អ្នកប្រើប្រាស់បណ្តាញសង្គមមួយចំនួនបានចែករំលែករូបភាពខុសគ្នា ពាក់ព័ន្ធនឹងករណីឃាតកបាញ់សម្លាប់លោក កែម ឡី កាលពីថ្ងៃទី១០ កក្កដា ឆ្នាំ២០១៦។
ការប្រៀបធៀបរូបភាពខុសគ្នានេះធ្វើបន្ទាប់ពីតុលាការបានបើកសវនាការកាត់ទោស បុរស អឿត អាង ហៅ ជួប សំលាប់ កាលពីម្សិលមិញ។
ក្នុងវីដេអូនិងរូបភាពដែលត្រូវបានអ្នកប្រើហ្វេសប៊ុក គូសជារង្វង់នៅត្រង់ស្បែកជើងរបស់ ជួប សំលាប់ ព្រមទំាងសសេរលើបណ្តាញសង្គមថា មានភាពខុសគ្នា នៅពេលធ្វើសកម្មភាពចូលបាញ់សម្លាប់លោក កែម ឡី ក្នុងស្តាម៉ាត និងរូបភាពសមត្ថកិច្ចចាប់បាន។ សារនោះមានខ្លឹមសារថា «ស្បែកជើងអាឃាតកពិតស្បែកជើងបាតពណ៌ស អាក្លែងក្លាយបាតពណ៌ខ្មៅ សម្ដែងភ្លាត់ស្នៀតខុសស្បែកជើង ទៅថតម្ដងទៀតទៅថតខុសហើយ រៀបចំអោយត្រូវហើយសមជាងនឹងតិចទៅ អ្នកកាត់តនៅខ្សោយបន្តិច អ្នកដឹកនាំឆាកល្ខោនមិនបានល្អជាដើម»។
VOD មិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញលោក លី សុផាណា បានទេនៅថ្ងៃនេះ។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត ថាមិនចាប់អារម្មណ៍និងស្បែកជើងលោក ជួប សំលាប់ ដែលអ្នកប្រើបណ្តាញសង្គមបង្ហោះនោះទេ ប៉ុន្តែលោកចាប់អារម្មណ៍ត្រង់វីដេអូក្នុងរូបភាពដូចជា ដើរស្កុបៗ និងមើលមុខឃាតកមិនច្បាស់។ ករណីនេះលោកស្នើទៅតុលាការគួរតែបង្ហាញវីដេអូបន្ថែមទៀត ព្រោះក្នុងនោះមានកំាមេរ៉ាច្រើនក្នុងស្តាម៉ាតនោះ។ លោកនិយាយថា «ម៉េមម៉ារីនៅក្នុងស្តាម៉ាត វាហាក់បីដូចជា វាមានលក្ខណៈស្តុបៗ ហើយវាមានភាពមិនច្បាស់ ហើយនៅក្នុងស្តាម៉ាតកំាមេរ៉ាមិនមាន មានតែមួយជ្រុងទេ វាមានច្រើនជ្រុង គួរតែបញ្ចំាងជ្រុងណាមួយដែលបង្ហាញអំពីរូបភាពឲ្យច្បាស់ និងសកម្មភាពនៃការបាញ់ទៅលើលោកបណ្ឌិត កែម ឡី»។
ក្នុងសវនាការកាលពីថ្ងៃពុធម្សិលមិញ តុលាការបានបង្ហាញវីដេអូចំនួន៤ភាគ ពាក់ព័ន្ធនឹងករណីឃាតកម្មលើលោក កែម ឡី ដើម្បីដាក់បន្ទុកលើបុរស អឿត អាង ហៅ ជួប សំលាប់ ដែលសមត្ថកិច្ចចោទថា ជាអ្នកបាញ់សម្លាប់អ្នកវិភាគរូបនោះ កាលពីថ្ងៃទី១០ កក្កដា ឆ្នាំ២០១៦។
ប្រធានក្រុមប្រឹក្សាជម្រះ លោក លាង សំណាត់ បានបញ្ជាឲ្យក្រុមបច្ចេកទេសចាក់វីដេអូ ដែលថា ជួប សំលាប់ ធ្វើសកម្មភាពដើរចូលក្នុងស្តាម៉ាត ស្តុបបូកគោ និងកម្មភាពដើរតម្រង់ទៅខាងជើងស្តាម៉ាត ដែលវីដេអូនេះថតពីបង្គោលភ្លើងស្តុបបូកគោ។ រីឯវីដេអូមួយទៀតបង្ហាញពីសកម្មភាព ដើរតាមផ្លូវម៉ៅ សេទុង ឆ្ពោះទៅស្តុបចំការមន និងវីដេអូដែលគេថតបានពីសកម្មភាព ជួប សំលាប់ ឡើងជិះម៉ូតូប៉ូលីស ខណៈពលរដ្ឋដេញតាមវាយឲ្យរងរបួសនៅម្តុំវត្តស្វាយពពែ។ ប៉ុន្តែមន្ត្រីសិទ្ធិមនុស្សចង់ឲ្យតុលាការបង្ហាញសកម្មភាពឃាតកបាញ់សម្លាប់លោក កែម ឡី។
ភ្លាមៗនោះ អ្នកនាំពាក្យសាលាដំបូងរាជធានីភ្នំពេញលោក លី សុផាណា បានឆ្លើយប្រាប់អ្នកសារព័ត៌មានតាមរយៈតេឡេក្រាមថា ភស្តុតាងដែលតុលាការបង្ហាញក្នុងអង្គសវនាការនោះ ធ្វើតាមបែបបច្ចេកទេសវិទ្យាសាស្ត្រពិត ក្នុងន័យនេះទំនងជាលោកថាមិនចំាបាច់បង្ហាញពីសកម្មភាពឃាតកបាញ់លោក កែម ឡី ផ្ទាល់នោះទេ។ លោកនិយាយថា «សវនការបានបង្ហាញឲ្យឃើញរួចហើយនូវសកម្មភាពរបស់ជនជាប់ចោទដែលត្រូវបានថតដោយកាម៉េរ៉ាសុវត្ថិភាពរបស់ស្ថានីយប្រេងកាល់តិច។ ភស្តុតាងនេះបានចាប់យកពីកន្លែងកើតហេតុផ្ទាល់ និងមានលក្ខណៈវិទ្យាសាស្រ្តពិត»។
គួរបញ្ជាក់ថា បុរស អឿត អាង ហៅ ជួប សំលាប់ ត្រូវបានតុលាការចោទប្រកាន់ ពីបទឃាតកម្មគិតទុកជាមុន និងបទកាន់កាប់ ឬដឹកជញ្ជូនអាវុធដោយគ្មានការអនុញ្ញាត ដែលប្រឈមជាប់ទោសដាក់ពន្ធនាគារអស់មួយជីវិត ខណៈសាលាក្រមនឹងប្រកាសនៅថ្ងៃទី២៣ មីនា ឆ្នាំ២០១៧ ខាងមុខនេះ៕
