ពលរដ្ឋជាង១០០នាក់មកពីខេត្តកោះកុងដែលថាខ្លួនមានជម្លោះជាមួយក្រុមហ៊ុនចំនួនពីរនៅក្នុងឃុំបួននៅខេត្តកោះកុងបាននាំគ្នាមកដាក់ញ្ញាត្តិនៅក្រសួងមហាផ្ទៃនិងខុទ្ទកាល័យនាយករដ្ឋមន្ត្រី ដោយសុំឲ្យស្ថាប័នទាំងនោះជួយដោះស្រាយជម្លោះដ៏រាំរ៉ៃដែលអូសបន្លាយជាង១០ឆ្នាំមកនេះ។
នៅព្រឹកថ្ងៃពុធនេះ ពលរដ្ឋជាង១៥០នាក់តំណាងឲ្យ១៤៧គ្រួសារ ដែលអះអាងថាមានជម្លោះជាមួយក្រុមហ៊ុនកោះកុងស៊ូហ្គ័រនិងកោះកុងផ្លេនថេសិន អ៊ិនដាស្រ្ទី នៅក្នុងស្រុកបុទុមសាគរនិងស្រុកស្រែអំបិល បាននាំគ្នាមកដាក់ញ្ញាត្តិនៅក្រសួងមហាផ្ទៃនិងខុទ្ទកាល័យនាយករដ្ឋមន្ត្រី ដើម្បីឲ្យស្ថាប័នទាំងនេះជួយដោះស្រាយជម្លោះដីធ្លីដ៏រ៉ាំរ៉ៃដែលបានបានកើតឡើងតាំងពីឆ្នាំ២០០៦។ ពលរដ្ឋទាំងនោះស្នើដល់ស្ថាប័នទាំងនេះឲ្យជួយអន្តរាគមន៍ដល់ក្រុមហ៊ុនទាំងនោះផ្តល់សំណងដល់ចម្ការដំណាំនិងដីធ្លីដែលត្រូវបានឈូសឆាយយកនិងសុំដីដែលពួកគេបាត់បង់នោះមកវិញឬសំណងណាមួយសមរម្យ។
តំណាងឲ្យពលរដ្ឋ១៧៣គ្រួសារ អ្នកស្រី ផាវ ញើង បានប្រាប់អ្នកសារព័ត៌មានថា ការឡើងមកដាក់ញ្ញាត្តិនេះ ក៏ព្រោះតែពួកគេបានព្យាយាមដាក់ញ្ញាត្តិនៅស្ថាប័នរដ្ឋមួយចំនួនរួចហើយ តែគ្មានការឆ្លើយតបណាមួយនោះឡើយ។ អ្នកស្រីបន្ថែមថា ចាប់តាំងពីក្រុមហ៊ុនចូលមកក្នុងឆ្នាំ២០០៦មក ពួកអ្នកស្រី១៤៧គ្រួសារបានជួបការលំបាកជាខ្លាំង ដោយបាត់បង់ដីស្រែចម្ការនិងកូនលែងបានទៅរៀន ហើយអ្នកខ្លះបន្ទាប់ពីបាត់ដីទៅលើក្រុមហ៊ុនមកក្លាយជាកម្មករស៊ីឈ្នួលកាប់អំពៅឲ្យក្រុមហ៊ុនដែលទទួលបានកម្រៃទាប ហើយទទួលការគំរាមពីក្រុមហ៊ុនជាបន្តបន្ទាប់ថែមទៀត។ អ្នកស្រីថាការឡើងមកដាក់ញ្ញាត្តិទាមទារនេះ គឺអ្នកខ្លះត្រូវខ្ចីលុយគេមកភ្នំពេញ។
អ្នកស្រីថា៖ «ពួកយើងគ្មានលុយទេ ពួកយើងប្តីចងការគេយកលុយផ្ញើរមកឲ្យរហូត។ សួរថាតើពួកយើងចង់នៅអត់? ពួកយើងមិនចង់នៅទេ ប៉ុន្តែពួកយើងអត់មានជម្រើសអី បើសិនជាពួកយើងទៅផ្ទះ ពួកយើងអត់មានដីស្រែចម្ការ យើងទៅចងការប្រាក់គេ យើងបាត់បង់មុខរបរ កូនយើងអត់បានទៅរៀន កូនយើងចំណាកស្រុក មានហិង្សានៅក្នុងគ្រួសារដូចជាជំពាក់លុយជំពាក់កាក់គេ សួរថាយើងទៅធ្វើអីបើទៅអត់មានអីធ្វើផងហ្នឹង!»។
ពលរដ្ឋដែលឡើងមកដាក់ញ្ញាតិ្តផងដែរនោះអ្នកស្រី ផន ឃុន បានឲ្យដឹងថា ពួកអ្នកស្រីដែលជាប្រជាពលរដ្ឋធ្លាប់រកបានដោយសារតែការដាំបន្លែ ផ្លែឈើ និងធ្វើស្រែចម្ការ ដែលអាចផ្តល់ចំណូលដល់គ្រួសាររស់នៅធម្មតា តែចាប់តាំងពីក្រុមហ៊ុនទាំងពីរនោះចូលមកក្នុងឆ្នាំ២០០៦ ពួកគេត្រូវបាត់បង់ទាំងដីនិងផ្ទះរួមទាំងផលដំណាំរបស់ពួកគេទៀតផង ហើយបច្ចុប្បន្ននេះពួកគេប្រែក្លាយពីម្ចាស់ដីទៅជាអ្នកស៊ីឈ្នួលកាប់អំពៅឲ្យក្រុមហ៊ុនទាំងនោះវិញ។
