ខុសពីការប្រកួតមុនៗ ដែលគេតែងកត់សម្គាល់ថាកីឡាករដែលត្រូវបានលោកអាជ្ញាកណ្ដាលរាប់មួយលើក និងស្ថិតក្នុងសភាពបាក់ជំហរសម្រាប់ការប្រកួតគួរតែជាអ្នកបោះបង់ការប្រកួត សម្រាប់ការប្រកួតក្នុងវគ្គជម្រុះ៨នាក់យក៤នាក់ទៅកាន់វគ្គពាក់កណ្ដាលផ្ដាច់ព្រ័ត្រនៅប៉ុស្ដិ៍លេខ៥ បែរជាកីឡាករ អ៊ុំ វណ្ណេត សម្រេចបានលទ្ធផលមិនគួរអោយជឿទៅវិញ ដោយសារតែគេមិនត្រឹមតែមិនបោះបង់ការប្រកួតក្រោយត្រូវរាប់មួយលើកប៉ុណ្ណោះទេ គឺថែមទាំងអាចវាយផ្ដួលគូប្រកួតអោយក្លាយជាអ្នកបោះបង់ការប្រកួតមុនចប់ទឹកនោះវិញផង។
នេះជាលទ្ធផលយ៉ាងកម្រ បើធៀបនឹងការប្រកួតត្រឹមតែ៣ដែលជារូបប្រកួតចាញ់ធ្លាក់ៗក្នុងការប្រកួតជម្រើសជើងឯកនៅប៉ុស្ដិ៍លេខ៥ ដែលគេតែឃើញអ្នកត្រូវអាជ្ញាកណ្ដាលរាប់ម្ដងច្រើនតែបាត់បង់ការតស៊ូ ហើយមិនប្រឹងប្រកួតដល់អាចកែប្រែលទ្ធផលវិញនោះ។
ការប្រកួតដែលបានធ្វើឡើងនៅសង្វៀនទូរទស្សន៍ប៉ុស្ដិ៍លេខ៥ព្រែកកំពិស កាលពីល្ងាចថ្ងៃទី ២ ធ្នូ នោះការប្រកួតដណ្ដើមជើងឯកប៉ុស្ដិ៍លេខ៥ដែលបានធ្វើឡើងហើយទទួលបានការចាប់អារម្មណ៍យ៉ាងខ្លាំង ដោយសារតែកីឡាករក្នុងប្រភេទទម្ងន់៦៥គីឡូក្រាម មកពីទូទាំំងប្រទេសរហូតដល់៣២នាក់ ដែលមានទាំងកីឡាករល្បីៗជើងចាស់ និងកំពុងឡើងកូដថ្មីៗផង ត្រូវអោយគេប្រមូលផ្ដុំគ្នាមកប្រកួតគ្នាចាញ់ធ្លាក់ៗ។
កីឡាករ២រូបគឺ អ៊ុំ វណ្ណេត និង គឹម វាសនា គឺជាអ្នកបានឡើងអង្គុយក្នុងវគ្គ៤នាក់ ដោយអ្នកទាំងពីទទួលបានឱកាសឈានឡើងដោយសារតែបានប្រកួតឈ្នះអ្នកដូចគ្នាក្នុងវគ្គ៨នាក់ ដែលជាវគ្គតានតឹងសម្រាប់ការប្រកួតជើងឯកមួយនេះ។ យ៉ាងណាមិញ ក្នុងចំណោមជ័យជម្នះរបស់កីឡាករទាំងពីរគឺមានតែជ័យជម្នះរបស់កីឡាករ អ៊ុំ វណ្ណេត បង្គោលក្រហមដែលជាគូប្រកួតជម្រើសជើងឯកទី១ប៉ុណ្ណោះ ដែលមានអ្នកទស្សនាផ្ដោតការចាប់អារម្មណ៍ខ្លាំងក្លាជាងគេ ដោយសារតែគេគ្រាន់តែបើកឆាកប្រកួតភ្លាមក៏ត្រូវគូប្រកួតវាយនឹងកែងអោយរាប់ម្ដង និងដេកដួលលើរេញ ដែលអ្នកគាំទ្រភាគច្រើនមិនរំពឹងថាលោកនឹងក្រោយរួចនោះផង។
គេត្រូវបានអាជ្ញាកណ្ដាលរាប់ដល់៨ភ្លាមៗ ទម្រាំតែអាចក្រោកបាន ដោយជំហរក្រោយពីត្រូវបានរាប់មួយលើករបស់គេ ក៏ចុះខ្សោយផងដែរ បើធៀបនឹងទឹកទី១ដែលមើលទៅរៀងស្វាហាប់។ យ៉ាងណាមិញ កីឡាករ អ៊ុំ វណ្ណេត មិនបោះបង់ក្ដីស្រម៉ៃក្នុងការតស៊ូនោះទេ ដោយសារតែគេមានបំណងចង់ទទួលបានជ័យជម្នះ ដើម្បីបានឡើងទៅវគ្គ៤នាក់ ដែលជាវគ្គពាក់កណ្ដាលផ្ដាច់ព្រ័ត្រ។
