ពលរដ្ឋជាង១០០នាក់រស់នៅសង្កាត់ចោមចៅ ខណ្ឌពោធិ៍សែនជ័យ នាថ្ងៃសុក្រនេះ នាំគ្នាមកតវ៉ា នៅមុខសាលារាជធានីភ្នំពេញ ដើម្បីឲ្យស្ថាប័នមួយនេះ ជួយពន្លឿនការដោះស្រាយបញ្ហាដីធ្លីពួកគេ ដែលបានអូសបន្លាយជិត២០ឆ្នាំមកនេះ។
តំណាងពលរដ្ឋ លោក ជា សុខ ប្រាប់អ្នកសារព័ត៌មាននៅកន្លែងតវ៉ាថា កាលពីថ្ងៃទី២ខែមីនាឆ្នាំ២០១៧ រដ្ឋមន្ត្រីក្រសួងការពារជាតិ លោក ទៀ បាញ់ បានចេញសេចក្ដីប្រកាសមួយ ដោយមានការយល់ព្រមពីលោកនាយករដ្ឋមន្ត្រី ថានឹងចុះវាស់ដីឲ្យពួកគាត់ ដែលជាតំណាង៣៥គ្រួសារ ដើម្បីយកទៅចែកគ្នាបន្តជាមួយពលរដ្ឋ១១០គ្រួសារទៀត ប៉ុន្តែមកទល់ពេលនេះ ពួកគាត់មិនទាន់ទទួលបានដីឡើយ។
លោកបន្តថា ពួកគាត់មកតវ៉ានៅថ្ងៃនេះ ដើម្បីឲ្យសាលារាជធានីភ្នំពេញ ជួយជំរុញទៅក្រសួងការពារជាតិដោះស្រាយបញ្ហាឲ្យពួកគាត់។
លោកថា៖ «មកដល់ថ្ងៃឥឡូវ វាហួសថ្ងៃកំណត់បាត់ទៅហើយ ពុំមានសេចក្ដីជូនដំណឹងអីស្ងាត់ឈឹងតែម្ដង ដល់ចឹងហើយ បានខ្ញុំមករកសាលាក្រុង ដែលជាអាណាព្យាបាលរបស់ពួកខ្ញុំជាប្រជាពលរដ្ឋ ដើម្បីជួយជំរុញក្នុងការដោះស្រាយ»។
លោក ជា សុខ បន្តថា កន្លងមកពួកគាត់បានដើរដាក់ញត្តិនៅតាមស្ថាប័នរដ្ឋផ្សេងៗ ដើម្បីឲ្យជួយអន្តរាគមន៍ដោះស្រាយបញ្ហាដីធ្លីជាមួយក្រសួងការពារជាតិ ប៉ុន្តែពុំទទួលបានលទ្ធផលអ្វីឡើយ។
តំណាងពលរដ្ឋម្នាក់ទៀត អ្នកស្រី សួស អិត មានប្រសាសន៍ថា ពួកគាត់បានស្នើទៅក្រសួងការពារជាតិឲ្យពន្លឿការដោះស្រាយ ប៉ុន្តែក្រសួងនៅតែមិនដោះស្រាយ ហើយក៏មិនបានឆ្លើយតបមកពួកគាត់វិញដែរ។
អ្នកស្រីបន្តថា ដីជាង៩ហិចតានេះ ក្រសួងការពារជាតិប្រគល់ឲ្យពួកគាត់ តែ៤ហិចតាវិញ ហើយពួកគាត់ក៏ព្រមទទួលតាមគោលនយោបាយឈ្នះៗរបស់រដ្ឋាភិបាល ប៉ុន្តែមកដល់ថ្ងៃនេះ ពួកគាត់នៅមិនទាន់ទទួលបានដីឡើយ គឺមានតែនៅក្នុងប្រដាសប៉ុណ្ណោះ។
អ្នកស្រីថា៖ «គាត់ថា គាត់ចាំដោះស្រាយឲ្យ តែដល់ពេលខ្ញុំមក គាត់មិនបានដោះស្រាយអ្វីឲ្យទេ ១៧ឆ្នាំហើយហ្នឹង។ ឯកសារដែលមានគ្រប់គ្រាន់ លិខិតដែលគាត់បានឲ្យមកពួកខ្ញុំហ្នឹង គឺតាំងពីថ្ងៃ២ ខែ៣ ឆ្នាំ២០១៧ គឺគាត់ត្រូវប្រគល់ឲ្យមកខ្ញុំ តែគាត់មិនបានឲ្យមកទេ តែដីនៅក្នុងកន្លែងទាហានហ្នឹង គឺគាត់ខ្ចីរបស់ប្រជាពលរដ្ឋហ្នឹង គាត់លក់ឲ្យគេជុំវិញអស់ហើយ ហើយគាត់ទុករបង ឲ្យទាហាននៅតែបន្តិចទេ អញ្ជឹងខាងខ្ញុំមកតវ៉ាយកដីពួកខ្ញុំវិញ គាត់ថា គាត់ប្រគល់ឲ្យខ្ញុំ តែមិនបានប្រគល់ឲ្យសោះ ហ្នឹងហើយខ្ញុំចង់និយាយតែប៉ុណ្នឹងទេ»។
