល្អបំផុតដែលប្រទេសកម្ពុជាអាចធ្វើបានសម្រាប់អនាគតរបស់ខ្លួន”។ សេចក្ដីប្រកាសព័ត៌មានឲ្យដឹងដែរថា កម្មវិធីប្រចាំប្រទេសរបស់យូនីសេហ្វឆ្នាំ២០១៦-២០១៨ នឹងដំណើរការសម្រាប់ទូទាំងប្រទេស ប៉ុន្តែវានឹងផ្តោតសំខាន់ទៅលើខេត្ត ស្រុក និងឃុំ ទាំងទ្បាយណាដែលមានគម្លាតខ្ពស់ និងសូចនាករ អភិវឌ្ឍន៍កុមារមិនល្អ ដោយអះអាងថា ដើម្បីធានាថាអន្តរាគមន៍នឹងអាចទៅដល់កុមារដែលងាយរងគ្រោះ និងលំបាកបំផុត។ បើតាមសេចក្ដីប្រកាសព័ត៌មាន កម្មវីធីរបស់យូនីសេហ្វបានទទួលថវិកាទាំងស្រុងពីវិភាគទានសប្បុរសធម៌ និងស្ម័គ្រចិត្តពីបណ្តារដ្ឋាភិបាលម្ចាស់ជំនួយ សប្បុរសជន វិស័យឯកជន និងគណៈកម្មាធិការជាតិយូនីសេហ្វនៅទូទាំងពិភពលោក។ កម្មវិធីនេះនឹងត្រូវអនុវត្តក្រោមកិច្ចសហការជាមួយនឹងស្ថាប័នរបស់រាជរដ្ឋាភិបាលនៅថ្នាក់ជាតិ និងថ្នាក់ក្រោមជាតិ ជាមួយនឹងអង្គការមិនមែនរដ្ឋាភិបាលនិងដៃគូអភិវឌ្ឍន៍ វិស័យឯកជន ស្ថាប័នអប់រំ ប្រព័ន្ធផ្សព្វផ្សាយ និងស្ថាប័នអង្គការសហប្រជាជាតិដទៃទៀត៕ សរសេរ​មក​លោក អុិត សូធឿត តាមរយៈ sothoeuth@vodhotnews.com  

