សកម្មជនដីធ្លីនៅតំបន់បឹងកក់នៅព្រឹកថ្ងៃចន្ទនេះ បានរៀបចំធ្វើយុទ្ធនាការថ្ងៃចន្ទពណ៌ខ្មៅបន្តទៀត មានការនិមន្តព្រះសង្ឃ សូត្រធម៌និងរាប់បាត ដោយពួកគេបញ្ជាក់ថា ដើម្បីបូងសួងឲ្យមានយុត្តិធម៌នៅក្នុងសង្គម។
នៅព្រឹកនេះ សកម្មជនដីធ្លីនៅសហគមន៍បឹងកក់បាននិមន្តព្រះសង្ឃចំនួន៧អង្ឃ ដើម្បីធ្វើពិធីសូត្រធម៌និងរាប់បាត្រ សុំឲ្យមានយុត្តិធម៌នៅក្នុងសង្គម។
ពិធីនេះ ពួកគេធ្វើឡើងនៅជិតព្រះវិហារឥស្លាម ហើយមានការដាក់តាំងរូបថតមន្ត្រីអាដហុក៤នាក់ មន្ត្រី គ.ជ.ប ម្នាក់ និង រូបអ្នកស្រី ទេព វន្នី ដើម្បីទាមទារឲ្យមានការដោះលែងអ្នកទាំងនោះ។ ទន្ទឹមនឹងនោះ ពួកគេអំពាវនាវឲ្យអាជ្ញាធរមានសមត្ថកិច្ចស្វែងរកឃាតករពិតដែលបាញ់សម្លាប់ អ្នកវិភាគបញ្ហាសង្គមលោក កែម ឡី កាលពីថ្ងៃទី១០ ខែកក្កដា ឆ្នាំ២០១៦៕
