បក្សប្រឆាំងជំរុញ គ.ជ.ប ឲ្យពិនិត្យឡើងវិញពីប្រកាសរបស់ក្រសួងមហាផ្ទៃ ដោយថាប្រកាសថ្មីនេះ បានបង្កការលំបាកដល់អ្នកប្តូរទីលំនៅ និងអ្នកចំណាកស្រុក ដែលចង់បំពេញកាតព្វកិច្ចបោះឆ្នោតជ្រើសរើសមេដឹកនាំនៅឆ្នាំក្រោយនេះ។
ប្រធាននាយកដ្ឋានកិច្ចការបោះឆ្នោតនិងនីតិកម្មរបស់គណបក្សសង្គ្រោះជាតិ លោកស្រី ម៉េង សុភារី បានលើកឡើងក្នុងកិច្ចប្រជុំនៅការិយាល័យ គ.ជ.ប ក្នុងរាជធានីភ្នំពេញ នាថ្ងៃទី១ខែកញ្ញានេះថា ប្រកាសរបស់ក្រសួងមហាផ្ទៃថ្មីនេះ បានបង្កការលំបាកដល់អ្នកចំណាកស្រុក និងអ្នកផ្លាស់ប្តូរទីលំនៅ។
លោកស្រី ម៉េង សុភារី លើកឡើងទៀតថា នីតិវិធីចាស់ អាជ្ញាធរអាចចេញលិខិតបញ្ជាក់លំនៅឋានបាន ដើម្បីបានទៅចុះឈ្មោះបោះឆ្នោត ដោយគ្រាន់តែមាន អត្តសញ្ញាណប័ណ្ណ និងសាក្សីម្នាក់ប៉ុណ្ណោះ និងមិនបានកំណត់ពេលវេលាទេ។ ប៉ុន្តែលោកស្រីថា ប្រកាសថ្មីរបស់ក្រសួងមហាផ្ទៃនៅឆ្នាំ២០១៧ បានបង្កការលំបាកដល់អ្នកចុះឈ្មោះបោះឆ្នោត ដោយថាក្រសួងបានកំណត់ពេលរហូតដល់៣០ថ្ងៃ ទើបអាចឲ្យនគរបាលប៉ុស្តិ៍ ចេញលិខិតបញ្ជាក់លំនៅឋានបាន។
លោកស្រីថា៖ «ប្រកាសលេខ៤០ បានកែប្រែកំនត់រយៈពេលរហូត៣០ថ្ងៃ ទើបប្រជាពលរដ្ឋត្រូវបានអនុញ្ញាតឲ្យស្នាក់នៅបណ្តោះអាសន្ន ពីប៉ុស្តិ៍នគរបាលក្នុងឃុំសង្កាត់។ [ក្រោយមក] បានយកលិខិតហ្នឹងទៅឲ្យក្រុមប្រឹក្សាឃុំ សង្កាត់ ចេញលិខិតបញ្ជាក់លំនៅឲ្យ។ អញ្ចឹងវាប៉ះពាល់ប្រជាពលរដ្ឋដែលធ្វើចំណាកស្រុក ដើម្បីការងារ ដើម្បីការសិក្សា ព្រះសង្ឃ និងប៉ះពាល់ដល់សន្តិសុខនៅថ្ងៃបោះឆ្នោតទៀត ព្រោះអីសន្តិសុខសណ្តាប់ធ្នាប់ការបោះឆ្នោត ត្រូវបញ្ជូនទៅយាមមណ្ឌលបោះឆ្នោត។ អញ្ចឹងប៉ះពាល់ដល់ពួកគាត់ ប៉ះពាល់ដល់ពលករ ដែលគាត់ទៅធ្វើការនៅប្រទេសជិតខាង នៅក្នុងស្រុកយើងក៏ប៉ះពាល់ដែរ និយាយរួមប៉ះពាល់ច្រើន»។
លោកស្រី ម៉េង សុភារី បញ្ចាក់ដូចនេះទៀតថា៖ «ការងារចេញលិខិតបញ្ជាក់លំនៅហ្នឹង ជាការងាររបស់ក្រុមប្រឹក្សាឃុំ-សង្កាត់ ប៉ុន្តែដោយឡែកប្រកាសហ្នឹង ការងារហ្នឹងត្រូវប៉ុស្តិ៍នគរបាលទៀត ទាល់តែប៉ុស្តិ៍នគរបាលចេញលិខិតបញ្ជាក់ក៩ហើយ បានក្រុមប្រឹក្សាហ្នឹងចេញលិខិតបញ្ហាលំនៅជូន។ អញ្ចឹងមានន័យថា ការចេញលិខិតបញ្ជាក់លំនៅបម្រើឲ្យការចុះឈ្មោះបោះឆ្នោតហ្នឹង ត្រូវតែមានការអនុញ្ញាតពីប៉ុស្តិ៍នគរបាល បើគ្មានទេ មេឃុំ ចៅសង្កាត់ហ្នឹង អត់អាចមានសិទ្ធិអំណាចអី ប្រើសិទ្ធិអំណាចហ្នឹងបានទៀតទេ មានចែងក្នុងច្បាប់មែន ប៉ុន្តែច្បាប់ហ្នឹងមានបានយកទៅប្រើអីកើតឯណា។ ណាមួយថាឲ្យក្រុមប្រឹក្សាឃុំ-សង្កាត់ហ្នឹង ចេញឲ្យទាន់ពេលវេលា ហើយចេញឲ្យទាល់ពេលយ៉ាងម៉េច បើទុកដល់៣០ថ្ងៃឯណោះហ្នឹង»។
