សមត្ថកិច្ចខេត្តរតនគិរីអំពាវនាវឲ្យឪពុកម្តាយ មានការប្រុងប្រយ័ត្នចំពោះសុវត្ថិភាពកូនស្រីដែលមានវ័យជំទង់ ដោយសារតែមួយរយៈកាលចុងក្រោយនេះ មានករណីរំលោភសម្លាប់សិស្សសាលាបន្តបន្ទាប់។
របាយការណ៍របស់ស្នងការដ្ឋាននគរបាលខេត្តរតនគិរី ដែលចុះផ្សាយដោយអគ្គស្នងការដ្ឋាននគរបាលជាតិ បង្ហាញថា ចាប់ពីខែតុលាឆ្នាំ ២០១៧ ដល់ខែកុម្ភៈឆ្នាំ២០១៨ មានករណីរំលោភសម្លាប់លើសិស្សសាលាចំនួន៣នាក់អាយុពី១៥ទៅ១៨ឆ្នាំ។
សមត្ថកិច្ចលើកឡើងថា ក្មេងស្រីទាំងបីនោះជាជនជាតិភាគតិចទំពូន ដែលភូមិសាស្ត្រពួកគាត់រស់នៅនិង ធ្វើដំណើរមានសភាពស្ងាត់ ឬ ឆ្លងកាត់ព្រៃ។
ជនរងគ្រោះទី១អាយុ១៨ឆ្នាំរៀនចប់ថ្នាក់ទី១១នៅវិទ្យាល័យសម្តេចឪសម្តេចម៉ែ ទី២ រៀនថ្នាក់ទី១២នៅវិទ្យាល័យភូមិថ្មី អាយុ១៨ឆ្នាំ និង ជនរងគ្រោះទី៣ អាយុ១៥ឆ្នាំ រៀនថ្នាក់ទី៦នៅសាលាបឋមសិក្សាភូមិស៊ូ។