[អានបន្ត]
សមាគមមួយរិះគន់សង្គមស៊ីវិលថាលំអៀងករណីហិង្សានៅក្រុមហ៊ុនកាពីតូល

ថ្ងៃពុធ ទី10 កុម្ភៈ 2016, 05:32 PM

សមាគមមួយដែលចងក្រងក្រុមអ្នកតរត់ម៉ូតូកង់៣ជំរុញឲ្យសង្គមស៊ីវិល​កែតម្រូវការចោទប្រកាន់ពួកគេថាជា​​​ជនដៃដល់ ប្រើញញួរ ដែក​​ស​សៃ និងឧបករណ៍រឹងមួយចំនួនទៀតវាយដំអតីតបុគ្គលិ​ក​ក្រុ​ម​​ហ៊ុ​​នកាពី​​តូ​ល​ឲ្យ​​​រង​​​រ​​​​​​បួ​​​​​​​​​ស​​ធ្ងន់​ស្រា​យ កាលពីសប្តាហ៍មុនដោយអះអាងថា​ការថ្កោ​​ល​​ទោ​​​សនោះមាន​ភាព​លំ​អៀង​។ កាលពីថ្ងៃទី៦ខែមករាព្រឹត្តិការណ៍ហិង្សាមួយបានផ្ទុះឡើងនៅមុខស្នាក់​ការក្រុមហ៊ុនកា​ពីតូលជិត​ផ្សារអូ​ឬ​ស្សីក្នុង​រាជធានីភ្នំពេញ។ ការប៉ះទង្គិចនោះកើតឡើងរវាងអតីតអ្នកបើកបររថយន្តដែល​ក្រុម​ហ៊ុន​បានបញ្ឈប់ពីការងារនិង​ស​មា​​ជិកសមាគ​មរួ​ម​​គ្នា​ដើម្បី​អភិវ​ឌ្ឍ​​ន៍​​ក​ម្ពុជារបស់លោកលោក ឯ សុភាស់។ ក្រោយការប៉ះទង្គិចភាគីអ្នកតវ៉ាប្រឆាំងក្រុមហ៊ុនអះអាងថាពួកគេយ៉ាងតិច១៤នាក់រងរបួសធ្ងន់ក្នុង​នោះអ្នកខ្លះបាក់ដៃខ្លះ​ទៀតបែកក្បាលចំណែកបរុ​សពីរនាក់ទៀតដែលរងរបួសត្រូវសមត្ថ​កិច្ចខណ្ឌ​៧ម​ក​​រា​​​ចាប់ខ្លួន។ ក្រោយផ្ទុះហិង្សាមួយថ្ងៃអង្គការ​សមាគមនិងសហជីពចំនួន៣៤បាន​ចេញ​សេ​ចក្ដីថ្លែ​ងកា​រណ៍​រួម​គ្នា​មួ​យ​ថ្កោ​ល​ទោស​ចំពោះ​អំពើហិង្សានោះដោយ​សង្គម​ស៊ីវិល​ហៅថាជាការ​ប្រព្រឹត្ត​ឡើង​ដោយ​ក្រុមស​មាគ​​ម​​រួម​​​គ្នាដើម្បី​អភិ​វ​ឌ្ឈ​កម្ពុជា ​(​ក្រុម​អ្នក​រត់​រ៉ឺ​ម៉ក់​កង់​បី​) ជា​អ្នកការពារ​ក្រុមហ៊ុន​កា​ពី​តូ​ល​។ ក្នុងសេចក្តីថ្លែងការណ៍រួមនោះអង្គការ​លីកាដូ សមាគម​អាដ​ហុក និងមជ្ឈមណ្ឌល​​អប់រំច្បាប់​ស​ម្រាប់ស​ហគមន៍រួមទាំង​អង្គការ​មួយចំនួន​ទៀត​ក៏​បានថ្កោលទោស​នគរបាលស្ថិតនៅក្នុងហេតុការណ៍ថាមិន​បាន​ឆ្លើ​យតប​ឲ្យបាន​គ្រប់គ្រាន់ដើម្បី​បញ្ជៀ​ស​អំពើហិង្សា​នោះ​។​ ក្នុងសន្និសិទសារព័ត៌មានដែលធ្វើឡើងក្នុងហាងលក់ដូរមួយជាប់ស្នាក់ការក្រុមហ៊ុនកាពីតូលនាព្រឹ​កថ្ងៃទី១០កុម្ភៈនេះ​ប្រធានសមាគមរួមគ្នាដើម្បីអភិវឌ្ឍន៍កម្ពុជាដែលចងក្រងអ្ន​ករត់​ម៉ូតូឌុបនិង​​រ៉ឺ​ម៉ក់កង់៣លោក ឯ សុភាស់ បង្ហាញការខកចិត្តថា សង្គមស៊ីវិលទាំងនោះបានមើលរំលងពីការពិត។ លើរំលងពីការពិតលោ​ក​ ឯ សុភាស់ អះអាងថាការប៉ះទង្គិចពេលនោះបង្កឡើងដោយភាគីម្ខាងទៀត​ជា​អ្នក​តវ៉ា​ប្រឆាំង​នឹង​ក្រុមហ៊ុនដែលលោកថាពួកគេបានលើ​កគ្នាម​កបិទផ្លូវនិងរារាំងមិនឲ្យរថយ​ន្តដឹ​កអ្ន​ក​​​ដំណើរចេញទើបមានកា​រប្រើហិ​ង្សា​វាយ​តប់គ្នាទៅវិញទៅមក។ ប្រធានសមាគ​មរូបនោះបានរិះគន់ចំៗទៅលើមន្ត្រីគ្រប់បច្ចេកទេសស៊ើបអង្កេតរបស់អង្គកាលីកាដូ​លោ​ក ​អំ សំអាត ថាបានមើលរំលងពួ​កគេជាង២០នា​ក់ដែលលោកថាបានរងរបួ​ស​​ក្នុ​ង​ព្រឹត្តិ​ការណ៍នោះ​ដូចគ្នា។ លោក ឯ សុភាស់​ អះអាងថាដើម្បីឲ្យសាធារណជនមើលមកថាសង្គមស៊ីវិលឈរលើស្មារតីឯករាជ្យនិង​អ​ព្យា​ក្រិត្យលោកថា  សង្គមស៊ីវិលដែលរួមគ្នាចេញសេចក្តីថ្លែងការណ៍នោះត្រូវធ្វើលិខិតជាលាយ​លក្ខអ​ក្សរ​​​កែ​ត​ម្រូវលិខិតថ្កោល​ទោសនោះឡើងវិញ។ លោកថា៖ “ខ្ញុំសោកស្តាយណាស់សង្គមស៊ីវិលអ្នកអាប៉ីតពេល​ដែលព្រឹត្តិការណ៍មួយប៉ះទង្គិចគេមិនហៅថាជាចេតនារបស់អ្នកណាមួយទេប៉ះទង្គិចហិង្សា។ ដើម​ហេ​តុដោយ​សាតាកុង​ឡានទាំងបីលើកគាត់ដើរទៅកាក់ផ្លូវពួកនេះការពារឆ្នាំងបា​​យទៅសុំការពារ​បើកផ្លូវឥឡូវអ្ន​កសារព័ត៌មានមើលមួយ​ទៅបិទផ្លូវ មួយទៅបិទផ្លូវនរណាជាចេតនាមុនបន្ទាប់មកវាប៉ះទង្គិចហើយខ្ញុំក៏​របួសគេក៏របួសដល់ថ្លែងការសង្គមស៊ីវិលរបួសតែម្ខាង”។ អ្នកគ្រប់គ្រងបច្ចេកទេសស៊ើបអង្កេតនៅអង្គការលីកាដូលោក អំ សំអាត អះអាងថាលោកនឹងមិនពិចា​រណា​លើកា​រទាម​ទា​រ​នោះ​ទេដោយអះអាងសេចក្តីថ្លែងការណ៍ផ្អែ​កលើភស្តុតាងនិងកា​រចុះអង្កេត​ផ្ទាល់​ដល់​កន្លែ​ងកើ​តហេ​តុ​។ លោកបន្តថា៖ “សេចក្តីថ្លែងការណ៍ទាំងអស់នេះយើងផ្អែកលើទិដ្ឋភាពជាក់ស្តែងហើយយើង​អំពា​វនាវឲ្យ​អាជ្ញាធរ​ពាក់ព័ន្ធ​ព្រម​ទាំង​តុលាការធ្វើការស៊ើបអង្កេតដោយតម្លាភាពដោយយុត្តិធ​ម៌ទៅ​លើ​អំពើហិង្សាដែលកើតឡើងនៅថ្ងៃសៅរ៍ហ្នឹង។ ចំពោះ​អង្គហេតុនិងព្រឹត្តិ​ការណ៍ផ្សេងៗយើងមានច្បា​ប់យើ​ង​មាន​ទម្លាប់ បើសិនអ្នកណាប្រើហិង្សា​ពួកគាត់មានសិទ្ធិប្តឹងទៅតុលាការ ប្តឹងទៅអាជ្ញាធរចា​ត់វិធា​នការ យើ​ង​មិ​ន​អាចយកអំពើហិង្សាមកសងសឹកដោះស្រាយអំពើហិ​ង្សាបានទេ។ ពី​ព្រោះបុគ្គ​លណា​ក៏ដោ​យឲ្យតែ​ប្រើ​ហិង្សាវាត្រូវតែទទួលទោសចំពោះមុខច្បាប់ដូចគ្នា”។ ប៉ុន្តែលោក ឯ សុភាស់ អះអាងទៀតថាបើសង្គមស៊ីវិលទាំងនោះមិនធ្វើការកែតម្រូវទេបុរស​រូប​នោះ​ព្រ​មា​​​​ន​​​ថាពួ​ក​​គេ​នឹងសុំអន្តរាគមន៍ពីរបស់រដ្ឋាភិបាលឲ្យចាត់វិធានការ​ករណីនេះ។ លោក​ថា៖ “​ខ្ញុំ​នឹងដា​ក់លិ​ខិតផ្ទា​ល់ទៅក្រសួងមហាផ្ទៃដាក់​ឈ្មោះចំៗទៅលើអង្គការសមាគមទៅក្រសួងម​ហាផ្ទៃ បើជាអ​ង្គកា​រអន្ត​រជាតិខ្ញុំ​ដាក់ទៅក្រសួងការបរទេសដើម្បីឲ្យ​ក្រសួងជំនាញទាំងអស់ចា​ត់វិធានការទៅធនាគារកណ្តាលធនា​គារជាតិ​ត្រួតពិនិត្យលើម្ចាស់ជំនួយលុយនឹងធ្វើឲ្យ​ខ្មែរឈ្លោះគ្នាឬអត់”។ សម្រាប់នាយកប្រតិបត្តិនៃមជ្ឈមណ្ឌលសម្ព័ន្ធភាពការងារនិងសិទ្ធិមនុស្សលោក មឿន តុលា ដែលចូលរួ​ម​​​ចេ​​​​​​ញ​​​សេចក្តី​ថ្លែងការណ៍ដែរនោះអះអាងថាសង្គមស៊ីវិលចង់ឲ្យភាគីពា​ក់ព័ន្ធទទួល​យកការពិតចូលរួ​ម​គោ​​​រ​​ព​ច្បាប់ដោះស្រាយបញ្ហា​ដោយសន្តិវិធីដែលលោកថាដើម្បីចូល​រួមលុបបំបា​ត់នីទ​ណ្ឌភាព​នៅកម្ពុជា។ លោកបន្ថែមថា៖ “មតិមហាជនទូទៅមើលឃើញថាការអនុវត្តច្បាប់ហ្នឹងហាក់មានស្តង់ដារពីរទៅហើយបើសិ​នជា​ក្រុម​ទាំងពីរប្រើហិង្សាទាំងពីរអញ្ចឹងវាគួតែត្រូវចាប់ខ្លួនទាំងពីរមិនមែនចាប់ខ្លួនតែម្ខាងទេ”។ បើតា​មអ​តីអ្នកបើកបរថយន្តក្រុមហ៊ុនកាពីតូលអះអាងថាពួកគេធ្វើការនៅក្រុមហ៊ុននេះខ្លះ៥ឆ្នាំខ្លះ​ទៀ​​ត​ជា​​​​​ង១​០។ ពួកគេថា ក្រុមហ៊ុននោះបានប្រើពាក្យអសុរោះមកលើបុគ្គលិកមិនអនុ​ញ្ញាតិឲ្យពួ​កគេទៅ​បោះ​ឆ្នោ​​តគ្រប់អាណត្តិ។ អ្នកដែលបានបញ្ឈប់ពីការងារបន្តទៀតថាធ្វើការថ្ងៃអាទិត្យថ្ងៃបុណ្យជាតិពួកគេថាក្រុមហ៊ុនមិ​នបានគិត​ប្រា​​ក់អត្ថប្រយោជន៍​បន្ថែមឲ្យពួកគេតាមច្បាប់ស្តីពីការងារទេរហូតពួក​គេបង្កើត​សហជីពដើម្បីជំរុញ​លក្ខ​ខណ្ខការងារ។ ក្រុមអ្នកតវ៉ាថាក្រោយពីក្រសួ​ងការងបញ្ជូនប​ញ្ជីឈ្មោះជាផ្លូវការមកក្រុមហ៊ុនពួកគេថាក្រុមហ៊ុនបានប​ញ្ឈ​ប់ពួកគេជាសមាជិក​សហ​ជីពជាបន្តបន្ទាប់រហូត៤៥​នាក់ធ្វើឲ្យផ្ទុះការតវ៉ាជាង៤០ថ្ងៃរហូតពេលនេះនូវមិនទាន់មានដំណោះស្រាយ។​ ប៉ុន្តែភាគីក្រុមហ៊ុនវិញការពារខ្លួនថាការបញ្ឈប់អ្នកបើកបរទាំងនោះថាមកពីពួកគេមិនគោរព​បទបញ្ជារបស់ក្រុមហ៊ុន៕ សូម​សរសេរ​មក​កាន់​លោក ញឹម សុខន តាម​រយៈ​ sokhorn@vodhotnews.com

