មិនត្រឹមតែទទួលបានការចាប់អារម្មណ៍ច្រើនឡើងក្នុងវិស័យចម្រៀងក្រោយពីចាកចេញពីហង្សមាសប៉ុណ្ណោះទេ តារាចម្រៀងនាង ឈិត សុវណ្ណបញ្ញា ក៏បានបង្ហើបថាខ្លួនសកម្មនឹងការសម្ដែងជាតួឯកលើកដំបូងក្នុងវីដេអូភាគរបស់ទូរទស្សន៍មួយនោះផង។ យ៉ាងណាមិញ នាងអះអាងថាតំណែងរបស់ខ្លួនមិនមែនទទួលបានដោយសារតែផលិតកម្មថោន ផ្ដល់អោយនោះទេ តែជាទទួលបានដោយសារតែនាងសម្រេចចិត្តឈប់ស្ថិតនៅក្រោមឥទ្ធិពលរបស់ផលិតកម្មហង្សមាស។
កញ្ញា ឈិត សុវណ្ណបញ្ញា និយាយថា មកទល់ពេលនេះនាងគឺជាតារាចម្រៀងរបស់ផលិតកម្មថោន តែនាងមិនទាន់បានចុះកុងត្រានៅឡើយទេ ដោយសារតែនាងយល់ថាការចុះកុងត្រា និងមិនកុងត្រា គឺមិនមានអ្វីខុសគ្នា តែអ្វីដែលសំខាន់គឺការផ្ដល់តម្លៃអោយគ្នា។
នៅក្នុងផលិតកម្មថោន នាងថាខ្លួនមានបទចម្រៀងចេញលក់កាន់តែច្រើន ហើយបើនិយាយពីការងារច្រៀងរាំវិញ គឺខាងផលិតកម្មមួយនេះផ្ដល់អោយនាងសឹងនឹងរកពេលសម្រាកមិនបាន ជាពិសេសការបើកឱកាសអោយនាងចេញច្រៀងនៅតាមកញ្ចក់ទូរទស្សន៍ និងតាមបណ្ដាខេត្ត ដែលតម្រូវអោយនាងត្រូវតែប្រឹងប្រែងហ្វឹកហាត់ទាំងក្បាច់រាំ និងប្ដូរស្ទីលប្លែកៗដើម្បីតម្រូវតាមចិត្តអ្នកគាំទ្រ។
នាងថាតាំងពីដើមខែឧសភាមកទល់ពេលនេះ នាងស្បើយឱកាសចេញច្រៀងបើធៀបនឹងមុនចូលឆ្នាំ តែនាងសកម្មច្រើនជាងនឹងការសម្ដែងរឿងភាគមួយ ដែលតម្រូវអោយនាងត្រូវក្នុងក្រុងផង និងតាមបណ្ដាខេត្តផងតាំងពីព្រឹកទល់ព្រលប់។ នេះជាវីដេអូរឿងភាគ ដែលនាងមិនមែនទទួលបានពីទូរទស្សន៍ថោនដែលនាងចូលជ្រកនោះទេ ប៉ុន្តែជាការផ្ដល់អោយដោយទូរទស្សន៍ CTV8HD ដែលនាងបានទទួលកុងត្រាតាំងពីមុនចូលផលិតកម្មថោន ទើបនាងមានសិទ្ធិទទួលថត ដែលខុសពីតារាចម្រៀងរបស់ផលិតកម្មថោនផ្សេងទៀត ដែលមិនត្រូវបានអនុញ្ញាតិអោយថតរឿងនៅប៉ុស្ដិ៍ផ្សេង។
នាងថាខ្លួនត្រូវបានផ្ដល់សិទ្ធិអោយថតពីសំណាក់ផលិតកម្មថោន ដោយសារតែផ្អែកថារឿងនោះ បានទទួលក្រោយពេលនាងចាកចេញពីហង្សមាសប៉ុណ្ណោះ ប៉ុន្តែសម្រាប់ការទាក់ទងអោយនាងថតរឿងនៅក្នុងរយៈពេលក្រោយក៏នាងមិនដែលហ៊ានទទួលដូចគ្នា។ នាងថាទូរទស្សន៍ CTV8HD និងនាងបានព្រមព្រមគ្នាមុន ហើយបើកុំតែក្រោយចូលថោន នាងមានការងារច្រៀងច្រើនដកឃ្លាមិនទាន់រួច ទើបរឿងធ្លាក់មកថតនៅអំឡុងខែ៥នេះវិញ។