មន្ត្រីគណបក្សប្រឆាំងរូបនេះ ជំរុញ គ.ជ.ប ពិភាក្សាជាមួយក្រសួងមហាផ្ទៃ ដើម្បីកុំឲ្យសេចក្តីប្រកាសនោះ ក្លាយជាឧបសគ្គរារាំងដល់សិទ្ធិពលរដ្ឋ ដែលមានចែងក្នុងគោលការសកល និងរដ្ឋធម្មនុញ្ញ។
អនុប្រធាន គ.ជ.ប លោក គួយ ប៊ុនរឿង អះអាងថា ក្រុមការងាររបស់លោកកំពុងពិនិត្យករណីនេះ។ លោកថា បើការអនុវត្តប្រកាសនេះ ជួបការលំបាកដូចការលើកឡើងមែន គ.ជ.ប នឹងស្វែងដំណោះស្រាយជាក្រសួងពាក់ព័ន្ធ។
លោកថា៖ «គ.ជ.ប កំពុងតែតាមដាន ហើយបើក្នុងករណីការអនុវត្តទៅមានផលប៉ះពាល់ខ្លាំង យើងនឹងស្នើសុំទៅក្រសួងមហាផ្ទៃ ដើម្បីដោះស្រាយធ្វើម៉េចបង្កលក្ខណៈងាយស្រួលដល់ប្រជាពលរដ្ឋ ដើម្បីបានចុះឈ្មោះផង ហើយក៏បង្កលក្ខណៈដល់ប្រជាពលរដ្ឋដែលមានឈ្មោះហើយនោះ ហើយគាត់ផ្លាស់ប្តូរទីលំនៅនោះក៏បានផ្ទេរទិន្នន័យរបស់គាត់ទៅក្នុងឃុំ-សង្កាត់ថ្មីនោះបានបោះឆ្នោតផងដែរ»។
ចាប់ពីថ្ងៃទី១ខែកញ្ញានេះទៅរហូតដល់ថ្ងៃទី៩ខែវិច្ឆិកា គ.ជ.ប ចាប់ផ្តើមធ្វើបច្ចុប្បន្នភាពបញ្ជីបោះឆ្នោតចាស់ ដោយចាប់ផ្តើមចុះឈ្មោះបោះឆ្នោត សម្រាប់អ្នកដែលមិនទាន់បានចុះឈ្មោះ និងអ្នកដែលមានអាយុបោះឆ្នោត ដោយប្រើរយៈពេល៧០ថ្ងៃ។
មន្ត្រីផ្នែកច្បាប់និងអង្កេតអង្គការឃ្លាំមើលការបោះឆ្នោតខុមហ្វ្រែល លោក យឿង សុធារ៉ា លើកឡើងថា បើប្រកាសរបស់ក្រសួងមហាផ្ទៃ មិនត្រូវបានបានកែប្រែទេ លោកថា អ្នកប្រឈមនឹងការបាត់សិទ្ធិបោះឆ្នោត គឺអ្នកធ្វើចំណាកស្រុក។
លោកថា៖ «ដោយសារតែគាត់មានបញ្ហាហិរញ្ញវត្ថុរបស់គាត់ គាត់មិនអាចមានលទ្ធភាពទៅចុះឈ្មោះនៅឃុំ សង្កាត់ ទីលំនៅអចិន្ត្រៃយរបស់គាត់ទេ ឬក៏ថាពេលវេលារបស់គាត់ មិនអំណោយផល ដូចនេះគាត់មកត្រឹមខេត្ត ដោយសារមានមិត្តភ័ក្រអីនៅតាមខេត្ត ដូច្នេះបើតាមនីតិវិធីចាស់ គាត់អាចចុះឈ្មោះនិងបោះឆ្នោតនៅតាមខេត្តអស់ហ្នឹងបាន ដូចនេះមិនគួរមានជម្រើសថ្មីដូចនេះទេ»។
លោក យឿង សុធារ៉ា ជំរុញឲ្យក្រសួងពាក់ព័ន្ធ គួរប្រើនីតិវិធីចាស់ សម្រាប់ការចុះឈ្មោះបោះឆ្នោតឆ្នាំ២០១៧ ដោយថា កន្លងទៅនីតិវិធីចាស់នេះ បានបង្កការងាយស្រួលដល់ពលរដ្ឋ ដែលថាលទ្ធផលបញ្ជីឈ្មោះឆ្នាំ២០១៦មានពលរដ្ឋជាង៨០ភាគរយបានទៅចុះឈ្មោះរួចហើយ។
បើតាម គ.ជ.ប អ្នកដែលមិនទាន់ចុះឈ្មោះបោះឆ្នោត និងអ្នកមានអាយុគ្រប់បោះឆ្នោតនៅប្រហែលជិត១លានកន្លះទៀត។
បើតាម លោក គុយរឿន ដំណើរការចុះឈ្មោះនៅថ្ងៃដំបូងនេះ លោកថាបានដំណើរការទៅដោយរលូន នៅទូទាំង១ ៦៤៦ឃុំ-សង្កាត់៕