ប្រមុខរដ្ឋាភិបាល រំឭកគ្រូពេទ្យ ឲ្យពង្រឹងសមត្ថភាព និងត្រូវគិតអ្នកជំងឺជាសំខាន់ ខណៈលោកបន្តប្រតិកម្មទៅនិងការរិះគន់ ពីរឆ្នាំកន្លងទៅថា មន្ត្រីសុខាភិបាលភាគច្រើនគ្មានវិជ្ជាជីវៈ និងខ្វះក្រមសីលធម៌ ។
អំឡុងឆ្នាំ២០១៦ កាសែតភ្នំពេញប៉ុស្តិ៍ បានដកស្រង់សម្តី ស្ថាបនិកម្ចាស់សាលាអន្តរទ្វីបអាមេរិកកាំង លោក គួច ម៉េងលី មកចុះផ្សាយថា គ្រូពេទ្យ១០នាក់ ដែលលោកបានជួប មាន៩នាក់ គ្មានវិជ្ជាជីវៈ គ្មានភាពទន់ភ្លន់ និងគ្មានមេត្តាធម៌។ លោកថា បញ្ហានេះបានបង្កភាពងាយរងគ្រោះ ដល់អ្នកជំងឺមានជីវភាពក្រីក្រ។
ប៉ុន្តែ លោក ហ៊ុន សែន ក្នុងពិធីជួបក្រុមសមាគមគ្រូពេទ្យស្ម័គ្រចិត្តយុវជន របស់កូនប្រុសលោក ក្នុងរាជធានីភ្នំពេញ នាថ្ងៃនេះបានថ្លែងប្រតិកម្មជាថ្មីទៀតថា ការនិយាយបែបនេះ លោកថាជាការប្រមាថក្រសួងសុខាភិបាល។
លោក ហ៊ុន សែន បន្តថា បើទោះបីជាក្រសួងសុខាភិបាល នៅមានចំណុចខ្វះខាតខ្លះ ត្រូវកែទម្រង់មែន ប៉ុន្តែលោកថា កំហុសឆ្កងនោះ មិនអាក្រក់ដល់ទី៩០ភាគរយ ដូចការលើកឡើងនោះទេ។
លោកថា៖«យើងត្រូវពង្រឹងនូវសមត្ថភាព នូវក្រមសីលធម៌ វិជ្ជាជីវៈរបស់គ្រូពេទ្យ មានតែវិធីហ្នឹងទេ កុំឲ្យដូចគេថា ១០ភាគរយដែលល្អនោះជានរណា ហើយ៩០ភាគរយដែលអាក្រក់នោះជានរណា»។
មេដឹនាំរូបនេះ បន្តថា ដើម្បីបន្សាបឥទ្ធិពលនៃពាក្យប្រមាថ លោកថា គ្រូពេទ្យទាំងអស់ ត្រូវធ្វើយ៉ាងណាឲ្យ ការព្យាបាលអ្នកជំងឺ មានគុណភាព និងគ្មានការរើសអើង ។
លោកថា៖«ប៉ុន្តែដើម្បីជៀសវាងកុំឲ្យការប្រមាថ របស់មនុស្សហ្នឹងវាត្រឹមត្រូវ វាទាល់តែយើងពង្រឹង នូវសីលធម៌របស់យើង ត្រូវស្រឡាញ់អ្នកជំងឺ ត្រូវយកចិត្តទូកដាក់អ្នកជំងឺគិតអ្នកជំងឺជាសំខាន់»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ លើកឡើងថា ការរិះគន់ក្រសួងសុខាភិបាល បានស្ងប់ស្ងាត់តាំងជាង២ឆ្នាំ ក្រោយពីមានលិខិតឆ្លើយឆ្លង រវាងអ្នករិះគន់ និងក្រសួង។ ប៉ុន្តែលោកថា អ្វីដែល មេដឹកនាំប្រតិកម្មជាថ្មីទៀត នៅពេលនេះ ទំនងជាចង់ទាក់ទាញប្រជាប្រិយភាព ពីការធ្វើកំណែទម្រង់ ឲ្យកម្មករ មន្ត្រីរាជការ ប្រើសេវាព្យាបាលឥតគិតថ្លៃ តាមរយៈបេឡាជាតិ របបសន្តិសុខសង្គម។
បើតាមលោក សន ជ័យ ការពង្រឹងសមត្ថភាព ក្រមសីលធម៌ និងវិជ្ជាជីវៈគ្រូពេទ្យ ជារឿងមួយ ប៉ុន្តែថា បើរដ្ឋាភិបាលមិន ទម្លាក់លុយឲ្យក្រសួង ប្រើការបានគ្រប់គ្រាន់ទេ សេវាព្យាបាលនៅកម្ពុជា នៅតែរងការរិះគន់ថា មិនអាចប្រៀបធៀប ជាមួយប្រទេសជិតខាងបាន។
លោកថា៖«ខ្ញុំឧទារណ៍ថា បើឥរិយាបថ គ្រូពេទ្យល្អហើយ យើងមានការខ្វះខាត ផ្តល់នូវឱសថ ដែលមានគុណភាព គឺជាចំណុចមួយ ដែលត្រូវបំពេញបន្ថែមដែរ»។
របាយការណ៍ក្រសួងទេសសចរណ៍បង្ហាញថា ក្នុងឆ្នាំ២០១៦ពលរដ្ឋកម្ពុជាដល់ទៅ ១លាន៤សែននាក់ បានធ្វើដំណើរទៅក្រៅប្រទេស ក្នុងគោលដៅដើរលេងកម្សាន្ត និងទៅស្វែងរកសេវាព្យាបាលនៅក្រៅប្រទេស។ ក្រសួងថាជាមួយនឹងដំណើរបែបនេះ ទឹកប្រាក់ប្រហែល ៦០០លានដុល្លារអាមេរិក ត្រូវបានគេវាយតម្លៃថា ត្រូវបានពលរដ្ឋកម្ពុជាចំណាយសម្រាប់ដំណើររបស់ពួកគេទៅក្រៅប្រទេស៕