នេះជាស្នាដៃលើកទី១ ដែលនាងមានឱកាសសម្ដែងជាតួឯកក្នុងរឿងភាគ តែក៏ជារឿងលើកទី២ដូចគ្នាគិតពីកាលមុននាងធ្លាប់សម្ដែងជាតួឯកម្ដងដែរក្នុងរឿង «ទេសចរណ៍ឋាននរក» ដែលជាប្រភេទរឿងដុំដាក់បញ្ចាំងក្នុងរោង។ នាងថាសប្បាយចិត្តដែលបានសម្ដែងជាលើកទី២ បើទោះជាការចេញថតម្ដងៗមានភាពនឿយហត់ និងតម្រូវអោយនាងត្រូវចំណាយសំលៀកបំពាក់ច្រើនឈុត ដែលនាងសារភាពថាមិនងាយដូចអាជីពចម្រៀងដែលមានតម្រូវការតែមួយកំប្លេៗ។ នាងថាការសម្ដែងមិនមែនជាចំណូលចិត្តខ្លួនទេ ប៉ុន្តែបើនាងមិនសម្ដែងគឺពិតជាពិបាកកន្ទ្រាក់បានសន្ទុះគាំទ្រ ទើបនាងត្រូវតែសម្ដែង ហើយមានគម្រោងទទួលយកការសម្ដែងបន្តទៀត ប្រសិនបើថោនបើកផ្លូវអោយនាងទទួលសម្ដែងក្រៅទូរទស្សន៍ដូចគ្នានឹងការទទួលសម្ដែងនៅក្នុង ទូរទស្សន៍CTV8HD នាពេលនេះ។
ខ្សែរឿងដែលនាងសម្ងំសម្ដែងនេះ ថតបានជា៣០ភាគរយហើយ ដោយនាងត្រូវខាងផលិតករអោយសម្ដែងជាតួយុវវ័យ និងមានចរឹតក្រម៉ិចក្រម៉ើមផងមិនខុសពីគ្នាពីចរឹតលេងសើចនៅខាងក្រៅរបស់នាង។ យ៉ាងណាមិញ នាងហាក់មិនសូវរំពឹងច្រើនទេ ថាផលិតកម្មថោន នឹងបើកផ្លូវអោយនាងសម្ដែងក្រៅប៉ុស្ដិ៍ ដោយសារតែថោនក៏មានទូរទស្សន៍របស់ខ្លួន និងត្រៀមដាក់បញ្ចំាងរឿងភាគរបស់ខ្លួនបន្តបន្ទាប់ដើម្បីប្រកួតប្រជែង។
នាងនិយាយថា៖ «ចប់រឿងហ្នឹងខ្ញុំចង់សម្ដែងទៀត តែមិនដឹងថាបានអត់ទេ ព្រោះលើកហ្នឹងខ្ញុំអាចថតអោយទូរទស្សន៍CTV8HD គឺដោយសារតែខ្ញុំកុងត្រាជាមួយគាត់តាំងពីមុនចូលថោន ហើយពេលខ្ញុំចូលថោនខ្ញុំបានបញ្ជាក់គាត់រឿងហ្នឹង ទើបខ្ញុំបានថត ដល់ពេលទទួលលើកក្រោយ ទាល់តែសួរគាត់(ថោន)សិនហើយ!»។
នាងមិនទាន់ដឹងថាទូរទស្សន៍ថោន នឹងមានគម្រោងផលិតរឿងហើយជ្រើសយកនាងអោយសម្ដែងតួឯកព្រោះតែសម្អាងថានាងធ្លាប់បានសម្ដែងរឿង ឬយ៉ាងណានោះទេ ប៉ុន្តែនាងថាបើទោះជាបានតំណែងតួឯក ឬមិនបាន ក៏សប្បាយចិត្តអោយតែខាងផលិតកម្មថោនលើកស្ទួយខ្លួនដូចពេលនេះមិនប្រែប្រួល។ នាងបានចាត់ទុកថាខ្លួនឯងយីអ៊ុនខ្ពស់ ដោយសារតែក្រៅពីមានការងារច្រើនពាក់ព័ន្ធនឹងបទចម្រៀង