[អានបន្ត]
នាយករដ្ឋមន្រ្តីសរសើរអ្នកកាសែត​ជើងចាស់​ពីការចងក្រង​សៀវភៅ​ជម្លោះព្រំដែនកម្ពុជា-វៀតណាម

ថ្ងៃពុធ ទី10 កុម្ភៈ 2016, 05:17 PM, (1)

លោក​នាយករដ្ឋមន្រ្តី​ ហ៊ុន សែន បានផ្ញើលិខិត​មួយច្បាប់​ទៅកាន់​អ្នកកាសែតជើងចាស់ លោក ឆាយ សុផល ដោយ​បាន​កោតសរសើរ​រូបលោក​ក្នុងការ​ចងក្រងសៀវភៅ​ទាក់​ទង​​នឹង​ជម្លោះព្រំដែនកម្ពុជានិង​វៀតណាម។ នៅក្នុងលិខិតចុះថ្ងៃទី​៧ខែមករា ដែល​​លោក ឆាយ សុផល ផ្សព្វផ្សាយតាមហ្វេសប៊ុកនៅថ្ងៃពុធនេះ​ ​ លោក​នាយករដ្ឋមន្រ្តីបាន​សរសេរថា​លោក​បាន​ទទួល​សៀវភៅចំនួន​១០ក្បាល​ដែល​លោក​ ឆាយ សុផល បានផ្ញើមកឲ្យ​រូប​លោក​ដើម្បីលោក​អាន​ស្វែងយល់។ សៀវភៅនោះ​មាន​ចំណងជើងថា​”សត្រូវ​មិត្តិភក្តិឯង​ ផែនដី និង​ផែន​ទីកម្ពុជា​វៀតណាម(១៩៦២-២០១៥)” ។​ លោក​ ហ៊ុន សែន មានប្រសាសន៍ថា៖ “ឆ្លៀតឱកាស​នេះ ខ្ញុំសូមថ្លែងនូវ​ការកោតសរសើរដោយស្មោះចំពោះ​លោក​ដែលបានខិតខំ​ស្រាវជ្រាវចងក្រងសៀវភៅ​ដ៏មានសារៈសំខាន់​នេះ​ឡើង​ទុក​ជា​ឯក​សារសម្រាប់កូនចៅជំនាន់ក្រោយ​បានសិក្សាស្រាវជ្រាវ”។​ លោក ឆាយ​ សុផល បានបង្ហោះសារលើហ្វេសប៊ុក​ក្រោយពី​ទទួលបានលិខិតនេះថា៖ "បើទោះជាមិនមានសម្បត្តិស្តុកស្តម្ភឬអំណាាចក្នុងរាជការក៏ដោយ ក៏នេះជាមោទនភាពដ៏ធំបំផុតសម្រាប់ខ្ញុំ ក្នុងនាមពលរដ្ឋ ដែលបានទទួលកិត្តិយសពីប្រមុខរាជរដ្ឋាភិបាលកម្ពុជា"។ កាលពីខែវិច្ឆិកា ឆ្នាំ​២០១៥ លោក ឆាយ សុផល បាន​ដាក់សម្ពោធ​​​សៀវភៅកម្រាស់​ប្រមាណ​៤០០ទំព័រ​នោះមានចំណងជើងថា“សត្រូវមិត្តភក្តិឯង ផែនដីនិងផែនទី កម្ពុជា​​វៀតណាម (១៦២៣ -២០១៥) ដែល​លោក​បានចងក្រង។​ លោក​មានប្រសាសន៍កាលនោះ​ថា​សៀវ​ភៅនេះមា​នលក្ខ​ណៈជាប្រវត្តិសាស្រ្តដែលបង្ហាញពីសាវតានៃការបាត់បង់ទឹកដីកម្ពុជាក្រោមឬដែនដីកូសាំងស៊ីន​ជា​ផ្លូវការទៅឲ្យវៀតណាមនៅឆ្នាំ១៩៤៩ ដែលក្រោយៗមក ​រហូតមកដល់ឆ្នាំ២០១៥ ជម្លោះ​ផ្ទៃក្នុង​កម្ពុជា​ស្តីពីព្រំដែននិងផែនទីបានកើត។​ លោក​បន្ត​ថាលោក​បានប្រមូល​ឯកសារ​ច្រើនដាក់ក្នុងសៀវភៅនេះ ដូចជា​សន្ធិ​សញ្ញា​ព្រំដែនកម្ពុជា​-វៀតណាមឆ្នាំ​១៩៨២ ៨៣និង​៨៥ ឲនិង​សន្ធិសញ្ញា​បំពេញ​បន្ថែម​នៅឆ្នាំ​២០០៥និង​ឯកសារ​គតិយុត្តមួយចំនួនទៀតទាក់ទងនឹង​ព្រំដែន​កម្ពុជា​និ​ង​​វៀតណាម។​ លោក​ ឆាយ សុផល បានបន្ថែម​ថា​ការចងក្រងសៀវភៅនេះ លោក​បាន​យោង​ឯ​កសារ​ជិត​៨០ ក្នុង​នោះ​មា​ន​សៀវភៅឯកសារចំនួន​២៦ក្បាល​ សារព័ត៌មានចំនួន​២៣និង​ទំព័រហ្វេសប៊ុក​របស់​លោក ហ៊ុន សែន និង​អ្នកនយោបាយ​មួយចំនួន​ដែលសកម្មខាងព្រំដែន​។ លោកបញ្ជាក់បន្ថែម​ថា​​លោ​កក៏​​បា​នកត់ត្រា​ព្រឹត្តិ​ការណ៍សំខាន់​​ដែលបានកើតឡើងមួយរយៈ​ចុងក្រោយនេះ ទាក់ទង​នឹង​បញ្ហាព្រំដែ​នកម្ពុជា​និង​វៀតណាម​ ដូចជា​ការ​ចុះទៅពិនិត្យ​មើល​ព្រំដែននិង​ការផ្ទៀងផ្ទាត់ផែនទី​ជាដើម។​ លោក​ សុផល មានប្រសាសន៍ថា៖ “ខ្ញុំជាអ្នក​សារព័ត៌មានខ្ញុំច្បិចយកមុំសំខាន់ៗ ខ្ញុំឃើញ​នៅក្នុងសៀវ​ភៅមួយ ខ្ញុំឃើញចំណុច​សំខាន់ល្អ​​នៅក្នុងសៀវភៅហ្នឹង អញ្ចឹងខ្ញុំទាញយកមក។ ដល់​​ពេ​លខ្ញុំអា​នសៀវភៅមួយទៀត ខ្ញុំឃើញ​ចំ​ណុចសំខាន់។…សៀវភៅមួយក្បាលនេះ​គឺស្លចេញពីឯក​សារជាច្រើន។ មានចំណុ​ចថ្មីច្រើ​ននៅក្នុងសៀវភៅនេះ”។​ បើ​តាម​លោក សុផល សៀវភៅនេះ​ក៏​បាន​បញ្ចូលនូវ​ ជម្លោះប្រទាក់​ក្រឡាគ្នាទាំងក្នុ​ងចំណោ​មជន​ជាតិកម្ពុជានិងនៅក្នុ​ងចំណោមបរទេសដូចជាអាមេ​រិក អង់គ្លេស ចិន រុស្ស៊ី និងពួក​សម្ព័ន្ធមិត្ត។​ លោ​មានប្រសាសន៍ថា៖ “អញ្ចឹងសៀវភៅនេះ ប្រសិនណា​បើ​មិត្តអ្នកអាន គាត់​អាន​សៀវ​​ភៅ​នេះចប់ អាចនឹងដឹង​ប្រវត្តិ​សាវតាខ្លះ ទាក់ទង​នឹង​បញ្ហា​​កម្ពុជា​និង​វៀតណាម ដើម្បីចៀសវា​ង​កុំ​ឲ្យ​​អ្នក​​នយោបាយមួយចំនួន​ គាត់ឆ្លៀតយក​បញ្ហាព្រំដែន​កម្ពុជា​វៀតណាមហ្នឹង យក​ទៅធ្វើការ​ឃោសនា​ដើម្បីចំណេញនយោបាយរៀងខ្លួន”។ លោក សុផល យល់​ថា​​ខ្មែរ​ចូល​ចិត្ត​លាក់ប្រវត្តិសាស្រ្ត​​របស់ខ្លួន​ បណ្តាល​ឲ្យ​មាន​ការយល់​មិន​​ច្បា​ស់ពីប្រវត្តិ​របស់ខ្លួន​។ លោក​បន្ត​ថា​សៀវភៅនេះ​នឹង​ក្លាយ​​ជា​”ឯក​សារជំនួយ​ស្មារតី”​មួយសម្រា​ប់ប្រជាជនកម្ពុជា។​ គួរ​បញ្ជាក់​ថា រហូតមក​ដល់​បច្ចុប្បន្ន​នេះ លោក ​ឆាយ ​សុផល ​បាន​បោះពុម្ពផ្សាយ​​សៀវភៅដែល​លោក​បានចងក្រង ​មិន​តិច​ជាង​៦ក្បាល​នោះ​ទេ​ ក្នុងនោះមានសៀវភៅនិយាយពីនាយករដ្ឋមន្រ្តីខ្មែរ​និង​ព្រះមហា​ក្ស​ត្រជាដើម។ នៅពេលខាងមុខឆាប់ៗនេះ លោក​នឹង​ចេញផ្សាយសៀវភៅមួយក្បាលយទៀត​មានចំណងជើងថា​”ហ៊ុន សែន នយោបាយ​និង​អំណាច​ក្នុងប្រវត្តិសាស្រ្ត​ខ្មែរ​ជាង​៤០ឆ្នាំ”៕ ​សៀវភៅ”ហ៊ុន សែន នយោបាយ​និង​អំណាច​ក្នុងប្រវត្តិសាស្រ្ត​ខ្មែរ​ជាង​៤០ឆ្នាំ”(រូបថតពីហ្វេសប៊ុក​លោក ឆាយ សុផល) សរសេរមកកាន់លោក ស៊ុន ណារិន តាមរយៈsun_narin@vodhotnews.com 

