នរគរបាលជាតិកម្ពុជា ឲ្យដឹងថា អាជ្ញាធរថៃ បានធ្វើការឡោមព័ទ្ធ និងឃាត់ខ្លួនពលរដ្ឋខ្មែរជាច្រើននាក់ ដោយចោទពួកគេថា បានលួចចូលកាប់ឈើគ្រញូងខុសច្បាប់ ក្នុងតំបន់ឧទ្យានជាតិមួយ នៅប្រទេសថៃ។
កាលពីថ្ងៃទី២៧ ខែវិច្ឆិកាឆ្នាំ២០១៧ អាជ្ញាធរ និងកម្លាំងចម្រុះថៃ បានធ្វើការពួនស្ទាក់ និងចាប់ពលករខ្មែរ ដែលថា មានគ្នាជិត១០០នាក់ បន្ទាប់ពីពួកគេ ត្រូវបានចោទថា បានលួចចូលកាប់ឈើគ្រញូង ក្នុងតំបន់ឧទ្យានជាតិ «ថាប់ឡាន» ស្ថិតក្នុងឃុំគូសក្រាក់ឆាយ ស្រុកខនបុរី ខេត្តនគររាជសីមា។ នេះដោយយោងតាមការចុះផ្សាយ របស់អគ្គស្នងការនគរបាលជាតិកម្ពុជា នៅថ្ងៃសុក្រនេះ។
បើតាមអគ្គស្នងការនគរបាលជាតិ ពីដំបូងឡើយ អាជ្ញាធរថៃ បានឃាត់ខ្លួនពលរដ្ឋខ្មែរ ចំនួន៣៩នាក់ និងដកហូតឈើគ្រញូងជាច្រើនដុំ និងវត្ថុតាងផ្សេងទៀត ហើយបញ្ជូនទៅអង្គភាពជំនាញ ក្នុងខេត្តស្រះកែវ ប្រទេសថៃ។ លុះដល់យប់ថ្ងៃទី២៨ខែវិច្ឆិកា អាជ្ញាធរថៃ បានរុករកបន្ដ និងចាប់ខ្លួនមនុស្សបាន ៤៥នាក់បន្ថែមទៀត ហើយបញ្ជូនពួកគេទៅអង្គភាពជំនាញក្នុងខេត្តស្រះកែវ ដើម្បីសាកសួរ។
សមត្ថកិច្ចថៃថា បច្ចុប្បន្ន កំពុងស្រាវជ្រាវរកជនសង្ស័យ និងមេក្លោង ដែលជាប់ពាក់ព័ន្ធដទៃទៀត ដើម្បីចាត់ការតាមនិតីវិធីច្បាប់ប្រទេសនេះ៕