ក៏មានស្ទីលប្លែកៗធ្វើអោយអ្នកទស្សនាចាប់អារម្មណ៍ ហើយថែមទាំងមានរឿងភាគមួយរឿងបើកប្រវត្តិសាស្រ្តសិល្បៈរបស់ខ្លួនក្រោយចូលឆ្នាំខ្មែរ ឬក្រោយចូលជ្រកនៅផលិតកម្មថោនទៅទៀត។ យ៉ាងណាមិញ នាងថាខ្លួនក៏មានសម្ពាធរឿងប្រកួតប្រជែងច្រើនដែរ បើធៀបនឹងពេលចូលប្រឡូកអាជីពចម្រៀងកាលពីដំបូងៗ ដែលមិនសូវមានតារាយុវវ័យច្រើននោះ។
ឈិត សុវណ្ណបញ្ញា ប្រកាសថាវីដេអូភាគលើកដំបូងរបស់នាងគ្រោងដាក់ផ្សាយលើកញ្ចក់ទូរទស្សន៍នៅអំឡុង៣ខែក្រោយ ដោយនាងរំពឹងថាតាមរយៈទូរទស្សន៍ CTV8HD ក៏ពិតជាធ្វើអោយមានការទទួលស្គាល់ចំពោះការសម្ដែងរបស់នាងនៅពេលនោះដែរ។ នាងបានចាត់ទុកថានេះជារឿងភាគចុងក្រោយដែលនាងអាចសម្ដែងអោយទូរទស្សន៍ក្រៅផលិតកម្ម ដោយសារតែក្នុងពេលបន្តបន្ទាប់នាងប្រហែលជាមិនអាចទទួលបានឱកាសនោះ ក្រោយពេលទូរទស្សន៍ថោនមានការប្រកួតប្រជែង។ នាងរវល់នឹងការចេញថតរឿងនេះស្ទើររាល់ថ្ងៃ ប៉ុន្តែខាងផលិតកររឿងក៏បើកសិទ្ធិអោយនាងចេញច្រៀងនៅតាមបណ្ដាទូរទស្សន៍ និងតាមខេត្តក្រុង ក្រោមការចាត់ចែងរបស់ផលិតកម្មថោនផងដែរ ទើបការទទួលសម្ដែងរឿងរបស់នាងមិនមានបញ្ហាចម្រូងចម្រាស់ពេលវេលានឹងអាជីព។
ឈិត សុវណ្ណបញ្ញា សប្បាយចិត្តដែលទទួលបានការងារច្រើន តាំងពីបានចាកចេញពីហង្សមាស តែនាងក៏បានប្រកាសថាផលិតកម្មចាស់គឺជាស្ពានមួយដ៏សំខាន់ដែលជួយអោយនាងមានឈ្មោះបោះសំឡេងនៅក្នុងវិថីសិល្បៈដែលនាងមិនអាចបំភ្លេចបាន។ នាងប្រកាសវាយលុកអោយបានពេញទំហឹងក្នុងវិស័យចម្រៀងនិងវិស័យសម្ដែង ដោយនាងបង្ហាញ ជំនឿចិត្តថានឹងកាន់តែមានសន្ទុះទីផ្សាររបស់ខ្លួនអោយឈានឡើងក្នុងឆ្នាំ២០១៧នេះ ជាពិសេសបន្ទាប់ពីខ្សែភាពយន្តភាគរបស់នាងត្រូវបានចាក់ផ្សាយនៅលើកញ្ចក់ទូរទស្សន៍ CTV8HD ។
ឈិត សុវណ្ណបញ្ញា បញ្ជាក់ថានៅផលិតកម្មថោននាងមានបទច្រើន ដោយបទដែលនាងពេញចិត្តជាងគេគឺបទ «ឃើញហើយក៏ហួសចិត្ត» ដែលនាងបានសម្ដែងលេងស្ទីលតាមជំនាន់ស្រ្តីជំនាន់ដើម។ នាងថាខ្លួននឹងមានស្ទីលច្រៀងប្លែកៗបន្ថែមទៀត ដោយក្នុងនោះបទចម្រៀងប្រភេទ Original ក៏នឹងមានការវាយលុកបន្តបន្ទាប់ផងដែរ ដើម្បីពង្រឹកទីផ្សារ៕
