ក្រុមកម្មករអះអាងថា កម្មការិនីជិត ៦០០នាក់នៅរោងចក្រហ្គាវ័ន អ៊ឹមភែរៀល ស្ថិតក្នុងក្រុងតាខ្មៅនោះ ត្រូវបានថៅកែបញ្ឈប់ពីការងារ ដោយពុំបានទូទាត់បប្រាក់អត្ថប្រយោជន៍ បន្ទាប់ពីពួកគេតវ៉ាអស់រយៈពេលជាច្រើនខែ។
កាលពីថ្ងៃទី២៧ ខែធ្នូឆ្នាំ២០១៧ សាលាដំបូងខេត្តកណ្តាល បានចេញដីការក្សាការពារ ដោយបង្គាប់ឲ្យកម្មកររោងចក្រហ្គាវ័ន្តចូលធ្វើវិញ បន្ទាប់ពីកម្មករទាំងនោះផ្ទុះការតវ៉ាដេកយាមរោងចក្រជាង ១០ថ្ងៃ ហើយបានដាក់ឱសានវាទរយៈពេលពីរថ្ងៃចាប់ពីថ្ងៃទី២៧ ដល់២៩ធ្នូ ដោយថា បើមិនចូលតាមកាលកំណត់ទេ ចាត់ទុកថា មានកំហុសធ្ងន់ ប៉ុន្តែ កាលនោះ មានកម្មករមួយចំនួនព្រមចូល ខណៈដែលកម្មករមួយចំនួនទៀតមិនព្រមចូលទេ។
ក្នុងសេចក្តីជូនដំណឹងចុះថ្ងៃទី២ ខែមករានេះ ថៅកែរោងចក្រហ្គាវ័ន្ត លោកស្រី ឆា ក្បុងហ៊ី បានសម្រេចបញ្ឈប់កម្មករ ៥៨៥នាក់ ដោយលោកស្រីថា ការសម្រេចនេះ គឺអនុវត្តតាមដីការរបស់តុលាការខេត្តកណ្ដាល។
ជាកម្មករផ្នែកត្រួតពិនិត្យម្នាក់ អ្នកស្រី ថូ ណៃយៀប ប្រាប់វីអូឌីពេលកំពុងតវ៉ាមុខរោងចក្រនៅថ្ងៃទីនេះថា ក្រោយពីឃើញសេចក្តី ជូនដំណឹងបញ្ឈប់កម្មករច្រើនសន្ធឹកសន្ធាប់បែបនេះ ក្រុមកម្មករបានផ្ទុះការតវ៉ាម្តងទៀត ដើម្បីទាមទារឲ្យថៅកែទូទាត់ប្រាក់អតីតភាពការងារជូនពួកគាត់។
អ្នកស្រីបន្ថែមថា៖ «ខ្ញុំគិតមួយរយភាគរយថា គាត់អត់មានចេតនាចង់គិតប្រាក់បំណាច់ឆ្នាំជូនកម្មករទេ។ បើសិនគាត់ចង់ទូទាត់គាត់មិនមែនកូរក្រឡុកតាំងដើមទីមកទេ។ តាំងពីដើមទីមក បើកប្រាក់ខែឲ្យមិនទៀងទាត់ តាំងពីព្យួរការងារកម្មករខុសច្បាប់ប.ស.ស. ក៏មិនបង់។ បើសិនគាត់មានចេតនាល្អ គាត់អត់ធ្វើអញ្ចឹងទេ តែគាត់មានចេតនាអាក្រក់ មិនចង់ឲ្យកម្មករហ្នឹងបានប្រាក់សំណងអតីតភាពដែលគេខំធ្វើការរយៈពេលប៉ុន្មានឆ្នាំហ្នឹងទេ ថៅកែហ្នឹងអាក្រក់ខ្លាំងហ្មង»។
កម្មករផ្នែកដេរ អ្នកស្រី បី សុផល ជាកម្មករម្នាក់ក្នុងចំណោមកម្មកររាប់រយនាក់ដែលត្រូវថៅកែបញ្ឈប់ពីការងារដែរនោះ អះអាងថា អ្នកស្រីធ្វើនៅរោងចក្រហ្គាវ័ន្តនេះរយៈពេល១០ឆ្នាំហើយ បើគិតប្រាក់អតីតភាពការងារ អ្នកស្រីអាចទទួលបានប្រហែលជាង៤ពាន់ដុល្លារ។
អ្នកស្រីបន្ថែមថា៖ «ខ្ញុំនឹងជួបផលលំបាកខ្លាំងហើយ ព្រោះខ្ញុំអត់មានលុយឲ្យផ្ទះ ថ្លៃភ្លើង ហើយចិញ្ចឹមកូនទៀត។ ក្នុងគ្រួសារខ្ញុំមានគ្មាន៥នាក់ អញ្ចឹង វាលំបាកខ្លាំង ហើយយើងអត់ដឹងរកស៊ីអីផង ព្រោះយើងធ្លាប់តែធ្វើការរោងចក្រ ដល់ទៅរកស៊ីអី ក៏ពិបាកដែរ។ អញ្ចឹង បើគាត់លុបឈ្មោះខ្ញុំចោល គាត់គុណលុយអតីតភាពការងារឲ្យខ្ញុំមក»។
វីអូឌីបានព្យាយាមស្វែងរកការបកស្រាយពីមន្ត្រីរដ្ឋបាលរោងចក្រ លោក ម៉ៃ និម្មិត ប៉ុន្តែពុំអាចទាក់ទងបានទេនៅថ្ងៃនេះ។
ទោះជាយ៉ាងណា លោក ម៉ៃ និម្មិត ប្រាប់វីអូឌីកាលពីចុងខែធ្នូកន្លងមកថា ក្រុមហ៊ុនមិនមានគម្រោងបិទរោងចក្រគេចវេសពីការទូទាត់សំណងជូនកម្មករនោះទេ។
ចំណែកឯប្រធានមន្ទីរការងារខេត្តកណ្តាល លោក ធុល នាង អះអាងកាលពីចុងខែធ្នូកន្លងមកថា ករណីវិវាទការនៅរោងចក្រហ្គាវ័ន្តនេះ បានឆ្លងផុតពីដៃមន្ទីការងារខេត្តកណ្តាលហើយ ដោយថា លោកបញ្ជូនសុំណុំរឿងនោះទៅឲ្យក្រុមព្រឹក្សាអាជ្ញាកណ្តាលជាអ្នកដោះស្រាយបន្ត ក្រោយពីមន្ទីរការងារ និងអាជ្ញាធរខេត្តមិនអាចដោះស្រាយបាន។
វិអូឌីមិនអាចសុំការអត្ថាធិប្បាយពីមន្ត្រីក្រុមប្រឹក្សាអាជ្ញាកណ្តាលខេត្តកណ្តាល លោក អ៊ឹង សុទ្ធី ដែលកាន់សុំណុំរឿងនេះបាននោះទេ។
លោកនាយករដ្ឋមន្រ្តី ហ៊ុន សែន ពេលចុះជួបសំណេះសំណាលជាមួយក្រុមកម្មករ ហើយលោកតែងតែរំឭកទៅភាគីពាក់ព័ន្ធឲ្យដោះស្រាយរាល់បញ្ហានានាជូនកម្មករ ដោយថា ដើម្បីធានា និងការពារផលប្រយោជន៍ជូនកម្មករ៕