ការប្រកួតប៉ុន្មានលើកចុងក្រោយរបស់កីឡាករយ៉េន ឌីណា ត្រូវគេកត់សម្គាល់ថាធ្លាក់ដៃយ៉ាងខ្លាំង ដោយសារតែលោកធ្លាប់តែធ្វើកីឡាករថៃជាគូប្រកួតសន្លប់ភីងៗនៅលើរេញ បែរជាចាញ់គូប្រកួតទៅវិញ ធ្វើអោយអ្នកទស្សនាខកចិត្ត។ យ៉ាងណាមិញ ការប្រកួតមួយថ្មីរបស់លោកកាលពីថ្ងៃទី៣០ មេសា គឺលោកបានស្ដារភាពអាម៉ាស់មួយនេះ ដោយប្ដូរពីប្រកួតមិនសូវល្អ ទៅជាប្រកួតល្អខ្លាំងមិនគួរអោយជឿ។
ការប្រកួតអន្តរជាតិនៅសង្វៀនអាស៊ីអាគ្នេយ៍នោះ កីឡាករ យ៉េន ឌីណា ដែលធ្លាប់ល្បីឈ្មោះនៅក្លិបអប្សរាគុនខ្មែរ បានធ្វើអោយមានការចាប់អារម្មណ៍យ៉ាងខ្លាំង ដោយសារតែក្នុងជំនួបជាមួយជើងខ្លាំងថៃ Phat Chhayakphum លោកអាចធ្វើអោយជើងខ្លាំងមកពីទីក្រុងបាងកកមួយនេះ បាក់ទឹក។ តាំងពីទឹកទី១ រហូតដល់ទឹកចុងក្រោយ កីឡាករថៃដែលធ្លាប់វាយស៊ីកីឡាករល្អៗរបស់កម្ពុជារាប់មិនអស់ បានត្រឹមតែវាយទប់ប៉ុណ្ណោះ ខណៈដែលក្នុងទឹកទី៣ក៏ត្រូវរាប់ម្ដង ប៉ុន្តែកីឡាករថៃនៅតែល្អសម្រាប់ការវាយលុក។ បើទោះកីឡាករកម្ពុជា យ៉េន ឌីណា មិនអាចសម្រេចគោលដៅវាយអោយថៃសន្លប់មុនចប់ទឹកទី៣ ដើម្បីយករង្វាន់១លានរៀល ប៉ុន្តែគេកត់សម្គាល់ថាសមត្ថភាពដែលលោកបានបង្ហាញសម្រាប់ការប្រកួតចុងក្រោយនេះ គឺល្អ និងធ្វើអោយមហាជនពេញចិត្តភាគច្រើន។ វិលទៅកាន់ការប្រកួតកាលពីប៉ុន្មានសប្ដាហ៍មុន អ្នកគាំទ្រមិនតិចនោះទេ បានសម្ដែងការភ្ញាក់ផ្អើលដោយសារតែគេបែរជាត្រូវកីឡាករថៃវាយអោយទ្រមខ្លួន និងអោយចាញ់ជាច្រើនលើក ខណៈដែលពេលបានឈ្នះក៏ឈ្នះទាំងពិបាកភ្នែក។
លោក ថៃ អ៊ូ អ្នកដឹកនាំកីឡាករថៃអោយមកប្រកួតនៅសង្វៀនទូរទស្សន៍អាស៊ីអាគ្នេយ៍បានអះអាងថារវាង យ៉េន ឌីណា និង Phat Chhayakphum មិនធ្លាប់ជួបគ្នានោះទេ ប៉ុន្តែបើអោយលោកទស្សន៍ទាយមិនពេលអ្នកទាំងពីរប៉ះគ្នា លោកថាកីឡាកររបស់លោកនឹងឈ្នះ ដោយយោងលើកីឡាកររបស់លោកជាម្ចាស់ខ្សែក្រវាត់ម្នាក់ឯង និងសម្អាងបច្ចេកទេសម៉ាត់ និងទាត់របស់គេល្អ និងរឹងមាំជាងកីឡាករកម្ពុជា។ គាប់ជួបជាកីឡាករយ៉េន ឌីណា ត្រូវបានលោកកត់សម្គាល់ថាចុះខ្សោយមិនដូចមុននោះផង ទើបប្រាកដចិត្តភាគច្រើនថាកីឡាកររបស់ខ្លួននឹងឈ្នះ។ យ៉ាងណាក៏ដោយលោកថាអ្វីៗបានក្លាយជារឿងអសារបង់ ដោយសារតែភាពជាក់ស្ដែងគឺកីឡាករលោកចាញ់ប្រៀបកីឡាករកម្ពុជាតាំងពីដើមទី។
លោកនិយាយថា៖ «អាឌីណា (យ៉េន ឌីណា) វ៉ៃ ប៉ុន្មានលើកមុនដូចអត់សូវល្អ តែដល់ពេលប៉ះជាមួយអា Chhayakphum កែងវាល្អម៉្លេះ ទើបធ្វើអោយអារបស់ខ្ញុំចាញ់!»។
លោកថាកីឡាករខ្លួនល្អជង្គង់ ម៉ាត់ និងទាត់ ប៉ុន្តែចុងក្រោយបែរជាទៅមិនរួចនឹងកែងរបស់គូប្រកួត ទើបធ្វើអោយអ្នកគាំទ្ររបស់យ៉េន ឌីណា ស្រែកហ៊ោចង់រញ្ជូយសង្វៀន ព្រោះតែការពេញចិត្ត។ អ៊ីចឹងហើយទើបលោកយល់ថា កីឡាករយ៉េន ឌីណា ល្អខុសពីការប៉ាន់ស្មាន ហើយប្រកួតល្អចំពេលប៉ះគ្នាជាមួយកីឡាករ Phat Chhayakphum ដែលលោកបញ្ជាក់ថាគឺជាជើងខ្លាំងទៅទៀត។
លោក ញាណ សុធី អ្នករៀបចំការប្រកួតបានអះអាងថា ហេតុផលដែលយ៉េន ឌីណា ប្រកួតល្អកាលពីថ្ងៃទី៣០ មេសា លោកថា គឺអាចបណ្ដាលមកក្រុមអ្នកផ្គូរផ្គងគូអន្តរជាតិនៅសង្វៀនទូរទស្សន៍អាស៊ីអាគ្នេយ៍ ដាក់កំហិតអោយកីឡាករដែលមានឈ្មោះឡើងប្រកួត ហ្វឹកហាត់អោយជាក់លាក់ និងប្រកួតអោយបានល្អ។
លោកថាខ្លួនធ្លាប់ព្រមានមិនអោយកីឡាករដែលល្អៗហើយស្រាប់តែធ្លាក់ដៃវិញមិនអោយឡើងរេញច្រើននាក់មកហើយ ទើបបណ្ដាម្ចាស់ក្លិបដែលស្នើកីឡាករអោយឡើងប្រកួតបានដាក់កំហិតខ្លាំងឡើង ដែលលោកយល់ថាជាមូលហេតុធ្វើអោយយ៉េន ឌីណា ប្រកួតល្អ។ លោកថាកីឡាករអោយតែហ្វឹកហាត់ជាប់លាប់ គឺពិតជាប្រកួតល្អ ហើយលោកក៏ប្រកាសពីការផ្គូរអោយកីឡាករថៃដែលបានចាញ់ពិន្ទុសងសឹកផងដែរនៅពេលខាងមុខ។ លោកថាយ៉េន ឌីណា បានត្រឹមឈ្នះពិន្ទុកីឡាករថៃ Phat Chhayakphum ប៉ុណ្ណោះ ប៉ុន្តែបើក្រឡេកមើលពីលទ្ធផល គឺកីឡាករកម្ពុជាឈ្នះទាំង៥ទឹកតែម្ដង ទើបធ្វើអោយអ្នកគាំទ្រកីឡាកររូបនេះសប្បាយចិត្ត៕