ករណីនេះ អ្នកនាំពាក្យក្រសួងការពារជាតិ លោក ឈុំ សុជាតិ មានប្រសាសន៍ថា លោកមិនទាន់បានដឹងរឿងនេះនៅឡើយ។
ដោយឡែក អ្នកនាំពាក្យសាលារាជធានីភ្នំពេញ លោក ម៉េត មាសភក្ដី មានប្រសាសន៍ថា ពាក់ព័ន្ធរឿងនេះ សាលារាជធានីភ្នំពេញ នឹងចុះសិក្សាពីបញ្ហានេះសិន មុននឹងធ្វើការដោះស្រាយ។
លោកថា៖ «ពាក់ព័ន្ធជាមួយការងារនេះ តាមការសួរនាំជាមួយតំណាងពីព្រឹកមិញ គឺពាក់ព័ន្ធជាមួយដីបន្ទាយរបស់ក្រសួងការពារជាតិ ហើយកិច្ចការអស់ហ្នឹង ដូចជាមានចំណារបស់រដ្ឋាភិបាលអស់ហើយ ប៉ុន្តែយ៉ាងណា ដោយសារតែពួកគាត់អត់បានដាក់ពាក្យ ចាំមើលក្រុមការងារយើងពិនិត្យលទ្ធភាព ឬក៏គិតគួរពីករណីហ្នឹងសិន»។
នាយកលេខាធិកាដ្ឋានក្រុមការងារពិសេសសិទ្ធិលំនៅឋានលោក សៀ ភារម្យ យល់ថា អ្នកដែលអាចដោះស្រាយបញ្ហាដីធ្លីនេះ មានតែលោកនាយករដ្ឋមន្រ្តី និងស្ថាប័នដែលពាក់ព័ន្ធប៉ុណ្ណោះ។ លោកស្នើឲ្យរដ្ឋាភិបាល ឬ ក៏ស្ថាប័នដែលពាក់ព័ន្ធពន្លឿនការដោះស្រាយ ដើម្បីឲ្យប្រជាពលរដ្ឋឈប់ដើរតវ៉ាទៀត។
លោកថា៖ «ព្រឹកមិញខ្ញុំមិនទាន់ទទួលបានដំណឹងទេ ចាំមើលទុកពេលសិន ចាំមើលថ្ងៃចន្ទខ្ញុំឆ្លើយតបមកវិញ ខ្ញុំគិតថារឿងនេះ សាលារាជធានីភ្នំពេញ លោកមិនមានសិទ្ធិអីដោះស្រាយជាមួយក្រសួងការពារជាតិទេ ខ្ញុំគិតថាមានតែនាយករដ្ឋមន្ត្រី ដែលលោកមានសិទ្ធិអំណាច ក្នុងការបញ្ជាទៅក្រសួងការពារជាតិ ដូច្នេះខ្ញុំគិតថាមានតែលោកនាយករដ្ឋមន្ត្រីទេ ដែលអាចសម្របសម្រួលក៏បញ្ជាទៅក្រសួងការពារជាតិ ដើម្បីឲ្យលោកពន្លឿនការដោះស្រាយជូនបងប្អូនប្រជាពលរដ្ឋឲ្យចប់សព្វគ្រប់ឆាប់ៗ ដូចថ្ងៃមុខសម្ដេចនាយរដ្ឋមន្ត្រី លោកបញ្ជាមកអភិបាលរាជធានីភ្នំពេញនៅវិមានសន្តិភាពថ្ងៃមុន ទិវាថ្នាក់ជាតិស្ដីពីធម្មជាតិថ្ងៃមុន»។
ក្រុមពលរដ្ឋទាំងនោះព្រមានថា ប្រសិនបើសាលារាជធានីភ្នំពេញ និងស្ថាប័នពាក់ព័ន្ធមិនព្រមដោះស្រាយទេ ពួកគេនឹងនាំគ្នាទៅតវ៉ានៅមុខផ្ទះលោកនាយករដ្ឋមន្ត្រី ហ៊ុន សែន ដើម្បីឲ្យលោកជួយដោះស្រាយ៕
បើតាមពលរដ្ឋ ដីដែលមេទាហានខ្ចីនោះ មានទំហំជាង ៩ហិចតា ហើយកាលពីសម័យសង្គ្រាមមេទាហានម្នាក់ឈ្មោះ សុខ ប៉ាង បានមកខ្ចីដីពួកគាត់ ដើម្បីយកទៅធ្វើជាបន្ទាយទាហាន ហើយសន្យាថា ប្រគល់ឲ្យពួកគាត់វិញនៅឆ្នាំ២០០០ ប៉ុន្តែមកដល់បច្ចុប្បន្ននេះ ក្រសួងការពារជាតិ មិនបានប្រគល់ឲ្យពួកគជាម្ចាស់ដីទៅតាមការសន្យាឡើយ៕
