មនុស្សដល់ទៅ ៧៤នាក់ ក្នុងនោះមានស្ត្រី ៤នាក់ផងដែរ ត្រូវបានសមត្ថកិច្ចចាប់ខ្លួននៅទូទាំងប្រទេសកាលពីថ្ងៃម្សិលមិញ ដោយសង្ស័យពាក់ព័ន្ធនឹងគ្រឿងញៀន។ នេះដោយយោងតាមរបាយការណ៍របស់សមត្ថកិច្ច។
របាយការណ៍ដែលផ្សាយលើទំព័រហ្វេសប៊ុកនគរបាលជាតិ បានឲ្យដឹងទៀតថា បទល្មើសគ្រឿងញៀន ២៣ករណី ត្រូវសមត្ថកិច្ចបង្ក្រាបបានទូទាំងប្រទេស ដោយឃាត់ខ្លួនជនសង្ស័យដល់ទៅ ៧៤នាក់ ក្នុងនោះមានជនសង្ស័យជួញដូរគ្រឿងញៀនដល់ទៅ ៣៤នាក់ ត្រឹមតែមួយថ្ងៃម្សិលមិញនេះ។
របាយការណ៍នគរបាលជាតិ បានឲ្យដឹងថា ជនសង្ស័យពាក់ព័ន្ធនឹងគ្រឿងញៀនជាង ៨ពាន់នាក់ហើយ ត្រូវបានសមត្ថកិច្ចចាប់ខ្លួននៅក្នុងរយៈពេល ៥ខែដំបូងដើមឆ្នាំនេះ។
បញ្ហាគ្រឿងញៀន ត្រូវបានរកឃើញក្នុងការស្ទង់មតិមួយកាលពីឆ្នាំមុនថា ជាចំណុចខ្សោយធំមួយរបស់រដ្ឋាភិបាលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន៕