មន្ត្រីជាន់ខ្ពស់ក្រសួងទេសចរណ៍ បានឲ្យដឹងថា ភ្ញៀវទេសចរដល់ទៅ ២លាននាក់ ត្រូវបានព្យាករថា នឹងចូលទៅលេងកម្សាន្តក្នុងព្រឹត្តិការណ៍អង្គរសង្ក្រានឆ្នាំថ្មីខាងមុខនេះ ដោយផ្ដល់ចំណូលប្រហែល ២០០លានដុល្លារដល់ប្រជាពលរដ្ឋនៅខេត្តសៀមរាប។
ក្នុងពិធីផ្សព្វផ្សាយព្រឹត្តិការណ៍អង្គរសង្ក្រាននៅខេត្តសៀមរាបកាលពីថ្ងៃម្សិលមិញនេះ រដ្ឋលេខាធិការក្រសួងទេសចរណ៍ លោក ជា បូរ៉ា បានបង្ហាញក្ដីរំពឹងថា អង្គរសង្ក្រានឆ្នាំថ្មីខាងមុខនេះ នឹងទទួលបានភ្ញៀវទេសចរជាតិ និងអន្តរជាតិប្រមាណ ២លាននាក់ បន្ទាប់ពីភ្ញៀវទេសចរដល់ទៅ ១លាន ៦សែននាក់ ត្រូវបានគេប៉ាន់ប្រមាណថា បានចូលរួមព្រឹត្តិការណ៍មួយនេះកាលពីឆ្នាំមុន។
លោកបន្ថែមថា ជាមួយលំហូរចូលនៃភ្ញៀវទេសចរទៅកាន់ខេត្តសៀមរាបបែបនេះ ទឹកប្រាក់ជាង ២០០លានដុល្លារ ត្រូវបានរំពឹងទុកថា នឹងចាក់បញ្ចូលក្នុងចរន្តសេដ្ឋកិច្ចខេត្តសម្បូរសំណង់ស្ថាបត្យកម្មបុរាណមួយនេះ។
លោក ជា បូរ៉ា អះអាងថា ការរៀបចំព្រឹត្តិការណ៍ អង្គរសង្រ្កាន្តលើកទី៦ បង្ហាញអំពីសារៈសំខាន់ និងតួនាទីដ៏ចម្បងនៃសម្បត្តិវប្បធម៌ជាតិ ប្រកបដោយគុណតម្លៃ ចូលរួមទ្រទ្រង់ដល់ការអភិវឌ្ឍវិស័យទេសចរណ៍កម្ពុជា។
ប្រធានប្រតិបត្តិនៃសហភាពសហព័ន្ធយុវជនកម្ពុជា(សសយក) លោក សុខ សប្បាយណា ឲ្យដឹងថា ស្ថាប័នរបស់លោកកំពុងរៀបចំព្រឹត្តិការណ៍នានា ដើម្បីទាក់ទាញភ្ញៀវទេសចរចូលរួមទស្សនាកម្សាន្តព្រឹត្តិការណ៍អង្គរសង្ក្រាននាពេលខាងមុខ។
បើតាមលោក សុខ សប្បាយណា កម្មវិធីលេងទឹក ប្រដាល់ធ្លាក់ទឹក ការប្រកួតបវរកញ្ញា និងការដាក់តាំងក្រមាវែងជាងគេនៅលើពិភពលោក នឹងត្រូវបានដាក់បង្ហាញនៅក្នុងព្រឹត្តិការណ៍អង្គរសង្ក្រាន ដែលនឹងរៀបចំឡើងចាប់ពីថ្ងៃទី១៣ ដល់ថ្ងៃទី១៦ ខែមេសាខាងមុខនេះ៕