អ្នកស្រីថា៖ «ប៉ះពាល់ដីចម្ការដាំខ្នុរដាំអីហ្នឹង កនពួកខ្ញុំដាំគ្រប់មុខកូន! មានដំណាំគ្រប់មុខហ្មងមានខ្នុរ មានចន្ទីអីទាំងអស់វាឈូសឆាយហ្នឹង ដីចម្ការឪឡឹកកនពួកខ្ញុំដាំបានក្នុងមួយឆ្នាំហ្នឹង៣ទៅ៤លាន ដល់ពេលវាឈូសយកអស់ហ្នឹងពួកខ្ញុំអត់មានអីទេ ពួកខ្ញុំអត់មានអីហូបទេ នៅតាមភ្នំពួកខ្ញុំអត់មានអីហូបទាំងអស់ … ឥឡូវអត់មានធ្វើអីទេឥឡូវនៅតែកាប់អំពៅឲ្យគេ កាប់ផ្តៅ ដូចអ៊ុំអញ្ចឹងមានអីហូប កាប់អំពៅឲ្យគេមួយរយបាច់បានតែមួយម៉ឺនរៀលទេ កូនខ្ញុំដល់ទៅ៩នាក់!»។
ក្នុងគេហទំព័រពហិកាស្ករឈាម Boyscottbloodsugar.net បានឲ្យដឹងថានៅខែសីហាឆ្នាំ២០០៦ ក្រសួងកសិកម្មបានសម្រេចផ្តល់ដីសម្បទានសេដ្ឋកិច្ចឲ្យក្រុមហ៊ុនកោះកុងផ្លេនថេសិន និងកោះកុងស៊ូហ្គ័រ ធ្វើឧស្សាហកម្មស្ករអំពៅនៅលើដីជិត២ម៉ឺនហិកតា ក្នុងស្រុកបុទុមសាគរនិងស្រុកស្រែអំបិលក្នុងខេត្តកោះកុង។ ក្រុមហ៊ុនទាំងនោះមានភាគហ៊ុនពី KSL គ្រុបរបស់ប្រទេសថៃ វេ វ៉ូងរបស់តៃវ៉ាន់ និងសមាជិកព្រឺទ្ធិសភាគណបក្សប្រជាជនលោក លី យ៉ុង់ផាត់។ បច្ចុប្បន្ននេះភាគហ៊ុនរបស់ KSL មានចំនួន៧០% និងវេ វ៉ូង ខូអបប្រេសិនកាន់កាប់៣០% ហើយលោកលី យ៉ុងផាត់ត្រូវបានគេគេរាយការណ៍ថាបានលក់ភាគហ៊ុនរបស់លោកទៅឲ្យក្រុមហ៊ុន KSL នៅឆ្នាំ២០១០។
ទោះជាយ៉ាងណាបើតាមញ្ញត្តិរបស់អ្នកតវ៉ាទាំងនោះបានបញ្ជាក់ថា ពួកគេធ្លាប់បានឡើងមកដាក់ញ្ញាត្តិនៅក្រសួងកសិកម្មផងដែរ តែត្រូវបានមន្ត្រីក្រសួងនោះចោទប្រជាពលរដ្ឋវិញថាអ្នកទាំងនោះជាអ្នកយកដីក្រុមហ៊ុនទៅវិញ។
តំណាងអ្នកតវ៉ាអ្នកស្រី ផាវ ញើង ដែលបានចូលទៅដាក់ញ្ញាត្តិនៅក្រសួងមហាផ្ទៃបានឲ្យដឹងក្រោយពីចូលទៅដាក់ញ្ញាត្តិថា មន្ត្រីទទួលពាក្យបណ្តឹងនៃក្រសួងមហាផ្ទៃបានបញ្ជាក់ថាក្រុមការងាររបស់ក្រសួងនឹងប្រជុំពិនិត្យទៅឯកសាររបស់ពលរដ្ឋ និងថារៀបចំចេញលិខិតអន្តរាគមន៍ណាមួយទៅដល់អ្នកពាក់ព័ន្ធឲ្យជួយដោះស្រាយរឿងនេះ។
អ្នកស្រីថា៖ «គាត់បានបញ្ជាក់ផងដែរថា ក្រសួងកសិកម្មអ្នកទទួលខុសត្រូវរឿងហ្នឹងហេតុអីពេលផ្តល់ដី ពេលវាស់ដីឲ្យក្រុមហ៊ុន ខ្លួនឯងអ្នកវាស់ហេតុអីបានជារុញដេញឲ្យទៅនេះទៅនោះ! ហើយគាត់មិនគាំទ្រទេ គាត់មិនគាំទ្រទេរាល់ទង្វើអញ្ចឹង!»។
មន្ត្រីសម្របសម្រួលនៃអង្គការលីកាដូប្រចាំខេត្តកោះកុងលោក អ៊ិន គង់ចិត្រ បានឲ្យវីអូឌីដឹងថា ការដែលពន្យារពេលនៃការដោះស្រាយបញ្ហានេះបានធ្វើឲ្យពលរដ្ឋកាន់តែលំបាកកាន់តែខ្លាំង។ លោកឲ្យជាដំណោះស្រាយថា បើគោរពតាមសារាចរណ៍០០១ កាលពីឆ្នាំ២០១២ ដោយសម្រេចឲ្យកាត់ឆ្វៀលដីដែលក្រុមហ៊នធ្វើប៉ះដីប្រជាពលរដ្ឋនោះលោកថា បញ្ហានោះនឹងអាចដោះស្រាយបាន។
បើតាមពលរដ្ឋដែលមកដាក់ញ្ញាត្តិនោះថាដីស្រែ និងចម្ការរបស់ពួកគេដែលត្រូវបានក្រុមហ៊ុននោះយកមានចំនួន ៧៨២,១៦ហិកតា៕