ឈានចូលដល់ទឹកទី៣ កីឡាករបង្គោលក្រហមរូបនេះកាន់តែស្ទុះវាយចូល ដោយមិនបាក់ស្មារតីនេះទេ ហើយទំនងជាការវាយលុករបស់គេកាន់តែមានភាពរឹងមាំអម ដោយការស្វាហាប់នោះផង ទើបធ្វើអោយកីឡាករម្ខាងទៀតបែរជាជាស្លុតជំហរ ហើយបណ្ដោយអោយចំណុចសំខាន់ៗត្រូវបានបង្គោលក្រហមវាយសង្គ្រប់។
យោងតាមការតស៊ូរបស់គេ គឺគេវ៉ៃស្ទុះខ្លាំងព្រោះតែអស់សង្ឃឹមនៅក្នុងការឈានឡើងប៉ុណ្ណោះ ដែលសភាពនៃការតស៊ូនោះត្រូវបានគេមើលឃើញថាដោយសារតែកីឡាករ អ៊ុំ វណ្ណេត យល់ថាខ្លួនត្រូវរាប់ម្ដងហើយ បើវ៉ៃតិចៗក៏មិនអាចឈ្នះកើត អ៊ីចឹងមានតែប្រឹងវាយលុកដោយលែងគិតពីបញ្ហាគ្រោះថ្នាក់ ទើបអាចកែខៃលទ្ធផលដែលចាញ់ប្រៀបរួចទៅហើយនោះ។
ម្នាក់ៗត្រូវគេឃើញផ្ដល់សម្រែកហ៊ោកញ្ជ្រៀវតែម្ដង បន្ទាប់ពីកីឡាករត្រូវសន្លប់ ឬត្រូវបោះបង់ពីរេញស្រាប់តែបានជោគជ័យ ដោយអាចវាយអោយកីឡាករ វ៉ែន ហុងជីវុង ជាជើងខ្លាំង ក្លាយជាអ្នកសន្លប់នៅមុនចប់ទឹកទី៣ទៅវិញ ក្នុងពេលដែលពិន្ទុនាំមុខត្រូវបានគេក្ដាប់រួចទៅហើយ។ លទ្ធផលរបស់គេ ត្រូវគេមើលឃើញថាកើតចេញពីភាពក្លាហានទាំងស្រុងតែម្ដង គឺមិនខុសពីកីឡាករ សៅ វណ្ណា ដែលកាលពីសប្ដាហ៍មុនគឺបែករយះហូរឈាមឡើងស្រោចមុខទៅហើយ នៅតែអាចរក្សាជំហរវាយផ្ដួលគូប្រកួតបាននោះទេ។
លោក សេង កដិកា អ្នករៀបចំការប្រកួតប្រចាំទូរទស្សន៍ប៉ុស្ដិ៍លេខ៥បញ្ជាក់ថា កីឡាករ អ៊ុំ វណ្ណេត គឺជាសមាសភាពទី១ក្នុងចំណោម៤នាក់ ដែលត្រូវឡើងទៅប្រកួតក្នុងវគ្គពាក់កណ្ដាលផ្ដាច់ព្រ័ត្រនៅក្នុងកម្មវិធី។ លោកថាអ្នកដែលបានឡើងទៅដល់វគ្គ៤នាក់ នឹងត្រូវបន្តការប្រកួតរបស់ខ្លួនចំនួន២ប្រកួតទៀត តែបើទោះជាចាញ់ក៏ឈប់ធ្លាក់ហាលអាវនោះដែរ បើធៀបនឹងការប្រកួតក្នុងវគ្គមុនៗ។
បន្ទាប់ពីបញ្ចប់ការប្រកួតកាលពីថ្ងៃទី២ ធ្នូ លោកថាប៉ុស្ដិ៍លេខ៥ជម្រើសបានកីឡាករ២នាក់ឆ្ពោះទៅកាន់វគ្គ១ភាគ៤ ដោយនៅសល់តែមួយសប្ដាហ៍ចុងក្រោយប៉ុណ្ណោះ នឹងជម្រើសបាន២នាក់បន្ថែម ហើយឆ្ពោះទៅបើកការប្រកួតក្នុងវគ្គ៤នាក់បន្ទាប់ទៀត។
ការប្រកួតក្នុងវគ្គពាក់កណ្ដាលផ្ដាច់ព្រ័ត្រនោះ កីឡាករទាំង៤នឹងតម្រូវអោយអោយចាប់គូគ្នាប្រកួតយកអ្នកឈ្នះ ដោយអ្នកឈ្នះនឹងបានឡើងទៅប្រកួតយកលេខ១ឬជើងឯក ហើយអ្នកចាញ់នឹងប្រកួតជាមួយអ្នកចាញ់ដើម្បីជម្រើសយកលេខ៣ ទើបឆ្លងផុតការប្រកួតក្នុងវគ្គនាក់គឺអ្នកចាញ់គឺធ្លាក់ហាលអាវទៀតទេ។
លោកថាកីឡាករ អ៊ុំ វណ្ណេត ដ្បិតថាប្រកួតបានល្អ ប៉ុន្តែរហូតទាល់តែគេអាចឈ្នះសម្រាប់ការប្រកួតជាមួយកីឡាករ គឹម វាសនា ដែលបានឈ្នះក្នុងថ្ងៃតែមួយនោះ ទើបអាចដឹងថាតើគេអាចក្លាយជាម្ចាស់ពានជើងឯក ឬមិនអាច៕