[អានបន្ត]
លោក ថោង ខុន៖ សៀមរាបនឹងបង្កើតរោងចក្រដុតសំរាម

ថ្ងៃពុធ ទី10 កុម្ភៈ 2016, 05:06 PM

មន្រ្តីរដ្ឋាភិបាលកម្ពុជាឲ្យដឹងថាប្រទេសកូរ៉េនឹងសាងសង់រោងចក្រដុត​សំរាម​យក​អគ្គិ​ស​នីនៅ​​ខេត្ដសៀមរាបដោយអះអាងថាដើម្បីឲ្យ​ទីក្រុង​បុរាណនេះទទួលបានជ័យលាភីនៃក្រុង​ទេស​​​ចរ​ណ៍​​អាស៊ាន​ឆ្នាំ​២០​១​៨​​​ខាងមុខ​​។ ថ្លៃងនៅក្នុងពិធីសន្និបាតបូកសរុបការអនុវត្ដការងារទេសចរណ៍ឆ្នាំ២០១៥​ និងទិសដៅឆ្នាំ២០១៦នៅ​ខេត្ដ​សៀមរាបរដ្ឋមន្ដ្រីក្រសួងទេសចរណ៍ លោក ថោង ខុន មានប្រសាសន៍ថា​ទីក្រុងសៀមរាប​ជាទីក្រុងទេសចរណ៍មាន​សារៈសំខា​ន់ដែលនៅជិតប្រទេសថៃដែលលោកថាអាជ្ញាធរ​មូលដ្ឋាន​ត្រូវយក​ចិត្ដ​ទុកដាក់ថែរក្សានូវ​បរិស្ថាន​ឲ្យ​​បានល្អដើម្បីឲ្យក្លាយជាទីក្រុងបៃតង​និងទទួលបានជ័យលាភីនៃទីក្រុង​ទេសចរណ៍​អាស៊ាននៅចុង​ឆ្នាំ២០១៨ខាង​មុខ​​​នេះ​។ លោកបន្ដថាសម្រស់បា្រសាទអង្គរមួយមិនគ្រប់​គ្រាន់​សម្រាប់​ការប្រគួតប្រជែងនោះទេ គឺត្រូវគួប​ផ្សំ​​ឲ្យមាន​ទីក្រុងមួយដែលមានព័ណបៃតងផង​ដែរ។​ លោកបន្ថែមទៀតថា៖ “ទីក្រុងភ្នំពេញសព្វថ្ងៃក្នុងចំណោមទីក្រុង​ដែ​ល​​ល្អស្អាត​ចំនួន៥០នៅ​លើពិភពលោកទីក្រុងភ្នំពេញក៏មានក្នុងហ្នឹងមួយដែរចឹងភ្នំពេញចាប់ផ្ដើមបង្ហាញ​ខ្លួន​ទៅហើយ​ ហើយយើងកំពុងប្រឹងប្រែងនៅតំបន់សមុទ្រ clean city និង blue sea ​ចឹងបានន័យថាទីក្រុងខៀវ​ស្រង៉ា​ត់ឯទីក្រុងនៅជាប់ទីក្រុងគគ្រិចទេ ទីក្រុងជាប់សមុទ្រក៏ត្រូវល្អសមុទ្រត្រូវស្អាតពិសេស​គឺដី​ខ្សាច់​​ត្រូវ​តែ​ល្អ​ស្អាត​ដើម្បីទេស​ចរណ៍ទៅ​កំសាន្ដនូវ​សម្រស់ខ្មែរបាទនេះគឺជាចំណុចសំខាន់”។ លោក ថោង ខុន បន្ថែមថាបើសិនការបង្កើតរោងចក្រដុតសំរាមចេញជាអគ្គិសនី​នេះទទួលបាន​ជោគ​ជ័យលោកថានឹងគ្មាន​សំរាមនៅទីក្រុងទេសចរណ៍ទៀតទេហើយសំរាមក៏បានក្លាយជាថាម​ពលប្រើ​ប្រាស់​ផង​​ដែរ​។ ប្រជាពលរដ្ឋមួយចំនួននៅក្រុងសៀមរាបសាទរនឹងគម្រោងបង្កើតរោងចក្រដុតសំរាម​ចេញជា​អគ្គិសនីនោះ ប៉ុន្ដែពួកគេលើកឡើងដើម្បី​ទីក្រុងស្អាតនិងមានសោភ័ណ្ឌភាព​អាជ្ញាធរត្រូវចាត់​វិធាន​ការចំពោះក្រុមហ៊ុន​សំ​​អាត​ក្រុងឲ្យគោរពកិច្ចសន្យានៃការ​ដឹកជញ្ជូនកាកសំណល់ចេញពីក្រុងឲ្យទាន់ពេលទើប​អាច​ប្រគួតប្រជែងជាមួយទីក្រុងទេសចរណ៍អាស៊ានបាន។ ពលរដ្ឋកត់សំគាល់ថាក្រុម​ហ៊ុនដឹកជញ្ជូនសំ​រាម​បង្កភាពកខ្វក់តាមដងផ្លូវ។ ពួកគេបន្ដថា៖ “យើងគួរមានវិ​ធានការនៅ​ក​ន្លែង​នោះ​សូមឲ្យអាជ្ញាធរជួយចាត់​ចែង​វិធានការឲ្យបានក្ដៅបន្ដិចទៅយើងចង់ឲ្យយកពី​ទីក្រុងសៀមរាប​យ​កទៅចាក់នៅ​កន្លែងរោងចក្រ​តែម្ដង។ មកយករាល់ថ្ងៃទៅ​នៅ​តាម​ក្នុង​ក្រុង​យ​ក​​​ឲ្យ​អស់ហើយ​កុំឲ្យកំពប់​កក្លេ​​កក​ក្លាក់កុំឲ្យសំរាមស្អុយតាមភូមិចប់បាត់ហើយប៉ុណ្ណឹងវាទីក្រុងស្អាត​អាចយក​​ទៅប្រគួតប្រ​ជែងបាន​ហើយ”។ ​អគ្គនាយករងនៃអាជ្ញាធរជាតិអប្សរាលោក សុខ សង្វា មានប្រសាសន៍ថានៅឆ្នាំ២០១៥កន្លងមកភ្ញៀវទេសចរណ៍អន្ដរជាតិ មកទស្សនានៅតំបន់ទេសចរណ៍សៀមរាបមានចំនួនជាង២លាន១សែននាក់មានការកើនឡើងប្រមាណ២%បើប្រៀបធៀបនឹងឆ្នាំ២០១៤។ អគ្គនាយករងនិងត្រូវជាកូន​លោក សុខ អាន បានអះអាងថាការកើនឡើងចំនួនភ្ញៀវទេសចរណ៍នេះដោយ​សារ​​ប្រាសាទអង្គរវត្ត​មានភាពល្បី​ល្បាញនៅ​លើពិភពលោក៕ សូម​សរសេរ​មក​កាន់​លោក បូ សាវី តាមរយៈ savy@vodhotnews.com

[អានបន្ត]
Page: 1/1194 12345678910>>>

បទយកការណ៍

បទយកការណ៍ផ្សេងទៀត

ព័ត៌មានបែបស៊ើបអង្កេត

ព័ត៌មានបែបស៊ើបអង្កេតផ្សេងទៀត

វិភាគព្រឹត្តិការណ៍

វិភាគព្រឹត្តិការណ៍ផ្សេងទៀត

បទសម្ភាសន៍

បទសម្ភាសន៍ ផ្សេងទៀត
To